5 Jix yalon Jehová jaxca tiꞌ: Jain Jehová jin chi walaꞌ: Ilaꞌ tol lalan sjul jun syaꞌilal je yibꞌan, tol cꞌamto bꞌey chi yun juneloj. 6 Jix jul scꞌual je cami, yutol caw miman jun syaꞌilal lalan sjul je yibꞌan tiꞌ. 7 Tuxa oj jul scꞌual yet chex lawi ey je masanil jex caan bꞌey jun nación tiꞌ. Jix jul scꞌual, tol asanxane xiwcꞌulal ey; tinaniꞌ chi lawi can tzalacꞌulal bꞌey sjolomlaj wonan ey yeltzabꞌil bꞌey caan jex. 8 Jaꞌ tinaniꞌ, jix jul scꞌual wiꞌon el sjowal jin cꞌul je yin jaex Israel jex tiꞌ. Oj waoc sjowal jin cꞌul je yibꞌan jaxca wal tzet chin naꞌ. Oj jin naꞌoc je yin jatacꞌalaꞌ yili je bꞌeybꞌal, oj waoc syaꞌilal je yibꞌan yu je bꞌeybꞌal tol yel xacꞌal yaabꞌetaj yili. 9 Manxa cꞌal oj okꞌ jin cꞌul je yin; yutol oj waoc syaꞌilal je yibꞌan yu je bꞌeybꞌal, tol oj je yabꞌ syaꞌil yu je penail tuꞌ. Queytuꞌ oj yun snaꞌcha el je yu, tol jain Jehová jin chi waoc syaꞌilal je yibꞌan.

10 Tuxa jix jul jun scꞌual tol eyxa smey yeocoj, yet chi lawi ey jun conobꞌ tiꞌ. Jaꞌ spenail oj yakꞌ yaawil bꞌey jun conobꞌ tiꞌ, yutol caw chi smeyne sbꞌa ebꞌ ánima tiꞌ. 11 Jaꞌ spenail caw chi jowbꞌi xol ebꞌ. Jaꞌ ebꞌ chi unen spenail tuꞌ, cꞌamxa junoj oj cancan xol ebꞌ. Cꞌamxa niꞌoj sbꞌeomal ebꞌ oj cancanoj, tam wal eyto bꞌey oj bꞌinale ecꞌ smimanbꞌilal ebꞌ. 12 Jix jul stiempoal, jix jul jun scꞌual tol manxa oj tzala scꞌul ebꞌ chi manwi yetoj ebꞌ txonwom. Oj waoc sjowal jin cꞌul yibꞌan masanil ebꞌ. 13 Jaꞌ mactxequel tuxa jix txonwi manxa oj skeꞌ yiꞌon pax oc junelxa, yajbꞌan iquisto ecꞌ yetoj jun jix manon tuꞌ. Yutol manxa oj skeꞌ jin tenon oc tucan sjowal jin cꞌul yibꞌan ebꞌ ánima tiꞌ. Jaꞌ ebꞌ penawom, cꞌamxa junoj ebꞌ oj skeꞌ colon sbꞌa.

