Jaꞌ Tzet Jix Al-le Can El Yibꞌan Egipto
29
Jaꞌ yet 12 yeoc yet slaonebꞌ xꞌaaw yet laonebꞌ abꞌil xa yiꞌletoj naj rey Joaquín jaxca presowomal, jaꞌ yet tuꞌ jix yalon Jehová ey jin jaxca tiꞌ: 2 Jaꞌ tinaniꞌ jaach ánima, asiꞌ tꞌanan yin conobꞌ Egipto, cha walon el wan kꞌane tiꞌ yibꞌan naj sreyal Egipto tuꞌ. 3 Al jaxca tiꞌ:Jaꞌ Jehová Naj Yaaw chi alon jaxca tiꞌ: Chi walaꞌ tol caw chi tit jin jowal ja win jaach sreyal Egipto, tol laan jaach jaxca junoj miman noꞌ eeytoj xol jaꞌ, catuꞌ cha waloni: Jaꞌ jaꞌ miman Nilo wet jaꞌ an, jain jix jin waꞌne jaꞌ, ja chi.
4 Yuxan oj waoc junoj chꞌen gancho yul ja tiꞌ, catuꞌ oj jaach waontoj xol noꞌ pescado bꞌey ey jaach ecꞌ xol jaꞌ tuꞌ, oj oc latzꞌan noꞌ yin ja tzꞌuumal. Jaꞌ bꞌey yul jaꞌ jaꞌ bꞌey ey jaach ecꞌ tuꞌ, jatuꞌ oj jaach wiꞌatej yetoj cꞌal noꞌ pescado latzꞌan oc yin ja tzꞌuumal tuꞌ.
5 Oj jaach jin kꞌojcantoj bꞌey txꞌotxꞌ cusiltaj txꞌotxꞌ yetoj cꞌal noꞌ pescado oj atej ja wetoj bꞌey yul jaꞌ jaꞌ tuꞌ. Oj jaach eyqꞌuey telna bꞌey txꞌotxꞌ cusiltaj txꞌotxꞌ tuꞌ. Cꞌamxa mactxequel oj jaach sicꞌon aoj, tam wal eyto mactxequel oj jaach mujonoj. Oj waontoj noꞌ xol-laj teꞌal noꞌ ja win, jaꞌ noꞌ oj jaach chiꞌontoj yetoj cꞌal noꞌ miij chi ecꞌ satcan.
6 Queytuꞌ tuꞌ oj yun yotajnen el masanil ebꞌ caan bꞌey Egipto tol jain ton Jehová jin. Jaꞌ conobꞌ Israel jix skꞌan ja colwal, ma skeꞌ ja colon eloj, yutol laan jaach jaxca junoj teꞌ aa chi kaoc cu kꞌojochoj.
7 Jaꞌ yet chi kiꞌon kip yin, tucꞌal chi poꞌotoj, catuꞌ chi too yul cu kꞌabꞌ; queytuꞌ jix ja wute ja bꞌa tet ebꞌ Israel tuꞌ. Jaxca tol jix jaach poꞌotoj, catuꞌ jix telcꞌotoj ebꞌ ja wu.
8 Yu jun tuꞌ, yuxan jain caw Jehová jin chi walaꞌ, tol oj jaach makꞌle cam yetoj chꞌen espada. Catuꞌ oj makꞌle pax cam ebꞌ ánima, yetoj masanil noꞌ noꞌ. 9 Cusiltaj txꞌotxꞌ oj yun cantoj ja conobꞌ tuꞌ. Queyton tuꞌ oj yun yotajnen el ebꞌ tol jain ton Jehová jin.
Tol jix ja walaꞌ: Jaꞌ jaꞌ miman Nilo wet jaꞌ, yutol jain jix jin waꞌne jaꞌ, ja chi. 10 Yu jun tuꞌ, yuxan jain chi walaꞌ, tol chi tit sjowal jin cꞌul ja win, cꞌal yin jaꞌ jaꞌ bꞌey ey jaach ecꞌ tuꞌ. Cusiltaj txꞌotxꞌ oj yun cantoj conobꞌ tuꞌ, caw eyxa smey yili oj yun canoj. Oj ẍaꞌel yich bꞌey Migdol, masantaꞌcꞌal bꞌey Asuán, masantaꞌcꞌal bꞌey smoonal yet Etiopía. 11 Cꞌamxa ánima, cꞌal noꞌ noꞌ oj to kaey ecꞌ tituꞌ. Ey 40 abꞌil junelne cꞌam mac oj caey ecꞌoj. 12 Jaꞌ Egipto tuꞌ, cusiltaj txꞌotxꞌ xacꞌal oj wute cantoj jaxca wan conobꞌ lawinajxa eloj. Yin 40 abꞌil oj cancan jun conobꞌ tuꞌ yin uchquiltaj yili. Yel xacꞌal ecꞌbꞌan spenail yili oj yun cantoj yintaj wanojxa conobꞌ tol qꞌueybꞌilxa eloj. Oj wuchon sajlemtoj ebꞌ a Egipto tuꞌ xol-laj wanojxa mimej conobꞌ bꞌey yul yibꞌankꞌinal tiꞌ.
