2 Jix jin jajon jin tiꞌ, jix yakꞌon jin loꞌeytoj jun juun tzꞌibꞌebꞌil tuꞌ. 3 Jix yalon ey jin jaxca tiꞌ: Bꞌukꞌeytoj an juun tzꞌibꞌebꞌil jix wakꞌ ey jaach tiꞌ, yet watxꞌ oj noel ja cꞌul yu, ẍi Dios.

Jix jin loꞌon eytoj. Caw chiꞌ jix wabꞌ jaxca noꞌ yal awcabꞌ. 4 Jix lawi tuꞌ, jix yalon ey jin jaxca tiꞌ: Asiꞌ, catuꞌ cha walon tet ebꞌ ja wet Israelal jantaj tzet oj wal ey jaach. 5 Man yaꞌtaj oj yun snaꞌcha el stiꞌ jun conobꞌal ánima bꞌey chach jin chejtoj tuꞌ, yutol jaꞌ xol ebꞌ ja wet conobꞌ chach jin chejtoj. 6 Manaj xol junoj nación bꞌey caw ey miman sbꞌisil ánima chach jin chejtoj, cꞌam bꞌey yaꞌtaj oj yun snaꞌcha el stiꞌ ebꞌ ja wu. Ta jaꞌ bꞌey wan conobꞌ tol txꞌoj stiꞌ chach jin chejtoj, oj mi ẍaꞌ yabꞌ ebꞌ tzet oj ja walaꞌ. 7 Jal pax ebꞌ ja wet conobꞌ tiꞌ xin, man oj ẍaꞌ yabꞌ tzet oj ja walaꞌ, yutol cꞌam chi yoche ebꞌ chi ẍaꞌ yabꞌ tzet chi walaꞌ. Caw wal pit snaꞌbꞌal ebꞌ. 8 Jain oj wakꞌ ja wip, yet watxꞌ man oj jaach xiw tet ebꞌ. 9 Jaxca scawil chꞌen chꞌen oj jaach wute sattaj ebꞌ. Man oj jaach xiw tet ebꞌ, caxcꞌal junelne tol pit snaꞌbꞌal ebꞌ, ẍi Dios.

10 Jix yalon pax ey jin jaxca tiꞌ: Chaꞌ ja wabꞌ tzetyetal oj wal ey jaach, catuꞌ cha cꞌubꞌan yin ja naꞌbꞌal. 11 Kꞌanabꞌan el xol ebꞌ ja wet conobꞌ eyecꞌ yin presowomal tiꞌ, caxcꞌal mi oj ẍaꞌ yabꞌ ebꞌ tzet oj ja walaꞌ, ma cꞌamaj, asan tol cha wal yabꞌ ebꞌ, tol jaꞌ Jehová chi aloni, ja chi tet ebꞌ, ẍi Dios.

12 Jix lawi tuꞌ, jix jin yiꞌon a waan yipalil Dios. Catuꞌ jix wabꞌeni, tol ey jun chi bꞌilwi stit wintaj, jaxca sbꞌilwi stit junoj miman quixcabꞌ, yutol jix a waan Jehová xol stzejejial bꞌey eyecꞌoj. 13 Jaꞌ jun jix wabꞌ sbꞌilwi tuꞌ, jaꞌton xicꞌ ebꞌ querubín chi potxlabꞌi yel yaw, cꞌal wan rueda junne yeoc yetoj ebꞌ, laan sbꞌilwi jaxca junoj miman quixcabꞌ. 14 Jaꞌ yipalil Dios jix jin yiꞌon a waanoj, jix jin yiꞌon eltej tituꞌ. Caw jix cus jin cꞌul, jix tit pax jin jowal. Jaꞌ Jehová jix jin quetzon bꞌey yetoj yipalil. 15 Jaꞌ yet jix jin apni oc bꞌey conobꞌ Tel Abib, bꞌey stiꞌ jaꞌ miman jaꞌ chi yij Quebar, jaꞌton bꞌey caan ecꞌ ebꞌ iꞌbꞌiltej yin presowomal tiꞌ, jujebꞌ cꞌual ey jin ecꞌ xol ebꞌ tituꞌ, tucꞌal jix qꞌueya jin cꞌul, cꞌam chi naꞌcha tzet chi wunne cꞌal tzet chi walaꞌ.

