2 Hamach hödegpain mag hi tꞌõopʌ̈iju kꞌĩirju naajieb mamʌ,

jũrr tagam kꞌʌʌnau,

“Keena,

mʌg nemkꞌoo hee maadëu hi tꞌõoba sĩuju.

Magba hakꞌiin hõor pöm mʌg wëjöm maach dʌ̈ita meeukꞌaju” haajeejim hanʌm.

3 Mag nʌm hee Jesús Betania pꞌöbördam hee mawi woun Simón hanʌm deg tꞌach kꞌö sĩejim haajem.

Hich mag Simón hibʌʌr wauwi “pꞌĩe paraa kꞌitarr” ha tꞌʌ̃ʌrjeejim haajem.

Maig hi tꞌach kꞌö simta,

hʌʌi hãb jʌ̃gdee didam durrkꞌudau alabastro hanʌm dën boteedidam wau kꞌitʌm dʌ̈i dubchëjim haajem.

Mag hee jʌ̃gdee narrdo hanʌm dën tꞌũpaaga sim hipir haibëejim haajem.

Mag jʌ̃gdee kꞌĩir nem parhẽpag sĩerrʌm.

Mag sim dʌ̈i jua hee dubchëwi,

chi boteedidam hö kꞌõorpnaa,

hõor dakꞌĩir Jesús pör hee choopʌ̈ijim hanaabá.

4 Mes gaai hi dʌ̈i hãba tꞌach kꞌö narr kꞌʌʌnau hamach daúa mag jʌ̃gdee parhẽpagkꞌamta sĩi hi pör hee choobapʌ̈im hoobaawai hãaur kꞌʌʌnau wir haigpai hamach kꞌapeenag,

—Keena,

¿kꞌantꞌeeta jãg jʌ̃gdee parhẽpag simta sĩi jãg hãr choobarma?

hajierram hanʌm,

5 jãg sĩi par hãr chooju kꞌãai,

parhẽpꞌʌ përpʌ̈iwia hag pꞌatkꞌonau hʌ̈u dau hapꞌʌʌm kꞌʌʌn kꞌĩirdam jãsenkꞌaju haai sĩerrtá.

6 Mag bigaaum kꞌʌʌnau magbaawaita jũrr hich Jesuu hamag,

—¿Kꞌantꞌeeta pãrau mag hʌʌi kꞌĩir naau hiekꞌa nʌma?

hajim hanaabá.

Jãgbarmua hirua mʌ dʌ̈i hʌ̈u habarm kꞌabahab;

hidëu hi sĩi kꞌajapꞌa sĩubat hajim hanʌm.

7 Dau hapꞌʌʌm kꞌʌʌndaman pãrau pãach hee hich jãg hoo wai wënʌrrajugui hajim hanʌm.

Maagwai pãachdëu nemdam deem kꞌõsim haig pãrau hamag deeju haai naabahab;

pari mʌ chan pãrau pãach hee hich mag mʌ hoo wai wënʌrrabaju.

8 Mʌg hʌʌirau hichdëu kꞌĩirjuawai hajapcha simjöta habarbahab mʌ dʌ̈i.

Mʌg mʌ pör hʌ̃r jʌ̃gdeeu choobarmua mʌ meebaadeewai haukꞌëraan harrju nawe ya hirua mʌ kꞌa pꞌuur sim kꞌabahab hajim hanʌm.

9 Magnaa,

Hĩs mua chadcha pãrag mag chirʌmgui hajim hanʌm:

Mʌg hatag pawiajã durrpierr Hẽwandamau hõor peerdʌ haaujem hiek jaau wënʌrrʌm dʌ̈i hĩchab mʌg hʌʌirau mʌ dʌ̈i mʌgbarmjã jaaub kꞌaba jaauju.

Mag,

hooba harr kꞌʌʌnaujã hĩchab hi hiigjeejugui hajim hanʌm.

10 Mag pꞌadnaan chi pörnaanau Moiseeu Hẽwandam hiek pꞌã pʌatarr jawaag chi machnaan dʌ̈imua hich Jesús dakꞌãu wai nʌm hee,

hich dʌ̈i doce wënʌrraajerr heem hãb Judas Iscariote ha tꞌʌ̃r sĩerrau pꞌadnaan chi pörkꞌa nʌm kꞌʌʌn dʌ̈i hiekꞌaan majim haajem,

jãga hichdëu hamag Jesús pʌr deeju ha jawaag.

