Jaꞌ Spenail Ebꞌ Ánima Bꞌey Jerusalén
22
Jix kꞌanabꞌ Jehová ey jin, jix yalon jaxca tiꞌ: 2 Jaach ánima, jaach oj jaach kꞌanabꞌ el wu, yu ja walon eloj jantaj wan syaꞌilal oj oc yibꞌan jun conobꞌ makꞌom cam ánima tuꞌ. Manxa jantajoj tzetyetal tol yaabꞌetaj jix el yuneni, 3 al yabꞌ ebꞌ tol jain Jehová jin chi wal tet jun conobꞌ tuꞌ jaxca tiꞌ: Jaach conobꞌ makꞌom cam ánima, catuꞌ che waꞌnen a wan echele tol chi etnentoj je naꞌbꞌal, yuxan jaex cꞌal oc che yiꞌtej syaꞌilal je yibꞌan. 4 Jaꞌ yu jantaj ánima jix je makꞌ camoj, yuxan oj jul wan tuꞌ je yibꞌan tinaniꞌ. Yu wan echele jix je waꞌne a je diosaloj, yuxan jix etex el je naꞌbꞌal, yu jun tuꞌ yuxan tuxa jix jul slawubꞌal tiempoal je yibꞌan. Oj jex wakꞌ bꞌuchle yu masanil ánima bꞌey yul yibꞌankꞌinal tiꞌ. 5 Masanil xacꞌal nación oj bꞌuchwa je yin, ebꞌ ey je cawilal, cꞌal ebꞌ ey bꞌey naat, caw oj jex bꞌinale yu jantaj spenail che bꞌeybꞌalne yet chi yiꞌon ey je bꞌa tet wan comon dios. 6 Jaꞌ ebꞌ yaaw yeoc yul conobꞌ Israel tuꞌ, comon xacꞌal chi smakꞌ cam ánima ebꞌ, yin cꞌam tzet yual. 7 Cꞌamxa yeloc apnoj je mam je txutx yul je sat. Che yetnen ebꞌ txꞌoj conobꞌal eyecꞌ je xol. Che tokꞌon ecꞌ stzetyetal ebꞌ cꞌamxa smam, cꞌal ebꞌ cꞌamxa xutx, yetoj cꞌal ebꞌ ix ix camnajxa yichamil. 8 Junelne cꞌam yeloc apnoj snail jin calubꞌal yul je sat, tam wal scꞌual xewilal tol wet yeocoj. 9 Che naꞌon a kꞌane yin je yet animail, che yaon oc ebꞌ yul skꞌabꞌ camich. Chex tocꞌal pax bꞌey wan kꞌin chi oc bꞌey sjolomlaj wonan yet chi oc eyilal tet comon dios, caw yaabꞌetaj tzet che yun tituꞌ. 10 Ey jex chex mulwi yetoj yistil je mam, ey jex che mitxꞌoc je yetbꞌi yet lalan yilon sbꞌisbꞌal xꞌaaw. 11 Ey jex chex mulwi yetoj yistil je yet winajil, ey jex che mitxꞌoc je yalibꞌ, ey jex che mitxꞌoc je yanabꞌ tol scutzꞌin je mam. 12 Jain wal caw Jehová jin chi walaꞌ, tol ey ebꞌ je yaawil chi ẍaꞌ tumin yet chi yaon oc camich yibꞌan ebꞌ cꞌam smul. Che yetnen je yet animail yin je kꞌanon el miman yucꞌaꞌ je tumin che yakꞌ smaane ebꞌ. Comon cꞌal chi tit je jowal yin ebꞌ je yet animail yu je yiꞌon ecꞌ tumin; jal jin jain tiꞌ xin, chin too qꞌueycꞌulal je yu.13 Caw eytej sjowal jin cꞌul je yin, yutol che yetne je yet animail, cꞌal yu je makꞌom cam je yet animail. 14 ¿Chim je naꞌ tol oj skeꞌ je tecꞌbꞌan je bꞌa jin sattaj yet oj jin naꞌon oc je yin? Jaꞌ tzetyetal jix jin naꞌ, jain Jehová jin tiꞌ, sowalil oj wakꞌ elocoj. 15 Oj jex jin sajlemne cantoj bꞌey xol-laj nación, cꞌal bꞌey xol-laj masanil conobꞌ. Queytuꞌ oj yun jex jin sajbꞌanen el xol je penail. 16 Qꞌuixwiltaj xacꞌal oj je yute je bꞌa sattaj masanil nacionlaj. Queytuꞌ oj yun snaꞌcha el je yu, tol jain ton Jehová jin, ẍi Jehová, ja chi tet ebꞌ.
