Chi Stzujel Xil Sjolom Naj Ezequiel
5
Jix yalon cꞌal pax Jehová ey jin jaxca tiꞌ: Jaꞌ tinaniꞌ jaach ánima, iꞌa junoj chꞌen nawax caw el yee, jaxca junoj chꞌen nawax chi kꞌanle yet chi tzujle el xil jolome; cha tzujel xil ja jolom cꞌal xil ja tiꞌ yetoj chꞌen. Chi lawi tuꞌ, cha waon cꞌal pax oc yul junoj echbꞌal, oxebꞌ tujan chi yun ja wechen ja xil tuꞌ. 2 Jaꞌ yet oj eyqꞌuey jun conobꞌ tuꞌ yu ebꞌ joyan oc yin tuꞌ, cha nus tzꞌaꞌ junoj tujan xil ja jolom bꞌey snan yul jun yechel conobꞌ tuꞌ; chi lawi tuꞌ, cha wiꞌon pax a chꞌen nawax tuꞌ junelxa, cha kocꞌ kꞌupnentoj junojxa tujan xil ja jolom tuꞌ bꞌey yinlaj conobꞌ tiꞌ, jal junxa yet yox tujan xin, cha tiẍon cantoj xol kaꞌeꞌ. Txꞌoxbꞌanile jun tuꞌ, yutol jain oj wujte ebꞌ conobꞌ tuꞌ yetoj chꞌen wespada. 3 Chi too ja sicꞌontej jayebꞌoj xil ja jolom tuꞌ, catuꞌ cha kꞌalon oc yin stiꞌ ja pichil. 4 Jaꞌ yin wan eyoc yin stiꞌ ja pichil tuꞌ, jatuꞌ cha wiꞌel jayebꞌoj, cha waon octoj tzꞌaꞌ xol kꞌakꞌ. Queytuꞌ oj yun sbꞌey cꞌaltoj kꞌakꞌ xol masanil ebꞌ ja wet conobꞌ.5 Jain Jehová jin chi walaꞌ: Jaꞌ jun tuꞌ chi txꞌoxon el conobꞌ Jerusalén, tol joybꞌilxa a yu wanxa nacionlaj wu. 6 Jal pax conobꞌ Jerusalén tuꞌ, yel xacꞌal jix ecꞌbꞌantoj ebꞌ yibꞌan yoc spitalil bꞌey jin ley, cꞌal bꞌey jin chejbꞌanil, yel xacꞌal pena ebꞌ yintaj wan nacionlaj bꞌey scawilal ebꞌ tuꞌ, yutol ma sjije jin ley ebꞌ, tam wal jix sbꞌeybꞌalne jin chejbꞌanil ebꞌ.
7 Yu jun tuꞌ, yuxan jain Jehová jin chi walaꞌ: Jaex tiꞌ yel xacꞌal pit jex yintaj wanxa nacionlaj eecꞌ je yinlaj tiꞌ, cꞌam che jije niꞌoj jin chejbꞌanil, caw jix jex ecꞌ yibꞌan sleyal sbꞌeybꞌal ebꞌ ánima eecꞌ je cawilal tuꞌ. 8 Yu jun tuꞌ, yuxan jain Jehová jin chi walaꞌ: Tol oj jin pakꞌoc je yin jaex a Jerusalén jex tiꞌ; sattaj wal wanxa nación tuꞌ oj waon oc syaꞌilal je yibꞌan. 9 Yutol jix jex je bꞌeybꞌalne wan bꞌeybꞌal tol yaabꞌetaj, yu jun tuꞌ, yuxan oj wun tzet tol cꞌamto bꞌey chi wun juneloj jaxca tiꞌ, cꞌamxa pax bꞌey oj wun junelojxa yet bꞌakꞌin. 10 Yutol ey ebꞌ mame oj ẍiꞌeytoj yuninal je xol tiꞌ. Ey cꞌal pax ebꞌ uninale, oj chiꞌon eytoj smam cꞌal xutx. Oj waoc syaꞌilal je yibꞌan. Jal mactxequel oj to iquisbꞌoj can ecꞌ xin, oj jin sajlemne cantoj ebꞌ bꞌey scanpaqꞌuil stiꞌlaj yul yibꞌankꞌinal tiꞌ. 11 Jain Jehová jin chi walaꞌ. Yutol jaex tiꞌ yel xacꞌal jix je yetnetoj jin templo yu je diosal tol yaabꞌetaj yeoc yul jin sat, cꞌal je bꞌeybꞌal tol yel xacꞌal pena yili, yu jun tuꞌ, yuxan oj jex wakꞌ qꞌueyle eloj, cꞌamxa cꞌal bꞌey oj okꞌ jin cꞌul je yin. Manxa cꞌal oj jin cus jin cꞌul je yin. 12 Jaꞌ junoj yet yox tujan jex jaex tiꞌ, oj jex cam bꞌey yul je conobꞌal tiꞌ yu yaꞌbꞌil, cꞌal yu wail. Jal junojxa yet yox tujan jex xin, oj jex makꞌle cam yinlaj conobꞌ, jal junojxa yet yox tujan jex, oj jex jin sajlemne cantoj bꞌey scanpaqꞌuil yul yibꞌankꞌinal tiꞌ. Jain caw oj jex wujte yetoj junoj chꞌen espada. 13 Queytuꞌ oj yun sicbꞌoj ey sjowal jin cꞌul, watxꞌ xacꞌal oj yun jin can chi wabꞌe. Jaꞌ yet tuxa jix wiꞌel sjowal jin cꞌul je yin tuꞌ, oj naꞌcha el je yu, tol jain ton Jehová jin, jix wal wan tiꞌ yetoj sjowal jin cꞌul. 14 Jain Jehová jin chi walaꞌ, tol cꞌamxa mactxequel oj wakꞌcan bꞌey Jerusalén, oj wuchtoj masanil ebꞌ ánima oj ecꞌ scawilal jun conobꞌ tuꞌ, pena xacꞌal oj yal ebꞌ yin. 15 Jaꞌ yet oj waon oc syaꞌilal yibꞌan yetoj sjowal jin cꞌul, masanil xacꞌal conobꞌlaj ey scawilal oj syaaon eloj cꞌal sbꞌuchwa yin conobꞌ Jerusalén tuꞌ. Txꞌoxbꞌanil sjowal jin cꞌul yeocoj, yu jun tuꞌ, yuxan caw oj xiw ebꞌ yu. 16 Jaxca chi yun sjulwa junoj mactxequel yetoj sjulbꞌal yin yakꞌon jowal, queytuꞌ oj yun jex wakꞌon lawoj ey yu wail. Tol jain oj watoj wail je yibꞌan, cꞌamxa je loꞌbꞌe, queytuꞌ oj yun je lawi eyoj. 17 Jain Jehová jin chi walaꞌ, tol oj watoj wail, yaꞌbꞌil, cꞌal camich cꞌal jowal je yibꞌan, cꞌal noꞌ chiꞌwawom noꞌ, pilan oj iꞌletoj ebꞌ je yuninal yu noꞌ noꞌ cꞌal ẍiꞌle eytoj ebꞌ. Ecꞌal jex jaex tiꞌ oj jex cam xol jowal, ẍi Jehová.