Wan Tzet Chi Akꞌle Kun Yu Naj Santo Espíritu
12
Jex wuẍtaj,
jex wanabꞌ,
chi woche che yotajne eloj,
tzettaj opisoal chi yakꞌ Naj Espíritu ey jon,
junjun jon.
2 Je yotaj,
tol jaꞌ yet man to creyenteoj jex,
jix jex ijbꞌaletoj bꞌey tzet chi al-le oc diosal.
Chex ecꞌ titiꞌ,
chex too tituꞌ,
je seyon ecꞌ wan cꞌam chi skeꞌ skꞌanabꞌ tuꞌ.
3 Yuxan,
chi woche che yotajne pax el wanxa tiꞌ.
Ta ey junoj mac chi alon jaxca tiꞌ:
“Tit ojabꞌ sjowal scꞌul Dios yibꞌan Jesús,”
ta ẍi,
jaꞌ jun chi alon jaxca tuꞌ,
man eyoj oc Yespíritu Dios yetoj catuꞌ chi yaloni.
Ta ey mac chi alon pax jaxca tiꞌ:
“Jaꞌ Jesús tuꞌ,
Waawil yei,”
ta ẍi,
asan yu Santo Espíritu chi skeꞌ yalon jaxca tuꞌ.
4 Jaon tiꞌ,
txꞌoj txꞌoj cꞌal opiso jix cu chaꞌ junjun jon.
Tol junne pax mac chi akꞌon ey jon,
jaꞌton Naj Espíritu.
5 Txꞌoj txꞌoj cꞌal kakꞌwi servil junjun jon,
junne pax mac chi kakꞌ servil cu masanil,
jaꞌton Naj Kaawil.
6 Yetoj pax oj,
txꞌoj txꞌoj cꞌal cu mulnail junjun jon.
Tol jacꞌal pax oc Dios chi oc ketoj yin tzet chi kun tuꞌ.
7 Chi akꞌle kopiso junjun jon yu cu watxꞌiloj cu masanil yet chi txeclo eloj tol eyoc Yespíritu kin.
8 Ilaꞌ,
tol yu Naj Espíritu tuꞌ,
ey mac chi skeꞌ yalon el sjelanil Dios,
ey pax mac chi naꞌcha el yu scuywai,
jacꞌal ton yu Espíritu tuꞌ.
9 Yu Naj Espíritu tuꞌ,
ey mac chi skeꞌ caw chi yaoc scꞌul yin Dios,
catuꞌ miman yeloc apnoj tzet chi eloc yu.
Jacꞌalaꞌ yu Naj,
yuxan ey mac chi akꞌle yipal yakꞌon can waꞌxoj scꞌul ebꞌ yaꞌey.
10 Ey mac chi akꞌle yipal xꞌoxon el milagro* yu.
Ey mac xin,
jaꞌ alo el skꞌane Dios akꞌbꞌil tet,
chi akꞌle yun yu Santo Espíritu.
Ey ebꞌ chi akꞌle yotajne eloj,
ta jaꞌ Santo Espíritu tuꞌ eyoc yetoj junoj mactxequel,
ma jaꞌ pena espíritu xin.
Ey mac jaꞌ skeꞌon skꞌanabꞌ yin wanojxa txꞌoj tiꞌeal cꞌam chi scuyuꞌ chi akꞌle yun yu.
Ey mac xin,
jaꞌ yoc a tiꞌal yin wan tiꞌeal tuꞌ,
chi akꞌle yun yu.
11 Ecꞌal tzet chi akꞌle kunne.
Txꞌoj txꞌoj cꞌal pax tzet chi yakꞌ ey jon junjun jon,
jatacꞌalaꞌ tzet chi el yin scꞌul Naj yakꞌon kunne.
Jaxca Tol Junne Mimanile Kei
12 Jaꞌ cu mimanil tiꞌ,
ecꞌal tujan tzet eyoc yin,
caxcꞌal ecꞌal tujan eyoc yin,
junne cꞌal pax mimanileal yei.
Jaxca ton yoc cu mimanil tiꞌ,
jaxca ton tuꞌ keoc yin Cristo.
Jaxca tol smimanil Cristo keoc cu masanil.
13 Yutol cu masanil,
caxcꞌal Israel jon,
caxcꞌal cꞌamaj,
junne keoc cu masanil.
Caxcꞌal ket xa cu bꞌa cu txꞌojli,
caxcꞌal yet jon junojxa mactxequel,
junne cꞌal pax kei.
Yutol jaꞌ yet jix cu akꞌle bautizar,
junxane jix kun can yetoj Cristo.
Yutol asanne jun Yespíritu jix cu akꞌon bautizar,
yu jun tuꞌ,
yuxan jaxca tol junne mimanile kei,
yutol jix akꞌle Naj ey jon cu masanil.
14 Ilaꞌ,
cu mimanil tiꞌ tinaniꞌ,
ecꞌal tujan yeocoj,
man junne oj.
15 Kꞌinaloj ta chi skeꞌ yalon wajan jaxca tiꞌ:
“Jain tiꞌ,
yu man jin kꞌabꞌe oj,
yuxan man jin yetbꞌi oj jun mimanile tiꞌ,”
kꞌinaloj ta ẍi.
Caxcꞌal chi yal jaxca tuꞌ,
yetbꞌi pax jin mimanil cꞌaltaꞌ yei.
