Habacuc
1
Kaychömi qellqaraykan profëta Habacucta Tayta Dios revelanqan.Habacuc llakikur mañakunqan
2 Tayta Dios, llapan shonqüwan mañakamuptïpis ¡imayyaqrä wiyamankitsu!
Pasaypa mañakaykämuptïpis ¡imayrä mana alli runakunapa makinpita salvayämanki!†
3 ¡Imayyaqrä mana allikunata rurayanqanta rikashä!
Kaychöqa wanutsinakuylla y ushakätsinakuyllami kaykan.
Maytsaychöpis rimanakuylla y chikinakuyllami kaykan.
4 Tsaynö karmi leykunata cäsukuyantsu.
Washäkuyta mana puëdiqkunatami manakaqman churayan.
Munanqaykinö kawaq runakunatami pasaypa chikiyan.
Juezkunapis manami leykuna qellqaranqannötsu arreglayan.
Habacuc mañakunqanta Tayta Dios contestanqan
5 Tsaymi Tayta Dios nirqan:
“Wakin nacionkunata ima päsanqantapis tantiyakur pasaypa mantsakäyay.
Pasaypa mantsariypä kaqkunata ruranäpänami kaykä.
Imanö ruranäpä kanqanta willayäshuptikipis manami criyiyankitsu.†
6 Noqami kamakaykätsï Babiloniaa mana alli runakuna guërrata rurayänanpä.†
Paykunaqa maytsaypami puriykäyan runakunapa wayintawan chakrankunata qechur.
7 Pasaypa mantsaypä mana allimi kayan.
Juk nacionman charpis tsay nacionpa leyninkunata mana cäsurmi kikinkunapa leyninkunallata välitsiyan.
8 “Paykunapa cawallunkunaqa tigripitapis masmi cörriyan.
Paqaspa puriq löbu mantsaypä kanqanpitapis mas mantsaypämi kayan.
Tsay cawallunkuna muntashqami yupaytapis mana atipaypä puriyan.
Chipshaman karupita anka aywanqannömi guërramanpis karupita aywayan.
9 Tinkuyanqan kaqtaqa pïmaytapis wanutsirmi ushayan.
Maypa chäyaptinpis pasaypami runakuna mantsayan.
Prësu tsariyanqan runakunaqa lamar kuchuncho aqushanörämi kaykäyan.
10 “Nación mandaq reykunatapis autoridäkunatapis asipar manakaqmanmi churayan.
Markacho runakuna amparakuyänanpä murallanqanta rikar asikuyanmi.
Murälla waqtanman allpata qotuskirmi atacayänanpä tsay markakunaman yaykuyan.
11 Shukukuy wayra imatapis ushakätsinqannömi pïmaytapis ushakätsiyan.
Tayta Diosman yärakuyänanpa trokinmi kikinkunapa kallpankunaman yärakuyan”.
Tayta Diosta Habacuc yapay mañakunqan
12 Tayta Dios tsaynö niptinmi Habacuc nirqan:
“Tayta Dios, imaypitapis kawaq santu Diosmi kanki.
Imaypis mana ushakaqmi kanki.
Tsapämaq qaqami kaykanki.
Kikiki yanapaptikimi Babilonia runakuna shayämunqa castigayämänanpä.
13 Tsaynö kaptinpis qamqa jutsa ruraq runakunata manami rikaytapis munankitsu.
Jutsasapa runakunataqa imaypis manami chaskinkitsu.
Tsaynö kaykarqa ¿imanirtä tsay mana alli runakunata ushakätsinkitsu?
¿Imanirtä tsay jutsasapa runakuna jutsaynaq runakunata wanutsiyaptin upällakunki?†
14 ¿Imanirtä kachapanki lamarcho pescäduta mällawan tsariskir apayanqannö runakunata apayänanta?
¿Imanirtä kachapanki pipis mana cäsushqa arashtanö wanutsiyänanta?
15 “Anzuëluwan mällawan karpis atska pescäduta tsariqnömi maytsay nacionpita runakunata wanutsir pasaypa kushikuyan. 16 Mikunanpä tsaytsika kaptin pescaq runa mällankunata y anzuëlunta adorar sacrificiukunata rupatsinqannömi armankunata adorayan y kallpayuq kayanqanpita allish tukuyan. 17 ¿Tsaynöllatsurä wanutsiyanqa? ¿Tsaynöllatsurä nacionkunata mana kuyapaypa ushakätsiyanqa?”