Jaꞌ Tzet Jix Al-le Can Yin Conobꞌ Tiro
26
Jaꞌ yet sbꞌabꞌel cꞌu yul xꞌaaw, yet 11 abꞌil xa eyecꞌ naj rey jaxca presowomal, jaꞌ yet tuꞌ jix kꞌanabꞌ Jehová ey jin, jix yalon jaxca tiꞌ: 2 Jaach ánima, ja ebꞌ Tiro, jix yal ebꞌ yin conobꞌ Jerusalén jaxca tiꞌ:¡Jaꞌ conobꞌ Jerusalén, tuxa jix lawi eyoj! Jaꞌ yet yalantoj, sbꞌe ebꞌ txonwom yeocoj, jal tinaniꞌ, tuxa jix lawi ey jun conobꞌ tuꞌ. ¡Jaꞌ tinaniꞌ, tuxa jix chaꞌlo ku! Caw jajbꞌil jon oc yin, caw oj cu oc bꞌeomal, ẍi ebꞌ.
3 Yu jun tuꞌ, yuxan jain Jehová Yaaw jin tiꞌ chi walaꞌ: Jaꞌ tinaniꞌ, caw chi tit jin jowal yin conobꞌ Tiro, yuxan oj watoj ecꞌaloj nacionlaj yin, yet chi akꞌle lawoj eyoj, jaxca wal chi yun ya pomna sat jaꞌ mar.
4 Oj uchle ey smuroal yu ebꞌ cꞌal yuchle ey storreal. Pilan oj wiꞌa spojojal txꞌotxꞌ txꞌotxꞌ, qꞌuisisi xacꞌal oj wute canoj; asanxane chꞌen mimej chꞌen oj cancanoj.
5 Jaꞌ bꞌey snan yul jaꞌ mar oj cancan jun tuꞌ jaxca bꞌey chi skeꞌ yakꞌle taj xꞌanil txim. Jain Jehová Yaaw jin chi walaꞌ. Tol oj iꞌletoj jantaj sbꞌeomal conobꞌ Tiro yu wanxa nación.
6 Jal ebꞌ caan bꞌey aldealaj bꞌey stiꞌlaj jaꞌ mar tuꞌ, oj cam ebꞌ yin jowal. Queytuꞌ oj yun snaꞌcha el yu ebꞌ tol jain ton Jehová jin.
7 Jain Jehová Yaaw jin chi walaꞌ: Jaꞌ yetcꞌulal bꞌey chi aol cꞌu, oj wiꞌtej Nabucodonosor sreyal Babilonia, jaꞌton jun rey tuꞌ yel xacꞌal miman yeloc apnoj yin yopiso. Jaꞌ oj akꞌon jowal yin Tiro, oj jul yetoj ebꞌ soldado eyoc yibꞌan che, cꞌal yetoj carruaje yetoj junxa miman bꞌulan soldado.
8 Oj akꞌle cam masanil yetoj espada jantaj ebꞌ caan bꞌey yul-laj wan aldealaj ey bꞌey stiꞌlaj jaꞌ mar. Oj waꞌxoj a junoj muro bꞌey yinlaj conobꞌ Tiro. Oj swaꞌne cꞌal pax a swalubꞌ yet oj oc ebꞌ yakꞌon jowal yin, iꞌbꞌil pax oc majbꞌal sat julbꞌal yu ebꞌ.
9 Oj smakꞌ poꞌo smuroal jun conobꞌ tuꞌ ebꞌ yetoj teꞌ teꞌ eyoc chꞌen makꞌbꞌal chꞌen yin sjolom teꞌ, oj smakꞌon poꞌo torre ebꞌ yetoj chꞌen hierro.
10 Manxa jantajoj noꞌ che yetbꞌi oc naj rey tuꞌ, oj noel yul conobꞌ yu pojoj oj stecꞌa noꞌ. Jaꞌ yet oj oc apnoj naj sreyal Babilonia bꞌey spuertail conobꞌ tuꞌ, jaxca xacꞌal junoj conobꞌ tol jix jajcha junoj jolan bꞌey smuroal, caw oj bꞌilwoj a smuroal conobꞌ yu yipal stoo yajan noꞌ che tokꞌnen oc teꞌ carreta, cꞌal wan carruaje yet jowal.
11 Pilan oj ecꞌ jininoj noꞌ che tuꞌ bꞌey yul-laj scalleal conobꞌ. Catuꞌ oj makꞌle cam ebꞌ ánima yetoj chꞌen espada. Oj makꞌle ey wejna chꞌen mimej chꞌen oy eyoc yipomaloj smuroal conobꞌ tuꞌ.
