Skꞌaneal Conobꞌ Samaria Cꞌal Conobꞌ Jerusalén
23
Jix kꞌanabꞌ Jehová ey jin, jix yalon jaxca tiꞌ: 2 Jaꞌ yet junel, ey cawan ebꞌ ix ix tol junne xutx ebꞌ. 3 Yet tax cꞌal yaliẍ kꞌopo ebꞌ, jix yaon oc sbꞌa ebꞌ yin amul ixal bꞌey Egipto. Jaꞌ tituꞌ jix ẍaꞌ scꞌul smitxꞌle yim ebꞌ, yuxan manxa kꞌopo ix oj jix yun can ebꞌ scawanil. 4 Jaꞌ ix bꞌabꞌel ix, chi yij sbꞌi Aholá,a jaꞌton ix chi txꞌoxontej conobꞌ Samaria. Jal junxa ix scaabꞌ ix, chi yij Oholibá, jaꞌton chi txꞌoxontej conobꞌ Jerusalén. Jix waoc ebꞌ ix wistiloj, jix el jin cꞌaal cꞌal jin cutzꞌin yetoj ebꞌ. 5 Caw pena jix yute sbꞌa ix Aholá tuꞌ, jix yaoc smul ix yul jin kꞌabꞌ yetoj ebꞌ naj soldado a Asiria. 6 Jaꞌ wan winaj tuꞌ, jaꞌ an yaxin kꞌap eyoc spichiloj ebꞌ: Ey gobernador yeoc xol ebꞌ, ey ebꞌ scapitanil ebꞌ soldado, achꞌe winaj cꞌal ebꞌ, caw sakꞌal yili ebꞌ, ey cꞌal oc ebꞌ yibꞌan che masanil. 7 Jaꞌ ebꞌ tol caw ochbꞌetaj yili xol ebꞌ a Asiria tuꞌ, jaꞌ yetoj ebꞌ tuꞌ jix yaoc sbꞌa ix Aholá yin amulal. Jix yakꞌon tzalabꞌoj scꞌul ix yin sdiosal ebꞌ, jix oc ix yin eyilal tet wan comon dios tuꞌ. 8 Jatax cꞌal yet eyecꞌ ix bꞌey Egipto jix yaon oc sbꞌa ix yin amulal, cꞌam cꞌal chi sbꞌej yuneni. Yet tax cꞌal kꞌopoal, caw ecꞌal mactxequel jix yun cꞌal mul yetoj. Manxa kꞌopo ix oj ix, yin xacꞌal amulal jix oc canoj. 9 Yu jun tuꞌ, yuxan jix waoc ix yul skꞌabꞌ ebꞌ chi camcꞌulnen ix tuꞌ, jaꞌton ebꞌ naj a Asiria, yutol caw jix yochetoj ix ebꞌ naj. 10 Jaxa jix yunne, jix el tꞌiran ix yu ebꞌ naj, jix iꞌle ecꞌ yuneꞌ ix yu ebꞌ naj, jix tzokꞌle cam ix yu ebꞌ yetoj chꞌen espada. Queytuꞌ jix yun yoc syaꞌilal yibꞌan ix yu ebꞌ naj. Jaꞌ yu tzet jix utele ix tuꞌ, caw jix too cꞌal skꞌumal xol masanil ebꞌ ix ix.11 Masanil cꞌal jix yil ix Oholibá jantaj tzet jix el yunen jun sno ix tuꞌ, jal pax ix xin, yel xacꞌal jix ecꞌ yibꞌan yunen amulal yintaj ix Aholá tuꞌ. 12 Jix yaoc sbꞌa ix yul skꞌabꞌ ebꞌ a Asiria, jaꞌton tet masanil ebꞌ yaaw, ebꞌ soldado eyxa smey yili spichil ebꞌ eyocoj, ebꞌ eyoc yibꞌan che, tol caw achꞌe ebꞌ sicꞌlebꞌil. 13 Jix naꞌcha el wu tol jix yetne cꞌal pax toj sbꞌa yetoj ebꞌ tuꞌ, laan cꞌal jix yute sbꞌa jaxca cꞌal jix yute sbꞌa junxa sno ix tuꞌ. 14 Caw yel xacꞌal jix ecꞌ ix yibꞌan yaon oc sbꞌa yin amulal. Jix yiloc wan echele tol tzꞌibꞌebꞌil oc yin satlaj yich na, jaꞌton yechel ebꞌ Caldeo, caw watxꞌ yili spichil ebꞌ eyocoj. 