Kꞌane Albꞌilcan El Yibꞌan Sreyal Tiro
Tol jain Jehová Yaaw jin, chi wal jaxca tiꞌ: Caw cha meyne ja bꞌa, cha waloni: Jain tiꞌ, dios jin, ey wopiso yibꞌan jaꞌ mar tiꞌ, jain chi wakꞌ yaawil xol ebꞌ conobꞌ jaxca junoj dios, ja chi. Caw naꞌbꞌa ánima jaach cꞌal, man dios oj jaach, caxcꞌal cha naꞌ tol jelan jaach jaxca junoj dios, cꞌam cꞌaltaꞌ tzet chi skeꞌ ja wu.
3 ¿Tumi yel xacꞌal jelan jaach yintaj naj Daniel ja naꞌoni? ¿Tumi ja wotaj junoj tzetyetal ewantaj yeocoj?
4 Yu ja jelanil, cꞌal yu jelan ja naꞌbꞌal, yuxan caw ey miman ja bꞌeomal; jix ja wakꞌ no ja caẍa yetoj chꞌen oro cꞌal yetoj chꞌen plata.
5 Yutol caw jelan jaach yin junjun tujan txon, yuxan jix chꞌibꞌ ja bꞌeomal; yu ja bꞌeomal tuꞌ, yuxan caw cha meyne ja bꞌa.
6 Yu jun tuꞌ xin, jain Jehová Yaaw jin chi walaꞌ: Yutol cha naꞌ tol laan xa ja naꞌbꞌal wetoj,
7 yuxan oj wiꞌtej ebꞌ txꞌoj conobꞌal ja win, jaꞌton ebꞌ tol cꞌam smimancꞌulal, tol oj yiꞌatej yespada ebꞌ ja win. Oj akꞌle lawoj ey ja mimanbꞌilal yetoj cꞌal jantaj ja tzetyetal tol txꞌojxa swatxꞌil yili jix ja wiꞌ yin ja jelanil tuꞌ.
8 Yuxan oj jaach tojcan yul jun sjolanil jun miman xabꞌ. Caw okꞌbꞌal cꞌul oj yun ja cam bꞌey snaatil yich jaꞌ mar.
9 ¿Tumi oj to ja wal sattaj ebꞌ oj jaach makꞌom camoj tol dios jaach? Jaꞌ yul skꞌabꞌ ebꞌ oj jaach makꞌon cam tuꞌ, laan jaach cꞌal jaxca junoj ebꞌ comon ánima.
10 Jain Jehová jin chi wal wan kꞌane tiꞌ, tol jaꞌ yul skꞌabꞌ ebꞌ txꞌoj conobꞌal oj jaach camoj, jaxca chi yun scam ebꞌ ánima pena sbꞌeybꞌal, ja chi tet naj sreyal Tiro, ẍi Dios.
Sbꞌital Camich Yin Sreyal Tiro
11 Jix yalon Jehová ey jin jaxca tiꞌ: 12 Jaach ánima, bꞌitne sbꞌital camich yin naj sreyal Tiro, tol jain Jehová jin chi wal jaxca tiꞌ:
Jaach tiꞌ, caw jelan jaach, caw jelan ja naꞌbꞌal, catuꞌ watxꞌ pax ja wili.
13 Jaꞌ xol teꞌ awbꞌeal teꞌ yet Dios bꞌey Edén, jaꞌ tituꞌ caan jaach. Jaꞌ chꞌen chꞌen caw sakꞌal yili eyoc yelawiloj ja pichil, jaꞌton chꞌen rubí, crisólito, jade, topacio, cornalina, jaspe, zafiro, granate cꞌal chꞌen esmeralda. Jaꞌ chꞌen oro eyoc smitxꞌbꞌaniloj chꞌen, eyxa cꞌaltaꞌ wan tuꞌ yet tax cꞌamto chach jin waꞌne.
14 Jaach querubín, jain jix wakꞌcan oc ja wopiso yu ja woc steynemaloj jun tzalan tol wet yeocoj. Jaꞌ xol-laj chꞌen chꞌen chi kopopi yili jix jaach ecꞌabꞌi.
15 Caw watxꞌ ja bꞌeybꞌal yet tax cꞌaltaꞌ jun cꞌual yet jix jaach jin waꞌneni, masantaꞌcꞌal yet jix qꞌuexchatoj ja naꞌbꞌal yin spenail.
