Skꞌaneal Yet Jix Pitzcꞌu A Cristo
15
Jaꞌ tinaniꞌ,
jex wuẍtaj,
jex wanabꞌ,
chi woche che naꞌtej jun skꞌaneal yet colbꞌanile jix wal can ey jex.
Jaꞌ jun skꞌaneal tiꞌ chabꞌilxa je yu.
Caw tecꞌan je yeoc yin tinaniꞌ.
2 Ta ey cꞌal oc je naꞌbꞌal yin jun kꞌane jix wal can ey jex tuꞌ an,
ta yel jix je yaoc je cꞌul yin,
ey je colbꞌanil yu.
3 Jaꞌ wan cuybꞌanile chabꞌil wu an,
jaꞌton wan yel miman yeloc apnoj,
jaꞌ jix walel ey jex.
Tol jaꞌ Cristo jix cam yu cu penail,
jaxca tzꞌibꞌebꞌilcan yul An Juun Tzꞌibꞌebꞌilcanoj.
4 Jix mujei,
jix pitzcꞌunele pax a yet yox cꞌual,
jaxca tuꞌ tzꞌibꞌebꞌilcan yul An Juun.
5 Jix xꞌoxa sbꞌa tet naj Pedro.
Catuꞌ jix xꞌoxon pax a sbꞌa tet wanxa ebꞌ ẍejabꞌ.
6 Jix lawi tuꞌ xin,
ecꞌbꞌan 500 ebꞌ ket creyenteal bꞌey jix xꞌoxon a sbꞌa.
Yaman ecꞌ ebꞌ catuꞌ jix yilon ebꞌ masanil.
Ecꞌal to ebꞌ iquisto ecꞌ tinaniꞌ,
ey pax jaywan ebꞌ camnajxa.
7 Jix xꞌox pax a sbꞌa tet Jacobo,
yetoj tet ebꞌ ẍejabꞌ masanil.
8 Tzunan xa jix xꞌoxon a sbꞌa ey jin an.
Caxcꞌal man listo oj jin yu chin chaꞌ jun acꞌ kꞌinale,
tol jaxca junoj unin man to yalubꞌaloj,
quey jin tuꞌ an.
9 Jain tiꞌ,
cꞌam weloc apnoj xol wanxa ebꞌ ẍejabꞌ Jesucristo tuꞌ.
Yutol,
jaꞌ ebꞌ,
yel ey yeloc apnoj wintaj an.
Tol tax man jin moo oj woc ẍejabꞌoj yetoj ebꞌ yutol etnebꞌil ebꞌ yiglesia Dios wu yetoj syaꞌilal.
10 Jal tinaniꞌ xin,
asan yu swatxꞌcꞌulal Dios,
yuxan ey jin oc yin wopiso tiꞌ.
Man cꞌal naꞌbꞌa oj jix xꞌox swatxꞌcꞌulal tuꞌ win an.
Yutol ecꞌbꞌan jin mulnail yintaj ebꞌ wet chejabꞌwomal masanil.
Yuxan man yul oj wet chin mulnai,
tol jaꞌ Dios chi mulna win yu swatxꞌcꞌulal.
11 Yuxan,
caxcꞌal jain jix wal an,
caxcꞌal jaꞌ ebꞌ jix aloni,
jacꞌal oc jun skꞌaneal yet colbꞌanile tuꞌ chi kalaꞌ.
Jaꞌton jun tiꞌ che yaoc yin je cꞌul.
Yet Oj Pitzcꞌu A Ebꞌ Camnaj
12 Jaꞌ jun skꞌaneal yet colbꞌanile chi kal tiꞌ,
jaꞌ chi alontej tol jix pitzcꞌunele a Cristo xol ebꞌ camnaj.
Yu tuꞌ xin,
¿tzet yuxan ey jex che yal tinaniꞌ,
tol cꞌam chi pitzcꞌunele a ebꞌ camnaj?
13 Ta yel cꞌam chi pitzcꞌunele a ebꞌ jaxca je yalon tuꞌ,
ma pitzcꞌunele pax a Cristo,
chi yal tuꞌ.
