Jix wiloni, tol jix octoj jun winaj tuꞌ tituꞌ. 3 Jaꞌ ebꞌ querubín tuꞌ, eyecꞌ ebꞌ bꞌey sur bꞌey yetcꞌulal templo, ey jun asun jix akꞌon noel bꞌey sattaj eltoj stiꞌ scawilal templo tuꞌ. 4 Jix lawi tuꞌ, jaꞌ tzejejial Jehová jix eyol yibꞌan wan yechel querubín bꞌey ey cꞌaltaꞌ ecꞌoj, catuꞌ jix oc linan bꞌey spuertail templo. Jix noel bꞌey yul templo yu jun asun tuꞌ, jal bꞌey sattaj eltoj snail scalubꞌal Jehová tuꞌ xin, tuxa cꞌal chi kopopi yili yu stzejejial Jehová. 5 Chi abꞌle tacꞌal sbꞌilwi xicꞌ ebꞌ querubín tuꞌ masantaꞌcꞌal bꞌey jun pacꞌxa sattaj eltoj stiꞌ snail scalubꞌal Jehová. Laan xacꞌal jaxca yoc yul snukꞌ Dios, Naj miman yeloc apnoj yibꞌan masanil, laan jaxca yet chi kabꞌen sbꞌilwi cꞌu. 6 Jaꞌ yet jix yalon Jehová tet jun winaj eyoc lino spichiloj tuꞌ, tol chi yiꞌeltej kꞌakꞌ bꞌey xol wan rueda bꞌey snan xol ebꞌ querubín tuꞌ, jix too jun winaj tuꞌ, jix oc linan scꞌatan wan rueda tuꞌ. 7-8 Jaꞌ bꞌey yalan xicꞌ ebꞌ querubín tuꞌ, ey jun tzet laan yili jaxca skꞌabꞌ ánima. Jaꞌ junoj ebꞌ querubín tuꞌ jix yatoj skꞌabꞌ xol kꞌakꞌ eyoc bꞌey snan xol ebꞌ tuꞌ, jix yiꞌon eltej niꞌoj kꞌakꞌ tuꞌ, jix yaon oc yul skꞌabꞌ naj eyoc lino spichiloj tuꞌ. Jix ẍaꞌon ecꞌ jun kꞌakꞌ tuꞌ, catuꞌ jix yiꞌontoj. 9 Jix wilon cꞌal pax canebꞌ rueda yetoj ebꞌ querubín tuꞌ, junne cꞌal yeoc yetoj junjun ebꞌ. Tuxa cꞌal chi kopopi yili wan rueda tuꞌ jaxca yili chꞌen topacio. 10 Jaꞌ wan rueda tuꞌ, laan cꞌal yili junjun, jaxca tol ey junjunojxa rueda chi kꞌaxbꞌo ecꞌ el snan yul junojxa. 11 Jaꞌ yet chi too ebꞌ querubín tuꞌ, jichan cꞌal chi yutetoj sbꞌa ebꞌ sattaj; cꞌam chi ecꞌ joyoyoj ebꞌ, yutol chi skeꞌ stoo cꞌal ebꞌ bꞌey scanpaqꞌuil bꞌey tꞌanantoj.

12 Jaꞌ smimanil ebꞌ querubín tuꞌ, masanil yinlaj ebꞌ, yichin ebꞌ, skꞌabꞌ ebꞌ, cꞌal xicꞌ ebꞌ, nonaj el yu sbꞌakꞌ sate, quey cꞌal pax tuꞌ wan srueda ebꞌ tuꞌ. 13 Jix wabꞌen cꞌal pax oj, tol jix al-le tet wan rueda tuꞌ jaxca tiꞌ: Ecꞌanwej xoyoyoj, ẍi. 14 Jaꞌ ebꞌ querubín tuꞌ, ey canebꞌ sat junjun ebꞌ. Jaꞌ jun sbꞌabꞌel sat laan jaxca sat junoj noꞌ wacax; jal jun yet scaabꞌ, laan jaxca sat ánima; jal jun yet yox, laan yili jaxca sat noꞌ bꞌalam; jal jun yet scan, laan yili jaxca sat noꞌ chii. 15 Jix lawi tuꞌ, jix a waan ebꞌ querubín tuꞌ, jaꞌton ebꞌ jix bꞌilwi bꞌey jaꞌ miman Quebar.

Jix a waan ebꞌ. 16 Jaꞌ yet jix too ebꞌ, jix too cꞌal pax wan rueda tuꞌ yetoj ebꞌ. Jaꞌ yet chi yiꞌon a xicꞌ ebꞌ yet chi a jenenoj ebꞌ bꞌey sat txꞌotxꞌ, cꞌam chi elcan wan rueda tuꞌ yin ebꞌ. 17 Jaꞌ yet chi oc tucan ebꞌ, chi oc cꞌal pax tucan wan rueda tuꞌ. Jaꞌ yet chi a waan ebꞌ xin, chi too cꞌal pax wan rueda tuꞌ yetoj ebꞌ, yutol jaꞌ yin ebꞌ eyoc yiquisal ebꞌ querubín tuꞌ.

18 Jix lawi tuꞌ, jix eyol stzejejial Jehová bꞌey yibꞌan templo, catuꞌ jix oc yibꞌan ebꞌ querubín tuꞌ. 19 Jix yiꞌon a xicꞌ ebꞌ tuꞌ, jix el ebꞌ bꞌey sat txꞌotxꞌ tiꞌ. Jix wil tzet jix yun ya waan ebꞌ yetoj wan rueda tuꞌ, jix wilon cꞌal pax tzet jix yun yoc linan ebꞌ bꞌey spuertail templo Jehová yetcꞌulal bꞌey chi aol cꞌu. Jaꞌ stzejejial Jehová, Naj sDiosal Israel jix eecꞌal ecꞌ yibꞌan ebꞌ. 20 Jaꞌton ebꞌ querubín tuꞌ wilnaj yin, tol eyecꞌ ebꞌ bꞌey yalan Naj sDiosal Israel bꞌey stiꞌ jaꞌ miman Quebar. Queytuꞌ jix yun snaꞌcha el wu tol querubín ebꞌ. 21 Yutol junjun cꞌal ebꞌ tuꞌ, ey canebꞌ sat, ey cꞌal pax canebꞌ xicꞌ junjun. Jaꞌ bꞌey yalan xicꞌ ebꞌ tuꞌ, ey wan tzetyetal laan yili jaxca skꞌabꞌ ánima. 22 Jaꞌ sat ebꞌ, laan cꞌal yili jaxca yili sat ebꞌ jix wil bꞌey stiꞌ jaꞌ miman Quebar; junjun cꞌal ebꞌ jichan cꞌal chi yun yilontoj sattaj yet chi bꞌey ebꞌ.