Wanojxa Txꞌoj Tiꞌeal Cꞌam Chi Cu Cuyuꞌ
14
Caw che yakꞌ je yip je camcꞌulnen je bꞌa junjun jex.
Catuꞌ che yakꞌon pax je yip je seyon ecꞌ wan opiso chi yakꞌ Naj Yespíritu Dios ey jex.
Ey jun opiso yel xacꞌal watxꞌ,
jaꞌton jun alo el yin eyojto.
2 Ey mactxequel chi skeꞌ skꞌanabꞌ yin wanojxa txꞌoj tiꞌeal tol cꞌam chi scuyuꞌ.
Jaꞌ yet lalan yalon ebꞌ junoj tzetyetal yin jun txꞌoj tiꞌeal tuꞌ,
jaꞌ tet Dios lalan skꞌanabꞌ ebꞌ,
manaj tet ánima,
yutol cꞌam mac chi abꞌen tzet chi yal ebꞌ tuꞌ.
Jaꞌ Naj Yespíritu Dios chi akꞌon yal wan tzetyetal ebꞌ tol cꞌam mac otajneni.
3 Jal pax mac chi alon el yin eyojto,
jaꞌ tet ánima chi al-lei.
Jatuꞌ chi kꞌanabꞌi,
yet watxꞌ chi yiꞌ stecꞌanil ebꞌ,
yet chi iptzele ebꞌ catuꞌ chi mimancꞌulnele ebꞌ.
4 Jaꞌ mac chi kꞌanabꞌ yin wanojxa txꞌoj tiꞌeal,
asan cꞌal chi yiꞌcan stecꞌanil xꞌojli.
Jal pax ebꞌ chi alon el skꞌane Dios xin,
jaꞌ ebꞌ creyente chi yiꞌcan stecꞌanil yu ebꞌ.
5 Chi yoche jin cꞌul tol chi skeꞌ je yu je kꞌanabꞌ yin txꞌoj tiꞌeal je masanil.
Tol yel xacꞌal chi yoche jin cꞌul tol jaꞌ skꞌane Dios che yaleloj.
Yutol jaꞌ alo el skꞌane Dios tuꞌ yel miman yeloc apnoj yintaj pax wan txꞌoj tiꞌeal tuꞌ.
Ey ton pax yopiso wan txꞌoj tiꞌeal tuꞌ,
ta chi skeꞌ yoc a tiꞌal yin tzet chi yal yeloc apnoj,
yet watxꞌ chi a can snaꞌbꞌal ebꞌ creyente yu.
6 Yuxan,
jex wuẍtaj,
jex wanabꞌ,
kꞌinaloj ta jain chin apni wal wan txꞌoj tiꞌeal je xol tinaniꞌ.
¿Tzet niꞌoj swatxꞌil oj skeꞌ je yabꞌen can ocoj?
Ta jaꞌ tzet jix yakꞌ Dios chi wakꞌ je yotajne eloj,
ma sjelanil,
ma xin,
jaꞌ skꞌane Dios chi wal ey jex,
yetoj wanojxa cuybꞌanile,
asan jaxca tuꞌ bꞌian,
ey swatxꞌilal chi skeꞌ je yabꞌen can ocoj.
7 Jacꞌalaꞌ yetoj wanojxa tzetyetal,
jaꞌ wanoj son tinaniꞌ,
kꞌinaloj ta chi xuꞌle chirimia,
ma chi qꞌuenle junoj arpa.
Ta tuxa cꞌal chi somlabꞌi snukꞌ,
¿tumi taꞌ chi kabꞌe tzet bꞌital chi yaoc junjun?
8 Kꞌinaloj ey junoj jowal tinaniꞌ,
catuꞌ chi too ebꞌ soldado.
Chi xuꞌle strompetail ebꞌ,
yet chi too ebꞌ.
Ta man yin oj sbꞌital yet jowal chi yun xuꞌlei,
¿tumi ta chi swaꞌne sbꞌa ebꞌ catuꞌ chi too ebꞌ?
9 Quey jon tuꞌ xin,
ta jaꞌ kꞌane cꞌam mac chi naꞌcha el yu tzet chi yal yeloc apnoj,
ta jaꞌ chi kalaꞌ,
¿tzet oj yute naꞌcha el ebꞌ tzet chi kalaꞌ?
