Laan Faraón Jaxca Junoj Teꞌ Kꞌuteꞌ
31
Jaꞌ yet bꞌabꞌel cꞌu yet yox xꞌaaw, yet 11 abꞌil xa yoc naj rey Joaquín yin presowomal bꞌey Babilonia, jaꞌ yet tuꞌ jix kꞌanabꞌ Jehová ey jin, jix yalon jaxca tiꞌ: 2 Al tet naj Faraón sreyal Egipto yetoj cꞌal tet masanil ebꞌ soldado cꞌal tet masanil ebꞌ ánima ey yul yet Egipto:¿Mac yetoj chi skeꞌ cu laanbꞌan ja mimanbꞌilal?
3 Laan jaach yetoj junoj teꞌ qꞌuisis, ma jaxca junoj teꞌ kꞌuteꞌ ey bꞌey Líbano, tol caw chi yakꞌ yenel skꞌabꞌlaj teꞌ, yutol caw naat eyaoj, catuꞌ chi apni taꞌcꞌal oc xol asun.
4 Caw watxꞌ ẍꞌibꞌ teꞌ yu nabꞌ, cꞌal yu syaxil sat txꞌotxꞌ txꞌotxꞌ tuꞌ; caw ey jaꞌ snukꞌ jaꞌ chi aol yichlaj teꞌ. Queytuꞌ chi yun yoc yaal wanxa teꞌ ey yinlaj teꞌ tuꞌ.
5 Yutol caw ey jaꞌ yichlaj teꞌ, yuxan caw miman jix yun steel teꞌ yintaj masanil teꞌ teꞌ ey xol-laj eltzabꞌlaj. Caw miman jix yun yel kꞌuyan skꞌabꞌlaj.
6 Masanil junjun tujan noꞌ tzꞌiquin, chi swaꞌne oc sweyubꞌ noꞌ xol-laj skꞌabꞌlaj teꞌ. Masanil noꞌ xol-laj teꞌal noꞌ, chi apni oc noꞌ caey yichlaj teꞌ, cꞌal yali yuneꞌ noꞌ. Jaꞌ bꞌey yalan yenel skꞌabꞌlaj teꞌ tuꞌ, chi skeꞌ scaey ecꞌ ecꞌaloj conobꞌlaj.
7 Asanne jun miman teꞌ tuꞌ txꞌojxa swatxꞌil yili, caw mimej steel skꞌabꞌlaj, yutol ey jun miman jaꞌ chi bꞌey yich.
8 Cꞌam junoj teꞌ kꞌuteꞌ bꞌey xol teꞌ awbꞌeal teꞌ yet Dios tol laan jaxca yili jun teꞌ tuꞌ. Cꞌam junoj teꞌ taa laan skꞌabꞌlaj yetoj. Cꞌam cꞌal pax junoj teꞌ castaño laan xaj yetoj. Cꞌam junoj teꞌ teꞌ ey bꞌey yawo Dios chi skeꞌ slaanbꞌane sbꞌa yetoj jun teꞌ tol txꞌojxa swatxꞌil yili tuꞌ.
9 Jaꞌ Jehová jix uten jaxca tuꞌ, yuxan caw ecꞌal skꞌabꞌlaj; yuxan caw yel xacꞌal watxꞌ yili yintaj wanxa teꞌ teꞌ ey bꞌey yawo Dios.
