Jix kꞌanabꞌ Jehová ey jin, jix yalon jaxca tiꞌ: 2 Jaach ánima, asiꞌ tꞌanan bꞌey yetcꞌulal sjolomlaj wonan bꞌey yinlaj conobꞌ Israel, catuꞌ cha walon can el wan kꞌane tiꞌ yibꞌan ebꞌ. 3 Cha waloni tol jain Jehová jin tiꞌ chi wal jaxca tiꞌ: Abꞌwej jex ánima caan bꞌey sjolomlaj wonan yet Israel, cꞌal bꞌey txꞌotxꞌ tzalquiltaj, bꞌey jobꞌelaj, cꞌal bꞌey pananlaj cꞌal bꞌey jaꞌlaj: Oj watoj jowal je yibꞌan, oj wakꞌon lawoj ey wan lugar tol naat eya bꞌey chex oc eyilal. 4 Oj jin makꞌ poꞌo wan yet xaambꞌal bꞌey che yakꞌ je xaambꞌal cꞌal bꞌey che yakꞌ tzꞌaꞌ incienso, catuꞌ oj wakꞌon cam ebꞌ winaj bꞌey sattaj wan yechel je diosal tuꞌ. 5 Oj jin kꞌojon eltej je mimanil jaex Israel jex tiꞌ sattaj wan echele tuꞌ. Jaꞌ yinlaj wan yet xaambꞌal tuꞌ oj jin sajlemne cantoj je bꞌajil. 6 Cusiltaj xacꞌal oj yun cantoj je conobꞌ bꞌey caan jex ecꞌoj. Oj wakꞌon lawoj ey masanil wan lugar naat eya bꞌey che yal je bꞌa tet wan comon dios, cꞌal masanil wan yet xaambꞌal, yetoj wan bꞌey che yakꞌ tzꞌaꞌ incienso tet yechel wan je diosal, yetoj masanil tzetyetal waꞌnebꞌil je yu, pilan oj qꞌueycan aoj. 7 Jaꞌ yet oj je yilon tol miman sbꞌisil ánima oj cam je xol, queyton tuꞌ oj yun snaꞌcha el je yu, tol jain ton Jehová jin chi skeꞌ wu masanil. 8 Jain oj wiꞌ can el jaywanojxa ebꞌ je xol, yet oj colcha can el ebꞌ xol jowal tuꞌ, oj wakꞌ sajlemtoj ebꞌ bꞌey xol-laj wanojxa nación. 9 Jaꞌ ebꞌ oj to cancan yin yiquisal, oj jin naꞌletej yu ebꞌ bꞌey wan nacionlaj bꞌey eyecꞌ ebꞌ tuꞌ. Oj snaꞌtej ebꞌ tzet jix yun yabꞌen syaꞌil ebꞌ, yutol jix jin yintajne can el ebꞌ, jaxa tet comon dios jix oc ebꞌ yin eyilal. Tuxa cꞌal oj qꞌuixwoj a ebꞌ yu jantaj spenail jix el yunen ebꞌ tuꞌ, cꞌal yu sbꞌeybꞌal ebꞌ tol yaabꞌetaj jix el yuneni. 10 Jaꞌton yet tuꞌ oj jin yotajnen el ebꞌ tol jain ton Jehová jin, catuꞌ man tucꞌal oj jix walaꞌ tol oj watej wan syaꞌilal tiꞌ yibꞌan ebꞌ, ẍi Jehová.