Naꞌbꞌacꞌal chi cu kꞌanabꞌ,
chi yal tuꞌ.
10 Jaꞌ tinaniꞌ,
ecꞌal tujanil tiꞌe ey yul yibꞌankꞌinal tiꞌ.
Masanil tiꞌe tuꞌ,
ey yeloc apnoj junjun.
11 Kꞌinaloj ta ey junoj mac chi kꞌanabꞌi,
cꞌam cꞌal chi kabꞌ pax tzet chi yalaꞌ.
Jaxca tol txꞌoj conobꞌal jon yul sat ebꞌ jaxca tuꞌ.
Yetoj pax oj,
jaxca tol txꞌoj conobꞌal pax ebꞌ yul cu sat,
yutol cꞌam chi kabꞌ tzet chi kal yetoj ebꞌ.
12 Jain tiꞌ,
wotajxa tol che yoche wan opiso chi yakꞌ Naj Yespíritu Dios ey jex.
Yuxan chi wal ey jex an,
tol che yakꞌ je yip,
yet watxꞌ jaꞌ jun opiso caw watxꞌ che chaꞌ.
Jaxca tuꞌ xin,
oj skeꞌ je yakꞌon stecꞌanil snaꞌbꞌal ebꞌ je yet creyenteal.
13 Yuxan,
ta ey mac chi kꞌanabꞌ yin txꞌoj tiꞌeal,
sowalil chi skꞌan sjelanil tet Dios,
yet watxꞌ chi skeꞌ yalon el tzet chi yal yeloc apnoj tzet chi yal tuꞌ.
14 Kꞌinaloj ta chin txali yin junoj txꞌoj tiꞌeal tinaniꞌ.
Jacꞌal jin pixan chi txali.
Jal pax jin naꞌbꞌal,
cꞌam chi naꞌcha el niꞌoj yu tzet chi wal tuꞌ.
15 Yuxan,
¿tzet watxꞌ chi kun che naꞌ?
Man ojabꞌ asanne oj yetoj cu pixan chi cu txali.
Sowalil chi cu txali pax yetoj cu naꞌbꞌal,
yet watxꞌ chi naꞌcha el ku.
Yetoj pax oj,
jaꞌ yet chi cu bꞌitni,
man ojabꞌ asanne oj yetoj cu pixan chi cu bꞌitni.
Sowalil chi cu bꞌitni pax yetoj cu naꞌbꞌal,
yet watxꞌ chi naꞌcha el ku.
16 Kꞌinaloj ey junoj jex che yal je watxꞌ kꞌane tet Dios tinaniꞌ yin txꞌoj tiꞌeal.
Jacꞌal ton yetoj je pixan chex kꞌanabꞌi.
Jal pax mac eecꞌ je yetoj xin,
cꞌam chi naꞌcha el yu ebꞌ tzet che yal tuꞌ.
Yuxan,
jaꞌ yet che yalon yu diosalil tet Dios,
ma skeꞌ yalon ebꞌ jun kꞌane yun ojabꞌi,
je yetoj.
17 Yel ton watxꞌ alo yu diosalil che yal yin txail tuꞌ,
cꞌam pax junoj chi yiꞌcan yip snaꞌbꞌal yu.
18 Yuwal dios tet cu Mam Dios,
yutol ecꞌbꞌan chin kꞌanabꞌ yin wan txꞌoj tiꞌeal je yintaj je masanil.
19 Jal pax yet chi cu yambꞌa cu bꞌa yin culto xin,
yel watxꞌ jaꞌ je tiꞌ chi wal yet chex jin cuyoni.
Yutol caxcꞌal mi joebꞌne skꞌane Dios chi wal yin jun tiꞌe chi kabꞌe,
tol caw ecꞌbꞌan pax tzet che yabꞌ can ocoj,
yintaj pax ta jaꞌ laonebꞌoj mil kꞌane yin junoj txꞌoj tiꞌeal tol cꞌam che yabꞌ yet chi walon an.
