Cꞌam Chi Skeꞌ Kalon Cu Bꞌa Tet Tzet Chi Al-le Oc Diosal
10
Jex wuẍtaj,
jex wanabꞌ,
chi woche che yotajne eloj,
tzet yunnaj ebꞌ kichmam yet peyxa,
yet tzajan oc ebꞌ yintaj Moisés.
Masanil ebꞌ jix bꞌeytoj yalan jun asun,
catuꞌ masanil ebꞌ ecꞌnajtoj snan jaꞌ Cajin Mar.
2 Jaxca tol akꞌbꞌil bautizar ebꞌ yu jun asun tuꞌ,
yetoj yu jaꞌ mar tuꞌ.
Jaxca tol junne ebꞌ yetoj Moisés yet jun tiempoal tuꞌ.
3 Masanil ebꞌ,
jix loꞌon jun loꞌbꞌe tuꞌ jaxca tol yin yesalil jix yun yakꞌle tet ebꞌ yu Dios.
4 Yetoj pax oj,
masanil ebꞌ yucꞌnaj jun jaꞌ jaꞌ,
tol tucꞌal xꞌoxnaj a sbꞌa tet ebꞌ yu Dios.
Sat chꞌen elnajtej jaꞌ jaꞌ tuꞌ.
Jaꞌ jun chꞌen tuꞌ,
jaꞌton Cristo.
Jaꞌ ecꞌnaj yetoj ebꞌ.
5 Caxcꞌal jaxca tuꞌ yunnaj Dios tet ebꞌ,
jacꞌalaꞌ tol ecꞌal pax ebꞌ cꞌam swatxꞌil snaꞌbꞌal yul sat Dios.
Yuxan,
camnaj can ebꞌ bꞌey txꞌotxꞌ cusiltaj txꞌotxꞌ bꞌey ecꞌnaj ebꞌ tuꞌ.
6 Jaꞌ tzet julnaj yibꞌan ebꞌ tuꞌ,
cu txꞌoxbꞌaniloj yei,
yet watxꞌ manche koche oc tzet cꞌam swatxꞌil jaxca yutenaj sbꞌa ebꞌ tuꞌ.
7 Yuxan,
cꞌam chi skeꞌ kalon cu bꞌa tet tzet chi al-le oc diosal,
jaxca yutenaj sbꞌa wan ebꞌ xol ebꞌ tuꞌ.
Jaꞌ yul An Juun Tzꞌibꞌebꞌilcanoj chi alon cantej skꞌaneal ebꞌ.
Ẍi An jaxca tiꞌ:
“Jix ey chotan ebꞌ,
catuꞌ jix low ebꞌ.
Jix lawi tuꞌ,
jix a waan ebꞌ,
catuꞌ jix canalwi ebꞌ sattaj jun chi yal ebꞌ sdiosaloj tuꞌ,”
ẍi yul An Juun tuꞌ.a
8 Manche pax cu too yin amulal.
Yutol queyton tuꞌ yutenaj sbꞌa wan ebꞌ xol ebꞌ tuꞌ.
Yuxan,
junne cꞌu jix yun scam 23,000 ebꞌ.b
9 Manche kakꞌ porobꞌal Naj Kaawil ta chi yakꞌ mimancꞌulal kin ma cꞌamaj.
Yutol queytuꞌ yutenaj sbꞌa wan ebꞌ xol ebꞌ tuꞌ.
Yuxan,
lawinaj el ebꞌ yu wan noꞌ labꞌa.c
10 Man comonoj chi kal skꞌumal Naj Kaawil.
Yutol ey ebꞌ alnen skꞌumal Naj.
Yu jun tuꞌ xin,
yuxan lawinaj el ebꞌ yu jun ángel ey yopiso smakꞌwi cam ánima.d
11 Masanil cꞌal tzet julnaj yibꞌan ebꞌ kichmam tuꞌ,
cu txꞌoxbꞌaniloj yei.
Tzꞌibꞌebꞌilcan skꞌaneal yul An Juun,
yet watxꞌ chi kotajne eloj,
tol ey smey ta chi oc cu penail.
Yutol jaon tiꞌ,
slawubꞌal tiempoal xa bꞌey ey jon ecꞌoj.
