Scuybꞌanil Ebꞌ Chi Oc Yetbꞌi
7
Jaꞌ tinaniꞌ xin,
oj jin pajtzetoj wan tzet jix je kꞌanle ey jin an yul jun an je carta jix je yatej ey jin an.
Watxꞌ toni,
ta ey ebꞌ winaj cꞌam chi oc yistil.
2 Asan xin,
caw ey smey chi eyqꞌuey ebꞌ yin mule,
yuxan,
yel watxꞌ ta chi oc yistil junjun ebꞌ,
cꞌal ebꞌ ix ix,
yel watxꞌ ta chi oc yichamil junjun ebꞌ ix.
3 Jaꞌ jaex ichamile jex xa,
che yakꞌ yochwan je yistil,
yutol je yetbꞌi je bꞌa.
Jacꞌalaꞌ jex pax jex istile,
akꞌwej pax yochwan je yichamil.
4 Yutol man yaawiloj jex yin je mimanil.
Jaꞌ je yichamil ey yalon yet je yin.
Jacꞌalaꞌ jex pax jex ichamile,
man yaawiloj jex yin je mimanil.
Jaꞌ je yistil,
jaꞌ ey yalon yet je yin.
5 Yuxan,
man smoo oj je tenon tzet chi yoche je yetbꞌi je yin.
Asanne ta chi oc tucan je yu jayebꞌoj cꞌual yu chex txali tet Dios yin masanil je cꞌul.
Chi lawi cꞌal jayebꞌ cꞌu tuꞌ,
junbꞌanewej pax je bꞌa junelxa,
yet watxꞌ manche jex etnele el yu Satanás.
Yutol ey smey,
tol ma skeꞌ je mitxꞌon oc tucan je mimanil.
6 Jaꞌ wan chi waltoj ey jex tiꞌ,
man jaꞌcaw chejbꞌanile oj.
Chi waltoj tol cꞌam sowalil che yun wan tuꞌ.
7 Jain tiꞌ,
jaꞌ chi wute jin naꞌoni,
tol yel watxꞌ ta cꞌam chi oc je yetbꞌi je masanil jaxca jin jain tiꞌ.
Tol txꞌoj txꞌoj cꞌal pax tzet chi yakꞌ Dios ey jon junjun jon.
Yutol ey mactxequel chi akꞌle junoj tzetyetal tet.
Ey mac xin,
chi akꞌle junojxa tzetyetal tet.
8 Chi walon pax toj wan tiꞌ ey jex,
mac jex cꞌamto chi oc je yetbꞌi,
cꞌal ey jex,
mac jex camnajxa je yichamil.
Yel watxꞌ chex can je txꞌojli jaxca jain tiꞌ,
9 ta cꞌam pax chi techa je yu je txꞌojli che yabꞌ xin,
oc ojabꞌ je yetbꞌi.
Yutol yel watxꞌ tol chi oc je yetbꞌi,
yintaj pax tol tucꞌal che yoche chex too yin amulal.
10 Jal jex eyxa je yetbꞌi xin,
tol chi waltoj wan chejbꞌanile tiꞌ ey jex.
Jaꞌ wan chejbꞌanile tiꞌ,
man wetoj an,
yet Naj Kaawil.
Jex wanabꞌ,
manche cꞌal je poꞌole je bꞌa yetoj je yichamil.
11 Ta ey pax junoj ix chi spoꞌole sbꞌa yetoj yichamil,
manche xa yiꞌ junojxa winaj.
Asan yetoj yichamil cꞌaltaꞌ tuꞌ chi skeꞌ yiꞌlen sbꞌa junelxa.
Jacꞌalaꞌ jex pax wuẍtaj,
ma skeꞌ je poꞌolen je bꞌa yetoj je yistil.
12 Ey pax wanxa jex,
ey wan tzet oj waltoj ey jex.
Man pax caw ẍejbꞌanil oj Naj Kaawil yeoc wan tiꞌ,
wet cꞌal yul wet.