15 Eyoc jun miman sat kꞌalile yin snan ebꞌ, jaꞌton chi scꞌan ebꞌ yin yopiso. Jaꞌ skꞌoxil sjolom ebꞌ eyocoj tzꞌibꞌintaj yili, jaxca yili ebꞌ soldado scapitanil ebꞌ soldado a Babilonia. 16 Jaꞌ yet jix yilon oc wan yechel ebꞌ a Babilonia tuꞌ ix, caw jix yoche ocoj, yuxan jix yatoj ẍejabꞌ bꞌey Babilonia. 17 Jix lawi tuꞌ xin, jix jul ebꞌ a Babilonia tuꞌ scꞌatan ix, jix wey ebꞌ naj yetoj ix. Caw jix yakꞌ tzalabꞌoj scꞌul ebꞌ naj yetoj ix, masantaꞌcꞌal jix yaale el ebꞌ naj yu ix. 18 Queytuꞌ jix yun yaon xacꞌal oc sbꞌa yin amulal sattaj conobꞌ. Tol jix xꞌox xacꞌal el tꞌiran smimanil ix, caw cꞌamxa chi woche chi wiloc yin ix, jaxca jix wun yetoj sno ix. 19 Yutol yel xacꞌal jix ecꞌ ix yibꞌan yunen amulal. Jix snaꞌon cꞌaltej ix yet jix titoc ix yin skꞌopoal yet peyxa, yet jix yunen amulal bꞌey Egipto, 20 yet tax jix yaon oc sbꞌa ix yul skꞌabꞌ ebꞌ, caw chi yochele sbꞌa ix yetoj ebꞌ, jaꞌton yetoj wan winaj caw ey yip jaxca noꞌ bꞌuru ma jaxca noꞌ caballo chi oc yin junoj noꞌ txutxe.
21 Yu jun tuꞌ, jix walon jaxca tiꞌ: Jaach Oholibá, cha naꞌtej yet jix jaach titoc yin ja kꞌopoal, yet jix ja wunen amulal yetoj ebꞌ naj a Egipto, yet jix smitxꞌon ja wim ebꞌ naj. 22 Yu jun tuꞌ, yuxan jain Jehová jin chi walaꞌ: Jaꞌ oj jaach wute, tol jaꞌ ebꞌ jix ja wochele ja bꞌa yetoj tuꞌ, jaꞌ ebꞌ oj oc ja cajatoj tinaniꞌ, 23 jaxca ebꞌ a Babilonia, cꞌal ebꞌ a Caldeo, ebꞌ a Pecod, ebꞌ a Soa cꞌal ebꞌ a Coa, yetoj cꞌal masanil ebꞌ a Asiria, masanil ebꞌ achꞌe tol watxꞌ xacꞌal yili, ebꞌ yaaw, cꞌal ebꞌ miman yeloc apnoj yin yopiso, cꞌal ebꞌ soldado eyoc ebꞌ yibꞌan che. 24 Oj tit ebꞌ tuꞌ ja win yetoj ecꞌaloj scarruaje yet jowal, cꞌal mimanoj sbꞌisil soldado. Tuxa cꞌal oj oc joyan ebꞌ ja win, iꞌbꞌil oc mitxꞌkꞌabꞌe yet jowal yu ebꞌ, cꞌal chꞌen kꞌoxkꞌome, iꞌbꞌil cꞌal pax oc majbꞌal sat julbꞌal yu ebꞌ. Jain oj wakꞌ yopiso ebꞌ yin snaꞌon oc ebꞌ ja win, yu yaon oc syaꞌilal ebꞌ ja wibꞌan jaxca sleyalil ebꞌ. 25 Yetoj wal jin chichoncꞌulal catuꞌ oj wiꞌon el sjowal jin cꞌul ja win. Jaꞌ ebꞌ tuꞌ oj jaach etnen sicꞌlebꞌil. Oj kꞌuple el ja txaam yu ebꞌ, yetoj ja txiquin. Jaꞌ ebꞌ ja wuneꞌ oj tzokꞌle cam ebꞌ yetoj chꞌen espada. Oj tzacꞌle a ebꞌ ja wuneꞌ tuꞌ, ebꞌ winaj unin cꞌal ebꞌ ix unin, jaxa yin slawubꞌal xin, oj jaach nusle tzꞌaꞌoj. 26 Oj yiꞌecꞌ ja pichil ebꞌ cꞌal yetoj masanil chꞌen chꞌen elawtaj yoqui. 27 Queytuꞌ oj yun slawoj can apnoj amulal jix ja wun bꞌey Egipto, cꞌamxa bꞌakꞌin oj ja wochetoj wan tuꞌ junelxa, tam wal oj to ja naꞌtej Egipto tuꞌ.