16 Yutol caw jix a can ja txon, yuxan caw jix a can spenail ja win, catuꞌ jix ja waon oc ja mul. Yu jun tuꞌ, yuxan jix jaach jin kꞌojel jin sattaj, jix jaach wujte el bꞌey jun tzalan tol wet yeocoj. Jaach querubín, teynewom jaach, jix jaach wujte el xol chꞌen chꞌen chi kopopi yili.
17 Jaꞌ yu swatxꞌilal ja wili tuꞌ, yuxan jix ja meyne ja bꞌa. Jaꞌ yu swatxꞌil ja wili, yuxan jix etex el ja jelanil. Jain jix jaach jin kꞌojeytoj sat txꞌotxꞌ, yet chi yotajne el ebꞌ rey tol cꞌam ja weloc apnoj.
18 Caw miman ja mul jix ja waocoj, jix ja wetne mactxequel chi txonwi cꞌal ebꞌ chi manwi ey jaach, yuxan jix ja wetnentoj ja templo. Yu jun tuꞌ, yuxan jix waeytoj jun kꞌakꞌ ja win, jaꞌ jix jaach akꞌon tzꞌaꞌeyoj. Taan xacꞌal jix jaach wute can ey sat txꞌotxꞌ sattaj mactxequel chach ilon ocoj.
19 Masanil nacionlaj otajnen jaach, caw oj xiwa ebꞌ yet oj jaach yilon oc ebꞌ. Xol mimej xiwcꞌulal jix jaach lawi eyoj. Yu jun tuꞌ, yuxan cꞌamxa bꞌakꞌin oj jaach txeclo a jaach sreyal Tiro, ẍi Jehová, ja chi tet, ẍi Dios ey jin.
Jaꞌ Tzet Jix Al-le Yin Conobꞌ Sidón
20 Jix yalon pax Jehová ey jin jaxca tiꞌ: 21 Jaach ánima, meltzaantoj tꞌanan bꞌey yetcꞌulal conobꞌ Sidón, catuꞌ cha walon el wan kꞌane tiꞌ yibꞌan jun conobꞌ tuꞌ. 22 Al yin jaxca tiꞌ:
Tol jain Jehová Yaaw jin chi walaꞌ: Jaach conobꞌ Sidón, jain chi wal ey jaach tol caw chi tit jin jowal ja win. Ja wu jaach tiꞌ, yuxan oj jin iꞌle a can yu wanojxa nacionlaj yu tzet oj jaach wute. Jaꞌ yet oj waon oc syaꞌilal ja wibꞌan, queytuꞌ oj yun xeclo eloj tol jain ton Jehová jin, tol asanne jin Dios jin an, yuxan jaꞌ yet oj jin naꞌon oc yin ebꞌ, oj txeclo el wipalil xol ebꞌ an.
23 Oj watoj yaꞌbꞌil yibꞌan ebꞌ ánima, tol oj bꞌey chicꞌ yul-laj scalleal conobꞌ. Oj cam masanil ebꞌ yu jowal tuꞌ, yal cꞌal bꞌeytuꞌ oj titoc ebꞌ oj tzokꞌon cam ebꞌ yetoj chꞌen espada. Queytuꞌ oj yun je yotajne eloj tol jain ton Jehová jin.
24 Jal conobꞌ Israel xin, manxa oj yabꞌ syaꞌil yu ebꞌ nación ey scawilal tuꞌ, jaꞌton ebꞌ jaxca qꞌuix caw wal eel yee, manxa syaꞌiloj bꞌey chi lowi. Queytuꞌ oj yun je yotajne eloj tol jain ton Jehová jin, ẍi Dios, ja chi tet ebꞌ.
25 Jain Jehová Yaaw jin chi walaꞌ: Tol oj jin yambꞌatej ebꞌ Israel tiꞌ bꞌey xol-laj nacionlaj, jaꞌton bꞌey sajleminaj ye cantoj ebꞌ. Queyton tuꞌ oj yun xeclo el wipalil sattaj wan nación tuꞌ. Jal Israel xin, oj el pax yich swaꞌnen sbꞌa junelxa sat xꞌotxꞌ, jaꞌton jun txꞌotxꞌ jix wakꞌcan tet naj jin chejabꞌ Jacob. 26 Cꞌamxa cꞌal tzet oj iꞌon ebꞌ tituꞌ, tzalacꞌulal xacꞌal oj yun scaey ecꞌ ebꞌ. Oj swaꞌne a sna ebꞌ, cꞌal yawon uva ebꞌ. Jain oj waoc syaꞌilal yibꞌan wan nación jix etnen ebꞌ. Queytuꞌ oj yun yotajnen el ebꞌ tol jain ton Jehová jin, sDiosal jin ebꞌ, ẍi Dios.