14 Yetoj pax oj,
ta ma pitzcꞌunele a Cristo tuꞌ,
jaꞌ jun skꞌaneal yet colbꞌanile chi kalel tiꞌ,
cꞌam niꞌoj yeloc apnoj.
Ta jaxca tuꞌ xin,
naꞌbꞌacꞌal che yaoc yin je cꞌul.
15 Yetoj pax oj,
lekꞌtiꞌ testigo jon yu Dios,
yutol jix kalaꞌ,
tol jix pitzcꞌunele a Cristo yu Dios tuꞌ.
Kꞌinaloj ta cꞌam chi pitzcꞌunele a ebꞌ camnaj jaxca je yalon jaywanoj jex tuꞌ,
ma pitzcꞌunele a Cristo yu Dios.
16 Yutol ta cꞌam chi pitzcꞌunele a ebꞌ camnaj tuꞌ,
ma pax pitzcꞌunele a Cristo.
17 Kꞌinaloj ta ma pitzcꞌunele a Cristo tuꞌ,
naꞌbꞌacꞌal che yaoc je cꞌul yin,
yutol eyto cꞌal oc je penail je yibꞌan ta ma pitzcꞌunele aoj.
18 Yetoj pax oj,
junelne camnaj el ebꞌ creyente camnajxa,
ta ma pitzcꞌunele aoj.
19 Ta asan yu niꞌoj cu kꞌinal yul yibꞌankꞌinal tiꞌ,
yuxan chi kaoc Cristo yipoj cu cꞌul,
yel xacꞌal okꞌbꞌalcꞌule jon yintaj masanil ánima.
20 Man pax jaxca tuꞌ yeoc tinaniꞌ,
yutol caw yel jix pitzcꞌunele a Cristo xol ebꞌ camnaj.
Jaxca junoj bꞌabꞌel sat awo,
queytuꞌ jix yun spitzcꞌunele Naj cu sattaj,
yu xꞌoxon eloj tol oj cu pitzcꞌunele pax aoj.
21 Asan yu jun winaj chi yij Adán,
jix tit can camich kibꞌan cu masanil.
Jacꞌalaꞌ pax oj asan yu junxa winaj,
oj pitzcꞌunele a ebꞌ camnajxa,
jaꞌton Naj Cristo.
22 Masanil ánima oj camoj,
yutol yicꞌaal naj Adán masanil.
Jaꞌ jaon cu masanil yet jon xa Cristo tiꞌ,
oj jon pitzcꞌunele pax aoj,
yutol yet jon xa.
23 Oj yun yin xolilal.
Bꞌabꞌel pitzcꞌunaj a Cristo.
Jaxa yet oj jul Naj yet scaelal,
catuꞌ oj pitzcꞌunele a ebꞌ yet xa.
24 Oj lawoj tuꞌ,
catuꞌ oj jul slawubꞌal.
Jaꞌ yet tuꞌ oj akꞌle lawoj el masanil ebꞌ yaaw yu Cristo,
cꞌal ebꞌ ey yopiso,
yetoj masanil wan ebꞌ ey yip.
Catuꞌ oj yaon can oc yopiso Naj yul skꞌabꞌ Dios Mame.
25 Yutol jaꞌ Cristo,
sowalil chi oc Reyal,
masantaꞌcꞌal oj can masanil mac chi jowi oc yin yalan yu Dios.
26 Ey pax junxa mac jaxca tol acꞌul oc kin bꞌey yul yibꞌankꞌinal tiꞌ,
jaꞌton camich.
Oj akꞌle lawoj camich tuꞌ yu Naj yin slawubꞌal.
27 Yutol jix ale can oc masanil tzettaj yetal yul skꞌabꞌ Cristo yu Dios,
yet watxꞌ,
jaꞌ chi ijbꞌan masanil.
Caxcꞌal mi eyoc masanil tzettaj yetal yul skꞌabꞌ jaxca taꞌ chi yal An Juun Tzꞌibꞌebꞌilcanoj,a
tol manaj chi ijbꞌan Dios tuꞌ.
Yutol jaꞌ Dios tuꞌ jix akꞌon masanil tzettaj yetal tuꞌ yul skꞌabꞌ.
