Ebꞌ Chi Yal Sbꞌa Sattaj Ebꞌ Yaaw
6
Jaꞌ yet ey jowal snan je xol tuꞌ,
¿tzet yuxan che tecꞌbꞌa je bꞌa je too sattaj ebꞌ yaaw man creyenteoj tuꞌ?
¿Tzet yuxan manaj sattaj ebꞌ yet xa Dios chi too je waꞌne ey jowal je xol tuꞌ?
2 ¿Tumi man to je yotaj oj,
tol jaon yet jon xa Dios tiꞌ,
jaon oj jon oc yaawilal,
catuꞌ oj cu naꞌoc yin ebꞌ yet yul yibꞌankꞌinal tiꞌ?
¿Ta oj cu naꞌoc yin ebꞌ yet yul yibꞌankꞌinal tiꞌ,
tumi cꞌam chi skeꞌ cu waꞌne yeoc wan tzetyetal cꞌam cꞌal yeloc apnoj tuꞌ?
3 ¿Tumi man to je yotaj oj pax oj,
tol jaon pax oj cu naꞌoc yin ebꞌ ángel?
Yuxan,
jaꞌ wan tzet yet yul yibꞌankꞌinal tiꞌ,
smoo pax cu waꞌnen yei.
4 Yuxan,
jaꞌ yet ey jowal je nan je xol,
¿tzet yuxan,
jaꞌ bꞌey ebꞌ cꞌam yopiso yu iglesia,
jatuꞌ chi bꞌet je waꞌne yei?
5 Chi waltoj wan tiꞌ ey jex yu je qꞌuixwiloj.
¿Tumi cꞌam junoj mac chi naꞌcha el yu je xol tuꞌ,
je naꞌoni?
¿Tumi cꞌam junoj creyente chi skeꞌ swaꞌnen yeoc je xol tuꞌ xin?
6 Ilaꞌ,
je yuẍtaj je bꞌa yin Cristo,
chi bꞌet pax je yal je bꞌa sattaj ebꞌ yaaw,
man pax creyenteoj ebꞌ.
7 Jaꞌ yet chi bꞌet je yal je bꞌa sattaj yaaw tuꞌ,
pena chex can yul sat Dios.
Ta ey junoj je yet creyenteal pena chi yute sbꞌa ey jex,
yel watxꞌ ta tucꞌal che yakꞌ techaoj.
Ta ey junoj mac chi elkꞌanen junoj tzetyetal ey jex,
yel watxꞌ ta che yakꞌ mimancꞌulal yin.
8 Ilaꞌ tol ey jex man tooloj pax che yute je bꞌa.
Ey jex chex elkꞌanwi pax oj.
Tol tax ey bꞌey queytuꞌ che yute je bꞌa tet ebꞌ je yet creyenteal.
9 ¿Tumi man je yotaj oj,
tol jaꞌ ebꞌ man tooloj chi yute sbꞌa,
cꞌam yalon yet ebꞌ yoc Dios Yaawiloj ebꞌ?
Manche je yetnele je bꞌa.
Yutol jaꞌ ebꞌ oj waltoj tiꞌ,
cꞌam niꞌoj yalon yet ebꞌ yoc Dios Yaawiloj.
Ebꞌ chi mulwi,
cꞌal ebꞌ chi yal sbꞌa tet tzet chi al-le oc diosal,
ebꞌ chi yaoc smul yul skꞌabꞌ yistil ma yul skꞌabꞌ yichamil,
cꞌal ebꞌ chi smitxꞌle oc sbꞌa yetoj yet winajil.
10 Yetoj pax ebꞌ elkꞌom,
ebꞌ chi yoche oc tzet ey tet junojxa mactxequel,
ebꞌ uqꞌuem an,
ebꞌ bꞌawawom,
cꞌal ebꞌ chi tokꞌon ecꞌ junoj tzetyetal bꞌey junojxa.
