Baꞌiobi Haukia Baiꞌoikia Aꞌi Temeꞌoinimi.
4
Auba Robe nehinabe maha harainaka netibaha,
muri ranikiai maearima baika aꞌikakauma katehabona ia auba weiakia tibaiꞌoi haukia murikiai katekaꞌa mai auba kiꞌa obokia ekia baꞌiobi tainai katetai.
2 Baꞌiobi nahomakia hanona baiꞌoi haukia herekiai timai weiakia aokia berokia hanona tekiꞌa ihobona auri hiabunai tebaꞌaranakia.
3 Maearima tikaiabunakia aꞌi katehawainibe mai aniani baika hanona aꞌi kateani.
Ia Tirama hanona aniani ebenaka kahani,
aniani neiakia hanona ebenakia aꞌikakauma haukia mai weiakia Tirama ena ꞌabi tohana ṯeꞌiobina haukia namo ꞌabina katehinana ba kateani.
4 Tirama ebarama tabakia ikoikiai hanona tenamo,
ikoikiai hanona ahakiai Tirama namo ꞌabina kahabena ba kahani ia ha aꞌi kahabakiꞌana.
5 Pokina aniani hanona Tirama ena ꞌabi mai eka bahubaꞌari nihore nibarobenakia.
Keriso Iesu Ena Aka Haumu Namomuai Koao.
6 Baꞌiobi neiakia uahoꞌabaka kobaꞌiobi harainakia raninai oi hanona Keriso Iesu ena aka haumu namomuai koao,
weiana oi kipomu abomo aꞌikakauma ꞌabikiai mai baꞌiobi namona weiana tainai otai haunai kotabura.
7 Hanopaka tiramakia baiꞌoikia ꞌorikia mai kikipa ꞌabaeakia herekiai kokapare,
iamo kipomu ibataburamu akana kobabaina Tirama imarikiaina haumuai koao.
8 Hauanika ibataburana akakia nahababai hanona ena namo baika,
ia Tirama imarikiaina hoana ena namo hanona taba ikoikiai aokiai,
pokina ia hanona mai ꞌabiꞌuaina eka mauri bariu hanopaka neiana aonai mai mauri banaibanai wairai hauna abomo aonai.
9 Neiana hanona ꞌabi tohana aoka tohakiai kahaꞌi taeana mai kahaꞌikakaumana.
10 Neiana paunai naharoꞌari mai nahahau haiara pokina aika hanona mauri Tiramana nahabuabena,
ia hanona maearima ikoikiai ekia Bamauri hauna,
weiakia tiaꞌikakaumana haukia hanona katemauri.
11 ꞌAbi neiakia kobaꞌiobinakia mai kohinanakia katekaꞌainakia.
12 Oꞌaruꞌaru buonai maearima oi aꞌi katehao tiboaniꞌo,
iamo ihaiha namokia aꞌikakauma maearimakia wairakiai kobawaira tinana emu ꞌabiꞌabiai,
emu mauriai,
emu raonaꞌauai,
emu aꞌikakaumai,
mai beho ha aꞌi kobabaina aonai.
13 Mako wairakiai aka neiakia kobabai toꞌona,
Puka robena ꞌabina kotuabina,
koiroro aina,
mai kobamarere aina keaomo au kawahi heremu.
14 Auba Robe ena ibeni aomuai nemiaho hauna aꞌi kobaoaoaina,
weiana hanona marea ena kiro haukia imakia ahamuai tehaoꞌau tebahubaꞌari raninai mahabanai ꞌabina aonai ebeniꞌo.
15 Kohauaro aka neiakia ikoikiai aokiai mai aomu ikoinai kobabainakia,
weiana maearima ikoinai oi emu aka aba ninamo hauna kateiha tinana.
16 Emu baꞌiobi mai emu mauri koꞌima haraina,
taba neiakia kobabai toꞌo baihana,
pokina neiana kobabaina hanona Tirama kehore kebamauriniꞌo haeamona aiamu tiona haukia ikoikiai abomo kebamaurinakia.