Jaꞌ Tzet Jix Txꞌoxle Yil Naj Ezequiel Yin Jerusalén
8
Jaꞌ yet joebꞌxa yoc scꞌual yet swaj xꞌaaw yet swaj abꞌil, chotan jin ey bꞌey jin na, joyan oc ebꞌ icham winaj xol conobꞌ Judá jin sattaj. Jaꞌ yet tuꞌ, jix yaoc skꞌabꞌ Jehová wibꞌan an. 2 Jix wiloni, ey jun jaxca yili ánima linan oc jin cꞌatan. Jaꞌ bꞌey yalan eytej snan, laan yili jaxca kꞌakꞌ, jal pax yibꞌan snan tuꞌ xin, tol chi chaw yili jaxca chꞌen bronce eyoc xol kꞌakꞌ. 3 Jaꞌ jun jaxca ánima tuꞌ, jix yatej skꞌabꞌ yibꞌan jin jolom, jix smitxꞌon xil jin jolom. Jaꞌ tzet jix yakꞌ Dios wilaꞌ, jaxca tol jaꞌ yipalil jix jin iꞌon a xol kaꞌeꞌ, jix jin yiꞌontoj bꞌey Jerusalén, jix jin yaon oc bꞌey jun puerta ey bꞌey yul sattaj eltoj stiꞌ templo, jaꞌton jun ey bꞌey yetcꞌulal norte. Jaꞌ tituꞌ ey jun echele tol chi txꞌemontej sjowal scꞌul Jehová. 4 Jaꞌ tituꞌ eyecꞌ stzejejial cu Diosal jaon Israel jon tiꞌ, jaxca wal jix yun xꞌoxle wil yet sbꞌabꞌelal yet ey jin ecꞌ bꞌey jun acꞌal. 5 Jix lawi tuꞌ, jix yalon ey jin jaxca tiꞌ: Jaach ánima asiꞌ tꞌanan bꞌey yetcꞌulal norte, ẍi ey jin.Jix jin to tꞌanan bꞌey spuertail bꞌey snorteal jun yet xaambꞌal. Jaꞌ tituꞌ jix wil jun echele tol chi txꞌemontej sjowal scꞌul Jehová.
6 Jix lawi tuꞌ, jix yalon ey jin jaxca tiꞌ: Ilaꞌ wal tzetyetal tol yaabꞌetaj chi yun ebꞌ yicꞌaal Israel tiꞌ. Yu wan tuꞌ, yuxan naat chi wiꞌel jin bꞌa yin snail jin calubꞌal tiꞌ. Eyto cꞌal wanxa yel xacꞌal pena oj jin txꞌox ja wilaꞌ, ẍi Dios ey jin.
7 Jix lawi tuꞌ, jix jin yiꞌon eltoj bꞌey sattaj eltoj stiꞌ na tuꞌ. Jaꞌ bꞌey smuroal yinlaj, ey jun jolan txequel. 8 Catuꞌ jix yalon Dios ey jin jaxca tiꞌ: Bꞌicꞌone yul jun jolan bꞌey yul muro tuꞌ, ẍi ey jin.
Jix jin bꞌicꞌone yul jun jolan tuꞌ, catuꞌ jix ilcha jun smaj na wu tituꞌ. 9 Jix yalon ey jin jaxca tiꞌ: Ocantoj yul, catuꞌ oj ja wiloni, jantaj tzetyetal tol yaabꞌetaj chi yun ebꞌ tituꞌ, ẍi Dios ey jin. 10 Jix jin octoj tituꞌ, jix wiloni, tol jaꞌ bꞌey satlaj yich na tuꞌ, jaꞌ tituꞌ tzꞌibꞌebꞌil oc masanil yechel noꞌ noꞌ tol chi sjutx sbꞌa sat txꞌotxꞌ tiꞌ, yetoj yechel masanil noꞌ noꞌ yaabꞌetaj, jatacꞌalaꞌ ley, yetoj masanil tujan tzetyetal chi yaloc ebꞌ wet Israelal sdiosaloj. 11 Ey 70 ebꞌ icham winaj yeoc xol conobꞌ Israel, jaꞌ xol ebꞌ tuꞌ ey cꞌal pax ecꞌ naj Jaazanías scꞌaal Safán. Eyoc ebꞌ yin eyilal tet wan echele tuꞌ. Junjun cꞌal iꞌbꞌil a junjun txayibꞌ chꞌen bꞌey chi tzꞌaꞌ incienso, wacaqui xacꞌal ya smucꞌal incienso yul wan neet tuꞌ.
12 Yu jun tuꞌ, jix yalon ey jin jaxca tiꞌ: Ilaꞌ wal tzet chi yun wan ebꞌ icham winaj yeoc xol conobꞌ Israel tiꞌ yin ewantajil. Junjun xacꞌal ebꞌ eyecꞌ sattaj bꞌey bꞌatxan a sdiosal. Chim snaꞌ ebꞌ tol cꞌam chi wil ebꞌ yaloni, tuxa mi jix jin bꞌejcan jun conobꞌ tiꞌ yalon ebꞌ, ẍi ey jin. 13 Jix yalon cꞌal pax ey jin jaxca tiꞌ: Eyto wanxa yel xacꞌal pena oj jin txꞌox ja wilaꞌ, ẍi Dios ey jin.
14 Jix jin yiꞌon pax toj bꞌey junxa puerta, jaꞌton jun chi cancan bꞌey yetcꞌulal norte. Jaꞌ tituꞌ chotan ey wan ebꞌ ix ix; lalan yokꞌ ebꞌ ix yu sdiosal chi yij Tamuz.a 15 Jix lawi tuꞌ xin, jix yalon ey jin jaxca tiꞌ: ¿Jix mi ja wil wan tiꞌ? Eyto cꞌal wanxa tzetyetal yel xacꞌal pena oj ja wilaꞌ, ẍi ey jin.
16 Jix lawi tuꞌ xin, jix jin yiꞌontoj bꞌey sattaj eltoj templo tuꞌ, jaꞌton bꞌey snan xol jun yet xaambꞌal yetoj bꞌey chi cu octoj bꞌey jun cuarto tol yet Jehová yeocoj. Jaꞌ tituꞌ ey 25 ebꞌ winaj, tol jaꞌ yichin ebꞌ eycantoj bꞌey stemplo Jehová, jacantoj ebꞌ yetcꞌulal bꞌey chi aol cꞌu, noan ey ebꞌ sat txꞌotxꞌ, lalan yoc ebꞌ yin eyilal tet cꞌu. 17 Jix yalon Jehová ey jin jaxca tiꞌ: ¿Jix mi wal ja wilaꞌ? Man asanne oj bꞌey conobꞌ Judá ey wan tzetyetal tol yaabꞌetaj chi yun ebꞌ ánima tiꞌ, yutol tuxa wal chi noel yul nación tiꞌ yu spenail chi yun ebꞌ. Man asanne oj junel cael jix xꞌemtej sjowal jin cꞌul ebꞌ, jix wabꞌ wal yoc sabꞌ spenail chi yun ebꞌ tuꞌ. 18 Yuxan jain tiꞌ, oj wakꞌ sowalil yetoj sjowal jin cꞌul. Manxa oj okꞌ jin cꞌul yin ebꞌ. Caxcꞌal oj awoj ebꞌ ey jin, manxa cꞌal oj jin takꞌwoj tet ebꞌ, ẍi Dios.