Habacuc willakunqan witsanmi Babilonia nación soldädukuna atska nacionkunata vincir munaynincho tsararäyarqan. Judá nación runakunata Babilonia runakunawan castigananpä Tayta Dios niptinmi Habacuc pasaypa llakikurqan. Manami tantiyarqantsu imanir mana alli runakunawan kuyanqan runakunata Tayta Dios castigananpä kanqanta (Hab. 1.13). Tsaymi Tayta Dios nirqan ima kaptinpis payman yärakunanpä kanqanta (Hab. 2.4) y mana alli runakunata ushakätsinanpä kanqanta (Hab. 2.5-20). Tsayta tantiyarmi Habacucqa Tayta Diosta alabarqan (Hab. 3.17-19). Habacuc willakurqan soqta pachak (600) watanö Jesucristo manarä yuriptinmi.