20 Jex wuẍtaj,
jex wanabꞌ,
man ojabꞌ jaxca oj snaꞌbꞌal ebꞌ unin,
che yute je naꞌon wan tiꞌ.
Jaxa je bꞌeybꞌal xin,
jaxca ebꞌ unin tol cꞌam bꞌey chi yun tzet man watxꞌoj,
queytuꞌ che yute je bꞌa.
Yuxan caw tecꞌan che yute je naꞌbꞌal,
yutol man unin oj jex.
21 Tzꞌibꞌebꞌilcan yul sley Dios jaxca tiꞌ:
“Jain tiꞌ,
oj jin kꞌanabꞌ tet jun conobꞌ tiꞌ yin txꞌoj tiꞌeal,
cꞌal yin stiꞌ ebꞌ txꞌoj txꞌoj conobꞌal.
Caw cꞌaltaꞌ yabꞌen ebꞌ,
ma sjije ebꞌ ey jin an,”
ẍi Naj Kaawil.a
22 Yuxan,
jaꞌ wan txꞌoj tiꞌeal chi al-le tuꞌ,
txꞌoxbꞌanile cꞌal yeoc tet ebꞌ man creyenteoj,
catuꞌ man txꞌoxbꞌanile oj yeoc tet ebꞌ creyente.
Jal pax yal-le el yin eyojto tuꞌ xin,
txꞌoxbꞌanil ton yeoc tet ebꞌ creyente tuꞌ jun tiꞌ,
catuꞌ man txꞌoxbꞌaniloj tet ebꞌ man creyenteoj.
23 Kꞌinaloj ta jaꞌ yet che yambꞌa je bꞌa je masanil jaex creyente jex tituꞌ tinaniꞌ,
catuꞌ je masanil chex kꞌanabꞌ a yin txꞌoj tiꞌeal.
Ta chi oc apnoj junoj man creyenteoj je xol,
tol man yotaj oj tzet utbꞌil yoc sbꞌeybꞌal jun ket tiꞌ,
tejan oj yal jaxca tiꞌ:
“Jaxca tol loco ebꞌ,”
ẍi mi.
24 Yuxan,
kꞌinaloj ta jacꞌal yin eyojto che yalel je masanil.
Catuꞌ chi oc apnoj junoj man creyenteoj tuꞌ,
caxcꞌal man yotaj oj tzet utbꞌil yoc sbꞌeybꞌal jun ket tiꞌ,
oj naꞌcha el yu,
tol penawom toni.
Oj snaꞌ sbꞌa scꞌul yet oj yabꞌen tzet oj je yal junjun jex.
25 Queytuꞌ oj yun xeclo el tzet ey yin spixan.
Yuxan,
oj ey kaanoj,
catuꞌ oj yiꞌon ey sbꞌa tet Dios.
Catuꞌ oj yalon jaxca tiꞌ:
“Yel toni,
caw eyoc Dios je yetoj,”
ẍi,
catuꞌ oj yaloni.
Cuybꞌanil Yin Tzet Utbꞌil Yoc Xolilal Culto
26 Yuxan,
jex wuẍtaj,
jex wanabꞌ,
oj waltoj ey jex tzet oj je yute je bꞌa yet che yambꞌan je bꞌa yin culto.
Jaꞌ yet tuꞌ,
ey jex chex bꞌitni,
ey jex che yakꞌ junoj cuybꞌanile,
ey jex che yal tzet chi yakꞌ Dios je yotajne eloj,
ey jex chex kꞌanabꞌ yin txꞌoj tiꞌeal,
catuꞌ ey jex pax che yal tzet chi al-le yin txꞌoj tiꞌeal tuꞌ.
Tol oj wal chi a can je naꞌbꞌal yu masanil tzet che yun tuꞌ.
27 Ta ey jex chex kꞌanabꞌ yin txꞌoj tiꞌeal,
kꞌojbꞌil ojabꞌ cawanoj ma oxwanoj jex chex kꞌanabꞌi.
Catuꞌ junjunal ojabꞌ je yalon je yet.
Yetoj pax oj,
sowalil jaꞌ ojabꞌ junoj chi skeꞌ yalon tzet chi al-le yin wan txꞌoj tiꞌeal tuꞌ,
tzet chi yal yeloc apnoj.
