Syaꞌilal Yibꞌan Ebꞌ Syaawil Conobꞌ Israel
11
Jix wilon an, tol jaꞌ Yipalil Dios jix jin iꞌontoj, catuꞌ jix jin apni oc bꞌey chi cu octoj yul stemplo Jehová yetcꞌulal bꞌey chi aol cꞌu. Jaꞌ bꞌey jun puerta tuꞌ, ey 25 ebꞌ winaj eyecꞌoj, jix wiloni tol eyoc naj Jaazanías xol ebꞌ, scꞌaal Azur, yetoj Pelatías, scꞌaal Benaías, jaꞌton ebꞌ tuꞌ yaaw yeoc xol conobꞌ. 2 Jix wabꞌen yalon Jehová ey jin jaxca tiꞌ: Jaꞌton wal ebꞌ naj tiꞌ chi naꞌon yunen spenail, cꞌal yakꞌon pena naꞌbꞌale ebꞌ bꞌey jun conobꞌ tiꞌ. 3 Chi yalon ebꞌ jaxca tiꞌ: Smoo cu waꞌnen a cu na tinaniꞌ. Jaꞌ cu conobꞌ tiꞌ laan jaxca junoj chꞌen xi, jal jon jaon tiꞌ laan jon jaxca noꞌ chiꞌbꞌe chi eytoj yul junoj xi, yutol colchanaj jon xa eloj, ẍi ebꞌ. 4 Yu jun tuꞌ, yuxan alel jin kꞌane tet ebꞌ, ẍi Jehová ey jin.5 Jix lawi tuꞌ, jix jul Yespíritu Jehová win, jix yalon jaxca tiꞌ: Al wan tiꞌ tet ebꞌ ánima tuꞌ, yutol jain chi wal tet ebꞌ: Jex Israel jex tiꞌ, wotaj masanil tzet chi ecꞌ yin je naꞌbꞌal. 6 Jaex tiꞌ, caw ecꞌal ánima jix je makꞌ cam bꞌey jun conobꞌ tiꞌ, caw jix noel yul-laj scalleal conobꞌ tiꞌ yu smimanil ebꞌ ánima. 7 Yu jun tuꞌ, jain Jehová jin chi wal ey jex: Jaꞌ Jerusalén tiꞌ, yel laan jaxca wal junoj chꞌen xi. Jal noꞌ chiꞌbꞌe tuꞌ, man jaex oj jaex tiꞌ, tol jaꞌton ebꞌ je yet conobꞌ jix je makꞌ cam tuꞌ. Jal pax jex jaex tiꞌ xin, oj jex wiꞌel yul conobꞌ tiꞌ. 8 Wotaj, tol caw chex xiw tet jowal, yuxan jain caw Jehová jin chi walaꞌ, tol oj watoj jowal je xol. 9 Jain oj waoc syaꞌilal je yibꞌan; oj jex wiꞌel yul conobꞌ tiꞌ, catuꞌ oj jex waon oc yul skꞌabꞌ ebꞌ txꞌoj conobꞌal. 10 Oj jex makꞌle cam yetoj chꞌen espada, Jain, oj jin naꞌoc je yin sattajto smoonal conobꞌ Israel tiꞌ. Queytuꞌ oj yun snaꞌcha el je yu, tol jain ton Jehová jin. 11 Jaꞌ jun conobꞌ tiꞌ, man laan oj jaxca junoj chꞌen xi, tam wal jaex tiꞌ laan oj je yun jaxca noꞌ chiꞌbꞌe. Jaꞌ bꞌey sattajto smoonal Israel tiꞌ, jaꞌ tituꞌ oj jin naꞌoc je yin. 12 Queytuꞌ oj yun snaꞌcha el je yu, tol jain ton Jehová jin. Yutol jaex tiꞌ, ma cꞌal je bꞌeybꞌalne niꞌoj jin chejbꞌanil tiꞌ, tam wal jix je jije jin ley. Asan cꞌal sbꞌeybꞌal wan nacionlaj eecꞌ je cawilal jix je bꞌeybꞌalne, ẍi Jehová, ja chi tet ebꞌ.
13 Yajbꞌan lalan walon wan kꞌane tuꞌ, jix wilon stelkꞌotoj naj Pelatías, scꞌaal Benaías, tol jix cam xacꞌal naj yet jun txolan tuꞌ. Jix jin ey pajna sat txꞌotxꞌ, catuꞌ jix waon el waw, jix waloni: Ay, Jaach Jehová jin Diosal, ¿tumi wal oj ja wakꞌ xacꞌal lawoj el jaywanxa ebꞌ jix to cancan bꞌey Israel tiꞌ? jin chi.
