Jaꞌ Tzet Jix Al-le Yin Ebꞌ Amonita
25
Jix yalon pax Jehová ey jin jaxca tiꞌ: 2 Jaach ánima, meltzaantoj tꞌanan bꞌey yetcꞌulal ebꞌ Amonita, catuꞌ cha walon el jin kꞌane yin ebꞌ. 3 Al tet ebꞌ jaxca tiꞌ: Abꞌwej yalon Jehová Naj Yaaw; jaꞌ chi aloni: Jaex tiꞌ caw jix jex a bꞌulna yel je yaw je tzeewi, yet jix je yiloni tol lalan yetneletoj jin templo, cꞌal yet lalan yuchle lawoj conobꞌ Israel, catuꞌ jix iꞌle cantoj ebꞌ conobꞌ Judá yin presowomal. 4 Yu jun tuꞌ, yuxan oj jex waoc yul skꞌabꞌ ebꞌ conobꞌlaj ey yetcꞌulal bꞌey chi aol cꞌu, yet watxꞌ, jaꞌ ebꞌ oj yakꞌ yaawil yibꞌan je txꞌotxꞌ, oj swaꞌnen ey bꞌulan sbꞌa ebꞌ, cꞌal scaey ebꞌ yul-laj je calubꞌal. Oj syambꞌa oc sat je yawo ebꞌ, cꞌal yuqꞌuen lech ebꞌ chi iꞌle el yin noꞌ wacax. 5 Slowbꞌal camello xacꞌal oj wute cantoj conobꞌ Rabá, jal sat je txꞌotxꞌ jex a Amón, slowbꞌal noꞌ meꞌ oj yun canoj. Queytuꞌ oj yun snaꞌcha el je yu, tol jain ton Jehová jin.6 Jain Jehová Yaaw jin chi walaꞌ: Jaex Amonita jex tiꞌ, caxcꞌal jix je tzaꞌoꞌtane je kꞌabꞌ cꞌal je tecꞌon ey je yajan yu je bꞌuchon can el conobꞌ Israel. 7 Yu jun tuꞌ, yuxan oj wiꞌa jin kꞌabꞌ yin waon oc syaꞌilal je yibꞌan, oj jex waoc yul skꞌabꞌ wanxa nacionlaj, yet watxꞌ oj iꞌle ecꞌ masanil tzettaj yetal ey, ey jex. Oj jex jin qꞌueycan el xol conobꞌlaj, oj jex wakꞌ lawoj ey yin junelne. Queytuꞌ oj yun je yotajnen eloj tol jain ton Jehová jin, ẍi Dios, ja chi tet ebꞌ.
Jaꞌ Tzet Jix Al-le Yin Conobꞌ Moab
8 Jain Jehová Yaaw jin chi walaꞌ: Jaꞌ ebꞌ a Moab, cꞌal ebꞌ a Seír chi yal ebꞌ, tol laan cꞌal Judá yetoj wanojxa nacionlaj. 9 Yu jun tuꞌ, yuxan oj jin chaꞌ eyqꞌuey wan conobꞌ chi majon bꞌey smoonal Moab, yetoj cꞌal wan conobꞌ tol caw watxꞌ yili, oj wakꞌ eyqꞌueyoj, jaꞌton Bet-jesimot, Baal-meón cꞌal Quiriataim. 10 Catuꞌ oj wakꞌon yun wan conobꞌlaj ey yetcꞌulal bꞌey chi aol cꞌu, jaꞌ ebꞌ oj iꞌon can oc txꞌotxꞌ xꞌotxꞌ ebꞌ a Moab, yetoj cꞌal xꞌotxꞌ ebꞌ Amonita. Cꞌamxa junoj nación oj to naꞌontej ebꞌ a Amón. 11 Catuꞌ oj waon oc syaꞌilal yibꞌan Moab. Queytuꞌ oj yun snaꞌcha el yu ebꞌ tol jain ton Jehová jin.
Jaꞌ Tzet Jix Al-le Yin Conobꞌ Edom
12 Jain Jehová Yaaw jin chi walaꞌ: Jaꞌ Edom tiꞌ jix ecꞌ yibꞌan yaon ecꞌ spaj yin Judá, yuxan caw miman spenail jix yaoc jin sattaj. 13 Yu jun tuꞌ, yuxan chi walaꞌ tol oj wiꞌa jin kꞌabꞌ yin, yu waon oc syaꞌilal yibꞌan Edom. Oj jin qꞌueyel masanil ánima cꞌal noꞌ noꞌ. Oj ẍaꞌel yich slawi el ebꞌ bꞌey Temán, masantaꞌcꞌal bꞌey Dedán; oj cam masanil ebꞌ ánima yu jowal. 14 Jain Jehová Yaaw jin chi walaꞌ, tol jaꞌ jin conobꞌ Israel oj jin kꞌanbꞌalne yin jin spajtzen tet Edom tuꞌ. Oj ale oc syaꞌilal yibꞌan conobꞌ Edom yu ebꞌ, jaxca wal yeoc sjowal jin cꞌul yin ebꞌ. Queytuꞌ oj yun yabꞌen ebꞌ tzet oj wute jin pajtzeni.
Jaꞌ Tzet Jix Al-le Yin Ebꞌ Filisteo
15 Jain Jehová Yaaw jin chi walaꞌ: Jaꞌ ebꞌ Filisteo, jix spajtze sbꞌa ebꞌ, ma cꞌal yakꞌ mimancꞌulal yin wan scajat ebꞌ yet tax cꞌal peyxa, jaꞌton ebꞌ a Judá. Yutol caw eytej ẍichoncꞌulal ebꞌ yet jix yakꞌon lawoj ey ebꞌ. 16 Yu jun tuꞌ, yuxan jain chi walaꞌ tol oj wiꞌa jin kꞌabꞌ yin waon oc syaꞌilal yibꞌan ebꞌ Filisteo tuꞌ; oj wakꞌ lawoj ebꞌ Cereteo yin junelne, yetoj cꞌal ebꞌ eyto can bꞌey stiꞌlaj jaꞌ mar. 17 Caw eyxa smey oj wute jin spajtzen tet ebꞌ; yetoj wal sjowal jin cꞌul oj waon oc syaꞌilal yibꞌan ebꞌ. Jaꞌ yet oj wunen jaxca tuꞌ, oj yotajne el ebꞌ tol jain ton Jehová jin, chi wun jaxca tuꞌ, ẍi Dios.