3 Jaꞌ Jehová chi alon jaxca tiꞌ: Caxcꞌal mi joyan oc ecꞌaloj nación ja winlaj, oj jin kꞌojtoj jin txim yaal ja win, queytuꞌ oj yun jaach jin mitxꞌon ey yetoj jin txim yaal tuꞌ. 4 Oj jaach jin jutxel stiꞌ jaꞌ, oj jaach waon cantoj bꞌey chi meyeyi xacꞌal yili; catuꞌ oj jul noꞌ miij ja win, cꞌal noꞌ xol-laj teꞌal noꞌ oj jaach chiꞌontoj. 5 Jaꞌ yetoj ja mimanil tol kꞌaꞌtajxa tuꞌ, oj wakꞌ noel bꞌey sjolomlaj wonan cꞌal yetoj bꞌey jobꞌelaj. 6 Oj wakꞌ ucꞌtzan txꞌotxꞌ txꞌotxꞌ tiꞌ yu ja chiqꞌuil, masantaꞌcꞌal oj apnoj oc bꞌey yichlaj wonan. Jaꞌ yetoj chicꞌ tuꞌ oj noel sbꞌeal jaꞌ, cꞌal satlaj jootxꞌ. 7 Jaꞌ yet oj jaach wakꞌon lawoj eyoj, oj wakꞌ kꞌejbꞌoj el bꞌey satcan, catuꞌ oj tan yajan weycan; oj majey el cꞌu yu asun; yetoj xꞌaaw, cꞌamxa sajkꞌinalil oj yakꞌa. 8 Jain Jehová jin chi walaꞌ, tol ja wu cꞌal, yuxan oj wakꞌ tan masanil tzejtebꞌal ey bꞌey satcan, catuꞌ oj waon oc kꞌejkꞌinal yibꞌan ja conobꞌ.

9 Jaꞌ skꞌaneal yet oj jaach lawoj ey tuꞌ, oj apnoj taꞌcꞌal oc bꞌey wanxa nacionlaj tol man ja wotaj oj, catuꞌ oj wakꞌon bꞌilwoj a masanil conobꞌlaj yu xiwcꞌulal yet oj yabꞌen ja kꞌumal ebꞌ, yu syaꞌilal oj waoc ja wibꞌan. 10 Ja wu jaach tiꞌ, yuxan oj watoj xiwcꞌulal yibꞌan masanil conobꞌ. Caw oj wakꞌ xiwa ebꞌ sreyal junjun conobꞌ yet oj makꞌon ecꞌ kopna chꞌen wespada sattaj ebꞌ. Jaꞌ yet oj jaach eyqꞌueyoj, caw oj bꞌilwoj a ebꞌ yu xiwcꞌulal cꞌal tet camich.

11 Jaꞌ Jehová chi alon jaxca tiꞌ: Jaꞌ chꞌen yespada naj sreyal Babilonia, jaꞌ oj low ja win. 12 Jal ebꞌ ánima tuꞌ, oj waoc ebꞌ yul skꞌabꞌ ebꞌ akꞌom jowal tol cꞌam smimancꞌulal, jaꞌ ebꞌ oj qꞌueyon el ebꞌ; queytuꞌ oj yun slawoj ey sbꞌinabꞌilal Egipto tuꞌ, caw miman ánima oj camoj. 13 Oj wakꞌ lawoj ey masanil noꞌ ja jobꞌbꞌeal noꞌ chi low bꞌey stiꞌlaj jaꞌ. Cꞌamxa bꞌakꞌin oj tatbꞌoj jaꞌ jaꞌ stecꞌon ebꞌ ánima, tam wal noꞌ noꞌ. 14 Jain Jehová jin chi walaꞌ, tol queytuꞌ oj yun sajbꞌoj el jaꞌ jaꞌ, meleli xacꞌal oj yun sbꞌey jaꞌ. 15 Jaꞌ yet oj cancan conobꞌ Egipto yin cusiltaj txꞌotxꞌal wu tuꞌ an, tzꞌinini xacꞌal oj yun cantoj. Yutol pilan oj cam masanil ebꞌ ánima cꞌal noꞌ noꞌ; queyton tuꞌ oj yun yotajnen el ebꞌ, tol jain ton Jehová jin, yutol asanne jin Dios jin, ẍi Jehová.

16 Jain Jehová Yaaw jin chi walaꞌ, tol oj sbꞌitne jun bꞌit yet camich ebꞌ ix ix bꞌey junjun nacionlaj, yet chi okꞌ ebꞌ yu conobꞌ Egipto, cꞌal yu jantaj sbꞌisil ebꞌ ánima, ẍi Dios.

17 Jaꞌ yet 15 cꞌualxa yoc yet lacawebꞌ xꞌaaw yet lacawebꞌxa abꞌil yoc naj rey Joaquín yin presowomal bꞌey Babilonia, jix kꞌanabꞌ Jehová ey jin, jix yalon jaxca tiꞌ: 18 Jaach ánima, bꞌitne jun bꞌit yet camich yin ebꞌ conobꞌ caw miman sbꞌisil bꞌey Egipto, yetoj ebꞌ ix ix yet junjun mimej conobꞌ.

