Maearima Ikoikiai Paukiai Kahabahubaꞌari.
2
Eꞌu bahiahi koriꞌuaina hanona neiana,
maearima ikoikiai paukiai Tirama konoina kebarainakia mai kebanamonakia,
ia paukiai Tirama herenai namo ꞌabina kohinana emu bahubaꞌari ai.
2 Weiana obia ꞌarana haukia mai hiabu haukia ikoikiai paukiai abomo kobahubaꞌari,
ba aika mai ia kipokia hanona mai baibuaka haeaomona mauri namona aonai kahamiaho Tirama imariki aina mai robe maurina ikoinai taearanai.
3 Bahubaꞌari nahomana hanona enamo ba Tirama ibamaurika hauna aona ibanamona hoana.
4 Tirama nenuatae maearima ikoikiai bamauri kateaꞌina mai katemai Tirama ena ꞌabi tohana kateꞌiobina.
5 Weiana Tirama hanona hamona haeamona Tirama mai maearima baiatakiai bairarao hauna abomo hamonamo Keriso Iesu,
ia hanona maearima tohana,
6 ia kipona hauanina ebaibeni maearima ikoikiai ekawanakia irubu kateaꞌina.
Tirama hanona ena nuatae ebatohana ranina tohanai ebawaira tinana.
7 Weiana paunai au etinaꞌanaꞌu iroro mai iuhubeau hauꞌuai naeao Keriso pouna kahinana,
rama haeai haukia ibamarerekia hauꞌuai naeao Tirama ena ꞌabi tohana mai aꞌikakauma kabaꞌiobinakia.
(ꞌAbi tohana nahinana aꞌi nabaiꞌoi.)
8 Ua buonai,
nanuatae ꞌeka maikoinai hau aꞌi kateopuere ꞌao kipokia aꞌi katebaihara tae,
ia ekia mauri katebero aonai katebahubaꞌari.
Babiꞌe Ekia Hoahoa Namokia Katebabai.
9 Abomo au nanuatae,
babiꞌe ekia habuni batotoai hanona aba tiaꞌiaꞌi harai,
ia buikia aꞌi katebahaeai haeainakia,
ꞌao taba ꞌimareꞌimarekia weiakia gold ꞌao kutu ai tebabainakia haukiai aꞌi kateba taitainakia,
habuni ꞌarakia rarikia aꞌi katebatotonakia.
10 Ia ekia hoahoa namokia katebabai weiakia katehore kateba tohanakia ia hanona Tirama ṯekuti aina babiꞌekia.
11 Babiꞌe hanona ena ꞌaiaunuai hanona ꞌiobi keaꞌina.
12 Au naharabuna,
babiꞌe hanona hau aꞌi kateba marerenakia ꞌao aꞌi katepoki ainakia,
ia hanona kemiaho ꞌuruꞌuruna keahaꞌi.
13 Pokina Tirama ehore Adamu ebabai ꞌuaina ba muriai ꞌEva ebabaina.
14 Ba Satani hanona Adamu aꞌi eꞌoina ia babiꞌe eꞌoina,
ba kiꞌa weia ia herenai eaꞌi ramana.
15 Iamo babiꞌe ekia ꞌaiaunu aokiai aꞌikakauma,
raonaꞌau,
mai robe maurikiai katemiaho toꞌo baihana raninai,
nahukia kateba ramanakia,
ba bamauri kateaꞌina.