7 Yuxan jaach tiꞌ, jaach jix jaach waoc yin smajumaloj bꞌey ebꞌ ja wet conobꞌ tuꞌ. Jaach oj ja chaꞌ jin kꞌane, jaach oj ja wal tet ebꞌ. 8 Ta chi wal ey jaach yu junoj penawom tol tꞌinan chi cami, ta cꞌam cha wal tet yet chi snaꞌon sbꞌa scꞌul, jaꞌton chi locontej yibꞌan, oj ton cam yu spenail tuꞌ, asan xin, oj wakꞌ sowalil ey jaach yu scamichal tuꞌ. 9 Asan ta cha wal tet xin, yet chi snaꞌon sbꞌa scꞌul yin spenail tuꞌ, catuꞌ ta cꞌam chi ẍaꞌ yabꞌe, oj cam yu spenail tuꞌ, jal jaach, jaach tiꞌ, cꞌam tzet chi tit ja wibꞌan, ẍi Jehová.

10 Jix yalon cꞌal pax Jehová ey jin: Jaach tiꞌ, al tet jun conobꞌ tuꞌ jaxca tiꞌ: Jaex tiꞌ che yal jaxca tiꞌ: Caw miman yeoc cu penail, yuxan lalan spax kip yu cu mul. ¿Tzet to wal oj yun kiquisbꞌi ecꞌoj? je chi, che yaloni. 11 Jain Jehová jin, jain chi wal tet ebꞌ ánima jaxca tiꞌ: Cꞌam chi woche, tol chi cam ebꞌ penawom. Jaꞌ tzet chi yoche jin cꞌul yin ebꞌ, tol chi sqꞌuex snaꞌbꞌal ebꞌ cꞌal sbꞌeybꞌal ebꞌ, yet watxꞌ chi iquisbꞌi cꞌal ecꞌ ebꞌ. Jex Israel, bꞌejwej can je pena bꞌeybꞌal tuꞌ, ¿tzet yu, yuxan tucꞌal oj jex cam jaxca tuꞌ? ẍi Dios.

12 Jaach tiꞌ; al tet ebꞌ ja wet conobꞌ jaxca tiꞌ: Ta ey junoj winaj watxꞌ sbꞌeybꞌal catuꞌ chi oc pax spenail, man oj colcha yu swatxꞌ bꞌeybꞌal yet yalantoj tuꞌ. Ta ey cꞌal pax junoj winaj yel xacꞌal pena sbꞌeybꞌal, catuꞌ chi snaꞌon sbꞌa scꞌul, catuꞌ chi swaꞌnen oc sbꞌeybꞌal tuꞌ, man oj cam yu spenail jix yun yet yalantoj. Jal pax junoj watxꞌ sbꞌeybꞌal xin, catuꞌ chi yaontoj sbꞌa xol spenail, jantaj swatxꞌ bꞌeybꞌal yet yalantoj tuꞌ, cꞌamxa yeloc apnoj, cꞌal yiquisbꞌi cꞌal ecꞌoj. 13 Ta jain chi wakꞌ jin tiꞌ yin yiquisal junoj ánima watxꞌ sbꞌeybꞌal, ta chi yaoc swatxꞌ bꞌeybꞌal tuꞌ yipoj scꞌul, catuꞌ chi oc pax spenail, cꞌamxa yeloc apnoj swatxꞌ bꞌeybꞌal yet yalantoj tuꞌ, asan tol oj cam yu spenail jix yaocoj. 14 Ta chi waxacꞌal oc camich yibꞌan junoj penawom, catuꞌ ta chi snaꞌ pax sbꞌa scꞌul, chi sbꞌejon yunen masanil spenail tuꞌ, catuꞌ chi yunen swatxꞌilal jaxca chi woche. 15 Chi yakꞌon meltzo tzetyetal yin smaanbꞌanil tumin tet junoj ey smaan tumin tet. Ta ey tzetyetal elkꞌanebꞌil yu, chi yakꞌon meltzo jun tzetyetal tuꞌ; catuꞌ chi sjijen sleyalil chi akꞌon yiquisbꞌoj ecꞌ ebꞌ ánima. Jain chi walaꞌ, jaꞌ jun tuꞌ man oj camoj. 16 Yutol watxꞌ xa tzet chi el yuneni, jaꞌ jun tuꞌ, oj iquisbꞌoj cꞌal ecꞌoj, manxa oj jin naꞌtej jantaj spenail jix yun yet yalantoj. 17 Jaꞌ ebꞌ ja wet conobꞌ tuꞌ chi yal ebꞌ tol man watxꞌoj chi wute jin naꞌon oc yin ebꞌ yaloni; caw yel chi walaꞌ, tol man watxꞌoj tzet chi snaꞌ ebꞌ jaxca chi yun yalon ebꞌ tuꞌ. 18 Ta jaꞌ junoj ánima chi sbꞌejcan yunen swatxꞌil, catuꞌ chi too yin spenail, jaꞌ jun tuꞌ smoo chi cam yu tzet chi el yunen tuꞌ. 19 Ta ey pax junoj caw penawom chi snaꞌ sbꞌa scꞌul, catuꞌ chi sbꞌejoncan spenail tuꞌ, jaxa swatxꞌil chi sbꞌeybꞌalne, oj iquisbꞌoj cꞌal ecꞌ yu tzet watxꞌ chi el yunen tuꞌ. 20 Jacꞌalaꞌ che yalon pax jaxca tiꞌ: Jaꞌ Jehová man jichanoj chi yute swaꞌnen yeocoj, je chi, che yaloni. Yin pax junjunal chi yun jin naꞌon oc je yin jaex Israel jex tiꞌ, jatacꞌalaꞌ tzet chi el je yuneni, ẍi Jehová.

