Jaꞌ tinaniꞌ,

oj waltoj yu tzet chi akꞌle yin xaambꞌalil tet tzet chi al-le oc diosal,

chi lawi tuꞌ catuꞌ chi chiꞌle pax oj.

Yel toni,

jaꞌ wan oj waltoj tiꞌ,

kotaj cu masanil.

Ey ton cu jelanil.

Jal pax cu jelanil tiꞌ,

tucꞌal chi kiꞌa can cu bꞌa yetoj.

Ta ey pax cu camcꞌulal,

caw chi yiꞌ yip ebꞌ ket creyenteal yu.

2 Jaꞌ mac jelan snaꞌoni,

cꞌam pax niꞌoj sjelanil jaxca chi yoche Dios.

3 Jal pax ebꞌ chi camcꞌulnen Dios,

otajbꞌil ebꞌ yu.

4 Jaꞌ tinaniꞌ xin,

oj waltoj yu tzet chi loꞌlei yet chi lawi yakꞌle yin xaambꞌalil tet tzet chi al-le oc diosal.

Jaꞌ tzet chi al-le oc diosal tuꞌ,

kotaj tol man Dios oj.

Cꞌam yopiso yul yibꞌankꞌinal tiꞌ,

yutol asan jun Dios ey,

man cawan,

oxwanoj.

5 Ey tzet chi al-le oc diosal chi ecꞌ satcan.

Ey pax tzet chi al-le oc diosal yul yibꞌankꞌinal tiꞌ.

Yutol jaꞌ ebꞌ ánima,

ecꞌal tzet chi yaloc ebꞌ sdiosaloj,

cꞌal yaawiloj.

6 Jal jon jaon tiꞌ,

asan jun cu Diosal ey,

jaꞌton cu Mam Dios.

Jaꞌ cu Mam Dios tuꞌ jix waꞌnen masanil tzetyetal.

Jaꞌ pax jix cu waꞌneni.

Jaꞌton yu Naj yuxan chi cu eqꞌui.

Asan pax jun Kaawil,

jaꞌton Jesucristo.

Yu naj yuxan ey masanil tzetyetal,

cꞌal jaon tiꞌ pax oj.

Asan yu naj yuxan ey jon ecꞌoj.

7 Man pax masaniloj creyente chi naꞌcha el wan tiꞌ yu.

Ey ebꞌ caw eyoc scꞌul yin tzet chi al-le oc diosal tuꞌ.

Yuxan jaꞌ tzet chi akꞌle yin xaambꞌalil,

asan tzet chi al-le oc diosal tuꞌ ey yet,

snaꞌon ebꞌ.

Man to tecꞌan oj yeoc snaꞌbꞌal ebꞌ.

Yuxan chi etex el snaꞌbꞌal ebꞌ ta chi sloꞌ ebꞌ tzet chi akꞌle yin xaambꞌalil tuꞌ.

8 Cꞌam pax chi naꞌle oc kin yu Dios yu tzet chi cu loꞌ.

Catuꞌ cꞌam pax chi cu waꞌxi a yul sat Dios ta chi cu loꞌ.

Jacꞌalaꞌ ta cꞌam chi cu loꞌ pax oj,

cꞌam chi cu etex pax el yul sat Dios.

9 Caxcꞌal chi skeꞌ cu loꞌon masanil tzetyetal,

cꞌam sleyal yu,

ey pax smey chi etex el ebꞌ man to tecꞌan oj yeoc snaꞌbꞌal yu tzet chi kunne.

Yuxan,

sowalil chi kakꞌ cuenta cu bꞌa.

10 Jaex tiꞌ,

jelan jex toni.

Je yotaj tol cꞌam smey tzet chi cu chiꞌ tuꞌ.

Ta ey pax mac man to tecꞌan oj yeoc snaꞌbꞌal,

man yotaj oj ebꞌ wan tiꞌ.

Kꞌinaloj ta chi yil ebꞌ tol chotan jex ey je low sattaj wan tzet chi al-le oc diosal tuꞌ.

Ey smey chi somcha snaꞌbꞌal ebꞌ je yu.

Catuꞌ chi sloꞌon ebꞌ tzet akꞌbꞌil xa yin xaambꞌalil tuꞌ,

caxcꞌal chi xiw ebꞌ tol man watxꞌoj chi yun ebꞌ.

11 Ta queytuꞌ che yute je bꞌa jaxca tuꞌ,

oj etex el snaꞌbꞌal ebꞌ man to tecꞌanoj yeoc snaꞌbꞌal tuꞌ yu je jelanil.

Caw cuscꞌulal pax oj,

yutol yu pax ebꞌ,

yuxan jix cam Cristo.

12 Yuxan,

jaꞌ ebꞌ man to tecꞌan oj yeoc snaꞌbꞌal tuꞌ,

ta je yu cꞌal catuꞌ chi etex el snaꞌbꞌal ebꞌ,

jaꞌ tet Cristo chi oc je penail.

13 Yuxan,

ta ey junoj mac chi etex el snaꞌbꞌal yu cꞌal tzet chin chiꞌ,

yel watxꞌ cꞌamxa chin chiꞌ chiꞌbꞌe,

yet watxꞌ cꞌam junoj mac chi etex el snaꞌbꞌal wu cꞌal an.