14 Caxcꞌal chi xuꞌle chꞌen trompeta yet chi swaꞌnen sbꞌa ebꞌ stoo yin jowal, cꞌamxa mac oj skeꞌ yeltoj yin jowal, yutol jaꞌ sjowal jin cꞌul eyoc yibꞌan masanil ebꞌ. 15 Jaꞌ stiꞌel conobꞌ, ey jowal, jal yul conobꞌ xin, ey syaꞌilal cꞌal wail. Jaꞌ mactxequel eyecꞌ xol smulnail, oj makꞌle camoj, jaꞌ mac eyecꞌ yul conobꞌ, oj cam ebꞌ yu wail, cꞌal yu yaꞌbꞌil. 16 Jaꞌ mactxequel chi too scol sbꞌa bꞌey sjolomlaj wonan bꞌey ey steꞌal, jaꞌ tituꞌ oj el yaw ebꞌ jaxca noꞌ cajmu chi el yaw bꞌey yul-laj jobꞌe, junjun cꞌal ebꞌ oj el yaw yabꞌen syaꞌil yu smul. 17 Masanil ebꞌ oj pax yip skꞌabꞌ ebꞌ, cꞌal sbꞌilwi a yajan ebꞌ yu xiwcꞌulal. 18 Oj yaoc an eel pichile ebꞌ yu xꞌoxon el syaꞌilal ebꞌ; masanil xacꞌal smimanil ebꞌ oj bꞌilwoj aoj, caj xacꞌal yili sat ebꞌ yu qꞌuixwilal, oj yakꞌ tzujom el xil sjolom masanil ebꞌ. 19 Tuxa cꞌal oj skꞌojel chꞌen plata ebꞌ cꞌal chꞌen oro bꞌey yul-laj scalleal conobꞌ, jaxca xacꞌal chi yun skꞌojle el kꞌalem. Jaꞌ chꞌen plata ma chꞌen oro, man oj skeꞌ scol-le ebꞌ yu chꞌen tet sjowal jin cꞌul jain Jehová jin tiꞌ. Man oj ecꞌ swail ebꞌ, man oj no scꞌul ebꞌ yu chꞌen, yutol jaꞌ chꞌen jix akꞌon eyqꞌuey ebꞌ yin spenail. 20 Yu cꞌal tol ey chꞌen chꞌen watxꞌ yili tet ebꞌ, yuxan jix smeyne sbꞌa ebꞌ, jaꞌ chꞌen tuꞌ jix swaꞌne oc ebꞌ yin diosaloj tol yaabꞌetaj yili. Yu jun tuꞌ, yuxan jaꞌ wan chꞌen tol watxꞌ xacꞌal yili xol ebꞌ tuꞌ, jaxca xacꞌal kꞌalem oj wute cantoj. 21 Oj wakꞌ jul ebꞌ txꞌoj conobꞌal yu jul yelkꞌanentoj sbꞌeomal ebꞌ, oj tit ebꞌ ánima tol yel xacꞌal yaabꞌil eloj. Oj jul iꞌletoj sdiosal ebꞌ tuꞌ, catuꞌ oj yetnentoj ebꞌ. 22 Oj wiꞌel jin sat yin jun nación tiꞌ, catuꞌ oj jul ebꞌ elkꞌom yetnentoj jin templo camcꞌulnebꞌil wu.

23 Akꞌ waꞌxoj jayebꞌoj chꞌen cadena, yutol jaꞌ yul jun conobꞌ tiꞌ, caw ecꞌal ebꞌ makꞌom cam ánima oj iꞌletoj yin presowomal. Yutol caw nonaj el jun conobꞌ tiꞌ yu spenail.

24 Yu jun tuꞌ, oj watej ebꞌ ánima yel xacꞌal pena bꞌey jun conobꞌ tiꞌ, yet watxꞌ oj yiꞌoc masanil tzetyetal ebꞌ ey bꞌey jun conobꞌ tiꞌ. Yutol oj wakꞌ lawoj ey smeynebꞌail ebꞌ miman yeloc apnoj; catuꞌ oj etneletoj wan lugarlaj bꞌey chi oc ebꞌ yin eyilal tet wan comon dios. 25 Jaꞌ yet oj jul jun xiwcꞌulal tuꞌ yin ebꞌ, oj yakꞌ yip ebꞌ seyon ecꞌ swatxꞌilal, manxa oj ilcha yu ebꞌ. 26 Txololi xacꞌal sjul syaꞌilal yibꞌan ebꞌ ánima; quey pax tuꞌ oj yun sjul skꞌaneal xiwcꞌulal. Oj to seyecꞌ junoj jin chejabꞌ ebꞌ tol chi skeꞌ yalon tzetyetal oj juloj, manxa oj ilcha yu ebꞌ. Cꞌamxa pax ebꞌ yalomal oc stiꞌ ebꞌ ánima oj akꞌon cuyle jin chejbꞌanil, tam wal ebꞌ icham winaj oj skeꞌ yakꞌon naꞌbꞌale. 27 Jaꞌ ebꞌ rey yetoj ebꞌ eyoc yin yaawil yetoj ebꞌ, oj yaoc an eel pichile ebꞌ yu cuscꞌulal. Masanil ebꞌ conobꞌ, caw oj bꞌilwoj a ebꞌ yu xiwcꞌulal. Oj waoc syaꞌilal yibꞌan ebꞌ yu spenail. Jaxca wal jix yun yetnen yet animail ebꞌ, jaxca tuꞌ oj wute pax ebꞌ. Oj jin naꞌoc yin ebꞌ jaxca jix yun snaꞌon oc ebꞌ yin yet animail. Queyton tuꞌ oj yun yotajnen el ebꞌ tol jain ton Jehová jin, ẍi Dios.