Jaꞌ Camcꞌulal
13
Kꞌinaloj ta jelan jon,
chi skeꞌ cu kꞌanabꞌ yin stiꞌ masanil ebꞌ ánima,
cꞌal yin stiꞌ ebꞌ ángel.
Ta cꞌam pax cu camcꞌulal,
laan jon cꞌal mi jaxca junoj waabꞌ tucꞌal chi tinxi.
Ma xin,
jaxca junoj chꞌen patxquiltaj yetbꞌi son jaxca plato,
quey jon mi tuꞌ.
2 Caxcꞌal akꞌbꞌil kopiso kalon el yin eyojto.
Caxcꞌal caw chi naꞌcha el ku masanil tzet cꞌamto mac otajneni.
Caxcꞌal kotaj masanil tzet ey yul yibꞌankꞌinal tiꞌ.
Caxcꞌal caw chi kaoc cu cꞌul yin Dios sicꞌlebꞌil,
catuꞌ chi skeꞌ kiꞌon el junoj wonan bꞌey slugar,
ta cꞌam pax cu camcꞌulal,
caw cꞌam niꞌoj kopiso.
3 Caxcꞌal chi cu saꞌ masanil tzet ey,
ey jon tet ebꞌ mebꞌa,
caxcꞌal chi akꞌle tzꞌaꞌ cu mimanil tiꞌ xol kꞌakꞌ,
ta cꞌam pax cu camcꞌulal,
naꞌbꞌacꞌal chi ketne cu cꞌul,
cꞌam niꞌoj spaj oj cu chaꞌ.
4 Oj waltoj tzet chi kute cu bꞌeybꞌal,
ta yel ey cu camcꞌulal.
Caw ey cꞌal cu mimancꞌulal yin ebꞌ ket animail,
catuꞌ chi cu txꞌoxon pax cu watxꞌcꞌulal tet ebꞌ.
Man comonoj chi chichon oc cu cꞌul yin junoj mac ecꞌal tzet ey tet.
Man ojabꞌ ecꞌnaj oj chi kute cu bꞌa,
catuꞌ chi kiꞌon a can cu bꞌa.
5 Ta caw yel ey cu camcꞌulal,
cꞌam chi kiꞌel sqꞌuixwil junoj mactxequel.
Chi koche tol man asanne oj jon ey kalon ket.
Man ojabꞌ cꞌuun oj stit cu jowal.
Cꞌam chi cu naꞌ kaon ecꞌ spaj tet junoj mactxequel.
6 Cꞌam chi cu tzala yu junoj tzet man watxꞌoj chi el yunen junoj mactxequel.
Asan wan tzetyetal caw yel watxꞌ chi cu tzala yetoj.
7 Ta yel ey cu camcꞌulal,
oj kakꞌ cꞌal techa masanil tzetyetal.
Chi kaoc yin cu cꞌul tol watxꞌ cꞌal tzet chi el yunen ebꞌ ket animail.
Chi kaoc ebꞌ yipoj cu cꞌul.
Yal cꞌal junoj tzetyetal chi jul kibꞌan tecꞌan cꞌal chi kute cu bꞌa tet.
8 Jaꞌ jun camcꞌulal tiꞌ,
cꞌam bꞌakꞌin oj lawoj.
Ey jun tiempoal oj juloj,
yet manxa sowalil oj tol eyto mac oj yakꞌ yopiso Dios yalon el yin eyojto.
Jaꞌ yet jun tiempoal tuꞌ,
manxa sowalil oj tol eyto mac oj kꞌanabꞌ yin txꞌoj tiꞌeal.
Yetoj pax oj,
cꞌamxa yopiso cu jelanil tuꞌ.
9 Yutol man tzꞌajanoj cu jelanil tinaniꞌ,
yetoj pax oj,
man tzꞌajanoj chi kute kalon el yin eyojto tinaniꞌ.
10 Jal pax xin,
ey jun tzꞌajan.
Jaꞌ yet oj jul jun tuꞌ,
jato yet tuꞌ oj lawoj yopiso masanil wan man tzꞌajanoj chi kun tiꞌ.
11 Kꞌinaloj jain tiꞌ tinaniꞌ,
jaꞌ yet unin jin to,
jaxca cꞌal skꞌanabꞌ unin jin kꞌanabꞌi.
Jix jin naꞌ wan tzet chi snaꞌ ebꞌ unin,
yutol laan jin naꞌbꞌal yetoj ebꞌ.
Jal tinaniꞌ xin,
icham winaj jin xa.
Yuxan,
jix jin bꞌejcan sbꞌeybꞌal unin tuꞌ.
Jaxca jin ton yet unin jin to tuꞌ,
jaxca jon ton tuꞌ cu masanil tinaniꞌ.
12 Yutol jaꞌ tinaniꞌ,
cꞌam caw chi naꞌcha el yet Dios ku.
Jaxca kilon oc cu sat yin junoj chꞌen chꞌen chi kopopi,
kꞌejtaninaj yili cu sat.
Jal pax yet jun tiempoal tuꞌ xin,
oj naꞌcha el masanil tzettaj yetal yet Dios ku.
Yutol jaꞌ yet tuꞌ oj kil masanil tzettaj yetal sicꞌlebꞌil.
Jaꞌ tinaniꞌ,
man tzꞌajanoj kotaj yet Dios,
Jal pax yet jun tiempoal tuꞌ,
oj kotajne eloj.
Jaxca chi yun cu yotajnen el Dios sicꞌlebꞌil tinaniꞌ,
queytuꞌ oj yun kotajnen el yet tuꞌ.
13 Jaꞌ tinaniꞌ,
chi kaoc Dios yin cu cꞌul,
catuꞌ chi kaon pax oc yipoj cu cꞌul.
Chi cu camcꞌulnen pax ebꞌ ket animail.
Jaꞌ oxebꞌ chi kun tiꞌ,
ey cꞌal yopiso tobꞌalkꞌinal.
Jal pax camcꞌulal tiꞌ ecꞌbꞌan yeloc apnoj yintaj caabꞌxa tiꞌ yul sat Dios.