12 Yuxan,
jaꞌ mac tecꞌan ye snaꞌoni,
chi cam wal yakꞌon cuenta sbꞌa,
yutol ey smey chi etex el snaꞌbꞌal.
13 Laan cꞌal porobꞌal chi jul yibꞌan junjun ánima.
Jal pax Dios chi cꞌal yun tzet chi yalaꞌ.
Man oj cu chaꞌle akꞌle porobꞌal yin junoj tzetyetal tol cꞌam chi techa ku.
Jaꞌ yet chi jul junoj porobꞌal tuꞌ,
jaꞌ Naj chi colwa yin tzet utbꞌil chi kute cu colon cu bꞌa tet,
yet watxꞌ chi techa ku.
14 Yuxan,
jex jin camcꞌulnebꞌil,
manche je yal je bꞌa tet junoj tzet chi al-le oc diosal.
15 Chi waltoj wan tiꞌ ey jex,
yutol jelan jex xa.
Chi cam je naoꞌtane sicꞌlebꞌil ta yel chi wal an.
16 Jaꞌ jun svaso Dios,
bꞌey chi tit swatxꞌilal,
chi kal yu diosalil yu,
jaꞌ chi txꞌoxoni,
tol junxane keoc yetoj Cristo,
yutol cu yaꞌiloj,
yuxan jix el ẍiqꞌuil.
Jacꞌalaꞌ pax ixim pan chi poꞌole ecꞌ cu xol,
chi xꞌox pax el ixim,
tol junxane ton keoc yetoj Naj,
yutol cu yaꞌiloj,
yuxan jix akꞌle cam smimanil.
Yutol junxane keoc yetoj naj,
yuxan manche je junbꞌane je bꞌa yetoj tzet chi al-le oc diosal.
17 Caxcꞌal ecꞌal jon,
junne ixim pan tuꞌ chi cu loꞌ cu masanil.
Yuxan,
jaxca ton jun pan tuꞌ,
jun chꞌan,
quey jon ton pax tuꞌ.
Yutol jaxca tol junxane smimanil Cristo keoc cu masanil.
18 Naꞌwejtej niꞌojxa wetoj an,
tzet chi yute sbꞌa ebꞌ Israel.
Jaꞌ ebꞌ chi chiꞌon tzet chi yakꞌ yin xaambꞌalil,
jaꞌ chi txꞌoxoni tol junxane yeoc ebꞌ yetoj Dios mac chi chaꞌon xaambꞌal tuꞌ.
19 Man lalan oj waloni tol ey yeloc apnoj tzet chi al-le oc diosal tuꞌ.
Jacꞌalaꞌ,
pax tzet chi akꞌle yin xaambꞌalil tuꞌ,
man lalan oj waloni tol ey yeloc apnoj.
20 Jaꞌ jun tiꞌ chi yoche jin cꞌul chi wal tiꞌ an.
Jaꞌ yet chi yakꞌon xaambꞌal ebꞌ man Israeloj,
manaj tet Dios chi yakꞌ ebꞌ.
Jaꞌ pax tet ebꞌ pena espíritu chi yakꞌ xaambꞌal ebꞌ.
Chi woche cꞌam junoj jex che junbꞌane je bꞌa yetoj ebꞌ pena espíritu tuꞌ.
21 Man smoo oj tol chi kucꞌ yin jun svaso chi naꞌontej Naj Kaawil ta chi kucꞌ pax yin junoj svaso chi naꞌontej ebꞌ pena espíritu tuꞌ.
Yetoj pax oj,
cꞌam chi skeꞌ comon cꞌal chi cu loꞌ ixim pan chi eltej ey jon yibꞌan smeẍa Naj Kaawil,
ta chi cu loꞌ pax tzet chi bꞌatxbꞌale atoj yibꞌan smeẍa ebꞌ pena espíritu tuꞌ.
22 ¿Ma chi koche chi kiꞌtej sjowal scꞌul Naj Kaawil kibꞌan?
¿Ma yel xacꞌal ey kipal yintaj Naj yuxan cꞌam chi cu xiw tet sjowal scꞌul Naj?
Man Smoo Oj Ketnentoj Snaꞌbꞌal Junojxa Mactxequel
23 Tejan ey jex che yal jaxca tiꞌ tinaniꞌ:
“Jaon tiꞌ,
cꞌam junoj tzetyetal ey sleyal ku,”
tejan je chi.
