Jisas yemei kore
(Matyu 28.1-8; Mak 16.1-8; Jon 20.1-8)
24
Sande ningkinama nole,
nu pinmana nuꞌpu sanda ka ommo wel e isi none saimoro ka painri koii e nu nina Jisas waiyeye.
2 Ka nu nuru roma wamo e isi nu nakrau rompulale namo nu uma plai nine pai waiye piyewa.
3 Ka e nu panri rompulale,
nu nuru nanrona puꞌlo e Manawamo Jisas re fei waiye.
4 E nu nerine ka wol mingklari ommo fika ese nu wolrufu,
wampane nro mana plainren naile ommo wow yukaine nemi e aliye noloni ka neri ekrene nu.
5 Nu pinmana num wamo ka kulipanro ka nuru ruwe.
Ka mana plainren namo nirengkle nu nanrona,
“E fika ka pone papu mana waiye laip koii e nu uma isi rili?
6 Wu fei waiye mee,
wu yemei pu.
Pone wolrufu mi e isi wu yireliye pone e wu yape pone paipepe distrik Galili.
7 Wu isi yirewi pone nanrona,
‘Auna e Mana,
nu ese nane wu pai mew e nu uma e nangke nale fafaile ka nu ese noꞌna wu kruse ka wu ese ri.
Ka kaire plainrikera sa wu ese yemei kore.’ ”
8 Nanrona fane nu pinmana,
wola kore mi e Jisas.
9 E nu nupone rompulale ka painri kore,
nu noprongkle nu 11pla disaipol ka nu uma plai ommo mingklari e none nuru ka nupu.
10 Maria e taun Makdala,
ka Joana ka Maria wongke Jems moka ka nu plai kore e nakle nu noloni noprongkle nu aposel mi namo.
11 Ka uma mingklari namo,
fei bilipim mi e nu pinmana namo.
E fika nu nire nanrona mi e nu pinmana namo alwone wee.
12 Ka Pita yemei ka priri pai roma pulale isi Jisas ri wiyeye.
Wu kulpalo ka yinra pari roma pulale ka yuru ommo amprapi nro nainene.
Ka wu yemei pai kore ka wolaye ompla namo ke yemei rongkele.
Mana plainren nuru Jisas rokoi e paiye Emeus.
13 Kaire namo,
disaipol plainre e nu namo nupene rokoi e pai mokoi wongke nouw Emeus.
Le yene waiye taun wamo Jerusalem ka yire pai mokoi Emeus sa yukaine 11pla kilomita.
14 E wuyane painrine rokoi,
wuyane noprone ommo mingklari e nemeine.
15 Ka e wuyane nopro mi painrine,
Jisas wone yemei wuyane ka yakle naraine plau rokoi.
16 Ka God yangke wuyane fei namale wu.
17 Ka wu yarine wuyane nanrona,
“Yenyane ke popro ompla fika,
e yenyane paraipe rokoi?”
Ka e wu yarine wuyane mi namo,
wuyane neri ka ungklama e wuyane nangke nire nirinale.
18 Ka wongke e wuyane,
noula Kliopas ke yarine wu nanrona,
“Uma mingklari noloni naine taun wamo Jerusalem ka yene wokera nro fei namale ommo fika e nemeine taim namo wee?”
19 Ka Jisas yarine wuyane kore nanrona,
“Ommo fika?”
Ka disaipol plainren nireni wu nanrona,
“Mi e Jisas e taun Nasaret.
Wu sa profet wongke,
ka wu sa kero,
yopro mi kero nama e God ka nu uma mingklari.
20 Nu bikpris e tempol ka nu uma fa painri risi mone,
nuka mi e nufu wu ka nane wu painri nu uma fa noꞌna wu yapa kruse ka ri.
21 E isi mu bilip nanrona wu mana God wone yaure e yuꞌpu kore nu Israel.
Namee sa onne.
Ka seke ompla namo nro,
wu ri ka namele kaire plainrikeraa wu waiye pike pulale.
22 Ka ompla wongke re,
pinmana plai e mu nangke mu wolnipanrini.
Kowerme ningkinama nole,
nu painri koii e Jisas puꞌlo waiyeye.
23 Ka nu fei nuru puꞌlo e wu waiye koii namo.
Nu niremi mu nanrona nu nuru ensel,
ka ensel nireli nu nanrona Jisas yemei kore pu ka waiye laip.
24 Ka nu plai e mu re painri koii namo ka noloni niremi mu nanrona nu nuru koii namo yukaine mi e pinmana niremi mu.
Ka puꞌlo e Jisas wone,
nu fi nuru.”
25 Ka wu yireni wuyane nanrona,
“Yenyane ikakro onnele.
