Albꞌil Yu Naj Ezequiel Yu Jowal Oj Oc Bꞌey Jerusalén
4
Jix yalon Jehová ey jin jaxca tiꞌ: Jaꞌ tinaniꞌ jaach ánima, iꞌa junoj txꞌotxꞌ xaan, catuꞌ cha waon ey ja sattaj, cha tzꞌibꞌen ey yechel conobꞌ Jerusalén yin. 2 Chi lawi tuꞌ, cha waon oc yechel ebꞌ soldado cꞌal mitxꞌkꞌabꞌe yet jowal yinlaj, cha waon oc smuroal yinlaj, cha waon oc sbꞌatxlubꞌal yinlaj tuꞌ, jaꞌ sattaj eltoj tuꞌ cha waon ey yechel bꞌey bꞌulan ey ebꞌ tuꞌ, chi oc joyan yinlaj. 3 Catuꞌ cha waon oc junoj chꞌen chꞌen saam snan ja xol yetoj jun conobꞌ tuꞌ, chach oc tꞌanan yin, jaxca tol lalan ja wakꞌon jowal yetoj. Queyton tuꞌ oj yun yoc txꞌoxbꞌanileal tet ebꞌ ja wet conobꞌ Israel.4 Oj lawoj tuꞌ, catuꞌ oj jaach ey telan bꞌey yetcꞌulal ja qꞌuexan, queytuꞌ oj yun ja woc yin syaꞌilal yu spenail ebꞌ ja wet conobꞌ. Jacꞌal bꞌey ja pacꞌul tuꞌ oj jaach ey cꞌal telanoj yajbꞌan eyoc syaꞌilal ja wibꞌan yu spenail ebꞌ. 5 Ey 390 cꞌual oj yun jun tuꞌ, chi yal yeloc apnoj junjun cꞌu yin junjun abꞌil, oj yabꞌ syaꞌil ebꞌ ja wet conobꞌ Israel yu spenail tuꞌ. 6 Jaꞌ yet oj lawoj jun tiempoal tuꞌ, jaxa bꞌey yetcꞌulal ja watxꞌ kꞌabꞌ, oj jaach ey telanoj. Queytuꞌ oj yun yoc can syaꞌilal ja wibꞌan yu spenail ebꞌ conobꞌ Judá yin cawinaj cꞌual, junjun cꞌu yin junjun abꞌil oj yabꞌ syaꞌil ebꞌ yu spenail. 7 Catuꞌ chach meltzo pax toj tꞌanan yin conobꞌ Jerusalén, cha bꞌalon octoj skꞌabꞌ ja camiẍ, catuꞌ chach kꞌanabꞌtoj yibꞌan jun conobꞌ tuꞌ wu. 8 Jaxca tol oj jaach jin kꞌaley yetoj lasu, yet watxꞌ cꞌamxa chi skeꞌ ja meltzo ecꞌ bꞌal-labꞌoj masantaꞌcꞌal oj tzꞌajna scꞌual ja wabꞌen wan syaꞌilal tuꞌ.
9 Jaꞌ yet cꞌamto chach kꞌal-le ey tuꞌ, cha wiꞌon cantej niꞌoj ja loꞌbꞌe, jaꞌton ixim tiriw, cebada, mijo cꞌal ixim avena yetoj cꞌal pax avasteꞌ cꞌal an lenteja; calan chi yun yeytoj yul junoj xi. Jaꞌ yetoj wan tuꞌ cha waꞌne ja loꞌbꞌe. Jaꞌton wan tuꞌ oj ja loꞌ yin 390 cꞌual, yajbꞌan telan jaach ey bꞌey yetcꞌulal ja qꞌuexan. 10 Eche nanoj libra cha loꞌ junjun cꞌu, txequel cꞌal yorail yet chach lowi. 11 Txequel cꞌal pax yorail yet cha wuqꞌuen nanoj litro jaꞌ yin junjun cꞌu. 12 Jaꞌ jun ja loꞌbꞌe cha waꞌne tuꞌ, jaxca chi yun swaꞌxi ixim pan cebada. Sattaj ebꞌ ánima tuꞌ oj ja wakꞌ ta ixim xol kꞌakꞌ, jaꞌ stzaꞌ ebꞌ ánima oj ja kꞌan ja siꞌoj, ẍi Jehová.
13 Jix lawi tuꞌ, jix yalon cꞌal pax Jehová ey jin: Oj ja loꞌ wan ja loꞌbꞌe yaabꞌetaj sattaj ley tuꞌ, yu ja txꞌoxon eloj tol queytuꞌ oj yun sloꞌon ebꞌ ja wet Israelal wan loꞌbꞌe yaabꞌetaj sattaj ley bꞌey wanxa nación bꞌey oj jin sajlemne cantoj ebꞌ, ẍi Dios.
14 Catuꞌ jix jin takꞌwi tet jaxca tiꞌ: Caw cꞌamaj jaach jin Diosal, caw cꞌam bꞌey chin mitxꞌ junoj tzetyetal yaabꞌetaj sattaj ley. Cꞌam bꞌey chin chiꞌ ẍiꞌbꞌeal junoj noꞌ noꞌ tol tucꞌal chi cameloj, tam wal noꞌ chi makꞌle can cam yu noꞌ chiꞌwawom xol-laj teꞌal noꞌ, tam wal junoj tujan chiꞌbꞌe tol yaabꞌetaj yeoc jaxca yalon ley, jin chi.
15 Jix yalon Jehová ey jin jaxca tiꞌ: Chi skeꞌ jaꞌ stzaꞌ noꞌ wacax cha kꞌan yin siꞌal xin, sqꞌuexeloj stzaꞌ ebꞌ ánima, yet cha waꞌnen ja loꞌbꞌe tuꞌ, ẍi Naj ey jin.
16 Jix yalon cꞌal pax ey jin jaxca tiꞌ: Oj wakꞌ lawoj a loꞌbꞌe bꞌey Jerusalén. Echebꞌil xacꞌal oj yun sloꞌbꞌe ebꞌ, cꞌal jaꞌ oj yucꞌ ebꞌ, yuxan ja yet oj low ebꞌ, cꞌal yuqꞌuen jaꞌ ebꞌ tuꞌ, yin xacꞌal bꞌiscꞌulal, cꞌal xiwcꞌulal eyoc ebꞌ. 17 Cꞌamxa jaꞌ, cꞌal sloꞌbꞌe ebꞌ, tuxa cꞌal oj qꞌueya scꞌul ebꞌ yu tzet utbꞌil yili oc junjun; yu cꞌal spenail ebꞌ, yuxan yin xacꞌal cuscꞌulal oj yun slawoj el ebꞌ, ẍi Jehová.