Jisas pai yeri ungklampren e Pontius Pailat
(Matyu 27.1-2; 27.11-14; Mak 15.1-5; Jon 18.28-38)
23
Nu irauma nemei ka numane wu painri Pontius Pailat.
2 Nu kotim wu ka nire nanrona,
“Mu namale pu mana namo fa yumale nu uma painri rokoi wongkeni ka e fi nupene mi e mone.
Ka wu yire mu ese fi maꞌne romaula pai Sisar.a
Ka wu yire nanrona wu nro sa Krais ka wu waiye yukaine king.”
3 Nanrona fane Pailat yarine Jisas nanrona,
“Yene king e nu Juda wee?”
Ka wu yire nanrona,
“Mi e yene yireye namo sa resukru.”
4 Pailat yemei ka yirengkle nu bikpris ka pinuma mingklari nanrona,
“Ki fi kapu ompla wongke fafaile ese pone kotim mana mee.”
5 Ka uma mingklari numplewa mi wunini ka nire mi kero nanrona,
“Mana namo pai mokoi mingklari e Judia.
Wu yemei distrik Galili yangke ompla yolowi plele mokoi mee.
Ka wu yukule nu pinuma ka fa yangke fafaile nu uma mi plai fa yereryane wolpuna nunini.”
Nu kotim Jisas ungklampren e Herot
6 E Pailat yupu mi nunini namo ka wu yarile nu nanrona,
“Mana namo mokoi wunini sa distrik Galili wee?”
7 E Pailat namale nanrona Jisas sa yolowi pike rola e king Herot fa yuruye,
fane wu yawane Jisas pai king Herot.
King Herot re waiye taun wamo Jerusalem e taim namo.
8 E Herot yuru Jisas wu woluporo wamo,
e fika,
isi ka wi plele mee wu samo yire yuru Jisas.
Wu yupu mi wunini nanrona fane wu yire ese yuru Jisas yangke mirakol wongke.
9 Herot yuyari Jisas mi mingklari,
ka Jisas fi yireni wu mi wongke.
10 Nu bikpris e tempol ka nu uma e namale lo re,
naine plau koii namo ka nu kar kerone mi wongkwongkeni ka kotim Jisas.
11 Herot yakle nu iimuma woneni ouwnire Jisas ka nire mi fafaile wu.
Nu nangke nanrona ka nem amprapi plol wongke niperini wu ka nawane wu pai kore Pailat.b
12 Isi Herot yane Pailat fa wolpuna nenine wonyane kore,
e wermee,
wuyane nemei fori uporo.
Pailat yirengkle nu ese noꞌna Jisas yapa kruse
(Matyu 27.15-26; Mak 15.6-15; Jon 18.38–19.16)
13 Pailat mi paiye nu bikpris e tempol ka nu uma fa painri risi nu pinuma ka uma mingklari ese noloni nemnoku.
14 Nu noloni nemnoku ka wu yirengkle nu nanrona,
“Pone pumane mana namo pane polopi ki ka pone pire nanrona wu fa yangke nu uma wolpuna nenine gapman.
Pupu!
Ki samo karine wu ka kupu mi wunini namapren e pone ka ki fei kapu ompla wongke fafaile,
ese pone kotim wu.
15 Herot re namale ompla namo pu,
nanrona fane wu yawane wu yolowi kore mone.
Pupu.
Mana mee fi yangke ompla wongke fafaile fa ki kire wu ese ri.
16-17 Nanrona fane ki ese kirengkle nu iimuma nufu wu ka ki ese kawane wu pai.”c
18 Ka nu awail nangke mi kero ka nire nanrona,
“Pufu mana namo ri ka pupone Barabas sa yolo moile.”
19 Barabas wu sa mana isi nu nina waiye kalabus fa waraiye yakle gapman nopune taun ka wu e yufu mana wongke ri.
20 Pailat wola yire wu ese mew yimane Jisas pai,
nanrona fane wu fa mi kero kore nu pinuma.
21 Ka nu nire mi kero nire nanrona,
“Poꞌna wu yapa kruse!
Poꞌna wu yapa kruse!”
22 Ka wu fa yirengkle nu kore nanrona,
“Wu se yangke ompla fika fafaile?
Ki fei kapu ompla wongke fafaile wu yangke sa ese wu ri.
Nanrona fane ki ese kufu wu ka mew kimane wu pai.”
23 Ka nu nangke mi kero wamo Pailat ka nire nanrona,
wu ese yoꞌna Jisas yapa kruse.
Nu nangke mi kero wamo pai pai wola mi e nu yumaro mi e Pailat.
24 Nanrona fane Pailat yupene wolpuna nunini ka yire yangke ommo yukaine uma mingklari nireni wu e yangke.
25 Pailat mew yimane mana isi nu nina waiye kalabus e yakle gapman nopune ka yufu mana ri yolo moile.
Ka e Jisas,
Pailat wu yire pu wu ese yupene wolpuna nunini.
Nu noꞌna Jisas yapa kruse
(Matyu 27.33-44; Mak 15.22-32; Jon 19.17-24)
26 E nu numane Jisas painrine,
nu nane mana wongke e taun Sairini,
noula Saimon yolowi yire pai taun wamo Jerusalem.
Nu nuna wu ka nane kruse e Jisas fa wu yongkole ka yupene wu.
