Romanos sbꞌi jun libro tiꞌ. Jix tzꞌibꞌelecan yet abꞌil 56-57 d.C. Jaꞌ naj Pablo jix tzꞌibꞌencan yet eyecꞌ naj bꞌey conobꞌ Corinto.

Jaxca junoj carta jix yun stzꞌibꞌentoj naj Pablo tet ebꞌ creyente bꞌey Roma, yet chi yalontoj tet ebꞌ tol oj apnoj oc naj tituꞌ, yet chi too il-le ecꞌ ebꞌ yu naj. Yutol chi yoche chi mulna yetoj ebꞌ junoj tiempoal. Chi lawi tuꞌ, catuꞌ chi too naj bꞌey España. Jix yaltoj naj tet ebꞌ tzet wal chi yal yeloc apnoj jun watxꞌ kꞌane yet colbꞌanile tiꞌ, yetoj bꞌeybꞌale smoo chi sbꞌeybꞌalne ebꞌ creyente. Jaꞌ jun libro tiꞌ tzꞌajan chi yun yalon canoj tzet chi yun scuywa naj Pablo xol ebꞌ creyente.

Jaꞌ yet jix lawi yakꞌle scawil scꞌul ebꞌ creyente a Roma yu Pablo, jix yalontoj tet ebꞌ tol chi txali naj yu ebꞌ. Jix lawi tuꞌ jix yalon naj tzet tzꞌibꞌebꞌil ey yul jun carta tiꞌ tet ebꞌ. Jaꞌton watxꞌ kꞌane txꞌoxbꞌil yu Dios, tzet chi yun yoc ebꞌ ánima yin watxꞌil yetoj, ta tol chi yaoc scꞌul ebꞌ yin; yutol masanil ánima eyoc yalan spenail, ebꞌ Israel cꞌal ebꞌ man Israeloj, sowalil chi ẍaꞌ ebꞌ jun colbꞌanile tiꞌ. Chi skeꞌ chi cu oc yin watxꞌcꞌulal yetoj Dios, asan tol chi kaoc cu cꞌul yin Jesús.

Ta chi kaoc cu cꞌul yin Cristo, watxꞌ jon xa yul sat, ta jaxca tuꞌ, ey jon xa oc yin watxꞌcꞌulal yetoj Dios, queyton tuꞌ chi yun cu colcha el tet spenail yu Yespíritu Dios. Yu jun tuꞌ, smoo ton chi qꞌuexcha cu bꞌeybꞌal. Chi yalon pax tzet chi snaꞌ Dios yibꞌan ebꞌ Israel, yetoj ebꞌ man Israeloj.

Chi yalon pax oj, tol yu jix oc spenail ebꞌ Israel yuxan jix akꞌle can jun colbꞌanile tiꞌ tet masanil ánima, yutol ma ẍaꞌ ebꞌ yabꞌ tzet jix yal Cristo. Asan xin, oj ya cꞌaltaꞌ oc scꞌul ebꞌ Israel tiꞌ yin Cristo yet slawubꞌ cꞌual. Chi yalon pax yu camcꞌulal, yu ebꞌ ket animail, cꞌal cu jijen tzet chi yal ebꞌ yaaw. Chi yalon pax oj tol cꞌam ojabꞌ chi cu teele cu bꞌa yu wan kꞌane tol yaꞌtaj snaꞌcha eloj.

Chi lawi can apnoj tzet chi yal Pablo yetoj scawilcꞌule, yetoj alo watxꞌ kꞌane tet Dios.