28 Jaꞌ yet jix ale can oc masanil tzettaj yetal yul skꞌabꞌ Naj Scꞌaal Dios tuꞌ,
catuꞌ jaꞌcaw Naj oj yaoc sbꞌa yin jijemal tet Dios Mame.
Yutol jaꞌ Dios tuꞌ,
jix yaoc masanil tzettaj yetal tuꞌ yul skꞌabꞌ.
Asanxane Dios oj ijbꞌan masanil tzettaj yetal yetoj cꞌal masanil ánima.
29 Jaꞌ tinaniꞌ,
ey ebꞌ chi akꞌle bautizar sqꞌuexeloj ebꞌ camnaj.
Ta man pax oj pitzcꞌu pax a ebꞌ camnaj tuꞌ,
¿tzet yuxan ey ebꞌ chi akꞌle bautizar sqꞌuexeloj ebꞌ xin?
30 Yetoj jon pax oj,
¿tzet yuxan chi kakꞌ cꞌal cu bꞌa yul skꞌabꞌ camich tobꞌalkꞌinal?
31 Jain tiꞌ,
jex wuẍtaj,
jex wanabꞌ,
junjun cꞌal cꞌu ian chin makꞌle camoj.
Caw yel chi wal ey jex an,
caw chin tzala je yu,
yutol eyoc je cꞌul yin Naj Kaawil Jesucristo wetoj an.
32 Jaꞌ bꞌey Éfeso tiꞌ,
ey wan ebꞌ jaxca tol jix wakꞌle jowal yetoj.
Caw jow ebꞌ jaxca junoj noꞌ noꞌ caw ey smey.
Kꞌinaloj ta tol cꞌam chi cu pitzcꞌu aoj,
¿tzet taꞌ wal chi wiꞌ yin wetne jin cꞌul jaxca tuꞌ?
Ta man pax oj pitzcꞌu a ebꞌ camnaj,
yel mi watxꞌ chi kakꞌ cu naꞌbꞌaloj tinaniꞌ.
“Lowojonwej,
kucꞌwej,
tzalajonwej,
tala cꞌuxan camnaj jon xa yecal”.b
33 Manche je yakꞌ je bꞌa etnele yu junoj lekꞌtiꞌal kꞌane,
jaxca ebꞌ chi alon jaxca tuꞌ.
Ta ey ebꞌ pena sbꞌeybꞌal chi cu ecꞌ yetoj,
ey smey chi etex el cu watxꞌ bꞌeybꞌal yu ebꞌ.
34 Naꞌwej je bꞌa sicꞌlebꞌil,
catuꞌ waꞌnewej oc je naꞌbꞌal.
Manche xa je yun tzet man watxꞌoj.
Ey jex cꞌamto wal che yotajne el Dios.
Chi waltoj wan tiꞌ ey jex,
yu je qꞌuixwiloj.
Jaꞌ Tzet Oj Yun Cu Pitzcꞌu Aoj
35 Tejan ey junoj jex oj je kꞌanle el ey jin jaxca tiꞌ an:
“¿Jaꞌ ebꞌ camnajxa cha wal tuꞌ?
¿tzet oj yun spitzcꞌu a ebꞌ?
¿Tzet utbꞌil yili smimanil ebꞌ yet oj pitzcꞌu a ebꞌ tuꞌ?”
tejan je chi.
36 Ta jaex oj je kꞌanle el jaxca tuꞌ,
jaxca tol cꞌamto je naꞌbꞌal xin.
Kꞌinaloj junoj yal cꞌal tzet jinatil.
Ta cꞌam chi kaw eytoj yul txꞌotxꞌ,
¿tzet oj yun yelol xeꞌ yin comon cꞌal?
Jaꞌ yet chi kawoni,
jaxca tol chi cꞌam chi kilaꞌ.
37 Jaꞌ yet chi kawon jun jinat tuꞌ,
manaj xutxal chi kaw eytoj.
Caxcꞌal tiriw,
ma junojxa yal cꞌal tzet jinat chi kawaꞌ,
asan sbꞌakꞌ ma sat chi kawaꞌ.