Junxa Acꞌ Swa Kꞌane Dios Yetoj Ebꞌ Israel
14 Jix kꞌanabꞌ Naj Kaawil ey jin jaxca tiꞌ: 15 Jaach ánima, jaꞌ ebꞌ caan bꞌey Jerusalén, chi yal ebꞌ je yin jaex tol jix jex iꞌletoj yin presowomal jaxca tiꞌ: Jaꞌ ebꞌ tuꞌ, caw naat yeel ebꞌ scꞌatan Jehová, yuxan jaꞌ txꞌotxꞌ txꞌotxꞌ tiꞌ, tol jix akꞌle can txꞌotxꞌ ey jon yin cu majul txꞌotxꞌ, ẍi ebꞌ. 16 Yu jun tuꞌ, yuxan al tet ebꞌ caan bꞌey Jerusalén jaxca tiꞌ: Jaꞌ Jehová chi alon jaxca tiꞌ: Jix wiꞌel ebꞌ bꞌey sat txꞌotxꞌ tiꞌ, catuꞌ jix jin sajlemnen cantoj ebꞌ bꞌey wan txꞌoj conobꞌal. Jaꞌ yet eyecꞌ ebꞌ tituꞌ, yin txenne tiempoal ey jin ecꞌ yetoj ebꞌ jaxca tol eyecꞌ jin templo xol ebꞌ, ẍi Jehová. 17 Catuꞌ cha walon cꞌal pax tet ebꞌ. Jaxca tiꞌ yalon Jehová: Jain oj jex wakꞌ meltzotej junelxa, oj jex wiꞌel bꞌey wan nacionlaj bꞌey jix jex jin sajlemne cantoj. Oj jex jin yambꞌa ocoj, catuꞌ oj wakꞌon je txꞌotxꞌ ey jex junelxa. 18 Oj jex meltzo junelxa bꞌey je conobꞌ, catuꞌ oj je qꞌueyon el masanil wan echele tol yaabꞌetaj yili yul jin sat. 19 Oj waon oc jun acꞌ naꞌbꞌale tol caw watxꞌ je yin cꞌal acꞌ pixane, catuꞌ oj wiꞌon can el jun naꞌbꞌale tol caw jaxca chꞌen chꞌen, 20 yet watxꞌ oj sbꞌeybꞌalne jin chejbꞌanil ebꞌ. Queytuꞌ oj yun yee ecꞌ ebꞌ jaxca yalon jin ley, cꞌal sbꞌeybꞌalnen jin chejbꞌanil ebꞌ; yutol jin conobꞌ oj yun oc ebꞌ sicꞌlebꞌil, jain xa oj jin oc sDiosaloj ebꞌ. 21 Jal pax ebꞌ oj bꞌeybꞌalne tocꞌal wan bꞌeybꞌale tol yaabꞌetaj yili yul jin sat tuꞌ xin, jain Jehová jin chi walaꞌ, oj waoc syaꞌilal yibꞌan ebꞌ, ja chi tet ebꞌ, ẍi Jehová ey jin.
Jix Yiꞌel Stzejejial Jehová Bꞌey Jerusalén
22 Jix lawi tuꞌ, jix too jenenoj ebꞌ querubín tuꞌ. Jix tocꞌal pax wan rueda tuꞌ yetoj ebꞌ. Jaꞌ stzejejial sDiosal Israel eyoc yibꞌan sjolom ebꞌ. 23 Jix a waanoj, catuꞌ jix el bꞌey conobꞌ Jerusalén. Jaxa tuꞌ jix apni oc bꞌey sjolom wonan yetcꞌulal bꞌey chi aol cꞌu bꞌey jun conobꞌ tuꞌ. 24 Jix lawi tuꞌ, jix wiloni tol jix iꞌle meltzotej bꞌey Babilonia yu Yespíritu Dios, jaꞌton bꞌey eyecꞌ wanxa ebꞌ jix iꞌletoj yin presowomal. Jaꞌ wan tuꞌ jix xꞌox Jehová wilaꞌ. Jix lawi tuꞌ xin, cꞌamxa tzet jix wilaꞌ. 25 Masanil wan tzetyetal jix txꞌoxle wil yu Jehová tuꞌ, masanil jix wal tet ebꞌ iꞌbꞌiltoj yin presowomal tuꞌ.