Yuxan,

yel watxꞌ tol manaj kin che yaoc je naꞌbꞌal.

Yutol yakꞌomal cꞌal chꞌan servil Cristo kei.

Jaꞌ kopiso,

asan tol chi kakꞌ cuyle scuybꞌanil Dios,

wan akꞌbꞌil cu cuy yu.

Wan man to akꞌbꞌil oj yotajnen el ebꞌ yet yalantoj.

2 Jaꞌ mac chi akꞌle junoj opiso yunne,

sowalil tol chi sjije smulnail tet jun mac chi akꞌon yopiso tuꞌ.

3 Chi woche tol jijem chin eloc yul sat Naj Kaawil,

cꞌam pax yeloc apnoj yul jin sat,

ta jaex che naꞌoc win.

Caxcꞌal tol txꞌoj wanojxa mac chi snaꞌoc win,

cꞌam cꞌal niꞌoj tzet chin naꞌ.

Yetoj pax oj,

ma skeꞌ jin naꞌon pax oc win an.

4 Ta ey junoj jin penail,

man wotaj oj.

Ma pax skeꞌ waloni tol cꞌam niꞌoj jin penail,

yutol asan Naj Kaawil chi skeꞌ snaꞌon oc win.

5 Yuxan,

cꞌam chi skeꞌ che naꞌoc yin junoj mactxequel tinaniꞌ.

Kechbꞌanewej masantaꞌ oj jul Naj Kaawil,

yutol jaꞌ naj oj txꞌoxon el masanil tzetyetal.

Jaxca junoj tzetyetal ewan xol kꞌejkꞌinal,

catuꞌ chi oc kopna sajkꞌinal yin,

masanil cꞌal chi txeclo eloj,

queyton tuꞌ oj yun xeclo el masanil tzetyetal yet tuꞌ.

Jaꞌ Naj Kaawil tuꞌ oj akꞌon txeclo el tzettaj yetal ey yin cu pixan cu masanil.

Catuꞌ oj al-le watxꞌ kꞌane yin junjun yu Dios,

jatacꞌalaꞌ cu mulnail junjun jon.

6 Jex wuẍtaj,

jex wanabꞌ,

jix waltoj ey jex tzet weocoj,

cꞌal tzet yeoc Apolo,

yu snaꞌcha el wan cuybꞌanile tiꞌ je yu.

Yutol jain tiꞌ,

cꞌal Apolo tuꞌ,

txꞌoxbꞌanile cꞌal keoc ey jex,

yet watxꞌ che yotajne eloj tol cꞌam chi skeꞌ je yecꞌ yibꞌan je yalon yintaj tzet chi yal An Juun Tzꞌibꞌebꞌilcanoj.

Yutol cꞌam junoj ebꞌ chi cuywa je xol chi skeꞌ je yiꞌon a can,

catuꞌ cꞌam junoj mac chi skeꞌ je yintajnen eloj.

7 Cꞌam junoj jon chi skeꞌ kiꞌon a can cu bꞌa,

yutol laan cꞌal keloc apnoj cu masanil.

Yal cꞌal tzet chi skeꞌ ku,

jaꞌ Dios chi akꞌon ey jon.

Yuxan,

cꞌam chi skeꞌ kiꞌon a can cu bꞌa yu.

Cꞌam chi skeꞌ kaloni,

tol ket yul ket,

yutol jaꞌ Dios chi akꞌon ey jon.

8 Jal jex xin,

¿ma tol tzꞌajan xa ey jex,

che naꞌ?

¿ma xax je chaꞌ masanil stzettaj yetal Dios tinaniꞌ,

je naꞌoni?

Tejan yaaw jex xa tinaniꞌ,

je naꞌoni.

Jal jon jaon tiꞌ,

cꞌam chi cu oc yaawilal je yetoj.

Tol oj wal yel yaaw jex xa,

chim kakꞌ pax yaawilal je yetoj.

9 Jaꞌ chi wute jin naꞌoni,

tol jix xꞌoxel Dios tol jaon ẍejabꞌ Cristo jon tiꞌ,

yintajil xa kei.

Jaxca junoj mac eyxa oc yul skꞌabꞌ camich,

catuꞌ chi makꞌle camoj,

jaxca jon tuꞌ kei.

Jal ebꞌ ánima yul yibꞌankꞌinal tiꞌ,

cꞌal ebꞌ ángel,

tucꞌal chi oc tꞌanan ebꞌ kin.

Catuꞌ chi qꞌueya scꞌul ebꞌ yu tzet utbꞌil kili.

10 Jaxca tol cꞌam niꞌoj cu naꞌbꞌal yul sat ánima,

yutol eyoc cu naꞌbꞌal yin Cristo.

Jal jex pax jaex tiꞌ,

caw jelan jex xa pax yin yet Cristo tuꞌ,

je naꞌoni.

Kotaj tol cꞌam kip,

cꞌam cu tecꞌanil.

Jal jex xin,

jaxca tol caw tecꞌan jex xa.

Jaon tiꞌ,

chi cu intajnele el yu ebꞌ ánima.

Jal jex jaex tiꞌ,

caw miman je yeloc apnoj yul sat ebꞌ.

11 Masantaꞌ tinaniꞌ,

ey bꞌey caw chi kil wail,

cꞌal tajin tiꞌal,

cꞌal cꞌam cu pichil.

Ey bꞌey chi cu makꞌle yu ánima,

catuꞌ cꞌam pax cu na jon.

12 Caw chi cu cꞌuumbꞌi cu mulna yetoj cu kꞌabꞌ.

Ecꞌal el chi cu bꞌuchle yu ánima,

jal pax jon,

jaꞌ swatxꞌcꞌulal Dios chi cu kꞌan yibꞌan ebꞌ.

Ey bꞌey caw chi yakꞌ acꞌulal ebꞌ kin,

chi cꞌal techa ku.

13 Ey bꞌey chi yal cu kꞌumal ebꞌ,

caw pena chi yal ebꞌ kin sicꞌlebꞌil.

Jacꞌalaꞌ yin cꞌal watxꞌcꞌulalil chi kute cu pajtzen tet ebꞌ.

Jaxca kꞌalem bꞌey yul yibꞌankꞌinal tiꞌ,

queytuꞌ keoc yul sat ebꞌ.

Masantaꞌ tinaniꞌ,

jaxca tzet naꞌbꞌa xacꞌal yul sat ebꞌ ánima kei.