21 Jaꞌ yet joebꞌ cꞌual yoc yet slaonebꞌ xꞌaaw yet lacawebꞌ abꞌil xa yoc naj rey Joaquín yin presowomal bꞌey Babilonia, ey jun winaj jix ela bꞌey Jerusalén, jix jul yalon ey jin tol tuxa jix eyqꞌuey jun conobꞌ tuꞌ yu ebꞌ chi jowi oc yin. 22 Jaꞌ yet skꞌejbꞌintajil yet ewi, yet cꞌamto chi jul naj jix ela tuꞌ, jix yaoc skꞌabꞌ Jehová wibꞌan. Jaꞌ yet jix kꞌinibꞌi a yet jix jul jun winaj tuꞌ, jaꞌ yet tuꞌ jix kꞌanabꞌ a yu Jehová junelxa.

23 Jix kꞌanabꞌ Jehová ey jin, jix yalon jaxca tiꞌ: 24 Jaꞌ ebꞌ ánima caan bꞌey wan conobꞌlaj tol uchbꞌiltoj yul yet Israel, chi yal ebꞌ jaxca tiꞌ: Jaꞌ naj Abraham junne chꞌan nail naj, caw jix akꞌle pax jun miman txꞌotxꞌ yin yoc smajuloj. Jal jon jaon tiꞌ, caw mimanxa cu bꞌisil; yuxan smoo ton cu majon can oc jun txꞌotxꞌ tuꞌ tinaniꞌ, ẍi ebꞌ. 25 Yu jun tuꞌ, al tet ebꞌ jaxca tiꞌ: Jaꞌ Jehová Naj Yaaw, chi alon jaxca tiꞌ: Jaex tiꞌ, che chiꞌ noꞌ chiꞌbꞌe yetoj cꞌal ẍiqꞌuil. Chex oc eyilal tet echele, chex makꞌwi cam ánima, chito wal je naꞌ je yiꞌon jun txꞌotxꞌ tiꞌ. 26 Che yetne ebꞌ je yet animail yu je yespada. Che yunen tzetyetal tol yaabꞌetaj, chex mulwi yetoj ebꞌ ix ix ey yichamil. Chi lawi tuꞌ, catuꞌ che yalon pax oj tol je yet xacꞌal yeoc jun txꞌotxꞌ tiꞌ je yaloni.

27 Che yalon cꞌal pax tet ebꞌ jaxca tiꞌ: Jaꞌ Jehová Naj Yaaw chi alon jaxca tiꞌ: Jain chi walaꞌ, tol oj makꞌle cam ebꞌ caan bꞌey wan conobꞌ tol uchbꞌilxa eyoj. Jal ebꞌ naat caan, jaꞌ noꞌ chiꞌwawom xol-laj teꞌal noꞌ oj chiꞌontoj ebꞌ. Jaꞌ ebꞌ chi eyecꞌ bꞌey yul-laj chꞌen nachꞌen, yaꞌbꞌil oj iꞌon cam ebꞌ. 28 Catuꞌ cusiltaj txꞌotxꞌ oj yun cantoj sconobꞌ ebꞌ, pilan oj etex cantoj. Catuꞌ oj wakꞌon lawoj ey smeynebꞌail tuꞌ. Jantaj mimej wonan bꞌey conobꞌ Israel, cusiltaj txꞌotxꞌ oj yun cantoj, cꞌamxa mactxequel oj ecꞌ tituꞌ. 29 Jaꞌ yet oj wuten can jun conobꞌ tuꞌ yin cusiltaj txꞌotxꞌ, yu cꞌal spenail ebꞌ tol yaabꞌetaj chi yunne, queyton tuꞌ oj yun snaꞌcha el yu ebꞌ tol jain ton Jehová jin, ẍi Dios.

30 Yuxan, al tet ebꞌ ja wet conobꞌ tuꞌ, tol cha wakꞌ bꞌina ebꞌ yet chi ẍaꞌlen sbꞌa ebꞌ bꞌey smuroal conobꞌ, ma bꞌey stiꞌlaj na, catuꞌ chi xij yal-len ebꞌ tet junjun jaxca tiꞌ: Toonwej, ton kabꞌwej skꞌane Jehová, ẍi ebꞌ. 31 Ta jaxca tuꞌ chi yun sjul ebꞌ jin conobꞌ tuꞌ, jaxca chi yun cꞌaltaꞌ ebꞌ, catuꞌ chi ey chotan ebꞌ ja sattaj yin yabꞌen ebꞌ tzet cha walaꞌ, ta cꞌam cꞌal chi sjije ebꞌ tzet cha walaꞌ. Ta asan cꞌal tzetyetal chi ẍaꞌ scꞌul ebꞌ chi yunne, ta asan yin tumin ma yin spenail eyoc snaꞌbꞌal ebꞌ. 32 Ta laan jaach yul sat ebꞌ jaxca junoj mactxequel tol caw watxꞌ sbꞌitni, tol watxꞌ yoc yul snukꞌ, catuꞌ watxꞌ stenon arpa. Caxcꞌal chi yabꞌ ebꞌ tzet cha walaꞌ, catuꞌ ta cꞌam chi sbꞌeybꞌalne ebꞌ tzet cha walaꞌ. 33 Jato wal yet oj yunen masanil tzet cha wal tuꞌ; catuꞌ oj naꞌcha el yu ebꞌ tol ey jun jin chejabꞌ eyecꞌ xol ebꞌ, ẍi Jehová.