38 Jaꞌ Dios chi aon oc xutxal junjun jinat tuꞌ jaxca chi yoche scꞌul,
jatacꞌalaꞌ tzet jinatil junjun.
39 Jaꞌ masanil tzettaj yetal yul yibꞌankꞌinal tiꞌ,
txꞌoj txꞌoj cꞌal smimanil junjun tujan.
Txꞌoj yel cu mimanil jaon ánima jon tiꞌ.
Txꞌoj yel smimanil noꞌ noꞌ canebꞌ yajan.
Txꞌoj pax yel smimanil noꞌ tzꞌiquin.
Jacꞌalaꞌ txꞌoj pax yel smimanil noꞌ pescado.
40 Ey satcanil mimanile,
ey pax sat txꞌotxꞌal mimanile.
Jaꞌ satcanil mimanile tuꞌ,
ey swatxꞌilal,
txꞌoj yel yintaj sat txꞌotxꞌal mimanile tuꞌ.
41 Jaꞌ wan tzet ey satcan tuꞌ,
txꞌoj txꞌoj yel stzejejial junjun.
Txꞌoj stzejejial cꞌu,
txꞌoj stzejejial xꞌaaw.
Txꞌoj pax yel stzejejial junjun weycan.
42 Jacꞌalaꞌ queyton tuꞌ oj yun ebꞌ camnaj yet oj pitzcꞌu a ebꞌ xin.
Chi muji eytoj jun cu mimanil tol cꞌuun skꞌaꞌtoj tiꞌ,
jal yet oj pitzcꞌu a tuꞌ,
cꞌamxa bꞌakꞌin oj camoj.
43 Jaꞌ yet oj muji cu mimanil tiꞌ,
cꞌam niꞌoj swatxꞌil yoqui,
catuꞌ cꞌam niꞌoj yip.
Jal yet oj pitzcꞌu a xin,
yel xacꞌal watxꞌ oj yun cu mimanil tuꞌ,
catuꞌ yel xacꞌal oj yiꞌ yip.
44 Jaꞌ yet oj mujle cu mimanil tiꞌ naꞌbꞌa chiꞌbꞌe cꞌal yeocoj.
Jal jun cu mimanil oj pitzcꞌu a tuꞌ xin,
satcanil mimanile xa.
Yutol ey jun cu mimanil naꞌbꞌa chiꞌbꞌe cꞌal,
yuxan,
kotaj pax oj tol ey pax jun cu satcanil mimanile.
45 Queytuꞌ tzꞌibꞌebꞌilcan yul An Juun bꞌey chi yal jaxca tiꞌ:
“Jaꞌ naj bꞌabꞌel winaj,
Adán sbꞌi naj,
jaꞌ Dios jix akꞌon skꞌinal naj,”
ẍi yul An Juun tuꞌ.c
Ey pax junxa mac tzunan xa jix juli,
jaxca Adán tuꞌ yei.
Jaꞌ junxa tuꞌ,
espíritu toni.
Jaꞌton chi akꞌon cu kꞌinal tol ey cꞌal yin tobꞌalkꞌinal.
46 Manaj jun cu mimanil satcanil tuꞌ jix bꞌabꞌi akꞌle ey jon.
Tol jaꞌ jun chiꞌbꞌe mimanile jix bꞌabꞌi akꞌlei.
Tzunan xa oj akꞌle cu mimanil yet satcan tuꞌ.
47 Jaꞌ naj bꞌabꞌel winaj tuꞌ,
yin txꞌotxꞌ jix tit naj.
Yuxan,
yet yul yibꞌankꞌinal tiꞌ yeoc naj.
Jal junxa yet scaabꞌ winaj tuꞌ xin,
jaꞌton Naj Kaawil yet satcan Naj.
48 Jaxca cꞌal jun mimanile tol txꞌotxꞌ tuꞌ,
jaxca cꞌal tuꞌ cu mimanil tiꞌ,
yet pax yul yibꞌankꞌinal tiꞌ yei.
Jaxca cꞌal pax smimanil Naj a satcan tuꞌ,
queytuꞌ jun cu satcanil mimanil oj cu chaꞌ tuꞌ.
49 Jaꞌ tinaniꞌ,
laan cu mimanil tiꞌ yetoj jun txꞌotxꞌ mimanile tuꞌ.