27 Pinuma mingklari nupene Jisas.
Pinmana mingklari nupene Jisas mew nuꞌfro wolpoku noneni,
niri wu wamo.
28 Jisas yensona ka yirengkle nu nanrona,
“Pone pinmana e Jerusalem,
pone fa piripe ki,
pone piri pone kore ka kongkom poneni.
29 E fika,
kaire ese yolowi,
pone ese pire nanrona,
‘God blesim nu pinmana e fi fa rengkinine kongkom ka nu pinmana e fi nuꞌpu kongkom ka nale roro.’
30 ‘Ka nu ese nirengkle moul ala wamfafai nanrona:
“Pone pikari polo mu!”
Ka moul arwola pitirpitiri:
“Pone puforo mu!” ’
31 E fika,
le nu uma fa nangke ompla namo e taim ilo fei row ka ese nu nangke rongkele e ilo namo row?”d
32 Mana plainrane isi nangke ommo fafaile,
nu numane wuyane painri ese nufu wuyane rili plau.
33 E nu noloni plele koii nouw Ikakro Rinra,
nu noꞌna Jisas yapa kruse plau mana plainre isi nangke ommo fafaile.
Mana plainre namo,
wongke nu noꞌna yapaye mew menrulpo e Jisas ka wongke sa yapaye mew aiyalpo e wu.
34 Ka Jisas yire nanrona,
“Aina,
yene wolyumaro ommo fafaile e nu nangkene.
E fika,
nu fei namale ompla fika e none nangkene.”
Ka nu raraku satu ka nepi ommo rile e Jisas pai none.
35 Uma mingklari neri nurune nro,
ka nu uma e painri risi pinuma namo nangke mi pingki ka ouwnire mi plai Jisas.
Ka nire nanrona,
“Wu e mewmew nu uma plai,
e fika ka wu fei mewmew wone.
Le wu yire yuku mone wone sa Krais e God,
mana God wone yaure sa wu mewmew wone kore.”
36 Nu iimuma re noloni ka nukainene wu,
ka nane wu mii kero nouw viniga fa wu ese yaikowo.
37 Ka nu nireni wu nanrona,
“E yene king e nu Juda,
sa yene mewmew yene kore.”
38 Nu noꞌna mi rola pitiri yapa kruse riri e wu ikakro yen.
Mi namo sa yire nanrona:
MANA NAMO WU KING E NU JUDA.
39 Mana plainrane nu noꞌna wuyane napa rep repo e Jisas,
wongke ouwyire Jisas yire nanrona,
“Yen yire yene sa Krais wee?
Yene mewmew yene ka kikane plau!”
40 Ka wongke e yapaye repo,
yenre wongke e yireye Jisas ka yireni nanrona,
“Yene fei yumye God wee?
Eni namo e yene yungkam,
sa yukaine wu re yungkamye.
41 Ommo e nu nangkene monkawe sa resukru ommo fafaile e monkawe mangkeme.
Ka mana mee wu fi yangke ompla wongke fafaire.”
42 Ka wu yire kore nanrona,
“Jisas,
wolrufu ki e yene pai waiye yuruye kingdom yeneni.”
43 Ka Jisas yireni wu nanrona,
“Ki kirewi yene mi alwone,
esemee monkawe ese maime heven.”
Jisas ri
(Matyu 27.45-56; Mak 15.33-41)
44 E kaire wi yeri iplele ka moule ningki yolo samo yuforo pike pai plele 3 kilok ningkipopri.
45 E taim namo kaire fei ali ka amprapi wamo fa yapaye tempol monre peperi plol plainre.
46 Ka Jisas yangke mi kero wamo ka yire nanrona,
“Aina,
ki kawe malma kinini pai mew yeneni.”
E wu yire mi namo ka wu yingklam pouwe.
47 Kepten e nu iimumae yuru ompla namo yemei ka wu yereri noula e God ka yire nanrona,
“Alwone la,
mana namo wu sa mana uporo nama e God.”
48 Taim uma mingklari e nemnoku neri nurune ommo namo nemeine,
nu wolpuna eni wamo ka mew nariri wolpoku noneni ka nu kenkenra painri.
49 Ka nu uma e namale wu ka nu pinmana e nupenene wu noloni distrik Galili neri as amon ka nurune nro ommo mingklari e nemeine namo.
Nu niꞌna Jisas
(Matyu 27.57-61; Mak 15.42-47; Jon 19.38-42)
50 E kaire namo mana wongke noula wunini Josep,
wu sa mana wongke e nu irauma e nu Juda fa nupune kot ka wu fa yangke nale uporo nro nama e God.
51 Isi nu irauma plai nuka mi nire nufu Jisas,
wu sa yum.
Mokoi e Josepni sa taun Arimatea,
waiye distrik Judia.
Ka wu waiye yori kingdom e God ese yolowi.
52 Josep pai Pailat ka yarine fa yongkole puꞌlo e Jisas pai yiꞌna.
53 Nanrona fane wu remane Jisas yapa kruse yunyolo ka amprapi yukaro wu ka pai yina wiye roma pulale fa nirine uma.
Roma pulale namo,
yeye piyewa e moul arwola wongke.
Ka rompulale namo,
nu fei niꞌna mana wongke.
54 Kaire namo nu ese samo kampruno ommo,
e fika kaire e Sabat sa yolowi ekrene pu.