Ebꞌ Chi Stzꞌaj Yaloc Sbꞌa Ẍejabꞌoj Dios
13
Jix kꞌanabꞌ Jehová ey jin jix yalon jaxca tiꞌ: 2 Jaach ánima, al wan jin kꞌane tiꞌ tet wan ebꞌ chi yaloc sbꞌa jin chejabꞌoj xol ebꞌ Israel, jaꞌ ebꞌ tol chi yalel skꞌane yul yet; al tet ebꞌ tol ojabꞌ chi ẍaꞌ yabꞌ jin kꞌane ebꞌ jain Jehová Yaaw jin tiꞌ. 3 Okꞌbꞌal cꞌul ebꞌ chi xij yaloc sbꞌa jin chejabꞌoj tuꞌ, tol cꞌam snaꞌbꞌal ebꞌ, jacꞌal snaꞌbꞌal ebꞌ yul yet chi yalaꞌ, cꞌam tzet jix txꞌoxle yil ebꞌ. 4 Jaꞌ ebꞌ chi yaloc sbꞌa jin chejabꞌoj bꞌey Israel tuꞌ, laan ebꞌ jaxca noꞌ waax caan bꞌey lawinaj ey wejna junoj conobꞌ. 5 Jaꞌ ebꞌ lekꞌtiꞌ tuꞌ cꞌam cꞌal bꞌey chi waꞌxi sbꞌeybꞌal ebꞌ yicꞌaal Israel yu ebꞌ, cꞌam scolwal ebꞌ yin conobꞌ Israel, yuxan jain Jehová jin tiꞌ, oj waoc syaꞌilal yibꞌan ebꞌ. 6 Jaꞌ tzet chi akꞌle yil ebꞌ yaloni, man yeloj. Jaꞌ kꞌane chi yal can el ebꞌ yin eyojto, lekꞌtiꞌal kꞌane cꞌal. Chi yalon ebꞌ tol jaꞌ jin kꞌane chi yalel ebꞌ yaloni, man pax jain oj jix jin chej yal ebꞌ. Catuꞌ chi yaon oc ebꞌ yipoj scꞌul tol oj yun wan skꞌane ebꞌ tuꞌ yaloni. 7 Yu jun tuꞌ, jain chi wal tet ebꞌ jaxca tiꞌ: Jaex che yaloc je bꞌa jin chejabꞌoj tuꞌ, lekꞌtiꞌal kꞌane cꞌal tzet che yalaꞌ yet che yaloni tol ey tzet jix txꞌoxle je yilaꞌ cꞌal je naꞌon el kꞌane; jaꞌ yet che yaloni, tol ja Jehová chi aloni je chi, cꞌam pax tzet jix wal ey jex. 8 Yu jun tuꞌ, yuxan jain wal caw Jehová jin chi walaꞌ: Jaꞌ tzet che yal can el tuꞌ man yeloj, cꞌal tzet che yil je yaloni, lekꞌtiꞌal cꞌal, yu jun tuꞌ, yuxan caw chi tit jin jowal je yin, jin chi tet ebꞌ. 9 Oj wiꞌa jin kꞌabꞌ yu waon oc syaꞌilal wan chi yaloc sbꞌa jin chejabꞌoj tuꞌ, yutol man yeloj ta tol ey tzet chi yil ebꞌ, tol lekꞌtiꞌal kꞌane cꞌal chi yalel ebꞌ. Cꞌam yalon yet ebꞌ yoc xol syambꞌabꞌail ebꞌ jin conobꞌ Israel, cꞌam bꞌey oj bꞌina sbꞌi ebꞌ bꞌey yul slistail jin conobꞌ, tam wal oj meltzo ebꞌ bꞌey sat txꞌotxꞌ junelxa. Queyton tuꞌ oj yun snaꞌcha el je yu, tol jain ton Jehová Yaaw jin.10 Jaꞌ ebꞌ chi yaloc sbꞌa jin chejabꞌoj tuꞌ, tucꞌal chi yiꞌeytej sat jin conobꞌ ebꞌ, chi yalon ebꞌ jaxca tiꞌ: Jaꞌ tinaniꞌ, cꞌam tzet che naꞌ, cꞌam cꞌal tzet oj jul kibꞌan, ẍi ebꞌ, man pax yeloj chi yal ebꞌ. Laan ebꞌ jaxca junoj mac chi tzicon oc chꞌen taan yet chi bꞌonle junoj na tol man watxꞌoj yeoc slatzꞌlei. 11 Al tet ebꞌ chi tzicon oc taan tuꞌ yin srepelloal jun yich na chi swaꞌne a ebꞌ tuꞌ. Tol oj jul mimej yaxnabꞌ, catuꞌ oj eyqꞌuey mimej sajbꞌat jaxca mimej chꞌen, oj yakꞌon cꞌal pax mimej kajxuchum kaꞌeꞌ, 12 oj eyqꞌuey bꞌulna srepelloal jun na tuꞌ. Queyton tuꞌ oj yun yoc kꞌanlebꞌal tet ebꞌ jaxca tiꞌ: ¿Tzet yopiso chꞌen taan jix je yaoc yin jun na jix je waꞌne tuꞌ xin? ẍim ebꞌ. 13 Yu jun tuꞌ, yuxan jain Jehová, yaaw jin, jain chi walaꞌ: Jaꞌton wal yu sjowal jin cꞌul oj wakꞌon tit jun miman jow kaꞌeꞌ tuꞌ. Yetoj wal jin chichoncꞌulal oj wakꞌon eyqꞌuey mimej yaxnabꞌ cꞌal sajbꞌat jaxca chꞌen chꞌen. Oj wakꞌ lawoj ey masanil jun yich na tuꞌ. 14 Oj wuchey jun yich na tol eyoc taan yin je yu tuꞌ; oj jin tenecꞌ wejna sat txꞌotxꞌ, masantaꞌcꞌal oj txeclo yich xeꞌ. Jaꞌ yet oj ey wejna tuꞌ, jaꞌ xol spoꞌoilal tuꞌ oj jex cam can jaex tiꞌ. Queyton tuꞌ oj yun snaꞌcha el yu, tol jain ton Jehová jin. 15 Oj wiꞌel sjowal jin cꞌul yin jun yich na tuꞌ yetoj cꞌal yin ebꞌ jix aon oc taan, catuꞌ oj yalon ebꞌ ánima jaxca tiꞌ: Cꞌamxa niꞌoj jun yich na tuꞌ jix cancanoj, tam wal ebꞌ jix aon oc srepelloal, 16 jaꞌton ebꞌ lekꞌtiꞌ chi yaloc sbꞌa ẍejabꞌoj Dios bꞌey xol ebꞌ Israel, wan tzet jix akꞌle yil ebꞌ yaloni. Jix yalon el ebꞌ tol cꞌam cꞌal tzet oj jul yibꞌan Jerusalén, yuxan jain caw Jehová Yaaw jin chi walaꞌ, tol man pax jaxca oj tuꞌ yeocoj, ẍi Dios.
