2 Jex wuẍtaj,

jex wanabꞌ,

chin tzala je yetoj yutol naꞌan jin cꞌal je yu tobꞌalkꞌinal,

cꞌal yu lalan je bꞌeybꞌalnen wan cuybꞌanile walnaj can ey jex.

3 Tol chi woche pax che yotajne eloj,

tol jaꞌ Cristo eyoc Yaawiloj junjun winaj,

jaxca tol sjolom yeocoj.

Jaꞌ naj yichamil ix ix,

jaꞌ naj eyoc yaawiloj ix,

jaxca yeoc Dios Yaawiloj Cristo.

4 Yal cꞌal mac winajil eya yenel sjolom yet chi txali ma yet chi yalon el skꞌane Dios,

jacꞌal oc chi yiꞌtej qꞌuixwanil yibꞌan sjolom,

jaꞌton Cristo.^a

5 Jacꞌalaꞌ pax ebꞌ ix ix tol cꞌam niꞌoj yenel eya yin sjolom yet chi txali ma yet chi yalon el skꞌane Dios,

chi yiꞌtej qꞌuixwanil ebꞌ yibꞌan sjolom.

Jaxca tol tzujbꞌil el sjolom ebꞌ tuꞌ.

6 Ta ey ebꞌ cꞌam chi yal scꞌul chi yaa junoj yenel yin sjolom xin,

yakꞌ ojabꞌ tzujom el sjolom ebꞌ tuꞌ.

Ta chi qꞌuixwi ebꞌ yakꞌon stzujom el sjolom xin,

ya ojabꞌ oc junoj yenel ebꞌ yin sjolom.

7 Jaꞌ jaon winaj jon tiꞌ,

man smoo oj chi kaoc junoj tzetyetal yin cu jolom,

yutol jaxca tol yechel Dios kei,

xꞌoxomal oj el swatxꞌilal Dios kei.

Jal ebꞌ ix ix,

xꞌoxomal el swatxꞌilal winaj yeoc ebꞌ ix.

8 Yutol jaꞌ yet jix waꞌnele naj bꞌabꞌel winaj yu Dios,

man yin oj ix ix elnajtej naj winaj tuꞌ.

Jaꞌ ix ix tuꞌ,

jaꞌ yin naj winaj tuꞌ elnajtej ix.

9 Jaꞌ ix ix tuꞌ,

waꞌnebꞌil ix yu yoc yetbꞌi oj naj winaj.

Man yu oj swatxꞌiloj ix,

yuxan jix waꞌxi naj winaj tuꞌ.

10 Yuxan,

smoo yaon a yenel sjolom ebꞌ ix ix,

yu xꞌoxon el ebꞌ ix tol eyoc ebꞌ yalan yaawil yichamil.

Smoo jaxca tuꞌ chi yute sbꞌa ebꞌ ix,

yutol tꞌanan oc ebꞌ ángel kin.

11 Jal jaon mac jon tol junxane keoc yin Naj Kaawil chi yoche Naj tol ey ojabꞌ yeloc apnoj ebꞌ ix yul cu sat jaon winaj jon tiꞌ.

Catuꞌ chi yochen pax tol ey ojabꞌ keloc apnoj yul sat ebꞌ ix pax oj.

12 Yel toni,

jaꞌ yin naj bꞌabꞌel winaj tuꞌ elnajtej ix bꞌabꞌel ix.

Jal tinaniꞌ xin,

jaꞌ yin ebꞌ ix ix chi cu pitzcꞌu eloj.

Jal masanil chi tit bꞌey Dios.

13 Naꞌwejtej sicꞌlebꞌil,

¿smoo mi chi txali junoj ix tet Dios,

ta cꞌam tzet eya yin sjolom?

14 Yotaj ánima masanil tol qꞌuixwiltaj ta jojan xil cu jolom jaxca xil sjolom ebꞌ ix ix.

15 Sakꞌal yili ebꞌ ix ix,

yutol jojan steel xil sjolom ebꞌ ix.

Jaꞌ xil sjolom ebꞌ ix tuꞌ eyoc yeneloj.

16 Ta ey jex chi tit je jowal yu wan cuybꞌanile tiꞌ,

sowalil chi naꞌcha el je yu,

tol jaon tiꞌ,

cꞌam chi kun junojxa txꞌoj bꞌeybꞌale.

Jacꞌalaꞌ pax ebꞌ creyente bꞌey junjun yiglesia Dios,

cꞌam pax chi yun junojxa txꞌoj bꞌeybꞌale ebꞌ.

17 Ey wanxa tzet oj waltoj ey jex.

Ma to skeꞌ cꞌal jex walon watxꞌil,

yutol ey jex,

eyto cꞌal je penail.

Yutol jaꞌ yet che yambꞌa je bꞌa tituꞌ,

cꞌam niꞌoj swatxꞌilal che chaꞌ,

tucꞌal chex etex can el yu.

18 Yuxan,

jaꞌ jun tiꞌ oj bꞌabꞌoj waltoj ey jex.

Chi wabꞌe,

tol abꞌ jaꞌ yet che yambꞌa je bꞌa yin je culto,

ey abꞌ jex che yoche che poꞌoel je bꞌa.

Jaꞌ chi wute jin naꞌoni,

tejan yel wan chi wabꞌ tuꞌ.

19 Tejan sowalil oj jex poꞌocha cꞌaltaꞌa,

yet watxꞌ chi txeclo eloj,

mac caw yel creyente je xol tuꞌ.