20 Jaꞌ ebꞌ conobꞌ tol miman sbꞌisil bꞌey Egipto tuꞌ, oj eyqꞌuey ebꞌ yetoj ebꞌ chi cam xol jowal. Tol yelcꞌulal xacꞌal oj oc chꞌen espada yin masanil ebꞌ. 21 Jaꞌ ebꞌ mimej yaaw eyxa ecꞌ bꞌey cambꞌal, oj yalon ebꞌ yin ebꞌ a Egipto cꞌal ebꞌ jaꞌjun yetoj ebꞌ: ¡E… Jaꞌ ebꞌ jix cam xol jowal, tuxa jix eyol ebꞌ titiꞌ! ¡Tuxa jix ey telan ebꞌ ketoj, jaon man sconobꞌoj jon Jehová! ẍi ebꞌ, oj yalon ebꞌ.

22 Jaꞌ tituꞌ eyecꞌ naj sreyal Asiria; joyan oc ebꞌ soldado yin bꞌey cambꞌal tuꞌ. Jaꞌton ebꞌ tuꞌ jix cam yin jowal. 23 Eyxa ecꞌ ebꞌ yich jun miman jolan xabꞌ tol naat yich. Jaꞌ ebꞌ soldado tuꞌ, jix yaoc xiwcꞌulal xol ebꞌ caan yul yibꞌankꞌinal tiꞌ; pilan jix cam masanil ebꞌ xol jowal tuꞌ, joyan oc smujbꞌanil ebꞌ yin ebꞌ sreyal Asiria bꞌey cambꞌal. 24-25 Jaꞌ tituꞌ ey cꞌal pax ecꞌ naj sreyal conobꞌ Elam, telanxa ey xol ebꞌ jix cam xol jowal tuꞌ. Jaꞌ ja winlaj jatuꞌ joyan oc smujbꞌanil ebꞌ soldado, ebꞌ man jin conobꞌoj. Jacꞌal xol jowal jix cam masanil ebꞌ tuꞌ. Jaꞌ yet iquis ecꞌ ebꞌ, caw jix xiw ebꞌ ánima bꞌey yul yibꞌankꞌinal tiꞌ yu ebꞌ, caw yin xacꞌal qꞌuixwiltajil jix yun scam ebꞌ, ilaꞌ tol eyxa ecꞌ ebꞌ xol ebꞌ camom, ebꞌ camnaj xol jowal.

26 Jaꞌ tituꞌ eyecꞌ naj sreyal Mésec, yetoj cꞌal naj sreyal Tubal. Joyan oc smujbꞌanil masanil ebꞌ soldado yinlaj ebꞌ. Jix cam ebꞌ man jin conobꞌoj tuꞌ xol jowal, caw jix xiwa ebꞌ ánima bꞌey yul yibꞌankꞌinal tiꞌ yu ebꞌ. 27 Junne mujan yetoj ebꞌ soldado caw jelan yin jowal, ebꞌ tol man jin conobꞌoj. Jaꞌ ebꞌ tuꞌ jix eytoj ebꞌ yetoj smitxꞌkꞌabꞌ yet jowal bꞌey cambꞌal. Ey can oc yespada ebꞌ yalan sjolom. Yu spenail ebꞌ, yuxan eyoc syaꞌilal yibꞌan ebꞌ, yutol jaꞌ ebꞌ tuꞌ, jix xibꞌten ebꞌ ánima caan bꞌey yul yibꞌankꞌinal tiꞌ.

28 Jaach sreyal Egipto, oj jaach akꞌle lawoj eyoj. Oj jaach apnoj snan xol ebꞌ man jin conobꞌoj, ebꞌ tol makꞌbꞌil cam xol jowal.

29 Jaꞌ tituꞌ eyecꞌ naj sreyal conobꞌ Edom, cꞌal yetoj ebꞌ yaaw tol miman yeloc apnoj yin yopiso. Caxcꞌal jelan yutenaj sbꞌa ebꞌ, jal tinaniꞌ jatuꞌ mujan ebꞌ xol ebꞌ man jin conobꞌoj, bꞌey ey spixan ebꞌ camnajxa.

30 Jaꞌ tituꞌ eyecꞌ masanil ebꞌ jix ecꞌle yin yaawilal bꞌey yetcꞌulal norte, yetoj cꞌal ebꞌ a Sidonio. Caxcꞌal caw jelan jix yute sbꞌa ebꞌ yin yopiso, caxcꞌal jix yaoc xiwcꞌulal ebꞌ xol ebꞌ yet animail, jal pax tinaniꞌ xin, caw qꞌuixwiltaj jix yun scam ebꞌ. Tol eyxatoj ebꞌ xol ebꞌ camnaj yu jowal, jaꞌton ebꞌ man jin conobꞌoj, cꞌamxa yeloc apnoj ebꞌ xol ebꞌ camnajxa tuꞌ.

31 Jain Jehová jin chi walaꞌ: Jaꞌ yet oj yil-len oc sbꞌa ebꞌ yetoj naj sreyal Egipto yetoj masanil ebꞌ soldado, caw oj smimancꞌulne sbꞌa yu scamichal ebꞌ yet conobꞌ tuꞌ, yutol jix cam yetoj masanil ebꞌ soldado yin jowal. 32 Caxcꞌal jain jix wakꞌ yaoc xiwcꞌulal yin naj sreyal Egipto tuꞌ xol ebꞌ caan bꞌey yul yibꞌankꞌinal tiꞌ, jain Jehová Yaaw jin chi walaꞌ, tol jaꞌ tituꞌ oj mujle xol ebꞌ man jin conobꞌoj yeoc tuꞌ, jaꞌton ebꞌ camnaj xol jowal, yetoj cꞌal ebꞌ soldado tol miman sbꞌisil, ẍi Dios.