13 Jain Jehová jin chi walaꞌ: Jaꞌ yet oj lawoj can ecꞌ 40 abꞌil tuꞌ, catuꞌ oj jin yambꞌantej ebꞌ a Egipto bꞌey wan nacionlaj bꞌey sajleminaj ye cantoj ebꞌ tuꞌ. 14 Jal ebꞌ a Egipto eytoj yin presowomal xin, oj meltzotej ebꞌ bꞌey yetcꞌulal sur yet Egipto, bꞌey alinaj smam icham ebꞌ. Jaꞌ tituꞌ oj swaꞌne a sconobꞌ ebꞌ yin tol cꞌam yip jun conobꞌal tuꞌ. 15 Jaꞌ jun nación tuꞌ, yel xacꞌal yeynajil oj yun yintaj masanil nacionlaj. Cꞌam bꞌakꞌin oj ecꞌbꞌantoj yibꞌan wanojxa conobꞌ. Yel xacꞌal yaliẍ conobꞌ oj wute canoj, cꞌamxa bꞌakꞌin oj yakꞌ eyqꞌuey wanojxa nacionlaj. 16 Jal conobꞌ Israel xin, cꞌamxa bꞌakꞌin oj yaoc Egipto yipoj scꞌul. Jaꞌ yu wan tzetyetal oj jul yibꞌan Egipto tuꞌ, yuxan oj naꞌcha el yu ebꞌ, tol naꞌbꞌacꞌal jix yaoc ebꞌ yipoj scꞌul. Queytuꞌ oj yun snaꞌcha el yu ebꞌ tol jain ton Jehová Yaaw jin, ẍi Jehová, ja chi tet, ẍi Dios.
17 Jaꞌ yet bꞌabꞌel cꞌu, yet bꞌabꞌel xꞌaaw, yet 27 abꞌil xa yiꞌletoj naj rey Joaquín yin presowomal bꞌey Babilonia, jaꞌ yet tuꞌ, jix kꞌanabꞌ Jehová ey jin, jix yalon pax jaxca tiꞌ: 18 Jaꞌ Nabucodonosor sreyal Babilonia caw miman mulnail jix yatoj yibꞌan ebꞌ soldado yin yakꞌon jowal ebꞌ yin conobꞌ Tiro. Masanil wan tuꞌ, jix pujel xil sjolom ebꞌ, cꞌal skꞌatoj sjolom xicꞌ ebꞌ yu yalil ijatz, tumi ta yu jun tuꞌ, ey tzet jix yiꞌ yetoj ebꞌ soldado tuꞌ yin Tiro tinaniꞌ. 19 Yu jun tuꞌ, jain Jehová Yaaw jin chi walaꞌ: Tol oj waoc txꞌotxꞌ Egipto tuꞌ yul skꞌabꞌ Nabucodonosor tuꞌ, jaꞌ naj oj iꞌon can oc masanil sbꞌeomal. Jaꞌ yetoj tzetyetal jix yelkꞌane, oj toolane ebꞌ soldado. 20 Jain Jehová jin chi walaꞌ, tol oj waoc txꞌotxꞌ Egipto yul skꞌabꞌ Nabucodonosor tuꞌ, jaxca tol jaꞌ oj yiꞌ stooloj yu jix bꞌetecꞌ mulna wu yetoj soldado bꞌey conobꞌ Tiro.
21 Jaꞌ yet jun tiempoal tuꞌ, oj wiꞌa can yipalil jin conobꞌ Israel. Yet watxꞌ, jaach Ezequiel jaach tiꞌ, sakꞌalxa ja walon el jin kꞌane. Queytuꞌ oj yun yotajnen el ebꞌ tol jain ton Jehová jin, ẍi Dios ey jin.