28 Jaꞌton wan tiꞌ chi wal jain Jehová Yaaw jin tiꞌ: Jain oj jaach waoc yul skꞌabꞌ wan mimej nación tol pena oj yute snaꞌbꞌal ebꞌ ja win, jaꞌton wan tol yaabꞌil el ja wu. 29 Caw oj el sjowal ebꞌ ja win. Jaꞌ ebꞌ oj iꞌon can oc jantaj tzetyetal jix ja wiꞌ yin ja mulnail, tuxa cꞌal oj jaach elcan tꞌiran yu ebꞌ. Tꞌiran xacꞌal can el ja mimanil jix ja waoc yin amulal tuꞌ, yin cꞌamxa qꞌuixwilal. 30 Jaxca tuꞌ oj yun sjul ja wibꞌan, yutol bꞌejan xacꞌal jix ja wute ja cꞌul yin amulal yetoj wan nación tuꞌ, cꞌal ja woc yin eyilal tet wan sdiosal ebꞌ tuꞌ. 31 Yutol jaxca cꞌal sbꞌeybꞌal ix ja no jix ja bꞌeybꞌalne, yu jun tuꞌ, yuxan jaꞌ syaꞌilal jix waoc yibꞌan ix ja no tuꞌ, jaꞌ oj waoc ja wibꞌan, jaxca tol jacꞌalaꞌ tzet eey yul junoj vaso, chi wakꞌ je yuqꞌueꞌ.
32 Jain Jehová Yaaw jin chi walaꞌ: Jaꞌ tzetyetal jix yucꞌ ix ja no, jaꞌ oj ja wucꞌ cꞌal pax oj. Jaꞌ jun miman vaso tol miman yul, jaꞌ oj kꞌanbꞌalne. Masanil xacꞌal nacionlaj oj jaach bꞌuchonoj, cꞌal ja yaale el yu ebꞌ yu jun miman vaso cha kꞌanbꞌalne tuꞌ.
33 Jaꞌ tzet ey yul vaso tuꞌ, oj joybꞌoj ja sat yu, cꞌal ja cusa yu. Caw oj jaach xiwa yu pena tzet oj yiꞌtej ja wibꞌan. Jaꞌton jun vaso tuꞌ jix yucꞌbꞌalne ix ja no Samaria.
34 Jain Jehová Yaaw jin chi walaꞌ, tol oj ja kꞌanbꞌalne jun vaso tuꞌ, cꞌamxa tzet oj cancan yul. Oj lawoj tuꞌ, catuꞌ oj ja makꞌon poꞌo, jaꞌ yetoj spoꞌoilal tuꞌ oj ja makꞌ yasoj ja bꞌa.
35 Yu jun tuꞌ, yuxan jain Jehová Yaaw jin chi walaꞌ: Yutol jix jin too can qꞌueycꞌulal ja wu, tuxa cꞌal jix ja wacantej ja wichin ey jin, yu jun tuꞌ, yuxan sowalil oj ja wabꞌ syaꞌilal yu amulal tuꞌ, ẍi Dios yibꞌan Jerusalén.
36 Jix yalon Jehová ey jin jaxca tiꞌ: Jaach ánima, alel jantaj syaꞌilal oj jul yibꞌan ix Aholá cꞌal yibꞌan ix Oholibá. Watxꞌ chi yun ja walon oc yin sat ebꞌ, jantaj tzetyetal tol yaabꞌetaj jix el yunen ebꞌ. 37 Yutol jix yun amulal ebꞌ yul jin kꞌabꞌ, chicꞌtaj xacꞌal yoc skꞌabꞌ ebꞌ. Jix jin bꞌejlecan yu ebꞌ, jaxa tet comon dios jix oc ebꞌ yin eyilal. Jix yakꞌon tzꞌaꞌ yuneꞌ ebꞌ yin xaambꞌalil tet wan comon dios tuꞌ, jaꞌton wan wuninal jix wil yetoj ebꞌ ix. 38 Jaꞌ wan jix yun ebꞌ tuꞌ, yin junne cꞌual jix yun yetnentoj jin templo, cꞌal scꞌual xewilal tol wet yeocoj. 39 Jaꞌton yet jix akꞌle tzꞌaꞌ ebꞌ wuninal yin xaambꞌal yu ebꞌ ix, yin yiꞌon a can sbꞌi sdiosal ebꞌ tuꞌ, jaꞌ yet tuꞌ jix jul cꞌal pax ebꞌ yu yetnentoj jin templo; jaꞌton wan tuꞌ jix sbꞌeybꞌalne ebꞌ yul jin na.
