Jaꞌ Chꞌen Saꞌbꞌeal Tet Dios Chi Iꞌle Aoj
16
Jaꞌ tinaniꞌ oj waltoj je yabꞌ yu jun colwal lalan yiꞌle aoj,
catuꞌ oj aletoj tet ebꞌ yet xa Dios.
Jaꞌ wan chejbꞌanil oj waltoj ey jex tiꞌ,
walnajxa tet ebꞌ iglesia bꞌey yul yet Galacia.
Yuxan jaxca ojabꞌ yunnaj ebꞌ tuꞌ,
quey ojabꞌ tuꞌ che yun pax jaex tiꞌ.
2 Jaꞌ yet junjun Domingo,
txꞌoj che yiꞌcan el je colwal tet ebꞌ yet xa Dios,
jatacꞌalaꞌ tzet che yakꞌ ganar junjun jex,
catuꞌ che yambꞌa ecꞌoj.
Yet watxꞌ manxa sowalil oj tol jato cꞌal yet chin apni,
catuꞌ che yiꞌon a je colwal tuꞌ.
3 Che sicꞌ el jaywanoj ebꞌ oj jin chejtoj bꞌey Jerusalén.
Asan chin apni catuꞌ chin tzꞌibꞌe el scarta ebꞌ bꞌey oj waltoj tol ey yopiso ebꞌ.
Jacꞌal ton oc ebꞌ oj iꞌontoj je saꞌbꞌeal tuꞌ bꞌey ebꞌ a Jerusalén tuꞌ.
4 Jaꞌ yet oj jin apnoj ey jex tuꞌ,
catuꞌ oj wiloni,
ta jain caw chin too bꞌey Jerusalén tuꞌ.
Ta chin toi,
jaꞌ wetoj chi too ebꞌ an.
Chi Yaltoj Naj Pablo Bꞌeytuꞌ Oj Toj Ecꞌabꞌoj
5 Jaꞌ yet oj jex toj wiloni,
sowalil oj jin ecꞌ caabꞌoxebꞌoj cꞌu yul yet Macedonia.
Catuꞌ oj jin apnoj oc ey jex tuꞌ.
6 Tala cꞌuxan chin eecꞌ je yetoj junoj tiempoal,
tejan jatuꞌ ey jin ecꞌoj catuꞌ oj ecꞌ nabꞌilkꞌinal,a
jaxa yet oj jin toj bꞌey wanojxa lugar xin,
oj jex colwa cꞌal wetoj yin jin viaje.
7 Cꞌam chi woche tol txenne tiempo xacꞌal oj jex ecꞌ wil canoj.
Chi woche tol chin ecꞌ junoj tiempoal je yetoj,
ta chi el yin scꞌul Naj Kaawil.
8 Ey jin tocꞌal ecꞌ bꞌey conobꞌ Éfeso tiꞌ,
catuꞌ oj ecꞌ kꞌin Pentecostés,
slawi to kꞌin tuꞌ catuꞌ chin toi.
9 Yutol caw watxꞌ cꞌal ẍaꞌon sbꞌa jin mulnail yin yet Naj Kaawil titiꞌ chi wil an.
Caxcꞌal ecꞌal mac chi chichon oc win,
jal jin,
jajan cꞌal jin mulnail.
10 Jaꞌ yet oj apnoj naj Timoteo ey jex tuꞌ,
yaꞌilnewej,
yet watxꞌ cꞌam ojabꞌ tzet chi snaꞌ,
catuꞌ chi eecꞌ je yetoj yin tzalacꞌulalil,
yutol chi mulna pax yin yet Naj Kaawil jaxca jin jain tiꞌ.
11 Yuxan,
cꞌam junoj jex chi skeꞌ je yintajnen el naj tituꞌ.
Jaꞌ tiꞌ je yet tol chi jul je yakꞌ can naj yul-laj bꞌe,
yet watxꞌ chi tit naj yin tzalacꞌulalil.
Tol lalan wechbꞌanen sjul naj yetoj wanxa ebꞌ kuẍtaj oj tit yetoj.