11 Maimua mawia chadcha Judaau hamachig Jesús pʌr deeju ha hũrbaawai chi pꞌadnaan pörkꞌa nʌm kꞌʌʌn honeeu pꞌöbaadëwia chi Judaag pꞌatkꞌonpa deeju hajierram hanaabá.

Hichig mag pꞌatkꞌonpa deeju habaawai chará hãba hi himeraa pʌr hauwia warre hamag hamach jua hee deeju kꞌĩirjugpaita wai sĩsijim hanaabá.

12 Pan levadura chukꞌu wauwia warrpem pꞌiesta burr nʌm hedcha judionaanau nemkꞌoo jaram hitꞌee ovejadam tꞌõowia hedau kꞌëubaadeewai kꞌoojem.

Magua hich mag hedcha Jesús kꞌapeenau hirig,

—¿Jampaita marau pʌ na pꞌiejãb wauwimaju haai nʌma?

hajierram hanʌm.

13 Mag hichig jëeubaawai hich kꞌapeen heem numí hich haig tꞌʌ̃rkꞌa hauwi pʌ̈yaagpamua hamag,

—Pãar maar na Jerusalén pꞌöbörög hërëubaadët hajim hanʌm.

Nau pãar ya pꞌöbör hee paaukꞌabaimaawai pãrau woun hãb dötꞌũr hee dö jöi harrum hooimajugui hajim hanʌm.

Mag woun dötꞌũr dʌ̈i mam hoobaawai hi hẽudee wëtwi,

14 hi dubbaimam deg dʌ̈i dubwia,

chi dikꞌʌʌg mʌ himeerba,

“Maestroou pʌrʌg jëeupijim,

¿jamta hí hich kꞌapeen dʌ̈i hãba nemkꞌoo jaram tꞌach kꞌöju haai chirʌ́?”

ha jëeubat hajim hanʌm.

15 Magbaawai mag wounau pãar hʌ̃gtꞌaa warrwia dijã pöoma sĩi wajappꞌa jar sim pãrag jaauju.

Maigta pꞌiejãb wauwia sĩi maar na wajapꞌa nem kꞌĩir kꞌaug sĩubat hajim hanʌm,

mag hich kꞌapeen hichdëu pʌ̈iju kꞌʌʌnag.

16 Jesuu hamachig magbaawai,

chadcha hi hipierr Jerusalén pꞌöbörög hërëuwia hooimaawai,

chadcha hamachig jaautarrjö hooimajierram hanaabá.

Mag hoobaimaawai maig mag nemkꞌoo jaram ovejadam wai narr wauwia sĩi hi baraata hoo nʌisijim haajem.

17 Mag hich na numí pʌ̈itarr haawai ya kꞌeeuraa haadëm hee,

tagam kꞌʌʌn dʌ̈i barjim haajem,

warm kꞌʌʌnau pꞌiejãb wau wai narr haar.

18 Mag barbaimaawai tꞌach tꞌöikꞌawia ya hãba mes gaai kꞌö nʌmua Jesuu hamag,

—Keena,

mua warre pãrag jaaukꞌimgui hajim hanʌm:

Mʌ cha hiekꞌa chirʌm hiekꞌau maach kꞌapeer mʌig maach dʌ̈i hãba tꞌach kꞌö simuapai tꞌetꞌem kꞌʌʌnag mʌ pʌr deejugui hajim hanʌm.

19 Jesuu hamachig mag hiekꞌabarm hũrwia warre hökꞌĩirjuu nʌisijim hanaabá.

Mag hökꞌĩirjuu nʌm hiekꞌau jũrram kꞌʌʌnau hirig jëjëeu haajeejim hanʌm,

chijãguata magju kꞌap haag hawi.

20 Mamʌ par mag hichig jëjëeukꞌamjã hamag chi tꞌʌ̃rjã jaauba,

sĩi,

—Pãach mʌg doce nʌm heem hãb mʌ kꞌö chirʌm tꞌëp hee hich panau sĩkꞌö sim wounauta mʌ kꞌaibag waujugui hajim hanʌm.

21 Mʌ dʌ̈i magbarmua Hemkꞌooi Hiewaan Hẽwandam hiek pꞌã sim gaai jaau simjö hich hag heyaata höbëbërgmam.

Mamʌ ¡hëh,

hapkꞌiitʌ chi mag mʌ përpʌ̈i sim woun!

