Txꞌoxbꞌanile Yeoc Naj Ezequiel
12
Jix yalon Naj Kaawil ey jin jaxca tiꞌ: 2 Jaach ánima tol caan jaach bꞌey snan xol jun conobꞌ tol caw pit chi yute snaꞌbꞌal tiꞌ. Ey sat ebꞌ, jaxca wal tol cꞌam chi skeꞌ yilwan ebꞌ. Ey xiquin ebꞌ, jaxca wal tol cꞌam chi skeꞌ yabꞌen ebꞌ, yutol jaꞌ jun conobꞌ tiꞌ junelne wal tol pit chi yute snaꞌbꞌal. 3 Yu jun tuꞌ xin, yambꞌa oc jantaj ja tzetyetal, catuꞌ chach toi, jaxca yin tol chach iꞌletoj yin presowomal. Jaꞌ ojabꞌ yet cꞌualil cha wun jun tuꞌ, sattaj wal ebꞌ chach el bꞌey ja na, txꞌoj bꞌey chach too caey ecꞌoj; tala oj naꞌcha el yu ebꞌ jaxca tuꞌ, yutol caw pit snaꞌbꞌal jun conobꞌal ebꞌ ánima tiꞌ. 4 Yet cꞌualil cha wun sattaj masanil ebꞌ yet cha wiꞌon eltej jantaj ja tzettaj yetal, jaxca tol chach toocan yin presowomal; jacꞌalaꞌ yet yeycꞌualil, chach el cꞌal pax toj sattaj ebꞌ; jaxca wal tol chach iꞌletoj yin presowomal. 5 Cha joltoj junoj jolan bꞌey satlaj xaanil ja na, jaꞌ tituꞌ chach eltoj yetoj ja tzettaj yetal sattaj masanil ebꞌ ánima tuꞌ. 6 Jaꞌ ojabꞌ yet lalanxa skꞌejbꞌi eyoj, catuꞌ cha sjolomxicꞌnetoj masanil ja tzetyetal sattaj ebꞌ, catuꞌ chach eli. Cha majche ey ja sat, yet watxꞌ cꞌam chi skeꞌ ja wilon bꞌey chach toi. Chi woche tol jaach chach oc txꞌoxbꞌanileal tet conobꞌ Israel tiꞌ, ẍi Jehová.7 Yu tuꞌ xin, jix jin waꞌne ey masanil jin tzettaj yetal jaxca jix yun yalon Jehová ey jin. Cꞌualil jix jin eltej yetoj jin tzetyetal tuꞌ, jaxca junoj mactxequel lalan yiꞌletoj yin presowomal. Jaꞌ yet yeycꞌualil jix jin jol jun jolan bꞌey satlaj xaanil jin na, jaxa yet jix kꞌejbꞌi ey xin, jix jin jolomxicꞌnetoj masanil jin tzetyetal tuꞌ. Sattaj masanil ebꞌ jix jin eltoj.
8 Jaꞌ yet jix kꞌinibꞌi a yet junxa cꞌu, jix kꞌanabꞌ Jehová ey jin jix yalon jaxca tiꞌ: 9 Jaꞌ ebꞌ ja wet conobꞌ Israel tol yel xacꞌal pit chi yute sbꞌa tuꞌ, jix mi skꞌanle ebꞌ ey jaach yu tzetyetal jix ja wun tuꞌ. 10 Al tet ebꞌ tol jain Jehová jin tiꞌ chi wal ey jaach, jaxca chi yun ja txꞌoxon eloj, queytuꞌ oj yun naj sreyal Jerusalén cꞌal yetoj masanil ebꞌ ánima caan tituꞌ. 11 Cha walon cꞌal pax oj tol txꞌoxbꞌanile ja weoc tet ebꞌ, yutol sowalil jaxca tuꞌ oj yun ebꞌ a Jerusalén, jaxca wal lalan ja wuten ja bꞌa tuꞌ, yutol oj iꞌletoj ebꞌ yin presowomal bꞌey junojxa conobꞌ. 12 Jaꞌ syaawil ebꞌ, sowalil oj sjolom xicꞌnentoj stzettaj yetal yet oj kꞌejbꞌoj eyoj, catuꞌ oj eltoj bꞌey jun jolan jolbꞌil bꞌey smuroal conobꞌ tuꞌ. Oj smajchen el sat, yet watxꞌ man oj yil bꞌey chi kaꞌ stoi. 13 Jain oj watoj jin txꞌan yaal yibꞌan, catuꞌ oj eyqꞌuey yul, jaxa yiꞌletoj bꞌey Babilonia, jaꞌton bꞌey xꞌotxꞌ ebꞌ Caldeo; manxa caw oj yiloc yin jun conobꞌ tuꞌ, yutol jaꞌ tituꞌ oj camoj. 14 Catuꞌ oj jin sajlemnen cantoj ebꞌ soldado chi teyneni, jacꞌalaꞌ quey cꞌal pax tuꞌ oj yun wanxa soldado ebꞌ. Jain oj wakꞌ ujtele el ebꞌ yetoj chꞌen espada. 15 Jaꞌ yet oj jin sajlemne cantoj ebꞌ bꞌey wanxa txꞌoj nacionlaj, queyton wal tuꞌ oj yun snaꞌcha el yu ebꞌ tol jain ton Jehová jin. 16 Jain oj jin colcan el jaywanojxa ebꞌ oj elcan bꞌey xol jowal, xol wail, cꞌal xol yaꞌbꞌil, yet watxꞌ jaꞌ bꞌey wanxa nación bꞌey oj apnoj can oc ebꞌ, oj yal ebꞌ yu jantaj tzetyetal yaabꞌetaj jix el yunen ebꞌ, cꞌal yotajnen el ebꞌ tol jain ton Jehová jin, ẍi Dios.