Ebꞌ Ix Ix Chi Yaloc Sbꞌa Ẍejabꞌoj Dios
17 Jix yalon Jehová jaxca tiꞌ: Jaꞌ tinaniꞌ jaach ánima, al tet wan ix tol chi kꞌanabꞌ el yin jin bꞌi yaloni, yutol asan cꞌal skꞌane ebꞌ yul yet chi yalaꞌ. 18 Jaxca tiꞌ chi yun ja walon tet ebꞌ: Jaxca wal tiꞌ yalon Jehová, Naj Yaaw: Caw okꞌbꞌal jex cꞌul jaex tol chex ecꞌ stiꞌlaj na, chi ecꞌ je kꞌalon oc wan kꞌap yin skꞌabꞌ ebꞌ ánima, yet watxꞌ chi oc yip ebꞌ je naꞌoni, che yaon cꞌal pax oc an kꞌap xotiloj sjolom ebꞌ, jatacꞌalaꞌ jantaj steel ebꞌ ánima tuꞌ, yet chi oc can ebꞌ yul je kꞌabꞌ. Che yoche tol jaex che yalaꞌ yet chi iquisbꞌi cꞌal ecꞌ junoj ánima, ma chi cami, asan yu je yiꞌon tzet chi yun yecꞌ tiempo je yu. 19 Jaex tiꞌ, asan yu junoj bꞌotzan ixim cebada ma asan yu junoj ixim pan, asan yu jun tuꞌ chin je yintajne el sattaj jin conobꞌ. Che yakꞌ cam ebꞌ ánima tol man smoo oj chi cami, jal ebꞌ ánima tol man smoo oj chi iquisbꞌi can ecꞌoj, jaꞌ ebꞌ tuꞌ cꞌam chi cam ebꞌ je yu. Queyton tuꞌ chi yun je yetnen ebꞌ jin conobꞌ tol chi ẍaꞌ yabꞌ je lekꞌtiꞌal kꞌane tuꞌ. 20 Yu jun tuꞌ, yuxan jain wal caw Jehová Yaaw jin chi walaꞌ: Tol caw chi tit jin jowal je yin yu wan kꞌap che kꞌaloc yin ebꞌ ánima tuꞌ, yet che majchen ey ebꞌ jaxca chi yun smaji ey noꞌ tzꞌiquin. Oj jin tzilel wan kꞌap tuꞌ yin skꞌabꞌ ebꞌ ánima tuꞌ. Queyton tuꞌ oj yun sjajcha can el ebꞌ yul je kꞌabꞌ. 21 Oj jin colel ebꞌ jin conobꞌ yul je kꞌabꞌ catuꞌ oj wiꞌon el wan kꞌap jix je yaoc yin sat ebꞌ tuꞌ. Cꞌamxa bꞌakꞌin oj eyqꞌuey ebꞌ je yu junelxa. Queyton tuꞌ oj yun snaꞌcha el je yu, tol jain ton Jehová jin. 22 Jaꞌ yu je lekꞌtiꞌal tuꞌ, cꞌal je yetnen ánima tuꞌ, yuxan che yakꞌ cus scꞌul ebꞌ watxꞌ snaꞌbꞌal. Jaꞌ jun tuꞌ, cꞌam chi woche jain tiꞌ. Tol jix je yijbꞌa ebꞌ pena sbꞌeybꞌal yin yunen cꞌal spenail ebꞌ, yuxan ma skeꞌ ẍaꞌon skꞌinal ebꞌ wu, yet chi colcha el ebꞌ. 23 Yu tuꞌ xin, cꞌamxa cꞌal bꞌey oj je yalaꞌ tol ey tzet chi akꞌle je yilaꞌ, tam wal oj to skeꞌ je naꞌon eloj tol ey tzet oj juloj. Jain oj jin colel ebꞌ jin conobꞌ yul je kꞌabꞌ jaex tiꞌ. Queyton tuꞌ oj yun snaꞌcha el je yu, tol jain ton Jehová jin, ẍi Jehová, ja chi tet ebꞌ, ẍi ey jin.