10 Yu jun tuꞌ, yuxan jaxca tiꞌ yalon Jehová Naj Yaaw: Jaꞌ jun teꞌ tuꞌ, caw miman jix yun steel. Jix ecꞌbꞌantoj steel yibꞌan wanxa yet teꞌal. Miman jix yun ẍꞌibꞌa jun teꞌ tuꞌ, jaxca tol chi smeyne sbꞌa. 11 Yu jun tuꞌ, yuxan jain oj wakꞌ eyqꞌueyoj. Oj waoc yul skꞌabꞌ jun yaaw txꞌoj conobꞌal, jaꞌ oj qꞌueyon el jaxca wal smooalil ẍaꞌon stooloj spenail jix el yuneni. 12 Jaꞌ ebꞌ txꞌoj conobꞌal, oj tzokꞌon aoj, tuxa cꞌal oj can telanoj. Oj kꞌatoj skꞌabꞌlaj, yu yeyqꞌuey xol-laj teꞌ teꞌ bꞌey sjolomlaj wonan, cꞌal bꞌey jobꞌelaj yul nación tuꞌ. Masanil conobꞌlaj caan bꞌey yenel tuꞌ, oj ela ebꞌ, oj bꞌejlecan yu ebꞌ. 13 Masanil junjun tujan noꞌ tzꞌiquin, oj jul noꞌ yin skꞌabꞌlaj teꞌ tuxa jix eyqꞌuey tuꞌ, cꞌal masanil junjun tujan noꞌ xol-laj teꞌal noꞌ, oj eecꞌ noꞌ tituꞌ. 14 Cꞌamxa junoj teꞌ teꞌ yel xacꞌal mimej oj yun steel, tol oj ecꞌbꞌan a yibꞌan wanojxa teꞌ, caxcꞌal ey mimanoj jaꞌ jaꞌ chi low yinlaj teꞌ; yutol oj kꞌajle a masanil. Jaꞌ jun tuꞌ chi yal yeloc apnoj, tol jaꞌ masanil ebꞌ mimej yaaw bꞌey yul yibꞌankꞌinal tiꞌ, oj cam ebꞌ jaxca cꞌal chi yun scam ebꞌ comon ánima. Queytuꞌ oj yun stoo can ebꞌ bꞌey chi toocan ebꞌ camom.
15 Jain Jehová Yaaw jin chi walaꞌ: Jaꞌ yet oj eytoj jun teꞌ tuꞌ bꞌey eyecꞌ spixan ebꞌ camnajxa, tol oj wakꞌ tantoj jaꞌ jaꞌ ey yul-laj txꞌotxꞌ txꞌotxꞌ, catuꞌ oj jin mitxꞌon oc tucan jaꞌ jaꞌ chi bꞌeyi. Yu jun tuꞌ, yuxan jaꞌ sjolom txꞌotxꞌ wonan Líbano, jaxca tol oj cusaoj, catuꞌ oj tajtoj masanil teꞌ teꞌ. 16 Oj waeytoj bꞌey cambꞌal, catuꞌ oj apnoj can yetoj ebꞌ camnajxa tol eyxa cꞌaltaꞌ ecꞌ tituꞌ. Jaꞌ yet oj bꞌilwoj yeyqꞌuey tuꞌ, oj bꞌilwoj masanil conobꞌlaj yu. Queyton tuꞌ xin, oj tzalabꞌoj a jantaj teꞌ teꞌ tol ey cꞌal oc yaal yet yalantoj, jaxca teꞌ awbꞌeal teꞌ jix yaw Dios bꞌey Edén, yetoj cꞌal pax teꞌ teꞌ txꞌojxa swatxꞌil yili bꞌey txꞌotxꞌ Líbano. 17 Jaꞌ mactxequel jix caey ecꞌ bꞌey yalan yenel, jaꞌton ebꞌ nacionlaj eyoc yetoj, jaꞌjun cꞌal pax ebꞌ oj eytoj bꞌey cambꞌal yetoj, ẍi Jehová, ja chi.
18 Jaꞌ jun teꞌ chi bꞌina tiꞌ, jaꞌton sreyal conobꞌ Egipto, yetoj ebꞌ yet conobꞌ. Ma apnoj ian steel jun teꞌ tuꞌ yintaj swatxꞌil yili cꞌal steel yintaj teꞌ awbꞌeal teꞌ bꞌey Edén. Jain Jehová Yaaw jin chi walaꞌ, tol oj eytoj bꞌey cambꞌal, jaxca wan teꞌ teꞌ bꞌey Edén tuꞌ, tol toonajxa xol ebꞌ cꞌam yeloc apnoj Dios yul sat, jaꞌton ebꞌ camnaj xol jowal, ẍi Jehová.