16 Kꞌinaloj,
jaꞌ junoj jin txiquin tiꞌ chi skeꞌ yalon jaxca tiꞌ:
“Jain tiꞌ,
yu man jin sbꞌakꞌ sate oj,
yuxan man jin yetbꞌi oj jun mimanile tiꞌ,”
kꞌinaloj ta ẍi.
Caxcꞌal chi yal jaxca tuꞌ,
yetbꞌi pax jin mimanil tiꞌ cꞌaltaꞌ yei.
17 Kꞌinaloj ta jaꞌ masanil jin mimanil tiꞌ,
sbꞌakꞌ sate yei,
ta jaxca tuꞌ xin,
¿tzet la chi wute wabꞌen pax oj?
Kꞌinaloj ta txiquine cꞌal el jin mimanil tiꞌ,
¿tzet la chi wute jin sukꞌten pax sabꞌ junoj tzetyetal?
18 Tol jaꞌ Dios jix waꞌnen cꞌal junjun tujan cu mimanil jaxca jix yun yel yin scꞌul swaꞌneni.
19 Kꞌinaloj ta junxane chi yute can a sbꞌa masanil,
¿bꞌeytuꞌ eyoc mimanile tuꞌ,
chi yal tuꞌ?
20 Kotaj,
tol ecꞌal tujanil cu mimanil tiꞌ,
tol junne pax yeoc masanil.
21 Jaꞌ sbꞌakꞌ cu sat tiꞌ,
cꞌam chi skeꞌ yalon tet cu kꞌabꞌ,
tol cꞌam yopiso cu kꞌabꞌ tiꞌ yu.
Jacꞌalaꞌ pax cu jolom,
ma skeꞌ yalon tet kajan tol cꞌam yopiso kajan tuꞌ yu.
22 Ey wan tujan cu mimanil tiꞌ jaxca tol cꞌam yopiso.
Jaꞌ pax wan tuꞌ yel xacꞌal ey yopiso ku.
23 Yetoj pax wan tujan cu mimanil tiꞌ,
jaxca tol cꞌam yeloc apnoj,
jaꞌton wan tuꞌ yel xacꞌal ey yeloc apnoj yul cu sat.
Jaꞌ wan man watxꞌoj yili,
chi cu majche eloj,
yu cu txꞌoxon eloj tol ey ton yeloc apnoj yul cu sat.
24 Jal wan watxꞌ yili xin,
man sowalil oj chi majchele el ebꞌ.
Jaxca ton tiꞌ jix yun yel yin scꞌul Dios swaꞌnen cu mimanil tiꞌ,
yet watxꞌ jaꞌ wan tujan cu mimanil tol cꞌam yeloc apnoj,
jaꞌ wan tuꞌ yel xacꞌal ey yeloc apnoj yul cu sat.
25 Yuxan,
ma skeꞌ scajlen sbꞌa yin cu mimanil tiꞌ.
Jaꞌ tiꞌ yet,
tol smoo scol-len sbꞌa junjun.
26 Kꞌinaloj ta ey junoj tujan cu mimanil tiꞌ chi yabꞌ syaꞌil ma chi yasi,
jun laan xacꞌal yabꞌen syaꞌil masanil yetoj jun tuꞌ.
Ta ey pax junoj chi tzala xin,
jun laan pax stzala masanil yetoj jun tuꞌ.
27 Yuxan,
jaꞌ jaon tiꞌ,
jaxca tol smimanil Cristo kei.
Junjun jon jaxca tol junoj tujan smimanil,
queytuꞌ keoc yin.
28 Yuxan,
ey jon jix yakꞌ Dios kopiso xol iglesia junjun jon.
Yin sbꞌabꞌelal,
ey jon ẍejabꞌ Cristo kei.
Yet scaabꞌ ey jon yalomal el skꞌane Dios kei.
Yet yox,
ey jon cuywam kei.
Yetoj pax oj,
ey jon chi cu txꞌoxel milagro.
* Ey jon chi skeꞌ kakꞌon waꞌxoj scꞌul ebꞌ yaꞌey.
Ey jon chi skeꞌ cu colwai.
Ey jon watxꞌ jon yilomaloj ánima.
Ey jon xin,
chi skeꞌ cu kꞌanabꞌ yin wanojxa txꞌoj tiꞌeal cꞌam chi cu cuyuꞌ.
Jix yakꞌ Dios kopiso xol iglesia junjun jon.
29 Man pax ẍejabꞌoj Cristo jon cu masanil.
Man cu masaniloj ey kopiso kalon el skꞌane Dios.
Man cuywam oj jon cu masanil.
Cꞌam chi skeꞌ cu txꞌoxon el milagro cu masanil.
30 Man cu masaniloj chi skeꞌ kakꞌon waꞌxoj scꞌul ebꞌ yaꞌey.
Man cu masaniloj chi skeꞌ cu kꞌanabꞌ yin wanojxa txꞌoj tiꞌeal.
Yetoj pax oj,
man cu masaniloj chi skeꞌ koc a tiꞌal yin wan txꞌoj tiꞌeal tuꞌ.
31 Yuxan,
akꞌwej je yip je seyon ecꞌ wan opiso miman swatxꞌilal chi yakꞌ Dios.
Ey pax jun bꞌeybꞌale yel xacꞌal watxꞌ oj waltoj ey jex.