Hante magju kꞌapnaa tꞌaababa harr hamuan hʌ̈ucha hakꞌamgui hajim hanʌm.

22 Maimua mag hiyʌ̈ʌ tꞌach kꞌö nʌmua Jesuu pan jua hee hauwia,

Hẽwandamag hʌ̈u hajim hanaa kꞌõreunaa hamag hʌapʌ̈inaa,

—Mʌg pan kꞌöbat.

Mʌ mʌ morougui hajim hanʌm.

23 Maimua hich hagjö jarrdamjã jua hee hauwia,

hag paar Hẽwandamag hʌ̈u hajim hanaa,

deeu hamag hʌapʌ̈ijim haajem.

Magbaawai tꞌumaam kꞌʌʌnau hag heem döjierram haajem.

Mag hʌapʌ̈iwia hich Jesuupai magjim hanʌm:

24 —Jãg döbarmʌn mʌ bagau,

warrgarwe Hẽwandamau hõor dʌ̈i hiek deeju haajerr.

Mamʌ mʌg hiekꞌan hiek hiiuriugui hajim hanʌm.

Mʌg pãar hitꞌee mʌ bag mʌg vinojö kꞌitʌm hãrbarmuata Hẽwandamau,

hĩsmua hatagan chadau pãar peerdʌ wënʌrraju haai nʌm ha jaau simgui hajim hanʌm.

25 Maimua,

Mua warre pãrag jaaukꞌimgui hajim hanʌm:

Mʌg vino döbarm haigmua mua chan tag döba,

hãba Hẽwandamta tꞌumaam kꞌʌʌn Pörkꞌa sĩsim hedta deeu hag kꞌãyaujã hajapcharamta döjugui hajim hanʌm.

26 Jesús mag hich kꞌapeen dʌ̈i hãba mes gaai hiyʌ̈ʌ tꞌach kꞌö naawia,

meukꞌaarjã Hẽwandam hiek Salmos hanʌm gaaim hauwia,

Olivo durrsĩig hërëujim haajem.

27 Mag wëtwia mam pabaimaawai hich Jesuu hamag magjim hanʌm:

—Nau pãach tꞌumaam kꞌʌʌnau mʌ mʌch happai barpʌaju.

¿Jãgwi mag chirʌ́?

Hich warrgarwe Hẽwandam hi jaaumienau Hẽwandam hiek pꞌã pʌarr gaai hich mag haju ha sĩewaima.

Mag hamau pꞌã pʌarr gaai jaauwai,

Hẽwandamau hʌdʌraa chi nemchaain pap hõrag tꞌõopiju ha sim,

mʌ higwia.

Mag mʌ tꞌõopʌ̈yaag pʌr hatꞌaawai pãar sĩi nemchaainjö parhoob pãach papjã kꞌaugba,

chawag haaidʌju ha pꞌã simgui hajim hanʌm.

28 Pari mag mʌ tꞌõopʌ̈iwiajã deeu hiiu pꞌiidʌwia mʌchta pãar na majugui hajim hanʌm,

Galileaag.

Mamta deeu pãar dʌ̈i hoojugui hajim hanʌm hich kꞌapeenag.

29 Jesuu mag hiekꞌabaawai Pedroou hirig magjim hanʌm:

—Mʌ kꞌapeenau pʌ hogdʌwia chawag haaidʌtkꞌawiajã mʌ chan bʌ̃ʌrjã pʌ haigmua chawag hogdʌbamgui hajim hanʌm.

30 Pedroou hichig magbaawai Jesuu hirig,

—Pʌ mag hiekꞌa chirab mamʌ,

cha mʌ hiekꞌa chirʌm hiekꞌau nau hãspajuag hãtꞌãrr biek numí bĩeju nawe hõrau pʌchig jëeubaawai pua biek tꞌãrjup mʌ kꞌaugba chitʌm hajugui hajim hanʌm hichigcha.

31 Magbaa Pedroou jũrr hirig,

—Pʌ tꞌõbaimam haar tꞌõimaju hawiajã mua chan pʌ kꞌa hogdʌbajugui hajim hanʌm.

Pedroou mag hijẽjẽb kꞌaawai tagam kꞌʌʌnaujã hich hagjö,

“Maraujã pʌ kꞌa hogdʌbaju” ha hiekꞌa naajim haajem.

