Skꞌaneal Jun Chꞌen Xi
24
Jaꞌ yet laonebꞌ abꞌil yeoc yet slaonebꞌ xꞌaaw yiꞌletoj ebꞌ yin presowomal, jaꞌ yet tuꞌ jix yalon Jehová ey jin jaxca tiꞌ: 2 Jaach ánima, tzꞌibꞌe can tzet cꞌual, cꞌal jantaj yeoc xꞌaaw tinaniꞌ, yutol jaꞌ yet jun cꞌual tiꞌ chi oc naj sreyal Babilonia yakꞌon jowal yin Jerusalén. 3 Al can el jun skꞌaneal tiꞌ yin yoc can txꞌoxbꞌanileal tet jun conobꞌ tol pit chi yute sbꞌa tuꞌ, cha walon jaxca tiꞌ: Jain Jehová Yaaw jin chi walaꞌ:Aatoj junoj chꞌen xi yibꞌan kꞌakꞌ, catuꞌ cha waon eytoj jaꞌ yul.
4 Aeytoj chiꞌbꞌe yul, jaꞌton noꞌ caw watxꞌ yili, tol jabꞌquiẍtaj chi yun ja polontoj, jaꞌ noꞌ xubꞌ cꞌal noꞌ sbꞌakꞌechal yichin chi eytoj, yetoj noꞌ sbꞌajil tol caw watxꞌ.
5 Iꞌtoj junoj noꞌ meꞌ caw bꞌakꞌech, miman siꞌ cha waoctoj yalan jun xi tuꞌ, yet watxꞌ chi juji sicꞌlebꞌil, masantaꞌcꞌal chi taa noꞌ bꞌaj tuꞌ.
6 Yutol jain Jehová Yaaw jin chi wal jaxca tiꞌ: Okꞌbꞌal cꞌul jun conobꞌ tol makꞌom cam ánima, laan xacꞌal jaxca junoj xi tol kꞌuxtaj xacꞌal. Caw cꞌamxa chi el jun skꞌuxtajilal. Yin junjunal chi yun ja wiꞌon atej noꞌ chiꞌbꞌe tuꞌ, cꞌam cꞌal cha sicꞌle atej.
7 Yutol jaꞌ jun conobꞌ tuꞌ, caw bꞌonchanajtoj yu chicꞌ, manaj bꞌey sat txꞌotxꞌ jix maltoj wan chicꞌ yet watxꞌ chi mujle el yu pojoj; yutol jaꞌ yibꞌan chꞌen chꞌen tol cꞌam tzetyetal ey yibꞌan, jatuꞌ jix maleyoj.
8 Oj can cꞌal can wan chicꞌ tuꞌ bꞌey yibꞌan jun chꞌen tuꞌ wu, yet watxꞌ txequel cꞌal yeocoj, yuxan oj tit cꞌal sjowal jin cꞌul yin, catuꞌ oj wakꞌon spajtzebꞌal.
9 Jain Jehová Yaaw jin chi wal jaxca tiꞌ: Okꞌbꞌal cꞌul jun conobꞌ tol makꞌom cam ánima. Jain caw oj jin waꞌne jun miman kꞌakꞌ.
10 Tit ojabꞌ mimanoj siꞌ, oc ojabꞌ skꞌakꞌal; queytuꞌ chi yun sta noꞌ chiꞌbꞌe tuꞌ, masantaꞌcꞌal chi tantoj masanil yal, catuꞌ chi tzꞌaꞌtoj noꞌ sbꞌajil eeytoj yul xial tuꞌ.
11 Chi lawi tuꞌ, cha waon atoj jun xi tuꞌ yibꞌan kꞌakꞌ yin tol cꞌam tzet eeytoj yul, masantaꞌcꞌal chi cajxinel jun chꞌen xi tuꞌ stzꞌaꞌtoj. Queytuꞌ oj yun yel stzꞌiltajilal, masantaꞌcꞌal chi qꞌueya yili skꞌuxtajil tuꞌ.
12 Naꞌbꞌacꞌal jix jin cꞌuumbꞌi el wakꞌon wip; tam wal chi el skꞌuxtajil tuꞌ yu kꞌakꞌ.
13 Jaꞌ jun skꞌuxtajil tuꞌ, chi txꞌoxon el yamulal conobꞌ Jerusalén. Jix wakꞌ wip jin sajbꞌanen el spenailal tuꞌ; caw cꞌam cꞌal chi sajbꞌi eloj. Jaꞌ tinaniꞌ xin, cꞌamxa tzet watxꞌ chi yun sajbꞌi eloj, masantaꞌcꞌal oj wakꞌ lawoj wiꞌon el sjowal jin cꞌul yin, catuꞌ oj sajbꞌoj canoj. 14 Jain Jehová jin chi walaꞌ: Tuxa jix jul stiempoal waon oc syaꞌilal, manxa oj jin mitxꞌoc tucan sjowal jin cꞌul. Man xacꞌal oj okꞌ jin cꞌul yin, tam wal oj to snaꞌ sbꞌa jin cꞌul. Jain caw chi walaꞌ tol oj waoc syaꞌilal yibꞌan, jaxca wal smooalil spena bꞌeybꞌal, yutol jain Jehová yaaw jin chi walaꞌ.
