2
Rikachakuna törricho marka täpaq runa maya maya kanqannömi noqapis shuyaraykä mañakunqäta Tayta Dios wiyamänanta.Habacuc yapay mañakunqanta Tayta Dios wiyanqan
2 Tsaymi Tayta Dios nimarqan:
“Pipis mana pantaypa liyinanpä taksha tablacho revelanqäta shumaq qellqay.
3 Tsay revelanqäqa tiempun chämuptinrämi cumplinqa.
Juklla mana cumpliptinpis mana ajayaypa shuyaray.
Imay karpis cumplinqami.
Höran chämuptinqa llapanpis ninqänöllami kanqa.†
4 “Tsay runakunaqa runa tukurmi kallpankunallaman yärakuyan.
Paykunaqa mana allikunatami rurayan.
Munanqänö kawaq runaqa noqaman yärakamurmi kawanqa”.†
Mana alli runakunata Tayta Dios ushakätsinanpä ninqan
5 Runa tukuqkunaqa rïcuyayta munarmia jamaytapis tariyantsu.
Imaykayuq tikrarpis alli kawayta manami tariyantsu.
Munayyuq kayta munarmi ayakunata sepultüra chaskiypa chaskinqannö runakunata ushaypa ushaykäyan.
Tsaymi juk markata juk markata atacar vinciykäyan.
6 Tsay vinciyanqan runakunami vinciqninkunata manakaqman churar niyanqa:
“¡Allaw qamkuna! ¡Runakunapa imaykankunatapis qechu qechurkurmi pasaypa imaykayuqyäyashqayki!
¡Imayyaqrä suwakuyanqallaykiwan imaykayuq kayanki!
7 Ñakatsiyanqayki runakuna wanutsiyäshunaykipä illaqpita chäyämuptinmi mantsakar pasaypa tsuktsukyäyanki.
Llapan imaykaykikunatapis apakuyaptinmi qallapächu rikakuyanki.
8 Atska markakunapa imaykantapis apakuyanqaykipitami tsaytsika soldädukuna shamur qamkunapatapis imaykaykikunata apakuyanqa.
Tsaynö rurayäshunki nacionnïman shamur may markachöpis wanutsiyanqaykipita y mana allikunata rurayanqaykipitami.
9 “¡Allaw qamkuna! Imaykayuq kayänaykipämi runapa imaykantapis suwapäyanki.
Tsaynö imaykayuq tikrarmi yarpäyanki imapis mana päsayäshunaykipä kanqanta.
10 Tsaynö kayanqaykipitami qamkuna y castaykikuna penqakuycho rikakuyanki.
Atska markakunata ushakätsiyanqaykipitami kikikikunatapis ushakätsiyäshunki.
11 Llutanta rurayanqaykitami wayipa pirqankunapis y vïgankunapis shimpiyäshunki.
12 “¡Allaw qamkuna! Runakunata wanutsir imaykantapis apakuyanqallaykiwanmi markaykikunata shäritsiyashqayki.†
13 Tsaynö kayanqaykipitami llapanta mandaq Tayta Dios llapan shäritsiyanqaykita ninawan ushakätsinqa.
Ushakätsiptinmi llapan aruyanqaykipis manakaqllapä kanqa.
14 Lamarcho yaku junta kanqannömi Tayta Diosta reqiqkunapis kay patsacho junta kayanqa.†
15 “¡Allaw qamkuna! Qamkunaqa vecïnuyki markakunata vinciskirmi pasaypa penqakuyman churayanki.
Qallapächu kaykaqta rikananpä runa mayinta machätsiqnömi kaykäyanki.
16 Tsaynö rurayanqaykipitami respitashqa kayänaykipa trokin penqakuycho kayanki.
Tayta Diospa castïgun wiñaraykaq cöpapita upuyaptikimi kikikikunatapis qarapachayäshunki.
Kanan munayyuq karpis waray warantinqa kuyapaypämi kayanki.†
17 Líbanuman aywar jachakunata ushar tsaycho taq uywakunata wanutsiyanqaykipitami kikikikunatapis Tayta Dios mana kuyapaypa wanutsiyäshunki.
Runakunata may markachöpis wanutsiyanqaykipitami pasaypa ñakayanki.
18 “Qeruta llaqllaykur rurayanqan ïdulukuna ¿imapärä välin?
Runakunata engañanallanpä kaykaptinqa ¿imapärä välin metalkunata fundiykur ïdulukunata rurayanqan?
Shimin kaptinpis manami parlayantsu.
¡Imanöparä kikin ruraqpis tsayman yärakunman!
19 “¡Allaw qamkuna! Qerupita rurayanqan ïdulutami ‘rikchay’ nikäyanki.
Tsaynöpis rumipita rurayanqan ïdulutami ‘shäriy’ nikäyanki.
Tsay ïdulukunaqa manami imatapis musyatsiyäshunkitsu.
Qoriwan y qellaywan laqashqalla karmi kawayantsu.
20 Tayta Diosqa sagrädu templunchömi kaykan.
Paypa ñöpancho llapan runakuna maytsaychöpis upällakuyätsun”.†