Jaꞌ Tzet Smoo Yunen Junoj Ẍejabꞌ Jesucristo
9
Jain tiꞌ,
caw yel ẍejabꞌ Jesucristo jin an.
Ilbꞌil yin Naj Kaawil Jesús tuꞌ wu an.
Yuxan,
ey walon wet jaxca wanxa ebꞌ ẍejabꞌ masanil.
Jaex tiꞌ,
jix jex oc creyenteal yu jin mulnail yin yet Naj Kaawil tuꞌ.
2 Caxcꞌal ey wanojxa ebꞌ chi aloni,
tol man ẍejabꞌoj jin Cristo an,
caw je yotaj jaex tiꞌ sicꞌlebꞌil,
tol ẍejabꞌ Cristo weoc an.
Txequel weoc yul je sat tol ẍejabꞌ jin,
yutol wu,
yuxan jix je yaoc je cꞌul yin Naj.
3 Ey ebꞌ pena chi alon win an,
tol man ẍejabꞌoj jin Cristo an.
Jaxca cꞌal tiꞌ chi wute pax jin pajtzen tet ebꞌ.
4 Jain tiꞌ,
ey walon wet jin chaꞌon tzet chin loꞌ,
cꞌal tzet chi wuqꞌue.
5 Kꞌinaloj ey junoj kanabꞌ chi oc wistiloj tinaniꞌ.
Ey walon wet wiꞌon bꞌey yal cꞌal bꞌey chin eqꞌui.
Yutol queytuꞌ chi yute sbꞌa ebꞌ yuẍtaj Naj Kaawil,
yetoj pax naj Pedro,
cꞌal wanxa ebꞌ ẍejabꞌ Naj.
6 ¿Ma tzet che naꞌ,
asan chꞌan jin jain tiꞌ yetoj naj Bernabé,
asan jaon tiꞌ sowalil chi cu mulna yu cu loꞌbꞌe?
7 Ilaꞌ ebꞌ soldado tinaniꞌ.
¿Ma ey junoj ebꞌ chi mulnai,
cꞌal chi yiꞌel sgasto yul yet?
Yetoj pax ebꞌ chi awon junoj tzetyetal,
ey yalon yet chi sloꞌ sat yawo ebꞌ tuꞌ.
Jacꞌalaꞌ pax ebꞌ ilom wacax,
¿tumi cꞌam chi yucꞌ slecheal swacax ebꞌ?
8 Jaꞌ wan chi waltoj ey jex tiꞌ,
man asanne oj yin snaꞌbꞌal ánima chi tita.
Chi yal pax yul sley Moisés,
tol albꞌilcan wan tiꞌ yu Dios.
9 Jaꞌ yul jun ley tuꞌ chi yal jaxca tiꞌ:
“Manche je yaoc spail stiꞌ noꞌ wacax yet chi tecꞌwi tiriw noꞌ,”
ẍi yul ley tuꞌ.a
Man asanne oj yu cꞌal noꞌ noꞌ tuꞌ,
yuxan jix yal can Dios jun tiꞌ.
10 Tol ku pax oj,
yuxan jix tzꞌibꞌelecan yul ley tuꞌ,
yet watxꞌ chi naꞌcha el ku.
Yutol jaꞌ ebꞌ kꞌuom txꞌotxꞌ,
yetoj ebꞌ tecꞌom tiriw,
jaꞌ yet chi mulna ebꞌ tuꞌ chi yaoc ebꞌ yipoj scꞌul,
tol oj low ebꞌ yin smulnail.
11 Jaxca ton ebꞌ chi mulna tuꞌ,
quey jon ton tiꞌ,
jaon ẍejabꞌ Cristo jon tiꞌ.
Jaꞌ yet jix cu ecꞌ je xol,
jaxca tol ey tzet ecꞌ kawnaj can je xol.
Jaꞌ tzet ecꞌ kawnaj can je xol tuꞌ,
jaꞌton skꞌane Dios.
Yuxan,
¿man smoo oj cu chaꞌon cu gasto ey jex,
yu spaj cu mulnail tuꞌ,
che naꞌ?