28 Ta cꞌam mac chi naꞌcha el yu tzet chi yal yeloc apnoj xin,
yel watxꞌ manche jex kꞌanabꞌ yin txꞌoj tiꞌeal yet che yambꞌan je bꞌa tuꞌ.
Yel watxꞌ ta chex txali tet Dios yul je cꞌul.
29 Jacꞌalaꞌ pax jex che yal yin eyojto,
kꞌojbꞌil ojabꞌ cawanoj,
ma oxwanoj jex chex kꞌanabꞌi.
Jal jex je masanil xin,
chi cam je yaon oc je txiquin yin tzet chi al-le ey jex tuꞌ,
ta yel jaꞌ bꞌey Dios chi tita.
30 Kꞌinaloj ey junoj jex lalan je yalon yin eyojto je nan je xol.
Catuꞌ ey junojxa chi akꞌle yal junojxa tzetyetal yu Dios,
sowalil chex oc tucan mac jex txequel lalan je kꞌanabꞌ tuꞌ,
catuꞌ chi yalon yet junxa tuꞌ.
31 Ta jaxca tuꞌ,
jaꞌ jantaj jex chi akꞌle je yalel kꞌane yin eyojto tuꞌ,
yin junjunal chi skeꞌ je yalon je yet,
yet watxꞌ jun laan je yiꞌon can je cuybꞌanil je masanil,
cꞌal je tecꞌanil.
32 Jaꞌ mac jex chi akꞌle je yalel skꞌane Dios tuꞌ,
caw che yakꞌ cuenta je bꞌa yetoj je pixan,
yet watxꞌ yin junjunal che yal je yet.
33 Ta tuxa cꞌal chi cu wejeji yet chi kalon tuꞌ,
manaj Dios chi akꞌon kun jaxca tuꞌ.
Yutol chi yoche Dios tuꞌ tol yin junjunal chi al-le masanil.
Jaꞌ sbꞌeybꞌal ebꞌ yet xa Dios bꞌey junjun iglesia,
34 tol tzꞌin cꞌal ẍi ebꞌ ix ix.
Yuxan quey ojabꞌ jex tuꞌ,
tzꞌin cꞌal ojabꞌ ẍi ebꞌ ix bꞌey che yambꞌa je bꞌa,
yutol cꞌam chi chaꞌle kꞌanabꞌ ebꞌ ix bꞌey culto.
Jijem ojabꞌ chi yute sbꞌa ebꞌ ix,
yutol jaxca tuꞌ yalon sley Dios.
35 Ta ey junoj tzetyetal chi yoche ebꞌ ix chi skꞌanle yabꞌe,
skꞌanle ojabꞌ ebꞌ ix tet yichamil bꞌey sna.
Yutol man smoo oj ebꞌ ix chi kꞌanabꞌ bꞌey culto tuꞌ.
36 Sowalil che naꞌtej,
tol manaj ey jex jix bꞌabꞌi akꞌle skꞌane Dios.
Yetoj pax oj,
man asanne oj jex jix je chaꞌ skꞌane Dios tuꞌ.
37 Ta ey jex che naꞌ,
tol ey je yopiso je yalon el kꞌane yin eyojto,
ma ey wanojxa tzetyetal jix yakꞌ Espíritu ey jex,
catuꞌ chi mulna Naj Yespíritu Dios je yin,
sowalil che yaoc yin je cꞌul,
tol ẍejbꞌanil Naj Kaawil wan chin tzꞌibꞌetoj ey jex tiꞌ.
38 Ta ey mac cꞌam yeloc apnoj wan ẍejbꞌanil Naj Kaawil tiꞌ yul sat xin,
cꞌam ojabꞌ pax yeloc apnoj ebꞌ tuꞌ yul je sat xin.
39 Yuxan,
jex wuẍtaj,
che yakꞌ je yip je yalon el kꞌane yin eyojto.
Catuꞌ man je tenoc tucan ebꞌ chi kꞌanabꞌ yin txꞌoj tiꞌeal.
40 Unwej masanil yin bꞌey cꞌal ian cꞌal yin xolilal,
jaxca tol smoo che yunne.