32 Jesuu hich kꞌapeen hich dʌ̈i pꞌë harrwia nemjĩirdö Getsemaní hanʌm hee barwia hamag,

—Mʌ chum Hẽwandamag jëwaan mamich,

pãar mʌig nʌisit hajim hanʌm tagam kꞌʌʌnag.

33 Magpet hawi tꞌãrjuppai hich dʌ̈i pꞌë harrjim haajem:

Pedro,

Santiago maimua Juan.

Maimua hamach happai hapꞌöbaadëm haig,

Jesús nem hökꞌĩirjuuga haadëmua gaai machaaga haadëjim haajem.

34 Hich magbaadeewai hichdëu hamag magjim hanʌm:

—Mʌʌn dëgölp gaai machgau hökꞌĩirjuuga haadëm;

hãba mʌch tꞌõjuuta kꞌĩirju chirʌmgui hajim hanʌm.

Pãar mʌig nʌisit,

mamʌ daukꞌana habat.

Hoob kꞌãimiet hajim hanʌm hamag.

35 Magpet hawi hichin hag hatgajãrpai kanieu pꞌõbkꞌanaa,

jẽb gaai dagau dʌrnaa,

Hẽwandamag jëeumamua hi gaai machag hãwatpibaju hakꞌiin hʌ̈u hakꞌam ha jëeumajim haajem.

Magnaa,

36 —Tata,

pʌ hitꞌee chan bʌ̃ʌrjã pꞌitꞌurm nem chukꞌum.

Pua kꞌõs chirʌm kꞌai mʌ peerdʌ hatꞌá hajim hanʌm,

mʌ dau hapꞌʌʌ haju nawe.

Pʌrʌg mua jëeu chirʌm,

mamʌ mʌchdëu kꞌõsi chirʌmjö kꞌaba pʌchdëu kꞌõsimjöta habá mʌ dʌ̈i ha jëeumajim haajem.

37 Mag jëeu sĩewi ham haig bëewi hoocheewai ham kꞌãi nʌmta hoochëjim hanaabá.

Magbaawai jũrr Simonagta,

—Pʌʌn sĩita kꞌãi chirabma.

Pʌ chan horadam hãbjã pöd daukꞌana haju kꞌabahab hajim hanʌm.

38 Sĩi jãg kꞌãi nʌʌ haju kꞌãai Hẽwandamagta jëeubat hajim hanaabá,

dösãtag hʌdʌʌr pãach tꞌʌ haupim hugua.

Mua hoowai pãach hödiiwan chadcha pãrau jëeum kꞌõsi durrumta pari dapꞌökgauta pödba nʌmgui hajim hanʌm.

39 Mag hiekꞌa pʌawi deeu ham haigmua petajim haajem.

Maimua Hẽwandamag hichdëu nacha jëeu sĩerrjö hich hag hiekpai hiekꞌamamua deeu jëeumajim haajem.

40 Mag jëeu sĩi hawia deeu hoon bëewaijãh,

hi kꞌapeen dapꞌökgau pödjã dau hẽeba,

sĩi kꞌãidʌtkꞌa tꞌʌnʌmta hoochëjim hanaabá.

Mag dapꞌökgau pödjã dau hẽepiba tꞌʌnaawai Jesuu hamachig hiekꞌabaichëmjã pöd hi hiek hʌ̈kꞌaju kꞌaugba naajim hanʌm.

41 Mag biek tꞌãrjupam gaaijã hagtꞌa kꞌãidʌtkꞌa tꞌʌnʌm hoobaicheewaita deeu hamag,

—¿Hagtꞌa pãar sĩi kꞌãai gaaita nʌ?

Kꞌãigap nem pʌabat hajim hanʌm.

Pekau pöm sĩsidʌm kꞌʌʌnag mʌch chi Hemkꞌooi Hiewaa pʌr deeju hora pabaichëbahab.

42 Pꞌiidʌtkꞌabat,

maimua maach kꞌapeen haar wëttarrau hajim hanʌm.

Mʌ hoomapꞌam kꞌʌʌnag mʌ pʌr deeju wounan ya dakpa hurumgui hajim hanʌm.

43 Jesús hagtꞌa mag hiekꞌa dʌnʌm hee,

hich kꞌapeenpai mag doce narr heem hãb Judas hanʌmta hõor pochag hurajim hanʌm.