Ta ey junoj kuẍtaj cꞌam chi oc yistil yin creyenteal yetoj,
ta chi ẍaꞌ pax scꞌul ix yeecꞌ yetoj naj,
manche ojabꞌ spoꞌole sbꞌa naj yetoj yistil tuꞌ.
13 Yetoj pax oj,
ta ey junoj kanabꞌ,
cꞌam chi oc yichamil yin creyenteal yetoj,
ta chi ẍaꞌ pax cꞌal scꞌul naj yeecꞌ yetoj ix,
manche ojabꞌ spoꞌole sbꞌa ix yetoj yichamil tuꞌ.
14 Yutol caxcꞌal man creyenteoj naj yichamil ix tuꞌ,
jaxca tol yet Dios yeoc naj yetoj ix,
yutol junne xa yeoc naj yetoj ix creyente tuꞌ.
Jacꞌalaꞌ pax junoj ix man creyenteoj,
jaxca tol yet xa Dios yeoc ix,
yutol junxane yeoc ix yetoj naj creyente tuꞌ.
Kꞌinaloj ta tol man yetoj Dios ebꞌ scawanil,
comon ánima mi yeoc yuninal ebꞌ.
Cꞌamaj pax oj,
yet pax Dios ebꞌ unin tuꞌ.
15 Ta jaꞌ pax jun man creyenteoj tuꞌ chi yoche chi spoꞌole sbꞌa yetoj jun creyente tuꞌ,
spoꞌole ojabꞌ ebꞌ sbꞌa xin.
Ta chi spoꞌole sbꞌa ebꞌ,
jaꞌ jun creyente tuꞌ,
jajbꞌil xa eloj.
Cꞌam chi oc smul,
yutol chi yoche Dios tol chi cu eecꞌ yin watxꞌcꞌulal.
16 Yutol jaex istile jex tiꞌ,
man je yotaj oj,
ta oj colcha el je yichamil tuꞌ yu cꞌam che poꞌole je bꞌa yetoj.
Jacꞌalaꞌ jex pax jex ichamile,
man je yotaj oj ta oj colcha el je yistil tuꞌ yu cꞌam che poꞌole je bꞌa yetoj.
17 Tol sowalil che yun jaxca chi xꞌox Dios ey jex junjun jex.
Chi oc je yetbꞌi ma cꞌam chi oc je yetbꞌi.
Che yun ojabꞌ jaxca chi xꞌox Dios ey jex,
catuꞌ chex tzala yin tzet chi yakꞌ Dios ey jex.
Quey cꞌal tiꞌ chi wute walon tet ebꞌ creyente bꞌey junjun iglesia.
18 Yuxan,
ta ey jex,
eyxa oc jun echele chi yij circuncisión* yin je mimanil,
catuꞌ jix jex awtele oc yu Dios,
Manche je cꞌubꞌa eloj tol chabꞌilxa jun tuꞌ je yu.
Jacꞌalaꞌ pax oj,
ta ey jex man to ocnaj oj jun echele tuꞌ je yin xin,
catuꞌ jix jex awtelei,
manche xa je chaꞌ tinaniꞌ.
19 Caxcꞌal ocnaj je yechel chi yij circuncisión tuꞌ,
caxcꞌal cꞌamaj,
cꞌam yeloc apnoj.
Ey pax jun tzetyetal caw miman yeloc apnoj,
tol chi cu bꞌeybꞌalne jaxca chi yoche Dios.
20 Junjun mactxequel awtebꞌil xin,
can ojabꞌ jaxca cꞌaltaꞌ yeoc yet jix awtele yu Dios.
21 Ta ey jex,
ey jex oc yin yakꞌomal servil yin junelne bꞌey junoj mactxequel,
jaex awtebꞌil jex xa yu Dios tuꞌ,
manche jex oc il.
Ta chi skeꞌ pax je yel yin je yakꞌon servil tuꞌ xin,
yel watxꞌ chex el yin.
