Ihaꞌini Haukia Ekia Mauri Marea Robe Aonai.
3
“Hau ha nenuatae Tirama ena mareai ihaꞌini akana kebabaina raninai ia hanona aka namona nenuatae aina,”
ṉa tiꞌabi aiho hanona ꞌabi tohana aoka tohanai kahaꞌi taeana hauna.
2 Tirama ena marea ihaꞌini hauna hanona ena babai kenamo herenai beho ha aꞌi katetabu ahina,
atawana kehamona,
aona kebakiro,
aona keaꞌi ꞌinina,
katemariki aina,
aru ꞌabaea haukia keaꞌi taeanakia ena ituai,
haeamona bamarere akana kebabai haraina,
3 aꞌi keinu ꞌari,
aꞌi keaiahu ia keꞌaiaunu,
aꞌi keaibara,
mai moni aꞌi keraonaꞌau aina.
4 Ia hanona kipona ena itu haukia keꞌima harainakia haeamona nahuna kemaiainakia aiana katekaꞌaina mai katemariki aina.
5 (Hau ha kipona ena itu haukia aꞌi keꞌima harainakia raninai,
Tirama ena marea haukia aea keꞌima harai aihonakia?)
6 Maearima bariumo niaꞌikakauma hauna hanona mareai ihaꞌini haunai aꞌi kateaꞌi taeana,
pokina aꞌi meapa ba Tirama Satani ebaꞌehona ꞌabanai aꞌi meꞌeho.
7 Ba murimuri haukia abomo ia katemariki aina,
weiana aꞌi kateꞌuahi aina Satani ena rioai aꞌi metoꞌo.
Baraibarai Haukia Ekia Mauri Marea Robe Aonai.
8 Taeara ihobonai Tirama ena marea ena aka haukia abomo hoahoa namokia katebaiha baihai,
baiꞌoi akakia aꞌi katebabai,
aꞌi kateinuinu banaina,
mai beho taearanai moni aꞌi katetabunakia.
9 Ia haukia hanona raonaraona apaꞌuakia weiakia Tirama aba ebawaira tinanakia aꞌikakauma aonai haukia tiaꞌi ꞌininakia mai aokia berona namonai.
10 Ia haukia hanona kahabahobo ꞌuainakia ba herekiai beho ha aꞌi kahatabu ahina hanona tiakono akana katebabaina.
11 Taeara ihobonai atawakiaa abomo hoahoa namokia katebaiha baihai mai aꞌi kateꞌuahi ꞌuahi,
bia aꞌi kateinu ꞌari,
mai aka ikoikiai aokiai hanona aia katebabua ꞌauna.
12 Tirama ena marea ena aka hauna atawana kehamona haeamona nahuna mai ena itu haukia keꞌima harainakia.
13 Weiakia tiakono akana tebabai haraina haukia ꞌarakia hanona mariki ꞌekakia kateaꞌina,
ekia aꞌikakauma katetabura kiꞌa Keriso Iesu pouna katehina haraina.
Eka Kuti Taearana.
14 Au nabuabeni rani papana aonai aba kawahi kaihaniꞌo,
iamo marere neiana natiu ahina niwahi heremu,
15 pokina papana kamahari reꞌa marere neiana kebaraonaniꞌo kipoka eka mauri aea kahaꞌima harai aihona Tirama ena marea haukia baiatakiai,
weiana hanona mauri Tiramana ena marea,
Tirama ena ꞌabi tohana kemiaho aina kebataburana ꞌekana.
16 Aika nahaꞌiobi haraina eka kuti taearana weiana Tirama herekai ebawaira tinana haukia hanona eapaꞌua.
Kerisob hanona hauaniai
ewaira tina,
aubai ena bero ebatohana,
aneru ia teihana,
rama haeai haukia herekiai
ia pouna teiroro aina,
mai hanopaka maearimakia
ia teaꞌikakaumana,
nuabi aonai eaꞌi taeana
eao kupai.