Yel toni,
man smoo oj kunen masanil tzetyetal.
Caxcꞌal mi chi skeꞌ kunen masanil tzettaj yetal.
Man pax masaniloj tzettaj yetal tuꞌ chi akꞌon stecꞌanil cu naꞌbꞌal.
24 Junjun jon,
man smoo oj kunen tzet chi koche yul ket.
Smoo chi cu seyaꞌ,
tzet utbꞌil chi kute kakꞌon stecꞌanil wanojxa ebꞌ.
25 Jaꞌ tinaniꞌ,
yal cꞌal tzet chiꞌbꞌeal chi txonle txombꞌal,
chi skeꞌ je manon je chiꞌ.
Manche je kꞌanle bꞌey chi tita,
yet watxꞌ manche je naꞌ tol man watxꞌoj tzet che yunne.
26 “Yutol jaꞌ yul yibꞌankꞌinal tiꞌ,
yet Naj Kaawil yei,
cꞌal masanil tzettaj yetal,
yet pax oj”.e
27 Kꞌinaloj ey junoj man creyenteoj chex awten low yetoj bꞌey sna.
Ta chi yoche je cꞌul chex toi,
chi cꞌal skeꞌ je loꞌon tzet chi yakꞌ ey jex.
Manche je kꞌanle tet bꞌey chi tit tzet chi bꞌatxbꞌale eltej je sattaj tuꞌ,
yet watxꞌ cꞌam che naꞌ tol man watxꞌoj tzet che yunne.
28 Ta ey pax junoj mac chi alon ey jex jaxca tiꞌ xin:
“Jaꞌ noꞌ chiꞌbꞌe chi yakꞌ naj tiꞌ je chiꞌ,
jix akꞌle noꞌ yin xaambꞌalil tet tzet chi al-le oc diosalil,”
ta ẍi ey jex,
manche je chiꞌ.
Yutol jaꞌ mac chi alon ey jex tuꞌ,
ey smey chi etex el snaꞌbꞌal je yu ta che chiꞌ,
catuꞌ chi somcha el snaꞌbꞌal je yu.
29 Chi waltoj wan tiꞌ ey jex,
yet watxꞌ cꞌam chi etex el snaꞌbꞌal ebꞌ cꞌamto yip snaꞌbꞌal je yu.
Man yu oj je naꞌbꞌal jaex tiꞌ,
yuxan chi waltoj wan tiꞌ.
Tejan ey jex oj je yal jaxca tiꞌ:
“Jaon tiꞌ,
chi cꞌal skeꞌ cu chiꞌon masanil tzetyetal.
Yuxan,
¿tzet yuxan chi naꞌle oc kin yu ebꞌ chi xiw ẍiꞌon chiꞌbꞌe tuꞌ?
30 Ta chi kal yu diosalil tet Dios yu noꞌ chiꞌbꞌe tuꞌ,
catuꞌ chi cu chiꞌon noꞌ,
cꞌam mac ey yalon yet yalon tzet pena kin,”
je chi mi.
Tejan ey jex lalan je naꞌon jaxca tuꞌ tinaniꞌ.
31 Chi wal pax toj ey jex,
caxcꞌal chi cu lowi,
ma chi kucꞌ junoj tzetyetal,
ma yal cꞌal tzetyetal junojxa chi el kuneni,
sowalil chi kunne,
yet watxꞌ chi txeclo el swatxꞌilal Dios ku.
32 Jaꞌ ebꞌ man to creyenteoj,
caxcꞌal Israel junoj mactxequel,
caxcꞌal man Israeloj junoj mactxequel,
caw cꞌam chi skeꞌ kakꞌon etex el snaꞌbꞌal ebꞌ.
Yetoj pax ebꞌ ket creyenteal,
jaꞌton ebꞌ yiglesia Dios,
ma skeꞌ kakꞌon etex el snaꞌbꞌal ebꞌ.
33 Jain tiꞌ,
chi wakꞌle wakꞌon tzala scꞌul ánima yin masanil tzet chi el wuneni.
Manaj tzet chi oc jin watxꞌiloj chin seyaꞌ.
Tol jaꞌ tzet chi oc swatxꞌiloj wanojxa ánima jaꞌton chin seyaꞌ,
yet watxꞌ tala ey ebꞌ chi colcha can eloj.