Scamichal Ix Yistil Naj Ezequiel
15 Jix yalon pax Jehová ey jin jaxca tiꞌ: 16 Jaach ánima, yin junne txolan oj wakꞌ cam ix ja wistil tol caw ey ja camcꞌulal yin. Catuꞌ man oj ja txꞌoxel ja cuscꞌulal yu, tam wal oj jaach okꞌ yu. 17 Yin cꞌal ewantajil oj ja wabꞌ syaꞌil, man oj ja waoc an eel pichile jaxca chi yun wanojxa ebꞌ ánima. Ey ojabꞌ cꞌal oc skꞌoxil ja jolom, ey ojabꞌ cꞌal oc ja xanabꞌ yet oj jaach ecꞌoj. Man oj ja majche ja sat yu ja txꞌoxon el ja cuscꞌulal, tam wal oj ja loꞌ loꞌbꞌe chi sloꞌ ebꞌ ánima bꞌey chi oc camich, ẍi Jehová ey jin.
18 Jaꞌ yet skꞌinibꞌalil jix jin kꞌanabꞌ yetoj ebꞌ ánima, jaꞌ yet jix ey cꞌu jix cam ix wistil, jaꞌ yet jix kꞌinibꞌi a yet junxa cꞌu jix wunen jaxca jix yun yalon Jehová ey jin. 19 Jix yalon masanil ebꞌ ánima bꞌey conobꞌ tuꞌ ey jin: Al ey jon tzet chi yal yeloc apnoj wan tzetyetal cha wun tuꞌ, ẍi ebꞌ ey jin.
20 Jix walon tet ebꞌ an: Jaꞌ Jehová jix kꞌanabꞌ ey jin, jix yalon jaxca tiꞌ: 21 Al tet ebꞌ ja wet Israelal: Tol jain Jehová Yaaw jin chi walaꞌ: Tol oj wakꞌ etextoj snail jin calubꞌal, jaꞌton jun caw ochebꞌil je yu, catuꞌ che camcꞌulne pax oj. Che yiꞌon can je bꞌa yu, jaxca tol je yipomal yeocoj. Jaꞌ ebꞌ je yuninal jix je yakꞌ can bꞌey Jerusalén, oj makꞌle cam ebꞌ yin jowal, ẍi Jehová. 22 Jaex tiꞌ oj je yun cꞌal pax jaxca tzet chi wunne. Man oj je majche el je sat yu je txꞌoxon el je cuscꞌulal, tam wal oj je loꞌ loꞌbꞌe chi sloꞌ ebꞌ ánima yet chi oc camich. 23 Man oj je majche el je jolom tam wal yin tol cꞌam je xanabꞌ eyocoj. Man oj je txꞌoxel je cuscꞌulal tam wal je yokꞌi. Oj pax xacꞌal je yip yu je penail, junjun jex xacꞌal oj jex oc yin cuscꞌulal. 24 Jain oj jin oc yin txꞌoxbꞌanileal ey jex. Jaꞌ masanil tzet chi wunne, jaꞌ oj je yun pax jaex tiꞌ, jaꞌ yet oj yunen masanil wan tiꞌ, queytuꞌ oj yun snaꞌcha el je yu, tol jain Jehová yaaw jin toni, ja chi, ẍi Dios ey jin.
25 Jix yalon cꞌal pax Jehová ey jin: Jaꞌ tinaniꞌ oj wiꞌel jun tzet eyoc yipoj scꞌul ebꞌ ja wet Israel, jaꞌton jin templo, yel xacꞌal miman chi tzala scꞌul ebꞌ yu swatxꞌil yili, tol eyoc snaꞌbꞌal ebꞌ yin, caw chi yoche ebꞌ. Catuꞌ oj wakꞌ cꞌal pax qꞌueyle el yuninal ebꞌ. 26 Jaꞌ yet jun cꞌual tuꞌ ey junoj oj colcha can el tituꞌ, jaꞌ oj jul alon ey jaach. 27 Jaꞌ yet jun cꞌual tuꞌ, oj skeꞌ ja kꞌanabꞌ a junelxa, yuxan oj jaach kꞌanabꞌ yetoj jun mac oj elcan tuꞌ. Queytuꞌ oj yun ja woc yin txꞌoxbꞌanileal tet ebꞌ conobꞌ, yuxan oj naꞌcha el yu ebꞌ tol jain ton Jehová jin, ẍi Dios ey jin.