2 Jix wiloni tol ey wajwan winaj jix wil yoctoj bꞌey yul jun miman puerta ey bꞌey yetcꞌulal norte, junjun cꞌal iꞌbꞌil oc mitxꞌkꞌabꞌe yet jowal yu ebꞌ, yin smakꞌon cam ánima. Jaꞌ snan xol ebꞌ tuꞌ, jix wil stit jun winaj eyoc pichile tol lino cꞌal eloj eyoc yu. Jaꞌ yin snan, jatuꞌ eyoc jun mitxꞌkꞌabꞌe yet tzꞌibꞌ. Jix wilon yoctoj ebꞌ jujwan winaj tuꞌ, jix oc linan ebꞌ bꞌey scawilal jun yet xaambꞌal tol chꞌen bronce cꞌal eloj. 3 Jaꞌ stzejejial Jehová, sDiosal Israel, jix a waan bꞌey yibꞌan wan yechel querubín, bꞌey ey cꞌaltaꞌ ecꞌoj, catuꞌ jix oc linan bꞌey spuertail templo. Jix awtele jun winaj tuꞌ yu Jehová, jun eyoc an pichile lino tuꞌ yu, jaꞌton jun iꞌbꞌil oc mitxꞌkꞌabꞌe yet tzꞌibꞌ yin snan. 4 Jix wabꞌen yalon Jehová tet jaxca tiꞌ: Ecꞌan bꞌey masanil yul conobꞌal Jerusalén, catuꞌ cha waon oc yechel yin snan sat masanil mactxequel chi okꞌ yu spenail chi yun ebꞌ conobꞌ, ẍi Dios tet.

5 Jix lawi tuꞌ, jix wabꞌen yalon cꞌal pax tet ebꞌ winaj iꞌbꞌil a mitxꞌkꞌabꞌe yet jowal tuꞌ yu, jix yalon jaxca tiꞌ: 6 Ocanwej tzajan yintaj naj tuꞌ, catuꞌ chex ecꞌ xol masanil conobꞌ tiꞌ; che makꞌon cam ebꞌ icham winaj, ebꞌ achꞌe, ebꞌ kꞌopo, ebꞌ ix ix yetoj cꞌal ebꞌ unin. Cꞌam cꞌal che yakꞌ mimancꞌulal yin ebꞌ. Jal pax ebꞌ eyoc yechel wu, manche je makꞌ cam ebꞌ. Jaꞌ tituꞌ che chaꞌel yich bꞌey jin templo tiꞌ, ẍi Dios. Jix el yich smakꞌle cam ebꞌ icham winaj eyecꞌ bꞌey sattaj snail scalubꞌal Jehová.

7 Jix lawi tuꞌ, jix wabꞌen yal-le tet ebꞌ jaxca tiꞌ: Asiꞌwej bꞌey templo, yet chi too je yetnetoj; akꞌwej noel sattaj eltoj tuꞌ yu smimanil ebꞌ camom tuꞌ, ẍi.

Jix lawi tuꞌ, jix wilon yeltoj ebꞌ, jix oc ian ebꞌ smakꞌon cam ánima bꞌey masanil yul conobꞌ tuꞌ. 8 Jaꞌ yet lalan yunen ebꞌ jaxca tuꞌ, asanxane jin ey jin ecꞌ sattaj Jehová, catuꞌ jix jin ey noan sat txꞌotxꞌ, caw jix cus jin cꞌul, yuxan jix el waw, jix walon jaxca tiꞌ: Jaach Jehová jin Diosal, Waawil jaach, ¿tumi oj ja wakꞌ lawoj masanil ebꞌ eyto can bꞌey Israel yu sjowal ja cꞌul yin Jerusalén tiꞌ? jin chi.

9 Jix takꞌwi Naj ey jin jaxca tiꞌ: Jaꞌ yu spenail ebꞌ Israel, caw yel xacꞌal miman yeocoj, yetoj cꞌal yet Judá. Caw nonaj el yul wan conobꞌ tuꞌ yu makꞌo cam ánima. Cꞌamxa sjichanil chi yun ebꞌ. Chi yal ebꞌ tol jix jin bꞌejcan jun nación tiꞌ, cꞌamxa chi wil tzetyetal chi yun ebꞌ, yaloni. 10 Jaꞌ tinaniꞌ man xacꞌal oj wakꞌ mimancꞌulal yin ebꞌ, tol oj waoc syaꞌilal yibꞌan ebꞌ yu masanil tzetyetal chi el yunen ebꞌ, ẍi Jehová.

11 Jix lawi tuꞌ, jix wilon smeltzo jun winaj eyoc lino pichile tuꞌ yu, ey cꞌal pax oc jun mitxꞌkꞌabꞌe yet tzꞌibꞌ yin snan, jix yalon ey jin jaxca tiꞌ: Tuxa jix jin jije wunen chejbꞌanile jix ja wakꞌ wunne, ẍi.