Cusiltaj Txꞌotxꞌ Xacꞌal Oj Yun Can Jerusalén
17 Jix kꞌanabꞌ pax Jehová junelxa ey jin, jix yalon jaxca tiꞌ: 18 Jaach ánima, bꞌilwaan a yu xiwilal yet chach lowi, catuꞌ chach bꞌilwi a yu bꞌiscꞌulal yet cha wuqꞌuen jaꞌ. 19 Al tet masanil ebꞌ ja wet Israelal, Tol jain Jehová jin, tol Yaaw weoc yin ebꞌ caan bꞌey Jerusalén, cꞌal yin masanil ebꞌ caan bꞌey yul yet Israel: Oj low ebꞌ yin xiwcꞌulal cꞌal yuqꞌuen jaꞌ ebꞌ yin cuscꞌulal; yutol oj lawoj ey jun nación tuꞌ. Tzꞌinini xacꞌal oj yun canoj, yu cꞌal spenail chi yun ebꞌ ánima caan yul jun conobꞌ tuꞌ. 20 Masanil conobꞌlaj bꞌey caan ebꞌ ánima, oj lawoj eyoj; cusiltaj txꞌotxꞌ xacꞌal oj yun can jun nación tuꞌ. Queyton tuꞌ oj yun snaꞌcha el je yu, tol jain ton Jehová jin chi walaꞌ, ja chi tet ebꞌ.
21 Jix kꞌanabꞌ pax Jehová ey jin, jix yalon jaxca tiꞌ: 22 Jaach ánima, ¿tzet chi yal yeloc apnoj jun skꞌane ebꞌ Israel chi yal ebꞌ jaxca tiꞌ: Tucꞌal chi ecꞌ el tiempo, cꞌam cꞌal chi yun tzet chi yal ebꞌ ẍejabꞌ Dios, ẍi jun kꞌane tuꞌ? 23 Yu jun tuꞌ, yuxan al tet ebꞌ: Jaꞌ Jehová Naj Yaaw yibꞌan masanil, jaꞌ chi alon jaxca tiꞌ: Jain oj wakꞌ yunne tol manxa oj al-le el jun kꞌane tuꞌ junelxa je xol. Tuxa oj yun wan kꞌane jix wal can el tuꞌ, ẍi Jehová, ja chi. 24 Yutol cꞌamxa mac oj tzꞌaj yalaꞌ tol ey tzet chi yilaꞌ, tam wal eyto mac naꞌom el kꞌane yin lekꞌtiꞌal je xol. 25 Yutol jain Jehová jin oj jin kꞌanabꞌoj. Jain Jehová jin chi walaꞌ, tol jaꞌ tzet oj walaꞌ man oj ecꞌ tiempo yuneni. Jaex conobꞌ tol pit je naꞌbꞌal tiꞌ, tol oj je yilaꞌ, tol jain oj jin kꞌanabꞌoj, catuꞌ oj yunen tzetyetal chi walaꞌ, ẍi Dios.
26 Jix yalon pax Jehová jaxca tiꞌ: 27 Jaach ánima, jaꞌ ebꞌ ja wet Israelal tuꞌ, chi yal ebꞌ tol jaꞌ wan jix jin txꞌox ja wilaꞌ, cꞌal jin kꞌane jix ja wal tet ebꞌ, tol oj ecꞌ tiempo yuneni, eyto cꞌal jayebꞌoj xa abꞌil catuꞌ oj yuneni, ẍi ebꞌ. 28 Yu jun tuꞌ, yuxan al tet ebꞌ, tol jain Jehová jin chi walaꞌ, tol jaꞌ jin kꞌane man oj ecꞌ tiempo yunen eloj. Jaꞌ tzet chi walaꞌ sowalil chi yun yin eymanil, ẍi Dios ey jin.