2 Taꞌaraꞌi haukia ekia poki haukia hanona aꞌikakauma haukia raninai ia uahoꞌabakia paukiai aꞌi katehao tiboanakia,

ia taꞌarakia kateaꞌi harai,

pokina poki haukia weiakia taꞌaraꞌi haukia herekiai barai barai tiaꞌina haukia hanona aꞌikakauma haukia weiakia taꞌaraꞌi haukia tiraonaꞌau ainakia haukia.

Taba neiakia hanona kobamarere ainakia mai kobahi ahinakia.

3 Hau ha baꞌiobi haeai ha nibaꞌiobi aina haeamona eka Obiapaka Iesu Keriso ena baꞌiobi tohana mai baꞌiobi weiana Tirama ikutiaina taearana tohana nibaihana hauna aꞌi nibatohana raninai,

4 ia herenai hanona apamo ebonu,

ia taba haꞌi eꞌiobina.

Ia ena raona raona tekiꞌa kiꞌa baha,

weiana ꞌabiꞌabi aokiai hanona keꞌabi harataea mai keꞌabi baitaeai,

ba ꞌabi weiakiai hanona wamuru mai baiara,

ꞌabi kiꞌa obokia mai tai ha aꞌi nibatohana.

5 Haeamona maearima weiakia ekia raona raona aꞌi tibero harai,

Tirama ena ꞌabi tohana aꞌi ṯeꞌiobina,

mai Tirama ibanamona akakiai kateobia tiraonana haukia kipokia baiatakiai tibaiara toꞌona.

6 Iamo hau ha herenai taba eaꞌinakia haukiai aona ketaina raninai Tirama ikutiaina maurina hanona kebaobiana.

7 Harama ahi raninai taba haꞌi hamaiaina hanopaka,

haeamona hanopakai kahaꞌari raninai taba haꞌi kahaeaoaina kupa.

8 Ua buonai herekai aniani mai habuni papakia katehaea reꞌa weiana hanona abetaina aika ꞌeukai.

9 Ia weiakia ṯenuatae pateobia haukia hanona baihobo aokiai katetoto,

raona poꞌokia mai ao ibahaiara raonaraonakia rionai katetoꞌo,

weiana ekia mauri keaoaina kiꞌa ꞌekana tohanai mai keaꞌi kiꞌanakia.

10 Pokina moni iraonaꞌau aina hanona aka kiꞌa haeai haeai ikoikiai keba ramanakia.

Maearima baika moni tenuakiꞌaina hanona aꞌikakauma tereana kipokia ao pumai tebonu.

11 Ia oi Tirama ena maearima,

taba neiakia ikoikiai herekiai kokapare.

Ia bero tohana kotabuna,

Tirama komarikiaina,

koaꞌikakauma,

raonaꞌauai komiaho,

kobapahihi,

mai rabo haraiai komiaho.

12 Aꞌikakaumai huari namona kobabaina,

ba mauri banaibanai koaꞌi ꞌinina,

pokina mako tebatohaniꞌo wairanai emu aꞌikakauma hoana ohina pou haraina raninai Tirama eapariniꞌo mauri neiana aonai.

13 Tirama taba ikoikiai mauri nibenakia hauna mai Keriso Iesu ia kipona Pontio Pilato herenai ꞌabi tohana ehina pouna hauna wairakiai au oi nabahi ahiniꞌo.

14 Keriso ena rauhubu ꞌabikia kokaꞌai harainakia mai herekiai aꞌi kobeho,

haeamona hau ha aꞌi kekaiahiniꞌo keaomo eka Obiapaka Iesu Keriso ena mai mue wapuna.

15 Ena mai mue wapuna weiana hanona Tirama kehore ena rani tohanai kebabaina.

Tirama hanona banamo pokina mai ia ikupaiana mo taba ikoikiai ekia poki,

obia ꞌarana haukia ikoikiai ekia Obia ꞌarana,

haeamona obiapaka ikoikiai ekia Obiapaka.

16 Ia ikupaiana mo kemiaho banaibanai aꞌi keꞌari ꞌapua,

ia hanona ea aonai nemiaho ea weiana hanona ea kiꞌa baha tai ha keao herena hanona aꞌi ketaina,

maearima ꞌabaeana ha hanona Tirama aꞌi eihana ꞌao aꞌi keihana.

Mariki mai hiabu hanona Tirama herenai kemiaho banai banai.

Amen.

17 Maearima weiakia bariu hanopaka neiana ena mauri tabakiai tiobia haukia kohinabe taburanakia,

aꞌi kateapa,

mai ekia buabeni obia tabakia weiakia aba kateꞌakauma haukia herekiai aꞌi kemiaho,

ia ekia buabeni hanona Tirama herenai mo kemiaho,

pokina taba ikoikiai niberuberu benaka aoka ibanamona.

18 Kohina benakia aka namokia katebabai,

babai namokiai kateobia,

haeamona maearima baika herekiai watewateai kateberuberu benakia.

19 Taeara weianai katebabaina hanona kipokia ekia kepu katebararona,

weiana hauna ia kebamia ꞌininakia mauri wairai hauna ꞌeuna,

ba mauri weiana kateaꞌina hanona mauri tohana.

20 Timoteo e,

aka naiana Tirama ebeniꞌo hauna koꞌima haraina,

hanopaka ꞌabiꞌabikia mai poꞌo baihara taeana weiana maearima baika tiapari haoreaina ṯetibaha ‘aotipa’ weiakia haukia herekiai kokapare.

21 Pokina maearima baika poꞌo raonana weiana teaꞌina hanona ekia aꞌikakauma tebaꞌakaumana.

Nabahubaꞌari Tirama ena aokoꞌo hoana hanona ikoimiai heremiai kemiaho.