17 Jix yalon pax Jehová ey jin jaxca tiꞌ: 18 Jaꞌ ebꞌ ja wet Israelal tiꞌ, cꞌamxa tzet chi oc ebꞌ wu. Laan ebꞌ jaxca skꞌail chꞌen cobre, chꞌen estaño, chꞌen hierro, cꞌal chꞌen plomo chi elcan yet chi akꞌle tzꞌaꞌ chꞌen yul jorna. 19 Yu jun tuꞌ, yuxan jain Jehová Yaaw jin chi walaꞌ: Jaex tiꞌ, laan jex jaxca junoj tzetyetal tol cꞌam yopiso, yuxan oj jex jin yambꞌa oc bꞌey yul conobꞌ Jerusalén tiꞌ. 20 Jaxca chi yun syambꞌale ey skꞌail chꞌen plata, chꞌen cobre, chꞌen hierro, chꞌen plomo, cꞌal chꞌen estaño, junne xacꞌal chi yun yale atoj chꞌen tzꞌaꞌ yul junoj jorna, catuꞌ chi ulitoj chꞌen bꞌey xol kꞌakꞌ tuꞌ, queytuꞌ oj jex wute yetoj sjowal jin cꞌul. Oj jex jin yambꞌa ocoj, catuꞌ oj waon oc syaꞌilal je yibꞌan. 21 Oj jex jin yambꞌa ocoj, catuꞌ oj waoc syaꞌilal je yibꞌan je conobꞌ tiꞌ yetoj sjowal jin cꞌul. 22 Jaxca wal chi yun yulitoj chꞌen plata bꞌey yul junoj jorna. Queytuꞌ oj yun snaꞌcha el je yu, tol jain ton Jehová jin jix wiꞌel sjowal jin cꞌul je yin, ẍi Dios.
23 Jix kꞌanabꞌ Jehová ey jin, jix yalon jaxca tiꞌ: 24 Jaach ánima, al tet ebꞌ ja wet Israelal jaxca tiꞌ: Jaꞌ je txꞌotxꞌ, man watxꞌoj yeoc jin sattaj; yu sjowal jin cꞌul, yuxan cꞌamxa chi yakꞌ nabꞌ yibꞌan je txꞌotxꞌ. 25 Jaꞌ ebꞌ chi yaloc sbꞌa jin chejabꞌoj eyecꞌ je xol, laan ebꞌ jaxca noꞌ bꞌalam chi el yaw, chi skocꞌtzilnetoj ẍiꞌbꞌe. Jun laan xacꞌal chi yun smakꞌwi cam ánima ebꞌ, catuꞌ chi yiꞌon ecꞌ bꞌeomal ebꞌ, cꞌal jantaj tzetyetal watxꞌ ey tet ebꞌ ánima. Caw ecꞌal ebꞌ ix ix chi cancan yin cꞌam yichamil je xol yu ebꞌ. 26 Jaꞌ ebꞌ yakꞌomal xaambꞌal, cꞌam chi sjije jin cuybꞌanil ebꞌ chi wakꞌa; jaꞌ tzetyetal tol watxꞌ yul jin sat, jaꞌ chi yetnetoj ebꞌ. Cꞌam sqꞌuexanil yul sat ebꞌ jantaj tzetyetal watxꞌ yul sat ley, cꞌal tzetyetal man watxꞌoj, tam wal chi cuyle ebꞌ ánima yu ebꞌ, yet chi yotajne el tzetyetal watxꞌ ebꞌ, cꞌal tzet man watxꞌoj. Cꞌamxa chi snaꞌtej scꞌual xewilal ebꞌ tol wet yeocoj. Yu jun tuꞌ, txequel tol cꞌam weloc apnoj yul sat ebꞌ. 27 Jaꞌ ebꞌ yaaw yeoc bꞌey je conobꞌ tiꞌ, laan ebꞌ jaxca noꞌ ooj tol chi skocꞌtzilnetoj ẍiꞌbꞌe. Chi smakꞌ cam ánima ebꞌ, yutol caw chi yoche ebꞌ chi oc yin bꞌeomal. 28 Cꞌal ebꞌ chi yaloc sbꞌa jin chejabꞌoj, chi smajche ey tzetyetal watxꞌ, jaxca chi yun yoc chꞌen taan yin satlaj xaanil junoj na. Chi yalon ebꞌ tol ey tzet chi wakꞌ yil ebꞌ yin weyicheal, chi yalon el lekꞌtiꞌal kꞌane ebꞌ. Chi yal ebꞌ tol jain chi wakꞌ yal wan kꞌane ebꞌ tuꞌ, man yeloj tzet chi yal ebꞌ, yutol cꞌam tzet chi wakꞌ yalel ebꞌ. 29 Jaꞌ ebꞌ ánima asanxane yin yetnen yet animail chi yunne, cꞌal yin elkꞌan. Jaꞌ ebꞌ mebꞌa, ebꞌ cꞌam tzet ey tet, jaꞌ ebꞌ chi yetne ebꞌ. Yel xacꞌal man jichanoj tzet chi yun ebꞌ yin ebꞌ txꞌoj conobꞌal. 30 Jain tiꞌ jix jin seyecꞌ bꞌey yul conobꞌ tiꞌ, tala ey junoj watxꞌ to snaꞌbꞌal, junoj mactxequel chi oc linan bꞌey jun jolan yin jun muro bꞌey jun conobꞌ tuꞌ yu chi majcha sat yu, yet watxꞌ cꞌam chi wakꞌ lawoj ey jun conobꞌ tiꞌ, jaxa wal chi yunne, cꞌam junoj jix ilcha wu. 31 Yu jun tuꞌ, yuxan jain Jehová jin chi walaꞌ tol oj watoj syaꞌilal yibꞌan ebꞌ, oj wakꞌ lawoj ey ebꞌ yetoj sjowal jin cꞌul. Queytuꞌ oj yun sjul syaꞌilal yibꞌan ebꞌ yu pena sbꞌeybꞌal tuꞌ, ẍi Jehová.