16 Jaꞌ yet jix lawi jujebꞌ cꞌual tuꞌ xin, jix kꞌanabꞌ Jehová ey jin, jix yalon jaxca tiꞌ: 17 Jaach tiꞌ, jain chach waoc steynemaloj conobꞌ Israel. Chi cam wal ja wabꞌen tzet oj wal ey jaach, jaach oj jaach kꞌanabꞌ jin qꞌuexeloj xol ebꞌ ánima tiꞌ. 18 Jaꞌ yet oj walon yin junoj penawom tol chi cam xacꞌal, ta jaach tiꞌ man oj ja wal tet, ma tol man oj ja tenchane jun penawom tuꞌ, yet watxꞌ chi sbꞌejcan spenail, yet chi too iquisbꞌi niꞌojxa, jaꞌ jun tuꞌ oj cam yu spenail; asan xin, oj jin naꞌoc ja win yu scamichal jun mactxequel tuꞌ. 19 Ta tuxa jix ja tenchane junoj penawom tuꞌ yin spena bꞌeybꞌal tuꞌ, catuꞌ ta cꞌam cꞌal chi sbꞌejcan spenail tuꞌ, jaꞌcaw chi locontej camich yibꞌan, jal jaach xin, cꞌamxa ja walon ja wet yin. 20 Yetoj cꞌal pax oj, ta ey junoj mactxequel tol watxꞌ sbꞌeybꞌal, jaxa chi yunne chi sbꞌejoncan swatxꞌ bꞌeybꞌal tuꞌ, catuꞌ chi sbꞌeybꞌalne spenail, jain chi waoc junoj tzetyetal sattaj yet chi telcꞌotoj. Ta jaach tiꞌ cꞌam cha tenchane, catuꞌ chi cami, cꞌamxa yeloc apnoj jantaj tzetyetal watxꞌ jix yun yet yalantoj. Jaꞌ jun tuꞌ, oj cam yu spena bꞌeybꞌal, jaꞌ ja wibꞌan chi toocan scamichal tuꞌ wu. 21 Ta cha tenchane junoj ánima tuꞌ yet watxꞌ cꞌam chi oc spenail, catuꞌ chi ẍaꞌon yabꞌ tzet oj ja walaꞌ, yet watxꞌ cꞌam chi yaoc spenail, jaꞌ jun tuꞌ oj to iquisbꞌoj ecꞌoj, yutol jix sjije tzet jix ja walaꞌ, jal jaach, jaach tiꞌ, jix ja col ja bꞌa, ẍi Dios ey jin.

22 Jix yaon oc skꞌabꞌ Jehová wibꞌan, jix yalon ey jin jaxca tiꞌ: Aan waanoj, catuꞌ chach eltoj bꞌey sat acꞌal. Jaꞌ tituꞌ oj jin kꞌanabꞌ ey jaach, ẍi. 23 Catuꞌ jix jin a waanoj, jix jin eltoj bꞌey sat acꞌal tuꞌ. Jaꞌ tituꞌ jix wil stzejejial Jehová, jaxca jix yun wilon bꞌey stiꞌ jaꞌ miman Quebar, catuꞌ jix jin eyqꞌuey pajna sat txꞌotxꞌ. 24 Jaꞌ yipalil Jehová jix oc win, jix jin yiꞌon a waanoj, jix yalon ey jin jaxca tiꞌ: Asiꞌ, catuꞌ cha majchen octoj ja bꞌa yul ja na. 25 Jaach ánima, oj jaach jin kꞌaley yetoj txꞌan bꞌey yul ja na, yet watxꞌ manxa oj skeꞌ ja weltoj xol ebꞌ ja wet conobꞌ. 26 Yetoj cꞌal pax oj, oj jin lakꞌbꞌa can oc ja wakꞌ yin ja pikꞌom, yet watxꞌ manxa oj skeꞌ ja kꞌanabꞌi, tam wal oj to skeꞌ ja tenchanen ebꞌ, caxcꞌal caw pit chi yute snaꞌbꞌal ebꞌ. 27 Ta ey tzetyetal oj yoche jin cꞌul oj ja walaꞌ, catuꞌ oj jaach wakꞌon kꞌanabꞌ aoj, oj ja walon jaxca tiꞌ: Jaꞌ Jehová chi aloni, ja chi tet ebꞌ. Jaꞌ mactxequel chi yoche scꞌul chi yabꞌe, ẍaꞌ ojabꞌ yabꞌe. Jal pax mac cꞌam chi yoche chi yabꞌoc xin, man ton oj ẍaꞌ yabꞌe, yutol jaꞌ jun conobꞌ tiꞌ caw pit snaꞌbꞌal, ẍi Jehová.