12 Ecꞌal el jix jin oc tean yin kuẍtaj Apolo yutol wochwan tol chex too il-le yu naj,
ma pax yal scꞌul jix jex too yil yetoj wanxa ebꞌ kuẍtaj.
Jato yet chi skeꞌ,
catuꞌ oj jex toj yiloni.
Scawilcꞌule
13 Majwanwej cꞌal.
Tecꞌan ojabꞌ cꞌal che yute je yaon oc je cꞌul yin Naj Kaawil.
Manche jex xiw niꞌoj.
Caw che tecꞌbꞌa je bꞌa junjun jex.
14 Masanil cꞌal tzet che yunne,
unwej yin camcꞌulalil.
15 Jaꞌ tinaniꞌ,
jex wuẍtaj,
jex wanabꞌ,
je yotaj,
tol jaꞌ Estéfanas yetoj yetbꞌi cꞌal yuninal,
jaꞌ ebꞌ bꞌabꞌel creyente bꞌey yul yet Acaya tuꞌ,
jaꞌ ebꞌ tuꞌ,
caw chi yakꞌ servil ebꞌ creyente ebꞌ yin masanil scꞌul.
16 Chin kꞌan ey jex,
tol che jije tzet chi yal ebꞌ.
Catuꞌ che jije pax tet wanxa ebꞌ jun laan yakꞌon servil Naj Kaawil yetoj ebꞌ tuꞌ.
Yutol caw chi colwa ebꞌ catuꞌ chi mulna ebꞌ yin yet Naj Kaawil.
17 Caw chin tzala tinaniꞌ,
yutol jix julecꞌ naj Estéfanas yetoj Fortunato cꞌal Acaico ey jin tiꞌ an.
Jaꞌ ebꞌ tiꞌ caw chi colwa ebꞌ wetoj titiꞌ an.
Jaxca tol je qꞌuexel yeoc ebꞌ yin scolwa wetoj an.
Ilaꞌ,
tol cꞌam chi skeꞌ je juli.
18 Jaxca jix yun yiꞌon can yip je naꞌbꞌal yu ebꞌ tituꞌ,
queytuꞌ jix yun pax yiꞌon yip jin naꞌbꞌal yu ebꞌ titiꞌ an.
Yuxan ey ojabꞌ yeloc apnoj ebꞌ yul je sat.
Jaꞌ wanojxa mactxequel jaxca ebꞌ tuꞌ,
ey ojabꞌ pax yeloc apnoj ebꞌ yul je sat.
19 Jaꞌ ebꞌ kuẍtaj cꞌal ebꞌ kanabꞌ bꞌey junjun iglesia yul yet Asia tiꞌ,
chi yatoj scawil je cꞌul ebꞌ je masanil tituꞌ.
Yetoj pax Aquila yetoj Priscila,
cꞌal ebꞌ creyente chi syambꞌa sbꞌa yakꞌon culto bꞌey sna ebꞌ,
chi yatoj scawil je cꞌul ebꞌ yin sbꞌi Naj Kaawil.
20 Masanil ebꞌ kuẍtaj titiꞌ,
chi yatoj scawil je cꞌul ebꞌ.
Jaꞌ yet che yil-len je bꞌa,
che yakꞌle scawil je cꞌul yin camcꞌulalil,
yutol yet jex xa Dios.b
21 Jaꞌ jun scawilcꞌule chin tzꞌibꞌetoj tiꞌ,
jain caw Pablo jin tiꞌ,
chin tzꞌibꞌetoj yetoj jin kꞌabꞌ.
22 Ta ey junoj mac cꞌam chi camcꞌulnen Naj Kaawil Jesucristo,
tit ojabꞌ sjowal scꞌul Dios yibꞌan.
Jaach Kaawil,
tol ojabꞌ chach jul yin eymanil.
23 Chi woche chi xꞌox swatxꞌcꞌulal Naj Kaawil Jesucristo ey jex tituꞌ.
24 Chex jin camcꞌulne je masanil yin Cristo Jesús.