Wolpuna e yenyane fi wampane bilipim mi e nu profet e God isi noprone.
26 Yenyane fei namale rona Kraisb isi yolowi ese yungkam eni namo,
se sa God ese yane wu glori?”
27 Wu yoproye mi nomu mingklari e Moses ka nu profet nilene buk e God,
nirene mi e wone nro.
28 E nu noloni ekrene mokoi e wuyane nire painrine namo,
Jisas yire as kar yupene rokoi namo pai.
29 Ka disaipol plainren mi naure wu ka nireni wu nanrona,
“Yene e yane kikane maime mee,
e fika moul ningkipopri pu,
e ningki yene.”
Nanrona fane Jisas pai pari monre yane wuyane naine.
30 E Jisas yane wuyane nainene fa e no ompla,
wu yem bret wongke ka wu yesapu ka yekri bret ka yane wuyane.
31 Wu yangke nanrona ka God yangke wuyane nampeperi wu ka wu karpekini ka wuyane fei nuru wu.
32 Ka wuyane nopro wonyane kore nanrona,
“E monkawe molomime rokoi,
wu yame monkawe mopro mi ka wu yeingkyane mi nomu monkawe nanrona buk e God yoproye ka mi namo yereryane wolpuna e monkawe.”
33 Wuyane wampane nemei ka painri kore Jerusalem.
E wuyane painri plele Jerusalem,
wuyane nuru nu 11pla disaipol fa nupene Jisas ka nu plai e fa nakle naraine plau nemnoku nainene.
34 Ka nu nireni wuyane nanrona,
“Won alwone!
Manawamo yemei kore pu ka Saimon Pita wane wu.”
35 Ka mana plainren noprongkle nu uma e ommo mingklari nemeine wuyane rokoi ka wuyane nopro mi e wu yekri bret ka God yangke wuyane nampeperi wu.
Jisas yemei alele nu disaipol
(Matyu 28.16-20; Mak 16.14-18; Jon 20.19-23)
36 E wuyane naine noprone mi namo,
Jisas wone karyemei iplele nu ka yakle naine ka wu yirengkle nu nanrona,
“Pone paipe wolraulo.”
37 Nu wolmalmaran ka num wamo.
Nu ke nire nu ro nuru opola wongke.
38 Ka wu yirengkle nu nanrona,
“E fikami ka pone wolmingklari ka fei bilip?
39 Pone puru mew ka rew kinini.
An ki kone fane!
Pone polopi ka puna ki ka pone ese namale nanrona an ki kone.
Ki sa koya ka rinra plau seke yukaine opola.”
40 E wu yoprongkle mi namo pekimo,
wu yuku mew ka rew e wone.
41 Nu nuru wu ka nu wolmalmaran ka woluporo wamo,
ka nu fei bilipim ompla namo ese yemei.
Ka wu yirengkle nu nanrona,
“Pone penru ommo plai naine sa ki ko?”
42 Nanrona fane nu nane wu firala plola wongke e nu nampo,
43 wu wo,
ka nu naine nurune wu.
44 Ka wu yireli nu nanrona,
“Ommo namo ki isi kireli pone e ki kape pone maimeme.
Ommo yukaine isi nu neꞌre nopro ki nilene lo e Moses ka buk e nu profet ka Buk Song ese nemei alwone.”
45 Ka wu yangke nu nampeperi mi nomu wiye buk e God.
46 Ka wu yireli nu nanrona,
“Buk e God yire nanrona:
Krais ese yungkam eni ka ri ka kaire plainrikera,
wu ese yemei kore.
47 Ka noula e wu nro nu ese mi nufu pai uma wongkwongkeni sa nu ese nensona ka nuplen ommo fafaire nu fa nangkene ka God ese yupone ommo fafaile namo.
Ompla namo ese yemei taunwamo Jerusalem se,
sa pai mokoi plai.
48 Pone ese paipi ka mi pufu ommo namo e pone purupe.
49 Ekreneye ki ese kape pone ompla resukru Aina kinini yireye ese yape pone.
Ka pone paipe taun wamo Jerusalem nro pai la God yape pone kero se.”
Jisas pari kore heven
(Mak 16.19-20; Aposel 1.9-12)
50 Ka wu yumale nu nupone taun wamo Jerusalem ka painri koii wongke yeye ekrene mokoi Betani,
ka wu yereri mew plainre ka blesim nu.
51 E wu blesim nu,
wu yupole nu ka God yem wu pari heven.
52 Ka nu fuful nokle ka nosinane wu,
ka nu sam ainem wamo ka painri kore taun wamo Jerusalem.
53 Ka nu fa nainene tempol nro nereri noula e God.