Syaꞌilal Yibꞌan Egipto
30
Jix kꞌanabꞌ pax Jehová ey jin, jix yalon jaxca tiꞌ: 2 Jaach ánima, kꞌanabꞌ el yin jin bꞌi, cha walon jaxca tiꞌ:Jaꞌ Jehová Naj Yaaw chi aloni: El ojabꞌ je yaw yu jun scꞌual,
3 tol cawilxa ey; jaꞌton scꞌual Jehová tuxa oj juloj. Jaꞌ jun yet jun cꞌual tuꞌ kꞌejtaninaj xacꞌal oj yunne, jaꞌ yet jun cꞌual tuꞌ, oj jul xiwcꞌulal yul-laj masanil nacionlaj.
4 Oj jul jowal yin Egipto, cꞌal Etiopía, caw oj bꞌilwoj a yu xiwcꞌulal. Jaꞌ yet tuꞌ, caw miman ebꞌ a Egipto oj makꞌle camoj, cꞌal yelkꞌaneletoj sbꞌeomal ebꞌ. Oj uchle ey Egipto masantaꞌcꞌal bꞌey cimientoal yichlaj jun conobꞌ tuꞌ.
5 Jaꞌ wan conobꞌ tuꞌ, junne oj yun smakꞌle cam ebꞌ yetoj ebꞌ a Egipto, jaꞌton ebꞌ a Etiopía, ebꞌ a Libia, ebꞌ a Lidia, ebꞌ a Arabia, ebꞌ a Cub, cꞌal yetoj wanxa conobꞌ tol eyto oc wa kꞌane yetoj.
6 Jaꞌton wan tiꞌ chi walaꞌ: Jaꞌ wan nación chi colwa yetoj Egipto, oj cam yetoj ebꞌ xol jowal. Jain Jehová jin chi walaꞌ, tol oj eyqꞌuey smeynebꞌail Egipto, oj ẍaꞌel yich bꞌey Migdol masantaꞌcꞌal bꞌey Asuán, ẍi Dios, ja chi.
7 Jaꞌ Egipto tuꞌ, yel xacꞌal tzꞌinini oj yun can yintaj wanojxa nacionlaj, jaꞌ sconobꞌlaj yel xacꞌal miman oj yun yetexcantoj yintaj wanxa conobꞌlaj. 8 Jaꞌ yet oj waon oc skꞌakꞌal Egipto tuꞌ, oj lawoj cꞌal pax ey wan nacionlaj chi colwa yetoj. Queytuꞌ oj yun yotajnen eloj tol jain ton Jehová jin.
9 Jaꞌ yet oj apnoj oc syaꞌilal yibꞌan Egipto, oj watoj jin chejabꞌ yibꞌan jaꞌ mar yet chi al-le yabꞌ ebꞌ ánima tol cꞌam tzet chi snaꞌ bꞌey Etiopía. Jaꞌ yet oj yabꞌen oc ebꞌ, caw oj xiwa ebꞌ sicꞌlebꞌil, jaꞌ jun cꞌual tuꞌ, tuxa wal chi juli.
10 Jain Jehová Yaaw jin chi walaꞌ: Tol oj waoc Egipto yul skꞌabꞌ Nabucodonosor sreyal Babilonia, yet oj yakꞌ lawoj ey jantaj sbꞌeomal jun conobꞌ tuꞌ. 11 Jaꞌton jun tuꞌ, oj toj yetoj ebꞌ soldado yakꞌon jowal yin, cꞌam cꞌal smimancꞌulal yet oj yakꞌ lawoj ey jun nación ebꞌ tuꞌ. Oj oc ebꞌ yetoj espada yin yakꞌon jowal yin Egipto, tuxa cꞌal oj can bꞌulan camom bꞌey jun nación tuꞌ. 12 Catuꞌ oj wakꞌon tantoj jaꞌ miman jaꞌ Nilo. Oj waoc jun nación caw pena tuꞌ yul skꞌabꞌ ebꞌ ánima cꞌam smimancꞌulal. Jain caw Jehová jin chi walaꞌ, tol oj lawoj can ey jun nación tuꞌ yu ebꞌ txꞌoj conobꞌal tuꞌ, yetoj cꞌal masanil tzetyetal ey tituꞌ.
13 Jain Jehová Yaaw jin chi walaꞌ: Oj wakꞌ lawoj ey masanil wan echele, yetoj cꞌal masanil wan comon dios ey bꞌey conobꞌ Menfis. Cꞌamxa mac oj to yakꞌ yaawilal bꞌey Egipto. Oj watoj xiwcꞌulal bꞌey masanil yul nación tuꞌ.