Jal yet jun tiempoal tuꞌ,
laan xa oj yun cu mimanil yetoj yet Naj a satcan tuꞌ.
50 Jex wuẍtaj,
jex wanabꞌ,
chi woche pax chi waltoj junxa tiꞌ ey jex.
Jaꞌ cu mimanil tiꞌ,
naꞌbꞌa chicꞌ naꞌbꞌa chiꞌbꞌe cꞌal eloj.
Yuxan ma skeꞌ yapni bꞌey chi yakꞌ Dios Yaawil.
Jaꞌ cu mimanil tiꞌ,
cambꞌeal yei.
Yuxan,
ma skeꞌ ẍaꞌon kꞌinale tol ey cꞌal yin tobꞌalkꞌinal.
51 Ey pax jun tzet cꞌamto mac otajneni.
Chi woche che yotajne el tinaniꞌ.
Man cu masaniloj jaon creyente jon tiꞌ oj cu camoj.
Tol cu masanil oj qꞌuexbꞌonele cꞌal cu mimanil tiꞌ.
52 Jaꞌ jun tuꞌ,
eyman oj juloj.
Junne mutzꞌsatil oj yun sjuli,
yet oj xuꞌle chꞌen trompeta.
Jaꞌ yet oj xuꞌle chꞌen trompeta tuꞌ,
catuꞌ oj pitzcꞌu a ebꞌ creyente camnajxa.
Jaꞌ yet oj pitzcꞌu a ebꞌ tuꞌ,
cꞌamxa bꞌakꞌin oj cam ebꞌ.
Jaꞌ jaon iquis jon to yet tuꞌ xin,
tuxa cꞌal oj qꞌuexbꞌonele can el cu mimanil tiꞌ.
53 Yutol jaꞌ cu mimanil tiꞌ,
man naatil oj catuꞌ chi etextoj.
Yuxan,
sowalil oj cu chaꞌ jun cu mimanil cꞌam bꞌakꞌin oj etextoj tuꞌ.
Jaꞌ cu mimanil tiꞌ,
cambꞌeal yei.
Yuxan sowalil oj cu chaꞌ jun cu mimanil cꞌamxa bꞌakꞌin oj cam tuꞌ.
54 Yel toni,
jaꞌ cu mimanil tiꞌ,
oj etextoj,
yutol cambꞌeal yei.
Ey pax junxa cu mimanil oj akꞌle oj,
cꞌamxa bꞌakꞌin oj etextoj jun tuꞌ,
catuꞌ cꞌamxa bꞌakꞌin oj cam pax oj.
Jaꞌ yet tuꞌ,
oj yunen el jun tzet tzꞌibꞌebꞌilcan yul An Juun bꞌey chi yal jaxca tiꞌ:
“Jaꞌ camich oj can yalan,
yutol oj akꞌle eyqꞌueyoj.d
55 Jaach camich,
¿bꞌeytuꞌ eyoc ja ganar tuꞌ tinaniꞌ?
¿Bꞌeytuꞌ eyoc ja wip catuꞌ cha wakꞌon cam ánima yin junelne?”
ẍi yul An Juun tuꞌ.e
56 Yu cu penail,
yuxan ey yipal camich tuꞌ chi cu yakꞌ camoj.
Jaꞌ sley Dios jix akꞌon can yip cu penail tuꞌ yu cu cam yu.
57 Caw yuwal dios tet cu Mam Dios,
yutol chi oc cꞌal Scꞌaal Jesucristo tuꞌ ketoj,
catuꞌ chi kakꞌon cꞌal ganar.
58 Yuxan,
jex wuẍtaj,
jex wanabꞌ camcꞌulnebꞌil,
caw tecꞌan cꞌal che yute je bꞌa.
Manche je yakꞌ caabꞌcꞌulal yin je cuybꞌanil.
Yin ojabꞌ masanil je cꞌul chex mulna yin yet Naj Kaawil tobꞌalkꞌinal.
Yutol je yotaj xa,
tol jaꞌ cu mulnail yin yet Naj Kaawil tuꞌ,
man cꞌal naꞌbꞌa oj.