20 Yuxan,

jaꞌ yet che yambꞌa je bꞌa yet chex lowi,

manaj Cena Naj Kaawil jun che loꞌ tuꞌ.

21 Yutol jaꞌ yet chi oc yorail Cena tuꞌ,

comon xacꞌal che loꞌ je yet junjun jex yin eymanil.

Yuxan,

ey jex cꞌamxa che yiꞌ je yet,

chi tit je wail.

Ey pax jex xin,

chex ucꞌwi xacꞌal vino,

catuꞌ che camtzen el je bꞌa.

22 ¿Tumi cꞌam je na bꞌey watxꞌ chex low junjun jex?

Jaꞌ yet che yunen jaxca tuꞌ,

jaꞌ ebꞌ je yet creyenteal che yintajne eloj,

tol yiglesia Dios pax yeoc ebꞌ je yetoj.

Jaꞌ ebꞌ che yute jaxca tuꞌ,

cꞌam tzet chi sloꞌ ebꞌ je yetoj.

Yuxan,

qꞌuixwiltaj chi eloc ebꞌ je yu.

¿Tumi chi skeꞌ jex walon watxꞌil yu jun je bꞌeybꞌal tuꞌ che naꞌ?

Caw cꞌam chi skeꞌ bꞌian.

23 Jaꞌ jun cuybꞌanile yu tzet chi yun ẍaꞌle Cena walnaj can ey jex,

jaꞌton Naj Kaawil jix akꞌon can ey jin an.

Jaꞌton jun tuꞌ oj waltoj ey jex tiꞌ.

Jaꞌ yet jun akꞌbꞌal yet jix ale oc Naj Kaawil Jesús yul skꞌabꞌ ebꞌ tꞌinan taꞌ yakꞌon camoj,

jaꞌ yet cꞌamto chi michꞌchai,

jix yiꞌon a jun ixim pan Naj.

24 Jaꞌ yet jix lawi yalon yu diosalil,

jix xꞌion ey ixim pan tuꞌ,

catuꞌ jix yalon tet ebꞌ scuywom jaxca tiꞌ:

Loꞌwej.

Jaꞌ jun tiꞌ,

jaꞌton jin mimanil oj akꞌle je yu.

“Loꞌwej ixim xin,

yu jin je naꞌontej,”

ẍi naj.

25 Jaꞌ yet jix lawi slow ebꞌ tuꞌ,

catuꞌ jacꞌalaꞌ queytuꞌ jix yute yiꞌon pax a jun vaso tuꞌ.

Jix yalon pax tet ebꞌ jaxca tiꞌ:

“Jaꞌ tzet eey yul jun vaso tiꞌ jaꞌton jun acꞌ swa kꞌane Dios.^b

Yu jin chiqꞌuil tol oj el yet chin cam an,

yuxan oj yun jun wa kꞌane tiꞌ.

Jaꞌ yet che yuqꞌuen jun tiꞌ junjun el,

unwej yu chin je naꞌtej,”

ẍi Jesús tet ebꞌ scuywom.

26 Yutol junjun el chi cu loꞌ jun pan tiꞌ,

cꞌal kuqꞌuen tzet eey yul jun vaso tiꞌ,

jaꞌ scamichal Naj Kaawil chi cu txꞌoxeloj.

Kunwej cꞌal jun tiꞌ xin,

masantaꞌcꞌal chi jul Naj Kaawil tuꞌ.

27 Yutol,

ta ey mac man watxꞌoj chi yute sloꞌon jun span Naj Kaawil tiꞌ,

cꞌal yuqꞌuen tzet eey yul jun svaso Naj tiꞌ,

chi oc spenail yin smimanil Naj Kaawil tuꞌ,

cꞌal yin ẍiqꞌuil Naj.

28 Yuxan,

jaꞌ yet cꞌamto chi cu loꞌ ixim pan tuꞌ,

cꞌal yet cꞌamto chi kuqꞌuen tzet eey yul jun vaso tuꞌ,

sowalil chi cu naꞌoc kin junjun jon yul ket.

29 Yutol jaꞌ yet chi cu loꞌoni,

cꞌal kuqꞌuen jun tiꞌ,

ta cꞌam chi cam cu naꞌon smimanil Naj Kaawil,

chi kiꞌtej syaꞌilal kibꞌan.

30 Yu wan tiꞌ,

yuxan ecꞌal ebꞌ yaꞌey je xol,

cꞌal mac tzꞌontaj.

Catuꞌ ey mac camnajxa.

31 Jal taꞌ chi cu naꞌoc kin junjun jon yin sjichanil,

man oj snaꞌoc Naj Kaawil kin.

32 Jaꞌ yet chi snaꞌoc Naj Kaawil tuꞌ kin,

chi yaoc cu yaꞌilal Naj,

yet watxꞌ man oj cu tojcan bꞌey jun miman syaꞌilal yetoj ebꞌ yet yul yibꞌankꞌinal tiꞌ.

33 Yuxan,

jex wuẍtaj,

jex wanabꞌ,

jaꞌ yet che yambꞌa je bꞌa je loꞌon Cena tuꞌ,

che yechbꞌanele je bꞌa,

yet watxꞌ junne cꞌal chi yun je loꞌon je masanil.

34 Ta ey jex ey je wail,

lowanwej bꞌey je na,

yet watxꞌ cꞌam chi jul syaꞌilal je yibꞌan yu Dios yu cꞌal tzet che yute je bꞌa bꞌey je yambꞌabꞌail tuꞌ.

Jal wanxa tzet tol man watxꞌoj bꞌey je xol xin,

oj jin waꞌne oc yet oj jex toj wiloni.