12 Ey pax wanxa ebꞌ ey yalon yet ẍaꞌon yet ey jex.
Tol yel xacꞌal pax ey kalon ket jaon tiꞌ.
Caxcꞌal ey kalon ket cu chaꞌon cu gasto ey jex,
cꞌam juneloj jix cu kꞌan ey jex.
Caw chi kakꞌ cꞌal techa masanil tzetyetal.
Cꞌam cꞌal chi cu chaꞌ ey jex,
yet watxꞌ cꞌam mactxequel chi aloni,
tol cꞌam yeloc apnoj skꞌaneal Cristo yutol yu cꞌal tumin chi kaleloj.
13 Je yotaj xa,
tol jaꞌ ebꞌ chi mulna bꞌey stemplo Dios,
jatuꞌ chi ẍaꞌ ebꞌ tzet chi sloꞌ.
Yutol jaꞌ ebꞌ ey yopiso yakꞌon xaambꞌal,
chi skeꞌ ẍiꞌon ebꞌ ẍiꞌbꞌeal noꞌ noꞌ chi yakꞌ yin xaambꞌalil tuꞌ.
14 Quey pax tuꞌ ebꞌ chi ecꞌ alo el skꞌaneal yet colbꞌanile.
Yutol yalnaj can Naj Kaawil tol sowalil chi ẍaꞌ sgasto ebꞌ yin bꞌey chi mulna oc ebꞌ tuꞌ.
15 Jain tiꞌ,
caxcꞌal ey walon wet jin chaꞌon jin gasto,
cꞌam cꞌal pax bꞌey jix jin kꞌan juneloj.
Tucꞌal ton chi waltoj wan tiꞌ ey jex.
Man yu oj jin kꞌanon jin gasto,
yuxan chi waltoj,
cꞌamaj.
Jaꞌ chi wute jin naꞌoni,
yel mi watxꞌ chin cam yu wail yintaj pax tol chin kꞌan jin gasto tuꞌ ey jex.
Ilaꞌ,
tol cꞌam chin kꞌan jin gasto ey jex,
yuxan ey walon wet jin tzala sattaj Dios.
Cꞌam mac chi skeꞌ yiꞌon ecꞌ jun jin tzalacꞌulal tiꞌ.
16 Jain tiꞌ,
caxcꞌal chin ecꞌ walel skꞌaneal yet colbꞌanile,
man yu oj tuꞌ chi skeꞌ wecꞌbꞌanen jin bꞌa.
Yutol sowalil chin ecꞌ waleloj.
Okꞌbꞌal jin cꞌul ta cꞌam chi ecꞌ walel jun skꞌaneal yet colbꞌanile tiꞌ.
17 Cꞌam chi wun asan yu chi wiꞌ jin gasto an,
chi wun pax an,
yutol jix yakꞌ wopiso Dios yin walon eloj.
18 Yuxan jaꞌ spaj lalan jin chaꞌon tinaniꞌ,
jaꞌton jin tzalacꞌulal tiꞌ lalan jin chaꞌon spaj yu chi ecꞌ walel skꞌaneal yet colbꞌanile tiꞌ yin tol cꞌam jin tool chin chaꞌ.
Yutol caxcꞌal ey walon wet jin kꞌanon jin gasto yin wopiso tiꞌ,
cꞌam cꞌal chin kꞌanaꞌ.
19 Caxcꞌal cꞌam mac ey yalon yet win an,
chi wakꞌ cꞌal pax jin bꞌa yakꞌomaloj servil masanil ánima yet watxꞌ ey ecꞌaloj chi oc creyenteal yin Cristo wu an.
20 Jaꞌ yet ey jin ecꞌ xol ebꞌ wet Israelal,
jaxca sbꞌeybꞌal ebꞌ tuꞌ,
queytuꞌ chi wute jin bꞌeybꞌal pax oj,
yu wakꞌon ganar jaywanoj ebꞌ.
Jaꞌ ebꞌ wet Israelal tuꞌ caw eyoc snaꞌbꞌal ebꞌ yin sley Moisés.
