Bꞌit Yet Camich Jix Bꞌitnele Yibꞌan Conobꞌ Tiro
27
Jix kꞌanabꞌ Jehová ey jin jix yalon jaxca tiꞌ: 2 Jaach ánima, bꞌitne jun bꞌit yet camich tiꞌ yibꞌan conobꞌ Tiro. 3 Jaꞌton jun conobꞌ ey bꞌey stiꞌ jaꞌ mar, jun tol watxꞌ yakꞌon yin txon yetoj wanojxa conobꞌ ey bꞌey stiꞌlaj jaꞌ mar. Al tet ebꞌ jaxca tiꞌ: Jaꞌ Jehová Naj yaaw, chi alon jaxca tiꞌ:Jaꞌ ebꞌ a conobꞌ Tiro, caw chi smeyne sbꞌa ebꞌ, chi snaꞌ ebꞌ tol asanne jun sconobꞌ ebꞌ tuꞌ watxꞌ yili jaxca junoj barco.
4 Jaꞌ smoonal bꞌey chi ecꞌ ebꞌ, jata cꞌal bꞌey stiꞌlaj jaꞌ mar. Caw watxꞌ jix yun swaꞌnen a sbarco ebꞌ.
5 Watxꞌ xacꞌal jix yun swaꞌxi oc ẍemteꞌal yu ebꞌ, jaꞌton teꞌ chemteꞌ tol taa, iꞌbꞌiltej bꞌey sjolom wonan Senir. Jix waꞌnele yoyal yetoj teꞌ kꞌuteꞌ chi tit bꞌey Líbano.
6 Jaꞌ teꞌ makꞌbꞌal jaꞌ yet barco, waꞌnebꞌil yin teꞌ jii chi tit bꞌey txꞌotxꞌ Basán; jaꞌ teꞌ qꞌuisis titnaj bꞌey Chipre, jaꞌ teꞌ eey yul cꞌal yinlaj, tol eyoc chꞌen marfil yelawiloj.
7 Jaꞌ an kꞌap eya smajbꞌaniloj kaꞌeꞌ, lino cꞌal el masanil, jaꞌ an waꞌnebꞌil a sbanderaoj teꞌ barco tuꞌ. Caw watxꞌ yeoc yelawil stiꞌlaj an, yutol jatuꞌ waꞌnebꞌil an bꞌey Egipto. Jaꞌ an kꞌap waꞌnebꞌil a spatiloj teꞌ barco tuꞌ, jaꞌ an kꞌejweinaj kꞌap cꞌal an yaax txꞌal eyoc yin an iꞌbꞌiltej bꞌey conobꞌ Elisá, bꞌey stiꞌlaj jaꞌ mar.
8 Jaꞌ ebꞌ chi iꞌon bꞌey barco, a conobꞌ Sidón cꞌal Arvad ebꞌ. Jaꞌ ebꞌ chi lekꞌon teꞌ, caw jelan ebꞌ, cuywinaj ebꞌ, a conobꞌ Tiro pax ebꞌ.
9 Jaꞌjun ebꞌ icham winaj a Guebal yetoj ebꞌ, caw jelan ebꞌ swaꞌnen bꞌey chi etextoj teꞌ barco tuꞌ. Caw ecꞌal ebꞌ ánima chi apni manwoj bꞌey conobꞌ Tiro.
10 Jaꞌ ebꞌ winaj a Persia, ebꞌ a Lidia cꞌal ebꞌ a Libia; jaꞌ ebꞌ eyoc soldadoal yin akꞌo jowal. Jaꞌ majbꞌal sat julbꞌal ebꞌ, yetoj chꞌen kꞌoxkꞌome chi yaoc ebꞌ, jatuꞌ chi slocbꞌa a ebꞌ satlaj smuroal conobꞌ, jaxca xacꞌal tol yelawil yeoc yinlaj muro tuꞌ.