40 Jix yatoj ebꞌ ẍejabꞌ ebꞌ yet jix awtele ebꞌ winaj caan bꞌey naat; jal ebꞌ ix scawanil xin, jix aẍni ebꞌ, cꞌal sbꞌonon sat ebꞌ, jix yaon cꞌal pax oc chꞌen chꞌen ebꞌ yin yelawiloj smimanil, yet chi chaꞌle sjul ebꞌ naj yu ebꞌ. 41 Jix ey chotan ebꞌ bꞌey jun txꞌat manxa jantajoj swatxꞌil scawxi. Watxꞌ xacꞌal pax ye ey loꞌbꞌe sat meẍa. Jix yaon cꞌal pax ey incienso ebꞌ, cꞌal aceite tol wet yeocoj, bꞌey sat meẍa tuꞌ. 42 Tuxa cꞌal chi wejlabꞌi jun bꞌulan comon ánima yin ẍaꞌon kꞌin yetoj ebꞌ; jaꞌton ebꞌ uqꞌuem an jix tit bꞌey cusiltaj txꞌotxꞌ, jaꞌton ebꞌ chi aon oc yelawiloj yin ebꞌ ix ix, chi yaoc chꞌen brazalete ebꞌ yinlaj skꞌabꞌ ebꞌ ix, chi yaon cꞌal pax a scorona manxa swatxꞌiloj yili yin sjolom ebꞌ ix. 43 Jix lawi tuꞌ, jix jin naꞌon yin wan ix caw pena xacꞌal yu amulal tuꞌ: Yun ojabꞌ amulal ebꞌ winaj yetoj ebꞌ ix, yutol jaxa cꞌal amulal chi yun ebꞌ, jin chi. 44 Jix jul ebꞌ wey yetoj ebꞌ amul ix, jaꞌton ix Aholá cꞌal ix Oholibá, jaxca chi yun swey ebꞌ winaj yetoj ebꞌ ix amul ix. 45 Jal ebꞌ winaj tol watxꞌ snaꞌbꞌal xin, jaꞌ ebꞌ oj alon jantaj wal syaꞌilal oj jul yibꞌan ebꞌ ix, jaxca wal smooalil yamulal ebꞌ, cꞌal yu smakꞌon cam yet animail ebꞌ, ẍi Jehová.
46 Jain Jehová Yaaw jin chi walaꞌ: Syambꞌa ojabꞌ sbꞌa masanil conobꞌ yin ebꞌ ix tuꞌ, yet chi ale oc ebꞌ yin mimej xiwcꞌulal, cꞌal yelkꞌaneletoj stzetyetal ebꞌ. 47 Masanil ojabꞌ conobꞌlaj tuꞌ chi kꞌojchꞌenen cam ebꞌ, cꞌal stzokꞌle cam ebꞌ yetoj chꞌen espada. Makꞌle ojabꞌ cam ebꞌ swinaj unin ebꞌ, cꞌal ebꞌ ix unin, catuꞌ chi nusle can tzꞌaꞌ sna ebꞌ. 48 Queytuꞌ oj yun wakꞌon qꞌueyel jun bꞌeybꞌale tuꞌ bꞌey masanil yul yet Israel. Jaxca tuꞌ oj yun snaꞌcha el yu ebꞌ ix ix tol cꞌam chi bꞌeybꞌalnen amulal. 49 Jaꞌ cawan ebꞌ ix ix tuꞌ, oj waoc syaꞌilal ebꞌ yu smul ebꞌ, cꞌal yu spenail jix yun ebꞌ, cꞌal yu yoc ebꞌ yin eyilal tet comon dios. Queytuꞌ oj yun snaꞌcha el je yu jaex tiꞌ, tol jain ton Jehová Yaaw jin, ẍi Dios.