22 Yutol ey mac eyoc yakꞌomal servil yin junelne bꞌey junoj mactxequel yet chi awtele oc ebꞌ yetoj yu Naj Kaawil.
Caxcꞌal yakꞌomal servil tocꞌal yeoc ebꞌ tinaniꞌ bꞌey spatrón tuꞌ,
jix jajcha pax el ebꞌ yul skꞌabꞌ spenail yu Naj Kaawil.
Ey mactxequel xin,
yet sbꞌa yet jix awtele yu Dios.
Jal tinaniꞌ xin,
eyoc yakꞌomaloj servil Cristo.
23 Jaon tiꞌ,
manbꞌil jon xa el yu Dios.
Yuxan,
manche ojabꞌ kaoc cu bꞌa yakꞌomaloj servil junoj ánima yin junelne.
24 Yuxan,
jex wuẍtaj,
jex wanabꞌ,
jaꞌ yet ey jex xa oc yetoj Dios,
watxꞌ cꞌaltaꞌa,
jaꞌ taꞌ chi cu can junjun jon jaxca cꞌaltaꞌ keoc yet jix cu yawten oc Naj yetoj.
25 Jaꞌ jaex cꞌamto chi oc je yetbꞌi,
cꞌam junoj ẍejbꞌanil Naj Kaawil oj waltoj ey jex.
Jaꞌ tzet oj waltoj ey jex,
jain cꞌal chin naꞌ yul wet an.
Jal pax tzet oj walaꞌ,
smoo tol ey yeloc apnoj yul je sat,
yutol jix okꞌ scꞌul Dios win an,
catuꞌ jix yakꞌon wopiso tiꞌ an.
26 Yu wan syaꞌilal lalan sjul kibꞌan tiꞌ,
yuxan chin naꞌ,
tol watxꞌ junjun jon chi cu can jaxca cꞌaltaꞌ keoc tiꞌ.
27 Yuxan jaꞌ jaex eyxa je yetbꞌi,
manche je sey tzet che yute je poꞌolen je bꞌa.
Yetoj jex cꞌamto je yetbꞌi,
watxꞌ cꞌam che sey je yetbꞌi tuꞌ.
28 Ta ey jex pax che sey je yistil xin,
jaꞌ jun tuꞌ man penaoj.
Cꞌal jex kꞌopotaj ix,
ta chi oc je yichamil,
man pax mule oj.
Jal pax ebꞌ chi oc yetbꞌi,
yel miman syaꞌilal oj yil ebꞌ yul yibꞌankꞌinal tiꞌ.
Yuxan chi waltoj wan tiꞌ ey jex,
yutol chi woche cꞌam chi jul wan syaꞌilal tuꞌ je yibꞌan.
29 Jex wuẍtaj,
jex wanabꞌ,
ey pax wanxa tzet oj waltoj ey jex,
tol txenxane tiempo,
yuxan,
jaꞌ ebꞌ ey yistil tinaniꞌ,
ma skeꞌ asan yin yistil ebꞌ chi yaoc snaꞌbꞌal.
30 Jaꞌ ebꞌ chi cusi,
ma skeꞌ asan cusilal chi yil yun ebꞌ.
Yetoj pax ebꞌ chi tzalai,
ma skeꞌ jacꞌal yin tzalacꞌulal tuꞌ chi yaoc snaꞌbꞌal ebꞌ,
yetoj ebꞌ chi yakꞌ negocio,
man ojabꞌ asanne oj yin snegocio tuꞌ chi yaoc snaꞌbꞌal.
31 Jacꞌalaꞌ pax ebꞌ chi kꞌanbꞌalnen tzettaj yetal ey yul yibꞌankꞌinal tiꞌ,
man ojabꞌ asanne oj yin wan tzettaj yetal tuꞌ chi yaoc snaꞌbꞌal ebꞌ.
Yutol jaꞌ jun yul yibꞌankꞌinal chi kil tiꞌ,
lalan sjul stiempoal,
tol oj lawoj eloj.