Yuxan,
jaꞌ yet ey jin ecꞌ snan xol ebꞌ,
caxcꞌal cꞌam chi waoc jin naꞌbꞌal yin jun ley tuꞌ,
laan cꞌal pax chi wute jin naꞌbꞌal yetoj ebꞌ,
yu wakꞌon ganar jaywanoj ebꞌ.
21 Jacꞌalaꞌ pax yet ey jin ecꞌ xol ebꞌ man Israeloj,
ebꞌ cꞌam chi yaoc snaꞌbꞌal yin jun ley tuꞌ,
laan chi wute jin naꞌbꞌal yetoj ebꞌ,
yu wakꞌon ganar jaywanoj ebꞌ.
Tobꞌalkꞌinal cꞌal,
sowalil chin jije sley Dios,
yutol eyoc jin naꞌbꞌal yin sley Cristo tinaniꞌ.
22 Jacꞌalaꞌ yet ey jin ecꞌ yetoj ebꞌ man tecꞌan oj yeoc yin tzet bꞌey eyoc snaꞌbꞌal ebꞌ,
laan chi wute jin bꞌa yetoj ebꞌ,
yu wakꞌon ganar jaywanoj ebꞌ.
Yuxan,
yal cꞌal bꞌey chin eqꞌui,
jaxca cꞌal chi yute sbꞌa ebꞌ bꞌey chin ecꞌ tuꞌ,
queytuꞌ chi wute jin bꞌa yetoj ebꞌ,
yet watxꞌ tala cꞌuxan ey ebꞌ chi wakꞌ ganar scolcha can eloj.
23 Masanil cꞌal tzet chi el wuten jin bꞌa tuꞌ,
yu skꞌaneal yet colbꞌanile,
yuxan queytuꞌ chi wute jin bꞌa,
yet watxꞌ ey walon wet yin swatxꞌilal iꞌbꞌil yu jun skꞌaneal tuꞌ pax oj.
24 Kꞌinaloj ebꞌ chi sajchi yin yujtelen ecꞌ sbꞌa tinaniꞌ,
chi yakꞌ ani ebꞌ.
Je yotaj xa,
tol masanil ebꞌ chi yakꞌ ani,
asanne pax jun mac chi bꞌabꞌi apni bꞌey tꞌinan chi apni ebꞌ tuꞌ,
asan chi chaꞌon spaj.
Yuxan,
jaxca ton ebꞌ chi yakꞌ ani tuꞌ,
sowalil queytuꞌ chi kute cu bꞌa yin yet Cristo,
yet watxꞌ oj cu chaꞌ spaj ket junjun jon.
25 Masanil cꞌal mac chi oc yin jun sajach tuꞌ,
chi steyne sbꞌa ebꞌ yin masanil tzet chi etnen el smimanil.
Chi steyne sbꞌa ebꞌ yutol chi yoche ebꞌ chi ẍaꞌ spaj.
Jal pax spaj chi ẍaꞌ ebꞌ tuꞌ,
junep jixto catuꞌ chi etextoj.
Jal pax spaj oj cu chaꞌ jaon tiꞌ xin,
cꞌam bꞌakꞌin chi etextoj.
Yuxan,
sowalil chi cu teyne cu bꞌa yin tzet man watxꞌoj.
26 Jaxca chi yun ebꞌ chi yakꞌ ani yin sajach tuꞌ,
queytuꞌ chi wute jain tiꞌ yin yet Dios.
Man caabꞌoj jin cꞌul chi wakꞌon wani.
Jaxca ebꞌ eyoc yin sajach chi smakꞌle sbꞌa,
yal cꞌal mac chi akꞌon ganar,
queytuꞌ chi wute pax jin bꞌa.
Yutol yin masanil jin cꞌul chin mulna yin yet Dios.
27 Caw chin mitxꞌoc tucan jin mimanil tiꞌ.
Catuꞌ chi wakꞌon cuenta sicꞌlebꞌil.
Yutol caxcꞌal ecꞌal mac bꞌey jix wal skꞌane Dios,
sowalil jacꞌalaꞌ wakꞌon cuenta jin mimanil tiꞌ.
Ta cꞌamaj,
tala cꞌuxan chin intajnele can el yu Dios.