Mag wëdurum kꞌʌʌnan hãaur kꞌʌʌn sĩi espaar jua panhapꞌa bëe tꞌʌnaawai tagam kꞌʌʌn sĩi pa dʌ̈ijã bëe tꞌʌnaajim haajem.

Makꞌʌʌn pꞌadnaan chi pörkꞌa nʌm kꞌʌʌnau Hẽwandam hiek jawaag chi machnaanau tagam kꞌʌʌn jöoin chi pörnaan dʌ̈imua pʌ̈itarr kꞌʌʌn hajim haajem.

44 Mag chadcha hõor pochag bëewi ya chi Judaau hag nawe,

“Nau mua mawia pãach dakꞌĩir kꞌĩir hʌ̃ʌ hatꞌamta pʌr hauwia hatꞌaadët” ha jaau wai sĩerr haawai,

45 chadcha hich dʌ̈i wënʌrrʌm kꞌʌʌn dakꞌĩraa hichdëu jaautarrjö Jesús dʌ̈i hãba dʌnʌʌuwimawia hirig,

“Maestro,

¿jãgpai chirʌ́?”

hanaa hi kꞌĩir hʌ̃ʌ hatꞌajim hanaabá.

46 Magbarm bʌ̈rre chi soldaaunau Jesús pꞌʌʌr tꞌuur hauwia hi pʌrpꞌöbaadëjim haajem.

47 Mamʌ chi kꞌapeen hi dʌ̈i wënʌrrarr kꞌʌʌnau hamach dakꞌĩir mag hamach kꞌapeer pʌrpꞌöbaadëm hoobaawai hãbmua hich espaar chi baindegam sʌrr ha jẽu haunaa waa pꞌadnaan tꞌumaam kꞌʌʌn pör hag chog kachta bis habarmʌn hoortꞌu werbpʌ̈ijim hanaabá.

48 Mag hich pʌrpꞌöbaadeewai Jesuu hamag,

—¿Pãrau hoowain mʌʌn sĩi hõor nem jĩgkꞌanaa hõor tꞌõomiejöta chirab hajim hanʌm,

jãg pãrau sĩi mʌ haig jua hee jierrnem panhappai bëeg hitꞌee?

49 Hag na hed hëepierr pãrag mua Haai hi jëeujem deg Hẽwandam hi jaaujeewai bʌ̃ʌrjã pãrau mʌ pʌr hauba harrta hĩsta chadcha pãrau mʌ pʌr hauju hed hajimgui hajim hanʌm.

Pari pãrau mʌ dʌ̈i mʌgbarmʌn,

jãan mʌ higwia hich Hẽwandam hiek pꞌã sim gaai jaau sim tꞌumaa hich hag hee höbëbërg mamkꞌĩirta chadcha mʌgbarmgui hajim hanʌm hamag.

50 Chi kꞌapeenau mag hamach dakꞌĩir hamach Pör pʌrpꞌöbaadëm hoobaawai tag hirigjã hooba,

sĩi warag kꞌapꞌig pꞌöbaadëwia hich happai barpʌajim hanaabá.

51 Mamʌ mag hamau hich happai hi werpʌawia hatꞌaadëm hee,

hẽwan hãb sĩerrauta sĩi börrjöoupai höpʌʌrnaa dʌ̈i hi hẽudee maa hajim haajem.

Mamʌ chi soldaaunau mag woun dʌ̈i mam hoo hatꞌaawai hi pʌr hawaag hẽkꞌa naajim hanʌm.

52 Pari mag hich gaai pʌrbaichee sĩi warag ham jua hee chi börrjö jẽu pʌawi hich jãg mor kꞌarr kꞌapꞌigbaadëjim hanaabá.

53 Soldaaunau mag Jesús pʌr hauwia hãb mag pꞌadnaan tꞌum tꞌʌnʌm kꞌʌʌn pörkꞌa sim haar warrjierram haajem.

Mag mam hi wai dubpꞌöbaadeewai haig pos haimajierram hanaabá:

tagam kꞌʌʌn chi pꞌadnaan pörkꞌa nʌm kꞌʌʌn,

judionaan Asamblea heem chi pörnaan,

maimua hagjö Moiseeu Hẽwandam hiek pꞌã pʌarr jawaag chi machnaanpa tꞌum hãba.