32 Chi woche tol cꞌam je bꞌiscꞌulal.
Jaꞌ ebꞌ cꞌam yistil,
eyoc snaꞌbꞌal ebꞌ yin tzet oj yute yakꞌon servil Naj Kaawil ebꞌ,
yu yakꞌon tzalabꞌoj scꞌul Naj ebꞌ.
33 Jal ebꞌ eyxa yistil xin,
jaꞌ tzet ey yul yibꞌankꞌinal tiꞌ chi snaꞌ ebꞌ,
yu yakꞌon tzalabꞌoj scꞌul yistil ebꞌ tuꞌ.
34 Yuxan,
caabꞌ chi eloc snaꞌbꞌal ebꞌ.
Jaxca pax tuꞌ ebꞌ ix ma ebꞌ kꞌopo cꞌamto yichamil,
eyoc snaꞌbꞌal ebꞌ yin tzet oj yute yakꞌon servil Naj Kaawil ebꞌ,
yutol chi yoche chi yakꞌ smimanil cꞌal spixan tet Naj Kaawil.
Jal ebꞌ eyxa yichamil xin,
jaꞌ pax yin yakꞌon servil sbꞌa ebꞌ yetoj yichamil yin tzet ey yul yibꞌankꞌinal tiꞌ,
jatuꞌ eyoc snaꞌbꞌal ebꞌ.
35 Jaꞌ wan chi waltoj ey jex tiꞌ an,
man yu oj jex jin tenon oc tucanoj,
yuxan chi waltoj,
cꞌamaj,
yu cꞌal je watxꞌiloj,
yuxan chi waltoj.
Yutol chi woche che bꞌeybꞌalne jaxca chi yoche scꞌul Naj Kaawil,
catuꞌ che yakꞌon servil naj yin masanil je cꞌul.
36 Jaꞌ tinaniꞌ,
chi waltoj ey jex,
jex mame,
cꞌal jex txutxe,
yutol ey jex ey je cutzꞌin ma je yuneꞌ,
stiempo xa yoc yichamil.
Ta tol che naꞌ tol watxꞌ chi oc yichamil ebꞌ,
yutol che yilaꞌ,
tol ey smey yet cꞌam chi oc yichamil ebꞌ tuꞌ,
skeꞌ ojabꞌ jaxca che naꞌ tuꞌ.
Chi skeꞌ yoc yichamil ebꞌ,
yutol man penaoj.
37 Tejan ey jex ey je cutzꞌin ma je yuneꞌ man sowalil oj chi oc yichamil.
Chi skeꞌ je yunen jatacꞌalaꞌ tzet ẍi je naꞌbꞌal,
jaex tiꞌ.
Ta jix cam je naꞌbꞌalnen eloj tol cꞌam che yaoc yichamil je cutzꞌin tuꞌ ma je yuneꞌ tuꞌ,
watxꞌ tzet che yun tuꞌ,
man penaoj.
38 Yuxan,
jaꞌ ebꞌ chi yaoc yichamil scutzꞌin ma yuneꞌ xin,
watxꞌ chi yun ebꞌ.
Jal pax ebꞌ cꞌam chi yaoc yichamil scutzꞌin ma yuneꞌ xin,
yel watxꞌ chi yun ebꞌ.
39 Jaꞌ junoj ix iquis yichamil,
jaxca tol txuan ix yetoj naj yu sley Dios.
Ta chi cam naj xin,
jajan xa ix.
Chi skeꞌ yiꞌon junojxa mactxequel ix ta chi yoche.
Asan xin,
sowalil tol creyente naj tuꞌ.
40 Yuxan chin naꞌ jain tiꞌ,
tol yel watxꞌ yet ebꞌ ix ta cꞌamxa chi yiꞌ junojxa winaj ix.
Jaꞌ chi wute jin naꞌoni,
catuꞌ chin naꞌ tol jaꞌ Naj Yespíritu Dios eyoc wetoj an,
catuꞌ chi walon jaxca tiꞌ an.