2 Timoteo narerebeniꞌo,

oi hanona au nahaꞌu tohamu Iesu iaꞌikakaumana aonai.

Nabahubaꞌari Hamaka Tirama mai Keriso Iesu eka Obiapaka ekia baraibarai apaꞌuana,

aokoꞌo mai baibua ahamuai kemiaho.

3 Au aeao Makedonia hanona raninai,

abahi ahiniꞌo ihobonai oi hanona naia Epeso aiaranai komiaho weiana maearima baika naia kohinabe pahihinakia baꞌiobi baiꞌoikia aꞌi katebabai mue,

4 abomo kipokia hauanikia aꞌi katebaibeni hanopaka tiramakia ꞌorikia mai kuputori ꞌabiꞌabikia weiakia ekia pua ahaꞌi haukia herekiai.

Neiakia hanona baihara taea rarikia kateba ramanakia iamo Tirama ena raona weiana aꞌikakaumai nibawaira tinana hauna akana iꞌiobinai aꞌi tibaraibarai.

5 Eꞌu bahiahi ꞌabina neiana ena poki tohana hanona raonaꞌauai katemiaho,

weiana hanona aoka berona namonai niaꞌi ramana mai raona beronai haeaomona aꞌikakauma tohanai nimai.

6 Ia maearima baika hanona hoahoa neiakia herekiai tekaobo teao ꞌabi anikia ahaꞌi haukia tiꞌabiꞌabi ainakia.

7 Ṯenuatae Tirama ena rauhubu ibaꞌiobi aina haukiai kateao,

iamo taba robana tiahuna ꞌao aokiai taba ṯehina taburana hanona obona aꞌi tiobo.

8 Aika aba haꞌiobina weiana maearima ha rauhubu kekaꞌai haraina raninai rauhubu hanona taba namona.

9 Abomo aba haꞌiobina weiana rauhubu hanona bero haukia paukiai aꞌi erama ia rauhubu hanona rauhubu tikabena haukia paukiai erama,

weiakia aꞌi tikaꞌaina haukia mai Tirama aꞌi timariki aina haukia mai kiꞌa haukia,

aꞌi terobe haukia mai Tirama atana tiaꞌi kiꞌana haukia,

weiakia hamakia ꞌao hinakia tiahu ꞌarinakia haukia mai ahu ahu haukia,

10 nabau haukia,

mai hau kipona ꞌabana ninabauaina haeamona babiꞌe kipona ꞌabana ninabauaina haukia,

taꞌara aꞌi haukia tikawa kawa ainakia haukia,

mai baiꞌoi haukia,

mai bakai aonai tihorehore abu haukia,

abomo taba haeai haeai weiakia baꞌiobi tohana tainai aꞌi titai haukia.

11 Baꞌiobi tohana weiana hanona banamo Tiramana ena pou namona nuabina herenai emai,

pou namona weiana au eꞌu ihaꞌini aonai ehorotina akana kababaina.

12 Keriso Iesu aika eka Obiapaka namo ꞌabina nabena,

weiana ia hanona au tabura ebenaꞌu pokina ia aia ababua ꞌauna hauꞌuai ebaonaꞌu.

13 Iamo ꞌuainai hanona Keriso atana ihinana aꞌikiꞌana mai aꞌoatana,

haeamona aibara kiꞌa herenai mo raninai,

Tirama au eaokoꞌo ainaꞌu pokina eꞌu aꞌikakauma ahaꞌi mai taba ababaina hanona aꞌi aꞌiobina.

14 Eka Obiapaka ena aokoꞌo hoana hereꞌuai ebapaꞌua kiꞌana,

haeamona aꞌikakauma mai raonaꞌau Keriso Iesu aonai aika ꞌeuka haukia rani hamonai ebenaꞌu.

15 Neiana hanona ꞌabi tohana aoka tohakiai kahaꞌi taeana mai kaha aꞌikakaumana.

Keriso Iesu emai hanopaka aonai hanona kiꞌa haukia kebamaurinakia,

baiatakiai au hanona akiꞌa kiꞌa baha.

16 Ia Tirama au eaokoꞌoai kiꞌa bahanaꞌu,

weiana au akiꞌa kiꞌa baha,

pokina Keriso Iesu ena bapahihi tabura weiana ena ore ahaꞌi hauna au hereꞌuai kebawaira tinana,

ba baika ihaiha neiana kateihana hanona Keriso kate aꞌikakaumana mauri banaibanai katetabu ahina.

17 Obia ꞌarana nimauri banaibanai,

ena pua ahaꞌi,

mai aꞌi nahaihana hauna,

Tirama mo weiana ikupaiana kahamariki aina mai herenai nuabi kemiaho keaomo banaibanai.

Amen.

18 Timoteo,

nahaꞌu e,

ꞌabi kokaꞌaina hauna neiana nabeniꞌo,

weiana hanona ꞌuainai mahabanai ꞌabina ihinanai oi robamu teahuna,

ba mahabanai ꞌabikia weiakia ihobokia kokaꞌainakia hanona oi aba huari namona kobabaina.

19 Emu aꞌikakauma mai aomu berona namona koaꞌi ꞌini harainakia.

Baika aokia berona neiana tebakiꞌana hanona ekia aꞌikakauma tebauhuna.

20 Ia baiatakiai hanona Humenaio mai Alesanda,

terarua hanona aba Satani imanai ahabonakia ia ena hiabu baꞌanai katemiaho,

weiana kehore kebaꞌiobinakia ekia ꞌabi kiꞌa Tirama herenai haukia katebapuanakia.