54 Mag hi pʌr hatꞌaadëm hẽudee hĩchab Pedroou sĩi warppaimua hoopʌ̈pʌ̈ig mawia pꞌadnaan pör sĩejem hag di hũjãrr dʌ̈i dubwi jupimajim haajem,

guardianaan Haai hi jëeujem di tꞌʌajem kꞌʌʌn bigaau.

Mag jupimawi hi hiek hõt huu tꞌʌnʌm bigaau dʌ̈i chi guardianaanpa hãba hõt kꞌãai hoo chirsijim haajem.

55 Maagwai pꞌadnaan chi pörnaanau judionaan Asamblea heem kꞌʌʌn dʌ̈imua chi Jesuu nem wauba harrta sëukꞌa hi gaai tꞌʌpʌ̈iju hẽkꞌaajeejim hanaabá,

magʌm gaaimua hi tꞌõopäaig.

Mamʌ chadcha hirua bʌ̃ʌrjã nem kꞌaigba wauba sĩerr haawai

56 parii hi kꞌaibag waupi jaau nʌm kꞌʌʌnaujã sëukꞌa nem hĩgkꞌam kꞌõchgau hamach hiekpai parhoob jaaubaadëpꞌʌmjã pöd hi pʌr hauba haajeejim haajem,

mag hihãbajã kꞌaba sĩi haaipꞌur nem jaaupꞌöbaadëp haawai.

57 Warm kꞌʌʌnau mamagkꞌam hee,

jũrr deeum kꞌʌʌn bʌ̈jãau paaukꞌabaadëwi chi tꞌetꞌemnaanag hich kꞌĩircha,

58 —Marau maachdëucha hi hiekꞌa sim hũurwain,

hirua mʌg Haai hi jëeujem di hõrau da hëu hauba harrjã sĩi tꞌum pogueupʌ̈iwia,

hõor juajã higba,

kꞌãai tꞌãrjuppaim hee deeu hëu dʌnʌʌuju ha hiekꞌa sim hũrjimgui haajeejim hanaabá jũrram kꞌʌʌnau.

59 Mamʌ par jũrram kꞌʌʌnau mamagkꞌamjã hihãbajã deeba,

sĩi warag maadëujã kꞌaugbata jaaupꞌöbaadëjim hanʌm.

60 Magbaa chi pꞌadnaan pöröu sĩi mag hõor pos tꞌʌnʌm hee pꞌiidʌbaadëwi Jesuug,

—¿Pua ham hiek hũr chirʌ́?

¿Kꞌan jãgwi jãg pʌ hiekꞌamapꞌa sĩ?

hajim hanʌm.

¿Pua chadcha mag hiekꞌajĩ wa hiekꞌabajĩ?

Jaaubá hajim hanʌm.

61 Mamʌ magʌmjã Jesuu bʌ̃ʌrjã jʌ̃ʌjã haba,

sĩi warag kꞌĩuu sĩsijim hanaabá.

Mag hich hiek hʌ̈kꞌaba habaawaita deeu chi pꞌadëu pʌaba jëeumamua hirig,

—¿Pʌʌta chadcha Hẽwandam Hiewaa hichdëucha jʌr hauwi pʌ̈iju jaaujerrá?

Marag jaaubá hajim hanʌm hirig.

62 Magbaa Jesuu,

—Hëera,

chadcha mʌʌugui hajim hanʌm.

Mʌg hatag pãrau mʌ Hẽwandam tꞌumaam kꞌʌʌn kꞌãaijã jua tꞌeeg hʌ̃rpai sĩerrʌm bigaau hi juachaar garcha jup chirʌmjã hoowi hʌ̃gtꞌarmua hedjã baug hee hurumjã pãach daúacha deeu mʌ hoobajup hajim hanʌm.

63 Jesuu hich dakꞌĩir mag hiekꞌabarm hũrbaawai chi pꞌadnaan pöröu hich kꞌajũa mor gaai jũa sĩerrta sʌrr habarmʌn warre jẽbpʌ̈ijim hanaabá,

kꞌĩir machgau.

Magwia hich kꞌapeenag,

—Keena,

¿kꞌan hatchata maadëu deeum kꞌʌʌnau jaau nʌmta hũrm hig nʌma?

hajim hanʌm.