11 Jaꞌ ebꞌ winaj a Arvad, junne ey ebꞌ yetoj ebꞌ soldado Tiro, joyan oc ebꞌ yinlaj smuroal bꞌey yinlaj conobꞌ tuꞌ, jaꞌ bꞌey torre, ey ebꞌ winaj a Gamad. Jaꞌ smajbꞌal sat julbꞌal ebꞌ locan a bꞌey satlaj muro tuꞌ, jaꞌ chi oc xacꞌal yelawiloj. 12 Jaꞌ ebꞌ a Tarsis, chi yakꞌ chꞌen plata ebꞌ, chꞌen hierro, chꞌen estaño cꞌal chꞌen plomo sqꞌuexeloj wan tzetyetal chi txonle tituꞌ. 13 Yetoj cꞌal pax conobꞌ Grecia, naj Tubal cꞌal naj Mésec chi manwi ebꞌ tituꞌ. Jaꞌ tzet chi yakꞌ ebꞌ stooloj tzet chi sman tituꞌ, jaꞌton ebꞌ ánima chi txonle yin yoc yakꞌomaloj servil, cꞌal wan tzetyetal tol chꞌen bronce cꞌal eloj. 14 Yetoj cꞌal pax ebꞌ a conobꞌ Bet-togarmá chi stoolane ebꞌ tzet chi sman ebꞌ yetoj noꞌ che yet ijatz, noꞌ chi kꞌanle yin jowal, yetoj cꞌal noꞌ mula che. 15 Jal ebꞌ ánima a Rodas, cꞌal wanxa conobꞌlaj bꞌey stiꞌlaj jaꞌ mar, jaꞌ tzet jix sman ebꞌ, jix toolane ebꞌ yetoj chꞌen marfil cꞌal yetoj ébano. 16 Jal ebꞌ a Edom, caw miman tzetyetal jix sman ebꞌ tituꞌ, jix toolane ebꞌ yetoj chꞌen granate, yetoj an kꞌap tol cajin yili, an eyoc yelawil, yetoj an lino, chꞌen coral, cꞌal chꞌen rubí. 17 Jal ebꞌ a Judá, cꞌal ebꞌ a Israel, chi jul pax ebꞌ manwoj tituꞌ. Jaꞌ yetoj tiriw chi el bꞌey Minit, yetoj pan, yetoj noꞌ yal awcabꞌ, yetoj aceite olivo, cꞌal yetoj bálsamo, jaꞌ jix yakꞌ ebꞌ stooloj wan tzetyetal tuꞌ. 18 Yetoj cꞌal pax Damasco, caw miman tzetyetal jix sman ebꞌ tituꞌ. Jaꞌ tzet chi yakꞌ ebꞌ stooloj, jaꞌton vino chi waꞌxi bꞌey conobꞌ Helbón, cꞌal yetoj noꞌ lana chi tit bꞌey conobꞌ Sahar. 19 Jacꞌalaꞌ pax ebꞌ a Vedán, cꞌal ebꞌ a Javán ey yul yet Uzal, chi jul ebꞌ manwoj, chi stoolane ebꞌ tzet jix sman yetoj chꞌen hierro waꞌnebꞌilxa, yetoj teꞌ yal mirra, yetoj cꞌal teꞌ canela. 20 Jaꞌ bꞌey conobꞌ Dedán chi tit wan kꞌap caw ey stool chi oc yibꞌan ẍila tzꞌuum chi oc yibꞌan noꞌ che. 21 Jaꞌ ebꞌ a Arabia, yetoj cꞌal masanil ebꞌ yaaw yeoc bꞌey Quedar jix toolane ebꞌ tzet jix sman yetoj noꞌ yuneꞌ meꞌ, noꞌ icham meꞌ cꞌal yetoj noꞌ chiw. 22 Ebꞌ txonwom a Sabá, cꞌal ebꞌ a Raamá, jix toolane ebꞌ tzet jix sman yetoj perfume caw watxꞌ, yetoj chꞌen chꞌen txꞌojxa swatxꞌil yili, cꞌal yetoj chꞌen oro. 23 Jaꞌ ebꞌ a conobꞌ Harán, cꞌal masanil ebꞌ a Media, jaꞌton ebꞌ tuꞌ chi manwi tituꞌ. 24 Chi stoolane ebꞌ tzet chi sman tuꞌ yetoj an pichile watxꞌ yili, waꞌnebꞌil yetoj an kꞌap púrpura, yetoj an kꞌap tzꞌisbꞌil oc yelawiloj, yetoj an labꞌan kꞌap txꞌojxa swatxꞌil yili stzꞌibꞌil, cꞌal yetoj lasu caw watxꞌ ye xꞌumleyi. 25 Jaꞌ teꞌ mimej barco chi ijon ecꞌ tzetyetal chi sman ebꞌ bꞌey Tarsis, cꞌal jantaj tzetyetal chi xon ebꞌ.
