3
¡Allaw Nínive runakuna, kananmi musyayämanki!Qamkunaqa runapa yawarnintami jichayashqayki.
Llullakullarmi y runakunata wanutsillarmi puriykäyanki.
Mana jamaypami suwakuyllaman churakashqa kaykäyanki.
2 Tsaynö kayanqaykipitami musyayanki chicötita pashtatsiyaqta,
carrëtakunapa ruëdankuna büllata rurayaqta,
cawallukuna patatarrä cörriyaqta
y carrëtakuna taqrarar aywaykäyaqta.
3 Tsaynöpis rikayankimi cawallun muntashqa soldädukuna atacayäshunqaykita,
chipipiqtarä espädankuna y lanzankuna aptashqa shamuykaqta,
atska runakuna malograkushqa kaykaqta,
waranqanpa waranqanpa ayakuna jitaraykäyaqta
y yupaytapis mana atipaypä wanushqa runakuna mashtaraqta.
Tsaynö kaptinmi mayman jaruykuyänaykipäpis sitiu kanqatsu.
4 Prostitüta warmi kuyayllapä kar runata engañanqannömi qamkunapis atska markakunata engañayashqayki.
Brüjukunanömi juk nación runakunatapis criyitsiyashqayki.
Tsaynö kayanqaykipitami tsay desgraciakuna päsayäshunki.
5 Tsaymi llapanta mandaq Tayta Dios niyäshunki:
“Qamkunapa contraykimi kaykä.
Runakunapa ñöpancho träjinta qariptin warmi penqakunqannömi qamkunapis markakunapa ñöpancho penqakuyanki.
6 Tsaynöpis rakchawan pichukuskir runa penqakunqannömi qamkunapis penqakuyanki.
7 Llapan rikayäshuqnikikunami qeshpir niyanqa:
‘¡Nínive marka pasaypa ushakashqami kaykan!
Kananqa ¿pirä tsay markata kuyapanqa?
¿Pillarä tsaycho taq runakunata shoqanqa?’
8 “Nínive runakuna, ¿imanirtä yarpäyanki Tebas runakunapita mas munayyuq kayanqaykita?
Tebas markaqa Nilo mayupa ñöpanchömi kaykan.
Tsay mayumi entëru kuchunpa tumar imayka murällanö markata tsaparan.
9 Pipis mana atacayänanpämi Etiopía y Egipto nacionkuna janan imaypis shäriyarqan.
Tsaynöllami Fut y Libia nacionkunapis Tebas markata yanapayarqan.
10 Tsaynö kaptinpis juk nación runakuna vinciskirmi Tebas runakunata prësu apakuyarqan.
Wamrankunatapis toqshunkuna putsiqpämi cälli esquïnakunacho tsapir usharqan.
Nirkurnami tsaycho kaykaq yachaq runakunata prësu apayänanpä suertita titayarqan.
Mayor runakunatapis cadinarkurmi prësu apakuyarqan.
11 “Nínive runakuna, qamkunapis Tebas marka runakunanöllami machashqanö tsankapaykäyanki.
Contraykikuna mana tsariyäshunaykipämi pakakur puriyanki.
12 Imayka hïgus jachata shoqshir shushuq kaq wayuyninta mikur ushayanqannömi qamkunatapis ushayäshunki.
Poqushqa hïgus ishkinqannöllami pakakuna törrikikunapis juchur ushakäyanqa.
13 Soldäduykikunapis warminömi mantsariyanqa.
Punkuykikunata nina lunyar ushaptinmi uchkuraykar quëdanqa contraykikunapis yaykayämunanpä.
14 “Upuyänaykipä yakuta churakuyaptikipis,
marka murälla mas anchu kananpä pirqayaptikipis,
mituta jaruykur adöbiwan shumaq sigurayaptikipis
15 markaykita rupatsirmi qamkunatapis rupatsiyäshunki.
Qeshpiq kaqtami espädawan wanutsiyäshunki.
Chakracho plantakunata shiwri ushanqannömi qamkunatapis ushakätsiyäshunki.
Tsaynö kananpä kaykaptinqa ¡soldäduykikuna atska kayänanpä qoriyay!
¡Chukllushkuna atska kanqannö kayänaykipä qamkunapis mirayay!
16 “Qamkuna kaqcho negociantikuna qoyllurnörämi mirayashqa.
Tsaynö kaptinpis chukllushkuna qaranta lloqtiskir pajar aywakuyanqannömi paykunapis aywakuyanqa.
17 Markaykita täpaq soldädukuna y capitannikikunapis atska chukllushkunanömi kaykäyan.
Alaptin chukllushkuna pirqacho mana kuyukuypa laqaräyanqannömi paykunapis kaykäyan.
Rupay yarqaskamuptin chukllushkuna pajar aywakuyanqannömi soldäduykikunapis qeshpir aywakuyanqa.
Maycho kayanqanpis manami musyakanqatsu”.
18 “Asiria nacionpa mandaqnin rey, tantiyakuy ima päsashunaykipä kanqantapis.
Mandar yanapashuqnikikuna y soldäduykipa capitanninkunapis wanurmi ushakäyanqa.
Soldäduykikunapis jirkakunapa qeshpir aywakuyaptin manami pipis qorinanpä kanqatsu.
19 Qampäqa wanuypis janaykichönami kaykan.
Qamqa pïmaytapis mana kuyapaypami ñakatsirqayki.
Tsaymi desgracia päsashunqaykita musyar pïmaypis kushipäyäshurniki taqllapäyäshunki”.