64 Ya hirua hich hiiucha jaau sĩebahab hajim hanʌm.

Pãrau tꞌumaam kꞌʌʌnau hi hiekꞌabarm hũrbarm,

chadcha hirua Hẽwandam dau na kꞌaigba hiekꞌabarm.

¿Pãrau mʌg woun dʌ̈i jãga haju kꞌĩirju nʌ keena?

hajim hanʌm hich kꞌapeenag.

Magbaawai tꞌumaam kꞌʌʌnau hihãba,

—Jãan hiekkꞌõr pöm sĩewai hichiita tꞌõopʌ̈ijugui hajierram haajem.

65 Magpꞌöbaadëwi hãaur kꞌʌʌnau warag hi kꞌĩir gaai hichöoujã tꞌunaa,

putiujã hi dau pꞌãarjʌ̃naa,

hi gaai mas waunaa,

juajãaujã kꞌĩidadcha deejeejim hanʌm.

Magnaa hogtꞌom hirig,

—¿Kꞌaíuta pʌ gaai mas deejĩ?

Magan jaaubá haajeejim hanʌm.

Mag jũrram kꞌʌʌnau hi mag wai naawai chi Haai hi jëeujem di tꞌʌajem guardianaanaujã dʌ̈i hi kꞌĩidadcha deejeejim haajem.

66 Mam hierr Jesús dʌ̈i mamag kꞌaawai Pedro hiek hi di hũjãrr chirajim haajem,

daaugajãr.

Maig hi chirʌmta hi haig hʌʌi hãb bëejim haajem,

pꞌadnaan tꞌumaam kꞌʌʌn pörkꞌa sim hag chog.

67 Mag hʌʌirau Pedro hõt kꞌãai sim hoobaicheewai hi kꞌĩir heerpa wai dʌnʌʌ hawia hirig,

—Pʌjã hĩchab Jesús Nazaretpierr dʌ̈i nʌrraajem kꞌabahab hajim hanʌm.

68 Hichig magbaawai hi hiek hirua,

—Mʌ kꞌabam,

mua kꞌaugbam pua kꞌaita jaau sim kꞌai ha chirajim hanʌm.

Magwia warag dawag mawia puertdi daaugajãrm haar hi hootꞌẽu chiirbaimamta,

hãtꞌãrrta kekerekee haadëjim haajem.

69 Maimua deeu hũmaai chi hʌʌirau hichdëu hi hoobaawai haig hõor tꞌʌnarr kꞌʌʌnag,

—Chamʌg woun chadcha Jesús dʌ̈i nʌrraajerr kꞌabahab hajim hanʌm.

70 Mag,

biek numiim gaaijã Pedroou hirua magʌm Jesús kꞌaugba chitʌm hajim hanʌm.

Mamʌ hag kꞌur nʌʌpai hawia deeu hũwaai haig narr kꞌʌʌnau,

—Chadcha pʌʌn hĩchab Jesús kꞌaperau.

Pʌ Galileapierr kꞌabahab hajim hanʌm.

Maguata pʌ hiekꞌa sim hũurwaijã pʌ hiek gaai merag chukꞌu sĩsim kꞌapꞌöbaadëjim hanʌm hirig jũrram kꞌʌʌnau.

71 Pari hichig mag nʌʌ paawai Pedro hiek warag hirua chi Jesús higwia,

—Chadcha mua magʌm woun kꞌaugab chitʌmta mʌrʌg mag naab.

Mʌ sëukꞌa chirʌm kꞌai,

Hẽwandamau mʌ gaai jua kꞌʌaba deeju haai simgui ha chirajim hanaabá.

72 Pedroou mag hirua chan bʌ̃ʌrjã Jesús kꞌaugba chitʌm ha hiekꞌabarm hee,

deeu hũmaai chi hãtꞌãrrta kekerekee hajim hanaabá.

Mag hãtꞌãrr biek numí bĩe dichdimaawaita Pedroou warre Jesuu hichig hiekꞌamatarr kꞌĩir heyaa haadëjim hanʌm,

“Hãtꞌãrr biek numí bĩeju nawe pua biek tꞌãrjup hõrag bʌ̃ʌrjã mʌ kꞌaugba chitʌm ha hiekꞌaju” hichig Jesuu jaautarr.

Hichig magtarr tꞌumaa kꞌĩirju hatꞌaawaita warre hökꞌĩirjug machag haadëmua hicharaucha hö jãsehne bĩe chirʌʌ hajim hanaabá.