Jaach conobꞌ Tiro, laan jaach jaxca junoj teꞌ barco caw al yijatz chi ecꞌ yibꞌan jaꞌ mar.
26 Jaꞌ ebꞌ chi iꞌon bꞌey barco, naat tacꞌal chi yiꞌtoj teꞌ ebꞌ yibꞌan jaꞌ, jaꞌ kaꞌeꞌ chi tit yetcꞌulal bꞌey chi aol cꞌu, jaꞌ chi makꞌon poꞌo teꞌ bꞌey yibꞌan jaꞌ tuꞌ.
27 Jaꞌ yet chi etextoj teꞌ, chi toocan jantaj bꞌeomal, cꞌal txon, yetoj cꞌal masanil tzetyetal bꞌey yich jaꞌ mar. Chi tocꞌal pax can ebꞌ chi iꞌon bꞌey teꞌ, yetoj ebꞌ chi nipen satilal teꞌ, cꞌal ebꞌ txonwom, ebꞌ soldado, yetoj cꞌal jantaj ebꞌ eyoc yul teꞌ, pilan oj tojcan ebꞌ yich jaꞌ jaꞌ tuꞌ.
28 Jaꞌ yet oj el yaw ebꞌ mulnawom tuꞌ spaxey yich jaꞌ, jaxa ebꞌ ánima caan stiꞌlaj jaꞌ mar tuꞌ, caw oj xiwa ebꞌ yet oj yabꞌen ebꞌ yel yaw ebꞌ.
29 Jaꞌ ebꞌ chi iꞌon bꞌey junojxa teꞌ barco, chi eytej ebꞌ yul sbarco. Jaꞌ ebꞌ chi iꞌon bꞌey teꞌ tuꞌ, chi oc linan ebꞌ stiꞌ jaꞌ mar.
30 Queytuꞌ oj yun yel yaw yul snukꞌ ebꞌ ánima yokꞌ yu cuscꞌulal yu conobꞌ Tiro. Oj yaon atoj pojoj ebꞌ yin sjolom, catuꞌ oj sbꞌalon ecꞌ sbꞌa ebꞌ xol stikꞌakꞌil taan.
31 Ja wu cꞌal, oj stzujon el xil sjolom ebꞌ, catuꞌ oj yaon oc an eel pichile ebꞌ, oj okꞌ ebꞌ yin mimej cuscꞌulal.
32 Oj sbꞌitnen ebꞌ jun bꞌit yet camich ja win. Oj yalon ebꞌ yin cusiltaj kꞌaneal jaxca tiꞌ: ¿Tumi ey junojxa conobꞌ jix qꞌueyle el jaxca jix yun sqꞌueyle el conobꞌ Tiro?
33 Jaꞌ yet cꞌamto chi lawi el conobꞌ Tiro tuꞌ, jix yijtoj masanil wan txon teꞌ barco bꞌey yibꞌan jaꞌ mar, caw chi tzala wanojxa conobꞌ smanoni. Jantaj ebꞌ rey yul wanxa nación, caw jix oc ebꞌ bꞌeomal yu tzet ey bꞌey jun conobꞌ tiꞌ.
34 Jaꞌ yet jix lawi el yu jaꞌ mar tuꞌ, pilan jix too wan txon yich jaꞌ, yetoj cꞌal ebꞌ chi mulna oc yin teꞌ, jix toocan masanil ebꞌ yich jaꞌ.
35 Masanil nacionlaj bꞌey stiꞌlaj jaꞌ mar, tuxa cꞌal chi qꞌueya scꞌul ebꞌ yiloni. Ebꞌ sreyal bꞌey junjun conobꞌ, caw chi xiwa ebꞌ, txequel xacꞌal yili oc sat ebꞌ yu xiwcꞌulal.
36 Jaꞌ yet oj yilon oc masanil ebꞌ txonwom oj tit bꞌey wanxa conobꞌlaj, caw oj qꞌuey scꞌul ebꞌ yiloni. Caw eyxa smey yili jix yun yakꞌle lawoj ey yin junelne, ẍi ebꞌ oj yalon ebꞌ, ẍi Jehová.