12 Cꞌamxa niꞌoj sbꞌeomal oj can yu ebꞌ. Masanil txon oj yelkꞌanetoj ebꞌ. Oj smakꞌon poꞌo smuroal conobꞌ ebꞌ, cꞌal smakꞌon poꞌo ebꞌ jantaj mimej na tol watxꞌ yili tinaniꞌ. Jantaj chꞌen eyoc yinlaj, cꞌal steꞌal yetoj xꞌotxꞌal, pilan oj kꞌojle cantoj yul jaꞌ mar.
13 Queytuꞌ oj yun wakꞌon lawoj can bꞌit chi sbꞌitni ebꞌ. Cꞌamxa bꞌey oj abꞌle yoc yul snukꞌ yarpa ebꞌ.
14 Jaꞌ yul jun conobꞌ tuꞌ, laan oj wute cantoj jaxca chꞌen samchꞌen tol neleli sat, watxꞌ xacꞌal yakꞌle taj txim mitxꞌbꞌal pescado yibꞌan. Cꞌamxa bꞌakꞌin oj caꞌ waꞌnele a junelxa. Jain Jehová Yaaw jin chin kꞌanabꞌi, ẍi Dios.
15 Jain Jehová Yaaw jin chi wal yin conobꞌ Tiro jaxca tiꞌ: Jaꞌ yet oj eyqꞌuey Tiro, masanil conobꞌlaj ey bꞌey stiꞌlaj jaꞌ mar oj bꞌilwoj a ebꞌ yu xiwcꞌulal, yu yabꞌen yel yaw ebꞌ oj yasitoj, cꞌal ebꞌ lalan scami. 16 Masanil ebꞌ rey bꞌey stiꞌlaj jaꞌ mar oj eytej ebꞌ bꞌey yul-laj spalacio, oj yiꞌel xotil ebꞌ, cꞌal spichil tol eyoc yelawil. Caw oj oc ebꞌ yin mimej xiwcꞌulal, oj ey chotan ebꞌ sat txꞌotxꞌ, masanil xacꞌal tiempo chi bꞌilwi ebꞌ yu xiwcꞌulal, yu yilon ebꞌ tzet jix jul yibꞌan conobꞌ Tiro. 17 Oj sbꞌitne jun bꞌit ebꞌ yet cuscꞌulal; oj yalon ebꞌ jaxca tiꞌ:
Tuxa jix lawi ey conobꞌ Tiro, jun conobꞌ caw bꞌinabꞌil. Caw bꞌinabꞌil xol ebꞌ chi ecꞌ yibꞌan jaꞌ mar. Caw oj bꞌilwoj a masanil ebꞌ conobꞌ caan bꞌey stiꞌlaj jaꞌ mar yu xiwcꞌulal.
18 Jaꞌ tinaniꞌ, tuxa jix ale oc wan conobꞌlaj ey bꞌey stiꞌlaj jaꞌ mar yin xiwcꞌulal, yutol jix eyqꞌuey jun conobꞌ tuꞌ. Jaꞌ ebꞌ caan sat txꞌotxꞌ txꞌotxꞌ ey bꞌey snanlaj jaꞌ jaꞌ, caw oj oc ebꞌ yin xiwcꞌulal, yutol jix lawi jun conobꞌ tuꞌ, ẍi skꞌaneal jun sbꞌit ebꞌ tuꞌ.
19 Yu jun tuꞌ, yuxan chi wal jain Jehová Yaaw jin tiꞌ: Oj wakꞌ qꞌueyle el conobꞌ Tiro, jaxca wanoj conobꞌlaj tol cꞌamxa junoj mactxequel caan bꞌey. Oj wakꞌ muji can eytoj bꞌey yich jaꞌ mar. 20 Oj pax can eytoj masantaꞌcꞌal bꞌey eyecꞌ ebꞌ camom. Jaꞌ ebꞌ ánima jix ecꞌ yet tax cꞌal peyxa, naat oj wa cantoj ebꞌ yich txꞌotxꞌ txꞌotxꞌ, jaꞌton xol wan conobꞌ tol jix lawi ey yin junelne. Queytuꞌ oj yun yee ecꞌ ebꞌ xol ebꞌ camnajxa. Cꞌamxa bꞌakꞌin oj caey ánima bꞌey conobꞌ Tiro junelxa, cꞌamxa bꞌakꞌin oj swaꞌne a jun conobꞌ tuꞌ ebꞌ. 21 Jain Jehová Yaaw jin chi walaꞌ, tol eyxa smey yili oj yun can wu, caxcꞌal oj seyle ecꞌoj, cꞌamxa bꞌey oj ilcha ocoj, jin chi, ẍi Dios.