Tayta Diosta Habacuc yapay mañakunqan
3
Profëta Habacuc Tayta Diosta cantapayllapa mañakurmi nirqan:2 Tayta Dios, Israel mayïkunata unay yanapanqaykitami willayämashqa.
Llapan ruranqaykikunata musyarmi pasaypa kushikü.
Taytay, unay yanapanqaykinölla kananpis yanapaykayällämay.
Tsaynöpami noqakunapis ruranqaykikunata rikayäshä.
Jutsata rurayanqäpita ajanashqa karpis kuyapaykayällämay.
3 Temán markapitami Tayta Dios shamun.
Parán jirkanpitami santu Dios shamun.a Selah
Entëru ciëluchömi munayyuq kanqan rikakaykan.
Entëru patsachömi payta alabaykäyan.
4 Chipipiyninpis empañakuyparämi atsikyaykämun.
Makinpitapis illaqukuynörämi atsikyay rikakämun.
Munayyuq kanqanqa maytsaychöpis musyakaykanmi.
5 Contrankunata castigananpä shamuptinmi mantsaypä pesti qeshya puntanta shamun.
Qepantanami fiebri qeshya shamun.
6 Tayta Dios ichiykuptinmi patsa pasaypa tsuktsukyan.
Rikaraptinmi maytsay markakunapis pasaypa mantsakäyan.
Unay jirkakunapis juchunmi.
Tsaynöllami jirkankunapitapis juchu aywan.
Tayta Diosmi itsanqa mana ushakaq kaykan.
7 Cusáncho taq runakunatami pasaypa desgraciacho kaykaqta rikashqä.
Madiáncho taq runakunatapis pasaypa mantsakar tsuktsukyaykäyaqtami rikashqä.
8 Tayta Dios, ¿mayukunawanku o lamarwanku ajanashqa kaykanki?
¿Tsaytsurä cawalluyki muntashqa y guërra carrëtaykiwan llapanta vincir puriykanki?
9 Flëchawan flëchanaykipäpis kamarikushqallanami kaykanki.
Flëchaykitapis jitan jitanllanami kaykanki. Selah
Mayukunawanmi kay patsatapis raqratsashqayki.
10 Jirkakunapis rikashurnikimi mantsakarnin tsuktsukyäyan.
Mangäda tamyapis pasaypami tamyamun.
Lamarpis bunyaypa bunyarmi qayaran.
Yakupis pasaypami pulchaqyan.
11 Flëchaykita y lanzaykita jitaptiki chipipirrämi aywan.
Aywaykaqta rikarmi rupaypis killapis takyaskiyan.
12 Contraykikunata castiganaykipämi pasaypa ajanashqa kay patsacho maytsaypapis purinki.
Castigarmi nacionkunatapis lanqur ushanki.
13 Kuyanqayki runakunata salvanaykipämi yarqamushqayki.
Akranqayki reyta yanapanaykipämi shamushqayki.
Contrayki shäriq reykunatami ushakätsishqayki.
Paykuna mandayanqan nacionkunatapis ushakätsishqaykimi. Selah
14 Tsay nacionkunapita shamuq soldädukunami mangäda tamyanö shayämurqan wakpa kaypa qarqayämänanpä.
Mana alli runa jäkuqcho asaltar kushikunqannömi paykunapis atacamar kushikuyarqan.
Jinatami kikinpa flëchankunawan flëchar ushakätsishqayki.
15 Bunyaypa bunyaykaq lamar jananpami cawalluyki muntashqa purinki.
16 Shamunqaykita wiyarmi pasaypa mantsarishqä.
Wirpäpis pasaypami katatashqa.
Tullükunapis pasaypami qotukashqa.
Valornïpis pasaypami ushakashqa.
Tsaynö kaptinpis conträkunata ushakätsinaykipä kanqanta musyarmi qamman yärakaykämü.
17 Hïguskuna mana tuktuptinpis,
üvakuna ni olïvukuna mana wayuptinpis,
chakracho ima cosëcha mana kaptinpis
y üshakuna y wäkakuna ushakaptinpis
18 Tayta Diosman yärakurmi kushikushä.
Salvamänanpä kanqanta musyarmi payta imaypis alabashä.
19 Tayta Diosmi shakyätsiman imanö karpis payman yärakunäpä.
Pay yanapamaptinmi imayka lluytsunö cörrï.
Jirkakunapa purirpis mana llutskaypami purï.†
(Kay salmuqa cantaqkunapa mandaqninpämi. Cuerdayuq instrumentuta tukar cantayanki.)