Jaꞌ ebꞌ chi bꞌeybꞌalnen cꞌal wan tiꞌ,
caw man oj apnoj ebꞌ yul skꞌabꞌ Dios.
11 Ey jex queytuꞌ je bꞌeybꞌal yet yalantoj.
Jal tinaniꞌ xin,
iꞌbꞌil xa el je penail tuꞌ je yibꞌan ketoj,
yet jex xa Dios ketoj.
Watxꞌ jex xa yul sat Dios tinaniꞌ ketoj.
Jaxca ton tiꞌ jix yun yeloc yu tzet jix yun Naj Kaawil Jesucristo,
cꞌal yu Naj Yespíritu cu Diosal.
Yet Cꞌal Dios Yeoc Cu Mimanil
12 Tejan ey jex che yal jaxca tiꞌ tinaniꞌ:
“Jaon tiꞌ,
cꞌam junoj tzetyetal ey sleyal ku,”
tejan je chi.
Yel ton che yalaꞌ,
man pax smoo oj kunen masanil tzetyetal.
Yel ton xin,
cꞌam junoj tzetyetal ey sleyal ku,
jal jin jain tiꞌ,
cꞌam junoj tzetyetal oj jin ijbꞌanoj.
13 Tejan ey jex pax che yal jaxca tiꞌ:
“Jaꞌ loꞌo yet cꞌule yei,
jaxa cꞌule yet loꞌo yei,”
tejan je chi.
Yel ton jun kꞌane tiꞌ,
jal pax Dios,
oj yakꞌ lawoj loꞌo cꞌal cꞌule.
Jal cu mimanil xin,
man yetoj amulal yei,
tol yet cꞌal Naj Kaawil xꞌojli.
Jaꞌ Naj Kaawil tuꞌ,
chi steyne cu mimanil tiꞌ.
14 Yuxan,
jaxca jix yute spitzcꞌunele a Naj Kaawil yu Dios,
queytuꞌ oj cu yute pax spitzcꞌunen a yetoj yipal.
15 Je yotaj xa,
tol jaꞌ cu mimanil tiꞌ,
jaxca tol smimanil Cristo yei.
Yuxan,
¿tumi chi skeꞌ kiꞌontoj smimanil Cristo,
catuꞌ chi too kaon oc yetoj smimanil junoj ix amul ix,
yet watxꞌ junxane chi yun can el yetoj ix?
Caw ma pax skeꞌ bꞌian.
16 Yutol je yotaj ta tol ey junoj mac chi iꞌon junoj amul ix,
junxane mimanileal chi yun can ey yetoj ix.
Yutol chi yal yul An Juun Tzꞌibꞌebꞌilcan jaxca tiꞌ:
“Junxane oj yun can el ebꞌ scawanil,”
ẍi An Juun tuꞌ.a
17 Jal pax yet chi kakꞌon cu bꞌa tet Naj Kaawil,
junxane chi kun can el yetoj Naj yin espíritu.
18 Yuxan,
bꞌejwej can amulal tuꞌ.
Yutol yal cꞌal tzet junojxa spenail chi el yunen ánima,
manaj yin smimanil ebꞌ chi mulwi.
Jal pax mac chi unen amulal tuꞌ,
jaꞌcaw yin smimanil tuꞌ chi oc smul.
19 ¿Tumi man je yotaj oj,
tol jaꞌ cu mimanil tiꞌ,
stemplo Naj Santo Espíritu yei?
Eyoc Naj kin,
yutol jaꞌ Dios jix aon oc Naj kin junjun jon.
Manxa ketoj cu bꞌa tinaniꞌ.
20 Yutol manbꞌil jon xa eloj.
Jaꞌ Dios jix cu toolaneni.
Yuxan,
jaꞌ yetoj cu mimanil tiꞌ,
sowalil chi cu txꞌoxeloj tol caw miman yeloc apnoj Dios tuꞌ.