Naj Jix Oc Smul Xol Ebꞌ Creyente Bꞌey Corinto
5
Jix wabꞌ an,
tol ey jun winaj ey smul je xol.
Tol abꞌ jix smonte el scaꞌ txutx naj yiꞌ.
Jaꞌ jun tuꞌ bꞌian,
caw junelne cꞌam swatxꞌil.
Tol tax xol ebꞌ comon ánima,
cꞌam bꞌey queytuꞌ chi yute sbꞌa ebꞌ jaxca tuꞌ.
2 Je yotaj tol queytuꞌ chi yute sbꞌa naj,
jacꞌalaꞌ pax che yiꞌa can je bꞌa.
Smoo tol chi tac je cꞌul yu sicꞌlebꞌil,
catuꞌ che yiꞌon el naj chi unen jun spenail tuꞌ je xol.
3 Jain tiꞌ,
caxcꞌal cꞌam chin ecꞌ yin jin mimanil je yetoj tituꞌ,
jaxca wal tol ey jin ecꞌ je yetoj yutol chin ecꞌ tituꞌ yin jin naꞌbꞌal.
Yuxan,
jix jin naꞌoc yin naj tzet oj je yute naj jix unen jun spenail tuꞌ,
yutol jaxca tol jain jun chin ecꞌ je yetoj tituꞌ.
4 Yuxan sowalil che yambꞌa je bꞌa yin yipal Naj Kaawil Jesucristo.
Jain xa xin,
jaxca tol oj jin apnoj je yetoj.
Yetoj pax oj,
oj oc Naj Kaawil Jesucristo je yetoj,
catuꞌ oj yakꞌon yipal ey jex.
5 Jaꞌ naj jix oc smul tuꞌ,
awej can oc naj yul skꞌabꞌ Satanás,
yu sqꞌueycan el smimanil naj,
chi colcha pax can el spixan naj yet oj jul Naj Kaawil Jesús.
6 Yu jun spenail jix yun je xol tuꞌ,
yuxan man smoo oj che yiꞌa can je bꞌa.
¿Tumi man je yotaj oj,
tol niꞌan yich pan chi akꞌon qꞌuexontoj masanil jun jarina tuꞌ?a
7 Yuxan,
bꞌejwej can wan je bꞌeybꞌal yet yalantoj tuꞌ.
Yutol jaꞌ wan tuꞌ,
laan jaxca yich pan.
Yuxan,
ta che bꞌejcan jaxca walon tuꞌ,
oj jex oc can jaxca ixim pan cꞌam yich chi loꞌle yet kꞌin Pascua,
* tol cꞌam niꞌoj cu penail yul sat Cristo tinaniꞌ,
yutol jaꞌ Naj jix cam cu qꞌuexeloj.
Jaxca taꞌ noꞌ meꞌ chi akꞌle cam yin xaambꞌalil yet skꞌin Pascua ebꞌ Israel,
jaxca tuꞌ jix yun scam Cristo ku.
8 Yuxan,
sowalil chi cu naꞌwejtej scamichal tuꞌ yin masanil cu cꞌul.
Ta jaxca tuꞌ chi kute,
jaxca junoj ixim pan cꞌam yich,
cꞌam niꞌoj spenail,
queyton tuꞌ cu bꞌeybꞌal.b
Ta chi cu naꞌwejtej scamichal Naj tuꞌ,
cꞌamxa chi skeꞌ cu too yin amulal cꞌal yin tzet man watxꞌoj.
Yutol jaꞌ wan tuꞌ,
laan jaxca peyxail yich pan catuꞌ chi yetnen el ixim pan tuꞌ masanil.
9 Jix waltoj yul jun jin carta ey jex,
tol cꞌam chi skeꞌ junne chi cu ecꞌ yetoj ebꞌ eyoc yin amulal.
10 Man pax yin oj ebꞌ amul man to creyenteoj chi wal an.
Ma ebꞌ chi yoche oc tzet ey bꞌey junojxa mactxequel,
ma ebꞌ elkꞌom,
ma ebꞌ chi yal sbꞌa tet tzet chi al-le oc diosal.
Kꞌinaloj ta jaꞌ ebꞌ man to creyenteoj tuꞌ chi wal an,
sowalil mi chi cu el bꞌey yul yibꞌankꞌinal tiꞌ.
Manaj ebꞌ man to creyenteoj tuꞌ chi wal an.
Sowalil chi cu ecꞌ xol ebꞌ,
sowalil chi cu kꞌanabꞌ yetoj ebꞌ.
11 Jaꞌ tzet jix waltoj ey jex tuꞌ,
jaꞌ ebꞌ chi yaloc sbꞌa creyenteal,
tol jacꞌalaꞌ pax pena sbꞌeybꞌal,
chi cꞌal yun ebꞌ,
jaꞌ ebꞌ chi wal an,
cꞌam chi skeꞌ tol junne chi cu ecꞌ yetoj ebꞌ tuꞌ.
Ma jaxca ebꞌ amul,
ma ebꞌ chi yoche oc tzet ey bꞌey junojxa mactxequel,
ma ebꞌ chi yal sbꞌa tet tzet chi al-le oc diosal,
ma ebꞌ bꞌawawom,
ma ebꞌ uqꞌuem an,
cꞌal ebꞌ elkꞌom.
Jaꞌ ebꞌ jaxca tuꞌ sbꞌeybꞌal,
catuꞌ chi yalon pax ebꞌ tol creyente ebꞌ,
cꞌam pax swatxꞌil tol chi cu low yetoj ebꞌ.
12-13 Jaꞌ ebꞌ man to creyenteoj,
cꞌam kalon ket cu naꞌon oc yin ebꞌ,
yutol jaꞌ Dios oj naꞌon oc yin ebꞌ.
Jal pax ebꞌ ket creyenteal,
sowalil chi cu naꞌoc yin ebꞌ.
Yuxan,
“Jaꞌ naj pena jix el yunen tuꞌ,
iꞌwej el naj je xol”.c