14 Jaꞌ bꞌey sur yul yet Egipto oj wakꞌ lawoj eyoj, catuꞌ oj waon oc skꞌakꞌal conobꞌ Soan, catuꞌ oj waon oc syaꞌilal yibꞌan conobꞌ Tebas.
15 Oj waontoj sjowal jin cꞌul yibꞌan conobꞌ Sin, jaꞌton jun eyoc yipoj scꞌul ebꞌ a Egipto, catuꞌ oj wakꞌon lawoj ey conobꞌ Tebas. 16 Oj waoc skꞌakꞌal Egipto, jal ebꞌ a Sin tuxa cꞌal oj ecꞌ txꞌumumoj ebꞌ yu syaꞌil; catuꞌ oj jol-le octoj sjolanil smuroal conobꞌ Tebas, catuꞌ oj jin qꞌueyon can el conobꞌ Menfis yet cꞌualil. 17 Jaꞌ ebꞌ achꞌe a conobꞌ On, yetoj ebꞌ a conobꞌ Bubastis oj cam ebꞌ xol jowal, jal jantaj to ebꞌ caan tituꞌ, oj iꞌletoj ebꞌ yin presowomal. 18 Jaꞌ yet oj wakꞌon lawoj ey yipalil conobꞌ Egipto tuꞌ, oj kꞌejbꞌoj el yajan cꞌu yibꞌan conobꞌ Tafnes, catuꞌ oj toj bꞌakꞌan jun asun yibꞌan Egipto, catuꞌ oj iꞌletoj masanil ebꞌ caan tituꞌ yin presowomal. 19 Jain caw oj waoc syaꞌilal yibꞌan Egipto. Queytuꞌ oj yun yotajnen el ebꞌ tol jain ton Jehová jin.
20 Jaꞌ yet jujebꞌxa cꞌual yeoc bꞌabꞌel xꞌaaw yet 11 abꞌil xa yiꞌletoj naj rey Joaquín yin presowomal bꞌey Babilonia, jaꞌ yet tuꞌ jix kꞌanabꞌ Jehová ey jin, jix yaloni: 21 Jaach ánima, tuxa jix jin makꞌ kꞌatoj skꞌabꞌ naj sreyal Egipto. Cꞌam mactxequel chi anteni, tam wal ey mac chi kꞌalon oc teꞌ yin skꞌabꞌ, yet chi waꞌxi ocoj, catuꞌ chi too skeꞌ kꞌanbꞌalnen yespada tuꞌ yetoj. 22 Yu jun tuꞌ, yuxan chi wal jain Jehová Yaaw jin tiꞌ: Tol caw eytej sjowal jin cꞌul yin naj sreyal Egipto; yuxan oj jin makꞌ kꞌatoj skꞌabꞌ tuꞌ scaabꞌil, jun watxꞌ to yetoj jun kꞌail xacꞌaltaꞌ tuꞌ. Queytuꞌ oj yun sbꞌejon el yespada tuꞌ. 23 Oj jin sajlemne cantoj ebꞌ ánima a Egipto bꞌey xol-laj wanxa nacionlaj. Sajleminaj xacꞌal oj yun cantoj ebꞌ. 24 Oj wakꞌ yip skꞌabꞌ naj sreyal Babilonia tuꞌ. Jain oj waoc wespada yul skꞌabꞌ, oj jin makꞌ kꞌatoj scaabꞌil skꞌabꞌ naj Faraón sreyal Egipto tuꞌ. Caw oj el yaw yabꞌen syaꞌil sattaj scajat tuꞌ, jaxca xacꞌal yel yaw junoj mac lalanxa scami. 25 Oj wakꞌ yipal skꞌabꞌ naj sreyal Babilonia, catuꞌ oj wiꞌon el yip skꞌabꞌ naj sreyal Egipto. Oj waon oc wespada yul skꞌabꞌ naj sreyal Babilonia, jaꞌ jun tuꞌ oj a waan yin Egipto. Queytuꞌ oj yun yotajnen el ebꞌ tol jain ton Jehová jin, ẍi Dios. 26 Catuꞌ oj jin sajlemne cantoj masanil ebꞌ a Egipto xol-laj conobꞌlaj cꞌal xol-laj nacionlaj. Queytuꞌ oj yun yotajne el ebꞌ tol jain ton Jehová jin, ẍi Dios.